26 C
Phnom Penh

ព្រឹទ្ធ​សភាអនុ​ម័ត​កិច្ច​ព្រម​ព្រៀង​បញ្ជូន​ពល​ករ​កម្ពុជា​ ឲ្យ​ទៅ​ធ្វើ​ការ​នៅ​ក្នុង​ប្រទេសកាតា

ដោយ ឌឹ ខេមបូឌា ដេលី

បទវិភាគ

មន្ត្រី​មួយ​រូប​បាន​និយាយថា កាល​ពី​ម្សិល​មិញ ព្រឹទ្ធ​សភា​បានអនុម័ត​ច្បាប់​មួយ ​ដើម្បី​ត្រួស​ត្រាយផ្លូវ​ឲ្យប្រជាពល​រដ្ឋ​កម្ពុជា​ អាច​ទៅ​ធ្វើ​ការ​នៅ​ក្នុង​ប្រទេស​កាតា។

លោកអ៊ុំសារិទ្ធ ​អគ្គលេខាធិការ​ព្រឹទ្ធ​សភា​​បាន​មាន​​ប្រ​សាសន៍​ថា សមាជិក​ព្រឹទ្ធ​សភា​ទាំង​​៥២រូប​ ដែល​មាន​​វត្ត​មាន​​បាន​​អនុម័ត​ច្បាប់​នេះ​​ជាឯកច្ឆន្ទ និង​ដោយ​គ្មាន​ការ​កែ​ប្រែ​អ្វី​ឡើយ។

កិច្ច​ព្រម​ព្រៀង​នេះ​អនុញ្ញាត​ឲ្យ​ប្រជា​ពល​រដ្ឋ​​កម្ពុជា អាចចេញទៅធ្វើ​​ការ​តាមផ្នែក​បម្រើ​សេវា​កម្ម​ និង​ឧស្សាហកម្មចំណី​អាហារព្រម​ទាំង​​ការ​សាង​សង់​​ហេដ្ឋារចនា​សម្ពន្ធ​នានា​ ដែល​រួមមានទាំង​ពហុ​កីឡាដ្ឋាន​សម្រាប់​ការ​ប្រ​កួត​បាល់​ទាត់​ពិភពលោក​នៅក្នុង​​ឆ្នាំ​២០២២​​ផងដែរ។

លោក​មាន​ប្រ​សាសន៍​ថា កិច្ច​ព្រម​ព្រៀង​​​នេះ​ក៏​តម្រូវ​​ឲ្យ​រដ្ឋាភិបាល​នៃ​ប្រ​ទេស​ទាំង​ពីរ​ទទួលខុសត្រូវ​​ចំពោះ​ការ​រៀប​ចំ​ការងារ​ទាំង​អស់ផង​ដែរ ដើម្បី​ចៀស​វាង​ការ​ប្រើ​ប្រាស់​ទីភ្នាក់​ងារ​ជ្រើស​រើស​ពលករនានា របស់​ប្រទេស​កម្ពុជា​ ដែលធ្លាប់ទទួលរង​ការរិះ​គន់​យ៉ាងខ្លាំង ដែលល្បី​ខាង​មិន​អនុញ្ញាត​ឲ្យ​ពល​ករ​​ទើប​ជ្រើសរើសថ្មី មិនឲ្យ​ចាក​ចេញ​ពី​កន្លែង​របស់​ខ្លួន​ និង​បញ្ជូន​ពួកគេទៅ​ធ្វើ​ការបម្រើ​ថៅកែ​ដែល​ចូល​ចិត្ត​រំលោភបំពាន។ លោក​​មាន​ប្រ​សាសន៍​ថា “ នេះ​ជា​កិច្ច​ព្រម​ព្រៀង រវាង​រដ្ឋាភិបាល​និង​រដ្ឋា​ភិបាល”។

លោកមឿនតុលា ​ប្រធាន​កម្ម​វិធី​ការ​ងារ​របស់មជ្ឈ​មណ្ឌល​អប់​រំ​ច្បាប់​សម្រាប់​សហ​គមន៍​ បាន​មាន​ប្រ​សាសន៍​ថា ​ប្រសិន​បើ​កិច្ច​ព្រម​ព្រៀង​ចុង​ក្រោយ​ជា​មួយ​ប្រ​ទេស​កាតា​នេះ ដូចគ្នា​នឹង​​សេច​ក្តី​ព្រាងមុនៗ ​ដូច​ដែល​លោក​ធ្លាប់បានអាន​នោះ វា​ប្រ​ហែលជា​មិន​អាច​ការ​ពារឲ្យបាន​​ល្អដល់​​ពល​ករ​ទៅ​ធ្វើ​ការ​នៅ​ប្រទេស​មួយ ​ដែល​ធ្លាប់​​បានទទួល​​រង​ការ​រិះ​គន់​រួច​ទៅ​ហើយ​ អំពី​ការ​រំលោភ​បំពាន​​សិទ្ធិ​ការងារ​នោះ​ឡើយ។ លោក​បានបន្ដ​​ថា “ អ្វីដែល​យើង​រំពឹង​ទុក​ពី​ [កិច្ច​ព្រម​ព្រៀង​នេះគឺ​ថា]វា​គួរ​តែ​មាន​ចែង​​ច្បាស់​លាស់​ពី​លក្ខ​ខណ្ឌ​ការងារថា ត្រូវ​ធ្វើ​ការ​ប៉ុន្មាន​ម៉ោង​ក្នុង​មួយ​ថ្ងៃ​​ និង​អាច​ទទួល​បាន​ប្រាក់​ឈ្នួល​ [អប្បបរមា] ​​ប៉ុន្មាន​។​មិនទាន់​មាន​ការ​លើក​ឡើង​ពី​ចំណុច​នោះទេ”។

លោកអ៊ុំសារិទ្ធបាន​អះអាង​​ថា​ ​ប្រទេស​នេះ​មាន​ប្រ​វត្តិ​ល្អ​ពាក់​ព័ន្ធ​នឹង​ពល​ករ​ពី​ប្រទេស​​ក្រៅ។លោកបាន​​មាន​ប្រ​សាសន៍​ថា“ ប្រទេស​កាតាល្អ​ដូច​ប្រទេស​កូរ៉េខាងត្បូងនិង​ប្រទេស​ជប៉ុន អ៊ីចឹង។យើង​​បាន​ពិនិត្យ​មើល​​លក្ខ​ខណ្ឌ​សមស្រប​រួច​ហើយ មុន​នឹង​យើង​អនុម័ត​វា”។

ព្រឹទ្ធ​សភា​កាលពី​ម្សិល​មិញ​ក៏​បាន​អនុម័ត​លើ​ញត្តិ​​មួយ​ចំនួន​ផងដែរដើម្បី​ផ្តល់​សច្ចាប័ន​លើអនុសញ្ញា​​​អង្គការ​សហ​ប្រជាជាតិ​ស្តីពី​សិទ្ធិ​របស់​ជន​ពិការ​ និង​អនុសញ្ញា​អង្គការសហ​ប្រជាជាតិក្រុង​រ៉ូតធើដាម ​(Rotterdam) ​​ផង​ដែរដែល​និយាយអំពី​ការ​ប្រើ​ប្រាស់​សារធាតុគីមី​ក្នុង​វិស័យ​កសិកម្ម។

លោកគាមមករាឌីប្រធាន​កម្មវិធី​សុខ​ភាព​និង​បរិស្ថានរបស់អង្គការសេដាក ​មាន​​ប្រ​សា​សន៍​ថា អនុសញ្ញាក្រុង​រ៉ូធើដាម នឹង​ជួយ​ការ​ពារ​​សុខុមាលភាព​របស់ប្រជា​កសិ​ករ​កម្ពុជា។

លោក​​បន្ដ​ថា ដោយ​អនុ​សញ្ញា​​នេះ​​ទទួល​បាន​ការ​ផ្តល់សច្ចាប័ន​ “ យើង​នឹង​ទទួលបាន​ព័ត៌​មាន​ស្តីពី​សារ​ធាតុគីមី​ពី​បណ្តា​ប្រទេស​ផ្សេងៗ​​ ដូច្នេះ​ប្រជា​ពល​រដ្ឋ​អាច​ពិចារណា​ថា ​តើ​ត្រូវ​ប្រើ​ប្រាស់​សារធាតុគីមីឬ​ក៏អត់”។

សូម​បញ្ជាក់​ថា ​ពេល​នេះកិច្ច​ព្រម​ព្រៀង​ទាំង​បី​នេះ​ នឹង​ត្រូវ​បញ្ជូន​ត្រឡប់​ទៅ​រដ្ឋ​សភា​វិញ ដែល​​បាន​អនុម័ត​​ដោយ​គ្មាន​ធ្វើ​ការ​កែ​ប្រែ​ចំណុច​ណាមួយ​ឡើយ​កាលពី​ខែ​មុន​ ហើយ​បន្ទាប់​មក​នឹងថ្វាយ​ព្រះ​មហា​ក្សត្រ​ ដើម្បីឡាយ​ព្រះហស្ត​លេខា៕​

ប្រែសម្រួល​ដោយតែមសុខុម​​​​​​

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស