28 C
Phnom Penh

​ជប៉ុន​ចូលរួម​រិះគន់​កម្ពុជា​ពី​តួនាទី​ជា​ប្រធាន​អាស៊ាន​នៃ​កិច្ច​ប្រជុំ​រដ្ឋ​មន្ត្រីការ​បរទេស​

ដោយ ឌឹ ខេមបូឌា ដេលី

បទវិភាគ

ប្រទេសជប៉ុនដែលជាម្ចាស់ជំនួយ​ជាយូរ​មក​ហើយរបស់កម្ពុជា បានរិះគន់​ដ៏កម្រដើម្បី​សម្តែងនូវការ​មិន​ពេញ​ចិត្ត​របស់ខ្លួន ចំពោះ​សកម្ម​ភាពប្រទេស​កម្ពុជា​ ដែលធ្វើជា​ប្រធាន​អាស៊ាន​ អំឡុង​កិច្ចប្រជុំ​រដ្ឋមន្ត្រី​ការបរទេស​អាស៊ានកាលពីខែ​កក្កដា ក្នុងរាជធានី​ភ្នំពេញ។

ប្រទេសសមាជិក​អាស៊ាន​មួយចំនួន​ បាន​រិះគន់​ប្រទេស​កម្ពុជា​រួចមក​ហើយ​ ចំពោះ​ការចេញសេច​ក្តី​ថ្លែងការណ៍​រួម​មួយ​ បន្ទាប់​ពីកិច្ច​ប្រជុំ​កាលពី​ខែកក្កដា​ រវាងរដ្ឋ​មន្ត្រីការ​បរទេស​អាស៊ាន​ និងប្រទេស​ជាដៃគូមួយ​ចំនួន​ រួមមាន​ប្រទេសចិន​ ជប៉ុន​ អាមេរិក​ និង​ប្រទេសកូរ៉េ​ខាងត្បូង។

អ្នករិះគន់​បានលើកឡើងថា ប្រទេស​កម្ពុជា​ហាក់បីដូចជា​មានបំណង​ការពារផល​ប្រយោជន៍​របស់​​ចិនច្រើនជាង​ការ​ពារ​ផល​ប្រយោជន៍របស់​ប្រទេស​សមាជិក​អាស៊ាន។

លោកយ៉ូស៊ីហ៊ីរ៉ូអាបេ (Yoshihiro Abe)​លេខាទី២ របស់ស្ថានទូត​ជប៉ុន​ប្រចាំ​រាជ​ធា​នីភ្នំពេញ​បាន​លើក​ឡើង​តាម​រយៈ​អុីម៉េលកាល​ពី​ម្សិលមិញ​ថា ប្រទេស​ជប៉ុន​មិន​ពេញ​ចិត្ត​ចំពោះ​សកម្មភាព​របស់​ប្រទេស​កម្ពុជាជុំវិញជម្លោះ​ដែន​ទឹក​នៅក្នុងសមុទ្រចិន​ខាង​ត្បូង និងមិន​ពេញ​ចិត្ត​​ចំពោះការ​មិន​លើក​ឡើងអំពី​ជម្លោះ​របស់​​ប្រទេស​ជប៉ុន​ ដែល​កំពុង​តែ​អូសបន្លាយជាមួយកូរ៉េ​ខាង​ជើងជុំវិញ​​​កូរ៉េ​​​ខាងជើងចាប់ពង្រត់ជនជាតិជប៉ុន​។

បន្ទាប់​ពី​កិច្ចប្រជុំ​កាលពីខែកក្កដា លោកយ៉ូស៊ីហ៊ីរ៉ូអាបេបានលើក​ឡើងថា “ ប្រទេស​ជប៉ុន​មាន​ការ​ស្តោកស្តាយ​យ៉ាង​ខ្លាំ​ងចំពោះ​ភាគី​កម្ពុជា​ និង​បាន​ទទូច​ឲ្យ​កម្ពុជា​មាន​ការ​ទទួល​ខុស​ត្រូវ​ក្នុងការចាត់​វិធាន​ការ​ដ៏​ត្រឹម​ត្រូវ​មួយ​ក្នុង​នាម​ជា ប្រធានអាស៊ាន​”។

