នគរបាលលើកឡើងកាលពីម្សិលមិញថាការនិរទេសខ្លួនបុរសជនជាតិស៊ុយអែត ហ្គតហ្វ្រីតស្វាតហូមវ៉ាក (Gottfrid Svartholm Warg) ជិតដល់ពេលហើយឥឡូវនេះ ពេលអាជ្ញាធរស៊ុយអែត បានយកឯកសារផ្លូវច្បាប់មកដល់ប្រទេសកម្ពុជា ដើម្បីសុំការអនុញ្ញាតពីលោកសខេងរដ្ឋមន្ត្រីក្រសួងមហាផ្ទៃឲ្យចុះហត្ថលេខាលើបទបញ្ជាសម្រាប់និរទេសខ្លួន។
ការចាប់ខ្លួនលោកស្វាតហូមវ៉ាកអាយុ២៧ឆ្នាំ កាលពីថ្ងៃព្រហស្បតិ៍ ក៏បានធ្វើឲ្យមានប្រតិកម្មយ៉ាងខ្លាំងពីបណ្តាចោរលួចព័ត៌មានអន្តរជាតិ ដែលធ្លាប់បានវាយប្រហារគេហទំព័រមួយចំនួនរបស់រដ្ឋាភិបាល និងធ្លាប់បានចែករំលែកលេខសម្ងាត់របស់ប្រព័ន្ធគ្រប់គ្រងកុំព្យូរទ័រ និងឯកសារផ្សេងៗជាច្រើនទៀតតាមប្រព័ន្ធអុីនធើណិតផងដែរ។
លោកស្វាតហូមវ៉ាកដែលជាសហស្ថាបនិកនៃគេហទំព័រចែករំលែកឯកសារដ៏មានប្រជាប្រិយភាពគឺគេហទំព័រផាយរ៉េតបេបានជាប់ឈ្មោះក្នុងបញ្ជីអន្តរជាតិ ថាជាជនដែលគេចង់ចាប់ខ្លួនបំផុតដោយសារការរំលោភកម្មសិទ្ធិបញ្ញា។
លោកត្រូវបានតុលាការស៊ុយអែតកាត់ទោស ហើយនឹងត្រូវជាប់ពន្ធនាគាររយៈពេលមួយឆ្នាំពីបទលួចព័ត៌មានដោយរំលោភកម្មសិទ្ធិបញ្ញា នៅក្នុងប្រទេសស៊ុយអែតប៉ុន្ដែលោកបានគេចមករស់នៅប្រទេសកម្ពុជា។
លោកសុខផលអគ្គស្នងការរងនគរបាលជាតិបានមានប្រសាសន៍ថា “ ខ្ញុំបានជួបជាមួយនឹងមន្ត្រីនគរបាលស៊ុយអែតចំនួនបីរូបកាល ពីព្រឹកមិញនេះ ហើយពួកគេបានស្នើឲ្យនិរទេសខ្លួនលោក ស្វាតហូម វ៉ាក ចេញពីប្រទេសកម្ពុជា”។
លោកឧត្តមសេនីយ៍ឯក សុខផល បានថ្លែងថានៅពេលលោកសខេងបានចុះហត្ថលេខាលើឯកសារនិរទេសខ្លួនរួច វាត្រូវការពេលប្រាំថ្ងៃ មុនពេលបញ្ជូនលោកស្វាតហូមវ៉ាក ឡើងយន្ដហោះដើម្បីបញ្ជូនចេញពីប្រទេសកម្ពុជា។
លោកស្វាតហូមវ៉ាកនិងមិត្តភក្ដិរបស់លោកចំនួនបីរូបទៀតត្រូវបានតុលាការកាត់ទោសពីបទលួចផ្សព្វផ្សាយផលិតផលតាមអុីនធើណិតដោយរំលោភកម្មសិទ្ធិបញ្ញា កាលពីឆ្នាំ២០០៩ តាមរយៈគេហទំព័រ ផាយរ៉េតបេរបស់ពួកគេដើម្បីចែករំលែក និងទាញយកតន្ត្រី វីដេអូនិងហ្គេមកុំព្យូទ័រដោយសេរី។
នៅពេលសហស្ថាបនិកគេហទំព័រ ផាយរ៉េត បេត្រូវបានបន្ធូរបន្ថយទោស កាលពីឆ្នាំ២០១០ នៅពេលនោះលោក ស្វាតហូមវ៉ាកមិនបានចេញពីប្រទេសកម្ពុជា ដើម្បីទៅចូលរួមសវនាការឡើយ ហើយទោសរបស់លោកត្រូវបានតុលាការតម្កល់។នៅពេលនោះសហស្ថាបនិកទាំងបួនរូបនេះ ក៏ត្រូវបានតុលាការពិន័យជាប្រាក់ជិត៧លានដុល្លារដែរ។
