មន្ត្រីក្រសួងការងារបានឲ្យដឹងកាលពីម្សិលមិញថា កម្មករសរុបចំនួន៧១នាក់បានដួលសន្លប់ កាលពីថ្ងៃសុក្រ និងថ្ងៃសៅរ៍នៅរោងចក្រមួយ ក្នុងខណ្ឌសែនសុខ រាជធានីភ្នំពេញ។
លោកប៉ុកវ៉ាន់ថាតអនុប្រធានផ្នែកនាយកដ្ឋានសុខភាព ការងារនៃក្រសួងការងារ បានមានប្រសាសន៍ថារោងចក្រ ហាយ ហ្វេសិន (Hi Fashion Co Ltd.) ក្នុងសង្កាត់ខ្មួញ ខណ្ឌសែនសុខ រាជធានីភ្នំពេញ មានកម្មករដួលសន្លប់ចំនួន៦១នាក់កាលពីថ្ងៃសុក្រនិង១០នាក់ទៀតនៅព្រឹកថ្ងៃសៅរ៍។
លោកបានមានប្រសាសន៍ថា“កម្មករដួលសន្លប់ ព្រោះអស់កម្លាំងដោយសារធ្វើការថែមម៉ោង ច្រើនម៉ោងពេក។ ម្យ៉ាងទៀតវាក្ដៅពេកនៅក្នុងអគារនោះ ហើយគ្មានកង្ហារគ្រប់គ្រាន់ទេ”។លោកបានបន្ថែមទៀតថាក្រសួងបានចេញបញ្ជាឲ្យបិទរោងចក្រនោះរហូតដល់ថ្ងៃអង្គារដើម្បីបំពាក់កង្ហារបន្ថែមទៀត។
ចំណែកលោក ហេង វីរៈ ប្រធានរដ្ឋបាលរោងចក្រនោះបានសារភាពថា រោងចក្រគ្មានអុកស៊ីសែនគ្រប់គ្រាន់មែនហើយលោកជឿជាក់ថាហេតុផលនៅពីក្រោយការដួលសន្លប់នេះ ភាគច្រើនមកពីកត្ដាចិត្តសាស្ត្រ ព្រោះកម្មករចាប់ផ្ដើមដួលសន្លប់ច្រើនឡើងៗ ក្រោយពេលឃើញអ្នកធ្វើការជាមួយគ្នាពីរបីនាក់ដួលសន្លប់។
កម្មការិនីឈ្មោះអ៊ុកយ៉ាអាយុ២៧ឆ្នាំ មិនបានយល់ស្របតាមការអះអាងនេះទេនិងបាននិយាយថារោងចក្រជារឿយៗបានសុំឲ្យពួកគេធ្វើការរហូតដល់ម៉ោង៩យប់ដើម្បីបង្គ្រប់ទៅតាមការបញ្ជាទិញ។ កម្មការិនីរូបនេះបាននិយាយថា“យើងមិនចង់ធ្វើការថែមម៉ោងច្រើនពេករាល់ថ្ងៃដូច្នេះទេ ព្រោះវាធ្វើឲ្យយើងបាក់កម្លាំង ”៕
ប្រែសម្រួលដោយ ហម សុផាណ្ណា