32 C
Phnom Penh

ការស្ទង់មតិ​៖ ​មនុស្សជាច្រើន​មិនដឹងពីតួនាទី​របស់​រដ្ឋ​សភាឡើយ

ដោយ ឌឹ ខេមបូឌា ដេលី

បទវិភាគ

របាយការណ៍​ថ្មី​មួយ អំពី​ការ​ចូល​រួម​ក្នុង​កិច្ចការ​នយោបាយ​ នៅក្នុង​ប្រទេស​កម្ពុជា បាន​រក​ឃើញ​ថា ៥៣​ភាគ​រយ​នៃ​អ្នក​​ត្រូវ​បាន​សម្ភាស​បាន​ឲ្យដឹង​ថា ពួកគេ​មិនយល់ថា​​រដ្ឋ​សភា​កំពុង​ធ្វើ​អ្វី​នោះ​ទេ​ រីឯ​៤៨​ភាគ​រយ​​ផ្សេងទៀត​មិន​យល់​អំពី​តួនាទី​របស់​សមាជិក​សភា​ឡើយ​។

របាយការណ៍​របស់​វិទ្យាស្ថាន​ជាតិ​​​​ប្រជា​ធិបតេយ្យ​ (National Democratic Institute) មាន​មូលដ្ឋាននៅរដ្ឋធានី​វ៉ាស៊ីនតោន​ ដែល​បាន​ធ្វើ​ការស្តង់មតិប្រជា​ពលរដ្ឋ​ចំនួន​១.៨០០​នាក់​ នៅក្នុង​ខេត្ត​ក្រចេះ កំពង់​ឆ្នាំង និង​ខេត្ដ​កំពង់​ចាមក៏បាន​រក​ឃើញ​ដែរ​ថា៤៦,៤​ភាគ​រយ​​នៃ​អ្នក​​ត្រូវ​បាន​សម្ភាស​មិន​ដែល​និយាយ​អំពី​កិច្ចការ​នយោបាយ​ជាមួយ​មិត្ត​ភក្ដិ​ ឬក៏​អ្នក​ជិត​ខាង​ឡើយ​ ហើយ​២២,១​ភាគរយ​ផ្សេង​ទៀត​បាន​លើក​ឡើង​ថា ពួក​គេ​មិន​អាច​ពិភាក្សា​​ដោយ​បើក​ចំហរ​អំពី​កិច្ចការ​នយោបាយ​នៅ​ក្នុង​សហគមន៍​របស់​ខ្លួនបាន​ទេ​។

ចំពោះចូល​រួម​ពិធីជួបជុំគ្នាដែលរៀបចំឡើងដោយគណបក្ស​នយោបាយ​ មាន​៤២,៧ភាគរយ​នៃ​អ្នក​ត្រូវ​បាន​គេ​សម្ភាស​ បាន​លើក​ឡើង​ថាពួក​គេ​មិន​ធ្លាប់ទៅ​ចូល​រួម​ឡើយហើយ​៣,២​ភាគរយ​បាន​លើក​ឡើង​ថាពួក​គេ​មិន​ត្រូវ​បាន​អនុញ្ញាត​ឲ្យ​ទៅ​ចូល​រួម​ទេ​ រីឯ​៤៨,៤ភាគរយ​លើក​ឡើង​ថាពួក​គេ​មិន​ធ្លាប់​និយាយ​អំពី​កិច្ចការ​នយោបាយ​នៅ​ក្នុង​កិច្ច​ប្រជុំ​របស់ក្រុម​ប្រឹក្សា​ឃុំ-សង្កាត់​នោះ​ឡើយ​។ជាង​៤៥​ភាគរយ​ បានលើក​ឡើង​ថាពួក​គេ​មិន​ធ្លាប់ចុះ​ហត្ថលេខា​ ឬ​ក៏​ផ្ដិត​មេដៃ​នៅ​លើ​ញត្តិ​ទេ​។