លោកអិនដឺចល (Anders Jorle) ប្រធានអង្គភាពព័ត៌មាន របស់ក្រសួងការបរទេសស៊ុយអែតក្នុងទីក្រុងស្ដុកខុម មានប្រសាសន៍ថា “ មានដីកាចាប់ខ្លួនជាអន្ដរជាតិមួយ ដើម្បីចាប់ខ្លួនអ្នកទោសនៅ ក្នុងប្រទេសកម្ពុជា។បុរសនេះត្រូវបានតុលាការកាត់ទោសឲ្យជាប់ពន្ធនាគារនៅក្នុងប្រទេសស៊ុយអែតហេតុដូច្នេះហើយទើបរដ្ឋាភិបាលស៊ុយអែតចេញដីកាតាមចាប់ខ្លួននេះ”។
ដើម្បីជាការសងសឹកចំពោះការចាប់ខ្លួនលោក ស្វាតហូមវ៉ាកចោរលួចព័ត៌មានមួយក្រុម ដែលគេឲ្យឈ្មោះថាណាល់គ្រូ (NullCrew) និងជាអ្នកគាំទ្រគេហទំព័រ ផាយរ៉េតបេបានវាយប្រហារគេហទំព័រមួយចំនួនរបស់រដ្ឋាភិបាលកម្ពុជា។
ក្រុមណាល់គ្រូនេះបានអួតអាងអំពីការវាយប្រហាររបស់ខ្លួនមកលើគេហទំព័រទំនាក់ទំនងសង្គម ទ្វីតធើ (Twitter) ហើយបានធ្វើឲ្យលេចធ្លាយ ឈ្មោះអ្នកប្រើប្រាស់ និងលេខសម្ងាត់ របស់គេហទំព័រមួយចំនួនរបស់ក្រសួងសាធារណការ និងដឹកជញ្ជូនកងយោធពលខេមភូរមិន្ទ និងវិទ្យាស្ថានស្ដង់ដាររបស់ក្រសួងឧស្សាហកម្មរ៉ែនិងថាមពល។
ក្រុមចោរលួចព័ត៌មាននេះ ក៏បានផ្ញើសារទៅអាជ្ញាធរកម្ពុជា តាមរយៈការបង្ហោះព័ត៌មាននៅលើគេហទំព័រប៉ាស្ដេប៊ីន (Pastebin) ថា“ ថ្មីៗនេះ សហស្ថាបនិកនៃគេហទំព័រផាយរ៉េតបេត្រូវបានចាប់ខ្លួននៅប្រទេសកម្ពុជា… ដរាបណារដ្ឋាភិបាលកម្ពុជានៅតែប៉ុនប៉ងធ្វើដូច្នេះតទៅទៀត អ៊ីចឹងនឹងមានការវាយប្រហារច្រើនជាងនេះ។ …កម្ពុជា យើងនឹងមិនឈប់ទេរហូតដល់កម្ពុជាយល់ដឹងអំពីបញ្ហានេះ”។
នៅពេលលោកស្វាតហូមវ៉ាកត្រូវបានចាប់ខ្លួននៅថ្ងៃតែមួយ ស្របពេលលោករ៉ុនឃើក (Ron Kirk) តំណាងពាណិជ្ជកម្មកំពូលរបស់ទីក្រុងវ៉ាស៊ីនតោនបានមកដល់ប្រទេសកម្ពុជា នៅពេលនោះលោកចលរដ្ឋមន្ត្រីក្រសួងការបរទេសស៊ុយអែត បដិសេធថា វត្តមានរបស់លោករ៉ុនឃើកមិនមានជាប់ពាក់ព័ន្ធនឹងការចាប់ខ្លួននេះទេ។
លោកចល ថ្លែងថា “សហរដ្ឋអាមេរិកមិនមានជាប់ពាក់ព័ន្ធនឹងរឿងនេះទាល់តែសោះ វាគឺជាស្ថាប័នផ្លូវច្បាប់របស់ស៊ុយអែតទេ ដែលចង់ចាប់ខ្លួនលោកស្វាតហូមវ៉ាកឲ្យទៅទទួលទោសជាប់ពន្ធនាគារនៅប្រទេសស៊ុយអែត”៕
ប្រែសម្រួលដោយស៊ាស៊ុយឈាង