ចំនួននៃជនជាតិជប៉ុនបាត់ខ្លួន​ដោយ​ការ​ចាប់ពង្រត់របស់ភ្នាក់ងារសម្ងាត់របស់កូរ៉េខាងជើង ចន្លោះ​ពី​ឆ្នាំ​១៩៧៧ និង​១៩៨៣ នៅតែមិនទាន់ដឹងច្បាស់លាស់ឡើយ។គណៈប្រតិភូ​របស់​ប្រទេសជប៉ុន ​​ចូលរួម​ក្នុងកិច្ចប្រជុំ​កាលពី​ខែកក្កដា ក្នុង​រាជ​ធានី​ភ្នំពេញ​ ដែលដឹក​នាំ​ដោយលោកកូអុីឈីរ៉ូហ្គេមបា (Koichiro Gemba) រដ្ឋមន្ត្រី​ក្រសួងការ​បរទេស​​ជប៉ុន ​កំពុង​ស្វែង​រក​ការគាំទ្រ​ពី​ប្រទេស​សមា​​ជិក​អាស៊ាន​ ឲ្យជួយ​គាំទ្រការ​ខិតខំ​ប្រឹង​ប្រែង​របស់​ខ្លួន​ក្នុង​ការ​ដោះស្រាយ​បញ្ហា​នេះ​។

​លោកយ៉ូស៊ីហ៊ីរ៉ូអាបេបាន​ថ្លែងថាទោះ​ជា​យ៉ាង​ណា ​កម្ពុជា​មិន​បាន​​បក​ស្រាយឲ្យបាន​ត្រឹម​ត្រូវ​​​​នៅក្នុង​សេចក្តី​ថ្លែងការណ៍ដែល​​ធ្វើឡើង​ដោយ​រដ្ឋមន្ត្រី​ការបរទេស​​នៅ​ក្នុង​កិច្ចប្រជុំ។លោកបាន​​បន្តថា “ នៅក្នុង​កិច្ច​ប្រជុំ​រដ្ឋមន្ត្រី​ការ​បរទេស​អាស៊ាន​ កាល​ពី​ខែ​កក្កដា សេចក្តី​ថ្លែង​ការណ៍​ ​ចេញ​ដោយ​ប្រទេស​កម្ពុជា​ក្នុងនាមជា​​ប្រធាន​អាស៊ានមិន​បាននិយាយអំពីសេចក្តី​ថ្លែងការណ៍របស់​លោកកូអុីឈីរ៉ូហ្គេមបារដ្ឋ​មន្ត្រីការ​បរទេស​ជប៉ុន​ឲ្យ​បាន​ត្រឹម​ត្រូវ​នោះ​ទេ ពាក់​ព័ន្ធទៅ​នឹង​បញ្ហាករណីចាប់ពង្រត់ ធ្វើឡើង​ដោយ​ប្រទេស​កូរ៉េ​ខាង​ជើង ​និង​បញ្ហា​​ក្នុង​សមុទ្រចិន

​ខាង​ត្បូង ហើយក៏មិនបាន​បក​ស្រាយ​ឲ្យ​បាន​ច្បាស់លាស់ចំពោះ​​សេចក្តី​ថ្លែង​ការណ៍​មួយ​ចំនួន​របស់​រដ្ឋមន្ត្រី​ការបរទេស​ផ្សេងៗទៀត​”។ លោកយ៉ូស៊ីហ៊ីរ៉ូអាបេបាន​បដិសេធ​មិន​និយាយថា តើ​ការ​មិន​ពេញចិត​​​្ត​របស់ប្រទេស​ជប៉ុន​​ចំពោះ​រដ្ឋាភិបាល​កម្ពុជាយ៉ាងណា​នោះ​ទេ​។

ទោះ​ជា​យ៉ាង​ណា​ យោង​តាម​ទីភ្នាក់​ងារ​ព័ត៌មាន​ជប៉ុន​ក្យូដូ (Kyodo) ​ចេញផ្សាយ​ កាលពីម្សិលមិញបានឲ្យដឹងថាលោកហ្គេមបាបាន​សរសេរលិខិត​ផ្ទាល់​ខ្លួន​មួយ​ផ្ញើ​ទៅ​លោកហោណាំហុង​ រដ្ឋមន្ត្រីក្រសួងការ​បរទេស​កម្ពុជា​ កាលពីថ្ងៃទី២៤ខែកក្កដាដើម្បី​សម្តែង​នូវ​ក្តីព្រួយបារម្ភរបស់​លោក។ យោង​តាម​ទីភ្នាក់ងារ​នេះលោកហោណាំហុង​ បាន​ផ្ញើ​លិខិត​ឆ្លើយតប​ទៅកាន់​លោក ហ្គេមបា វិញកាលពីថ្ងៃទី២៧ខែកក្កដា។

ទីភ្នាក់​ងារ​ព័ត៌មាន​ក្យូដូ​ បាន​ដក​ស្រង់​លិខិត​របស់​លោកហោណាំហុង ​ថា “ គ្មាន​ប្រទេស​ណាក្រៅពីប្រទេស​ជប៉ុនទេដែល​បាន​សម្តែងនូវការ​មិន​យល់ស្រប​​ចំពោះ​ការ​ចេញ​សេចក្តីថ្លែងការណ៍របស់​ប្រទេសកម្ពុជាក្នុង​នាមប្រធាន​អាស៊ាន​”។ រដ្ឋមន្ត្រី​ក្រសួង​ការ​បរទេស​កម្ពុជា​មិន​អាច​ទាក់​ទង​សុំ​អត្ថា​ធិ​ប្បាយ​ជុំវិញបញ្ហាចម្រូង​ចម្រាស​​នេះបាន​ទេ កាល​ពី​ម្សិលមិញ។

ទោះ​ជា​យ៉ាង​ណា​ ប្រទេស​ហ្វីលីពីន មិន​ពេញ​ចិត្តយ៉ាង​ខ្លាំងហើយ​បាន​រិះគន់​ប្រទេស​កម្ពុជា​ជា​សាធារណៈចំពោះ​ការ​ទទូចរបស់​ប្រទេសកម្ពុជា​ដែល​ថា សេចក្តី​ថ្លែងការណ៍​រួម​មិន​គួរ​រិះគន់​ប្រទេសចិន ​ដោយ​ចំហ​​​ចំពោះ​បញ្ហា​សមុទ្រ​ក្នុងដែនសមុទ្រចិន​ខាង​ត្បូង​នោះ​​។ ភាព​រកាំរកូស​រវាង​ប្រទេសទាំង​ពីរ​ក៏បាន​ធ្វើឲ្យមាន​បញ្ហា​ដល់​អតីត​ឯក​​​អគ្គ​​​រាជទូត​កម្ពុជា​ប្រចាំ​ក្រុង​ម៉ានីលផងដែរ ដោយចាប់​តាំង​ពី​ពេល​នោះ​មក ​លោកត្រូវ​បាន​ជំនួសតំណែង​ដោយឯកអគ្គរាជទូតថ្មី​។

ទីភ្នាក់ងារព័ត៌មានរដ្ឋ​ ស៊ីនហួ (Xinhua) បានឲ្យដឹងថាកាលពី​ថ្ងៃអាទិត្យបន្ទាប់​ពីកិច្ច​ប្រជុំ​ជាមួយ​​​​​លោកនាយក​រដ្ឋមន្ត្រី​ ហ៊ុនសែន​ ​លោកវេនជាប៉ាវ (Wen Jiabao)​នាយក​​រដ្ឋមន្ត្រី​ចិន​បាន​យល់​ព្រម​ផ្តល់​ជំនួយ​ និង​ប្រាក​់​​កម្ចី​​​ថ្មីដល់​ប្រទេសកម្ពុជា​គិត​ជា​ទឹក​ប្រាក់ចំនួន​៥២៣​លាន​ដុល្លារ ហើយឆ្លៀត​ក្នុង​​​ឱកាស​​​នោះ​ លោកវេនជាប៉ាវ​ ក៏បាន​ថ្លែង​អំណរគុណ​​​

​ដល់​ប្រទេសកម្ពុជា​ ចំ​ពោះ​ការប្រើប្រាស់​តួ​​​នាទីដ៏សំខាន់​របស់​ខ្លួន​ ដែល​បាន​ធ្វើឲ្យ​ទំនាក់​ទំនង​រវាង​ប្រទេសចិន​ និងបណ្តា​ប្រទេស​ជាសមាជិក​អាស៊ាន​ដទៃ​ទៀត​​​នៅតែ​​​ល្អ​​​ប្រសើរ​នឹង​គ្នា៕

ប្រែសម្រួល​ដោយស៊ាស៊ុយឈាង​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស