ក្រុមអ្នកភូមិ ដែលប្រឈមនឹងការបណ្តេញចេញ ដើម្បីសាងសង់ផ្លូវការពារសន្តិសុខថ្មីនៅតាមបណ្តោយរបងរបស់អាកាសយានដ្ឋានអន្តរជាតិភ្នំពេញបានដាក់ពាក្យបណ្តឹងទៅអង្គភាពប្រឆាំងអំពើពុករលួយកាលពីម្សិលមិញ ដោយចោទប្រកាន់មន្ត្រីមូលដ្ឋានថា បានប្រព្រឹត្តខុសដោយអនុញ្ញាតឲ្យអ្នកភូមិផ្លាស់ទៅរស់នៅលើដីមានបញ្ហាតាំងពីដំបូងមក។
អ្នកស្រី ច្រាយ នីន អាយុ៣៤ឆ្នាំ តំណាងអ្នកភូមិជាង១០០គ្រួសារដែលប្រឈមនឹងការបណ្តេញចេញពីភូមិថ្មគោល សង្កាត់ចោមចៅ ខណ្ឌពោធិ៍សែនជ័យ និយាយថា “យើងបានដាក់ពាក្យបណ្តឹងទៅអង្គភាពប្រឆាំងអំពើពុករលួយ ពីព្រោះយើងជាម្ចាស់ដីនេះ ហើយមន្ត្រីអាជ្ញាធរបានអនុញ្ញាតឲ្យយើងរស់នៅទីនេះ”។
អ្នកស្រីនីន បានមានប្រសាសន៍បន្តថាអ្នកស្រីមានឯកសារស្របច្បាប់ ដែលបានចុះហត្ថលេខាដោយមន្ត្រីសង្កាត់ និងមន្ត្រីខណ្ឌកាលពីឆ្នាំ២០១០ដែលបានផ្តល់ឲ្យអ្នកស្រីនូវសិទ្ធិស្របច្បាប់។ អ្នកស្រីបាននិយាយថា ហត្ថលេខាទាំងនោះបានបញ្ជាក់អំពីអំពើពុករលួយ។
អ្នកស្រីមានប្រសាសន៍ថា “ យើងបានទិញដីនេះដោយស្របច្បាប់ ហើយយើងមិនបានលួចពីអ្នកជំនួញ ដែលសមគំនិតគ្នាជាមួយអាជ្ញាធរមូលដ្ឋាននោះទេ។ពួកគេចង់ឲ្យយើងចាកចេញដោយមិនមានសំណង ប៉ុន្តែយើងបានជំទាស់ ហើយយើងទាមទារឲ្យ[សាលារាជធានីភ្នំពេញ]រកដំណោះស្រាយអំពីបញ្ហានេះ”។
មន្ត្រីរដ្ឋាភិបាលបាននិយាយថា អ្នកភូមិបានរស់នៅលើដីនេះដោយខុសច្បាប់ ហើយត្រូវតែប្តូរឲ្យបានចម្ងាយប្រាំម៉ែត្រពីព្រំរបងរបស់អាកាសយានដ្ឋានអន្តរជាតិភ្នំពេញ ដើម្បីអាចឲ្យការសាងសង់ផ្លូវការពារសន្តិសុខថ្មីនៅមុនការមកដល់របស់ប្រធានាធិបតីសហរដ្ឋអាមេរិក លោក បារ៉ាក់ អូបាម៉ា (Barack Obama) ដើម្បីចូលរួមកិច្ចប្រជុំកំពូលអាស៊ាននៅខែវិច្ឆិកា។
លោកឡុងឌីម៉ង់អ្នកនាំពាក្យសាលារាជធានី បានមានប្រសាសន៍កាលពីម្សិលមិញថា “ យើងសង្ឃឹមថា ប្រធានាធិបតីរុស្ស៊ី លោកវ្លា៉ឌីមៀពូទីន(Vladimir Putin) និងប្រធានាធិបតីរបស់សហរដ្ឋអាមេរិកលោក បារ៉ាក់អូបាម៉ា នឹងអញ្ជើញមកចូលរួមនៅក្នុងកិច្ចប្រជុំកំពូលអាស៊ាន”។
ភូមិថ្មគោល បានលាតសន្ធឹងព័ទ្ធជុំវិញរបងអាកាសយានដ្ឋានអន្តរជាតិភាគខាងកើត និងមានផ្ទះធ្វើពីឥដ្ឋ ប្រក់ស័ង្កសីជាច្រើនខ្នង នៅតាមបណ្តោយផ្លូវលំមួយខ្សែកាត់តាមសហគមន៍នេះ។
លោកវ៉ាសារ៉ាង ចៅសង្កាត់រងចោមចៅបានមានប្រសាសន៍ថា ការវាស់វែងដីមានជម្លោះបានរកឃើញថា មានប្រជាពលរដ្ឋប្រមាណ៩៩គ្រួសារអាចប្រឈមនឹងការបណ្តេញចេញពីភូមិថ្មគោលរួមទាំងប្រជាពលរដ្ឋ៤០គ្រួសារទៀតនៅក្នុងភូមិព្រៃជីសាក់ និងភូមិគោកចំបក់ ដែលជាភូមិនៅជិតខាងគ្នា។
អ្នកស្រីចិនធីម ដែលបានទិញដីទំហំទទឹង៥ម៉ែត្រ និងបណ្តោយ១៣ម៉ែត្រព្រមទាំងផ្ទះមួយ ក្នុងតម្លៃ១៣.០០០ដុល្លារ បាននិយាយថា គាត់នឹងមិនព្រមចាកចេញទេ។
អ្នកស្រីបាននិយាយបន្តថា “ បើសិនពួកគេចង់ឲ្យខ្ញុំចាកចេញ ខ្ញុំមិនអាចចេញទេពីព្រោះខ្ញុំចំណាយលុយទិញដីនេះ ហើយខ្ញុំត្រូវការលុយ ដើម្បីចាកចេញ”។
លោកសៀនម៉ាកគីនតុស (Sean McIntosh) អ្នកនាំពាក្យស្ថានទូតសហរដ្ឋអាមេរិកប្រចាំរាជធានីភ្នំ ពេញបានសរសេរតាមរយៈអុីម៉េលថា សេតវិមានមិនទាន់បានបញ្ជាក់ច្បាស់លាស់អំពីការធ្វើទស្សនកិច្ចរបស់លោកប្រធានាធិបតីបារ៉ាក់ អូបាម៉ា មកកាន់ប្រទេស
កម្ពុជានៅឡើយទេ៕ប្រែសម្រូលដោយឃិនណៃ