លោក​ស្រី​ ឡូរ៉ាថនតុន (Laura Thornton) នាយិការ​ប្រចាំ​ប្រទេសកម្ពុជា​របស់​វិទ្យាស្ថាន​ជាតិ​ប្រជាធិបតេយ្យ​ កាល​ពី​ម្សិលមិញ​ បានមាន​ប្រសាសន៍​ថាការ​រក​ឃើញ​ទាំង​នេះ”គឺ​ជា​ស្ថិតិ​មួយ​ដ៏​មាន​សារសំខាន់​”។លោកស្រីថនតុនបាន​បន្ដ​ថា”​រដ្ឋ​សភា​មិន​បាន​ធ្វើ​ការ​ឲ្យ​បាន​ជិតដិ​តជាមួយ​ប្រជាជន​ឡើយ​”។

ការ​រក​ឃើញ​ទាំង​នេះ​ គឺ​ធ្វើ​ឲ្យ​មាន​ក្ដី​ព្រួយ​បារម្ភ​បន្ថែមទៀត ​នៅ​ពេល​ប្រទេស​កម្ពុជា​ ខិតជិតដល់ពេល​បោះ​ឆ្នោត​ជាតិ​អាណត្ដិ​ទី៥ដែល​នឹង​ត្រូវ​ធ្វើ​ឡើង​ក្នុង​កក្កដា​ឆ្នាំ​ក្រោយ​។

លោក​ស្រី​ ថន​តុនបាន​សួរ​ថា”​ប្រសិន​បើ​ប្រជាពលរដ្ឋ​មិន​មាន​ការ​យល់​ដឹង​អំពី​អ្វី​ជា​រដ្ឋសភា​ និង​មិន​មាន​ការ​យល់​ដឹង​ថានរណា​ជា​សមាជិក​សភា​នោះ​ អ៊ីចឹង​តើ​ពួក​គេ​បោះ​ឆ្នោត​ ដើម្បី​អ្វី​?។ ​រដ្ឋសភា​ទំនង​ជា​មាន​ការិយាល័យ​របស់​ខ្លួន​នៅ​តាម​បណ្ដាខេត្ដប៉ុន្ដែការិយាល័យ​ទាំង​អស់​កំពុង​ធ្វើ​អ្វី​? មក​ដល់​ពេល​ឥឡូវនេះ​ គឺ​បួន​អាណត្តិ​ឡើយ​ ការ​រក​ឃើញ​ទាំង​នេះ​ គឺ​ជា​លទ្ធផល​មួយ​ដ៏​គួរ​ឲ្យ​ភ្ញាក់​ផ្អើល​បំផុត​”។

លោកស្រីថនតុនបាន​បន្ដ​ថា”ប៉ុន្ដែ ​ព័ត៌មាន​វិជ្ជមានគឺ​អំពីចំណាប់អារម្មណ៍​ខ្លាំង​របស់​ប្រជាជន​ ជុំវិញកិច្ចការនយោបាយ​”។លោក​ស្រី​បាន​លើក​ឡើង​អំពី​ការ​រក​ឃើញ​ថា៥៣​ភាគ​រយ​នៃ​អ្នក​​ត្រូវ​បាន​សម្ភាស​បាន​លើក​ឡើង​ថា”ពួក​គេ​មាន​ចំណាប់​អារម្មណ៍​នឹងកិច្ចការ​នយោបាយខ្លះដែរ”​។

លោកស្រីបាន​ថ្លែង​ថា”​ពួក​គេ​ប្រហែល​ជា​មិន​ហាន​និយាយ​អំពី​កិច្ចការ​នយោបាយ​ឡើយ​ ប៉ុន្ដែ​ ពួក​គេ​មាន​ចំណាប់​អារម្មណ៍​នឹង​នយោបាយហើយ​នេះ​គឺ​ជា​ព័ត៌មាន​ល្អ​ ដែល​យើង​អាច​ធ្វើ​ការ​ជាមួយ​បាន”។

 

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស