32 C
Phnom Penh

អ្នកយក​ព័ត៌មាន​ឲ្យកាសែត​ជា​ភាសាខ្មែរ​ម្នាក់​ ត្រូវ​បាន​សម្លាប់​

ដោយ ឌឹ ខេមបូឌា ដេលី

បទវិភាគ

នគរបាល​បាន​មានប្រសាសន៍ថា អ្នក​យក​ព័ត៌​មាន​ឲ្យ​កាសែត​​​មិន​សូវ​ល្បីឈ្មោះ​ម្នាក់ដែល​បាន​រាយការណ៍អំពី​បទ​ល្មើស​កាប់​ឈើ​នៅក្នុង​ខេត្ត​រតនគិរី​ ត្រូវ​បាន​ប្រទះ​ឃើញស្លាប់​នៅ​ក្នុង​ឃ្លុបរថយន្ត​របស់​ខ្លួនកាលពីម្សិលមិញ។

លោកសុងប៊ុនថាណមនាយការិយា​ល័យនគរបាល​ព្រហ្មទណ្ឌ​ខេត្ត​ មាន​ប្រសាសន៍​ថា លោក ហង្ស សេរីឧត្តម អាយុ​៤២ឆ្នាំ​ ​អ្នក​យក​ព័ត៌​មាន​ឲ្យកាសែត​ជា​ភាសា​ខ្មែរ​ឈ្មោះ វីរ​ជនខ្មែរ​ ប្រចាំ​ថ្ងៃ​ បាន​បាត់​ខ្លួន​កាល​ពីថ្ងៃ​អាទិត្យ​​​

នៅ​ពេល​លោកបាន​ចាក​ចេញ​ពីផ្ទះ​នៅក្នុង​ក្រុង​បានលុង ដោយ​ប្រាប់​ភរិយា​​ថា លោក​ចេញ​ក្រៅ​តែ​មួយ​រយៈ​ពេល​ខ្លី​ប៉ុណ្ណោះ​។

លោកប៊ុនថាណមបាន​មាន​ប្រសាសន៍​បន្តថា សាក​សព​លោក​ ហង្សសេរីឧត្តម ត្រូវ​​បាន​ប្រទះ​ឃើញ​កាលពី​ល្ងាច​ម្សិលមិញដោយ​ដេក​ផ្កាប់មុខ​នៅក្នុង​ឃ្លុប​រថយន្ត​តូយ៉ូ​តា​កា​មរី របស់​ខ្លួន​​។ អ្នក​ភូមិ​បាន​រាយ​ការណ៍​​​ប្រាប់​​នគរបាល​អំពី​រថយន្ត​​នេះ បន្ទាប់ពីមាន​ក្លិន​ស្អុយ​ចេញ​ពីរថយន្ត ដែល​គេទុក​ចោល​នៅ​ក្នុង​ចម្ការ​ស្វាយចន្ទីមួយ នៅ​ក្នុង​ឃុំ​ចាអ៊ុង​ ស្រុក​អូរជុំខេត្ត​រតនគិរី។

លោកប៊ុនថាណមបាន​បន្តថា“​សាក​សព​ជន​រង​គ្រោះ​ត្រូវបាន​គេកាប់​ពីរ​ពូថៅ​ចំក្បាល​ផ្នែកខាង​ក្រោយ​ និង​ចំ​​ចិញ្ចើម។ ​​យ៉ាង​ហោច​ណាស់​​មាន​មនុស្ស​ពីរ​នាក់​ ជាប់ពាក់​ព័ន្ធ​នឹង​ឃាតកម្មនេះ​។ ឃាតកម្មនេះ​មិន​ពាក់​ព័ន្ធ​ង​ករណី​ប្លន់​នោះ​ទេ​ ពីព្រោះ​សម្ភាររបស់​លោក ហង្ស សេរីឧត្តម ​មិន​មាន​ការ​បាត់​បង់​ទេ​។ ជន​ល្មើស​គឺ​ជា​អ្នក​ស្គាល់​គ្នា​ជាមួយ​ជន​រង​គ្រោះ​ ហើយ​បាន​ប្រើល្បិច​ឲ្យជន​រង​គ្រោះ​​ចេញ​ពី​ផ្ទះ​ទៅ​ជួប​ខ្លួន​ ដើម្បី​សម្លាប់​តែម្តង​។ឃាតកម្ម​នេះ​ជា​ឃាតកម្ម​គ្រោង​ទុក​ជាមុន​”។

អ្នកស្រីអុឹមចន្ធីភរិយា​របស់​លោកសេរី​ឧ​ត្តម ដែល​មាន​ផ្ទៃពោះ​ប្រាំពីរខែ និយាយ​ថាប្តីរបស់​អ្នកស្រី​បាន​ធ្វើការ​ជាអ្នក​យក​ព័ត៌មាន​បួនឆ្នាំ​មក​ហើយ។លោក​បាន​ចេញ​ពីផ្ទះ​នៅ​ម៉ោង​ប្រាំពីរ​យប់​​ថ្ងៃអាទិត្យ​ដោយ​និយាយថា គាត់​ទៅជួប​មនុស្សម្នាក់​ឈ្មោះ​ “ ហេង”។

អ្នកស្រី​ ចន្ធីមាន​ប្រសាសន៍បន្តថាបន្ទាប់​ពី​មិន​ឃើញប្តី​របស់​គាត់​​ត្រលប់​មក​ផ្ទះវិញហើយ​មិន​លើក​ទូរស័ព្ទ​នោះ​ អ្នក​ស្រី​​​ក៏បាន​ទូរស័ព្ទប្ដឹង​ទៅនគរបាល​នៅព្រឹក​បន្ទាប់​។

កាសែត​វីរជន​ខ្មែរ​ប្រចាំ​ថ្ងៃ​បាន​ចេញ​សេចក្តីថ្លែងការណ៍មួយ កាលពីម្សិលមិញ​​ដោយថ្កោលទោស​ឃាតកម្ម​លើ​អ្នក​យក​ព័ត៌មាន​របស់​ខ្លួន​។លោករិនរតនៈនិពន្ធ​នាយក​កាសែត​វីរជន​ខ្មែរ​ប្រ​ចាំថ្ងៃ​ មាន​ប្រសាសន៍ថាលោកហង្សសេរីឧត្តមបាន​ធ្វើការ​ជាអ្នក​យក​ព័ត៌មានឲ្យកាសែត​របស់​លោក​បួនខែមក​ហើយ​ ហើយ​រាយ​ការណ៍​អំពី​ករណី​កាប់​ឈើ​ខុស​ច្បាប់​មួយ​ចំនួន​​ ដែល​ពាក់​ព័ន្ធនឹង​អ្នក​មាន​អំណាច​​ក្នុង​ខេត្ត​រតនគិរី​។

លោករតនៈបានមានប្រសាសន៍បន្តថា“ គាត់​បាន​សរសេរ​អត្ថបទ​ពាក់​ព័ន្ធនឹង​ករណី​កាប់​ឈើ​ប្រណីត​ខុស​ច្បាស់​ក្នុង​ខេត្ត​រតនគិរី​និង​អត្ថបទ​ដែល​លោក​បាន​រាយ​ការណ៍ពាក់​ព័ន្ធនឹងមន្ត្រីមាន​អំណាច​ ដែល​ប៉ះពាល់​ដល់​ផល​ប្រយោជន៍របស់​ពួក​គេ​”។

នៅក្នុង​អត្ថបទចុង​ក្រោយ​របស់​លោក​ដែល​បាន​ចេញ​ផ្សាយ​កាលពីថ្ងៃទី​៦​ខែកញ្ញាលោកហង្សសេរី​ឧត្តម​ បាន​រាយ​ការណ៍ថាកូន​ប្រុស​របស់​​មេបញ្ជាការ​កង​រាជ​អាវុធ​ហត្ថខេត្ត​មាន​ជាប់​ព័ន្ធ​នឹង​ជំនួញ​ឈើ​ខុស​ច្បាប់​។ លោកហង្សសេរីឧត្តម ​រាយការណ៍​ថា​ កូន​ប្រុសរបស់​លោក​មេបញ្ជាការ​កង​រាជ​អាវុធហត្ថខេត្ត​ ជា​អ្នក​ជួញដូរ​ឈើ​ប្រណីត​ខុសច្បាប់​ដោយ​ប្រើរថយន្ត​ពាក់​ស្លាក​លេខ​នគរបាល និង​មានជាប់​ពាក់ព័ន្ធ​ក្នុង​ការ​ជំរិត​ទារប្រាក់​ពីអ្នក​ភូមិ ​ដែល​ដឹក​ឈើ​ស្រប​ច្បាប់​ ដើម្បីសង់​ផ្ទះ​។

លោក រតនៈ បន្ថែម​ថា​“ បើសិន​ជា​អ្នក​យក​ព័ត៌មាន​របស់​ខ្ញុំ​បាន​រាយ​ការណ៍​ខុស​ពី​ករណី​កាប់​ឈើនេះ​គាត់​គួរ​តែ​ប្រឈមមុខ​នឹង​ច្បាប់​សារព័ត៌មាន ​គឺមិន​ត្រូវ​សម្លាប់​គាត់​ទេ​”។ លោកប៉ែនប៊ុណ្ណារ៍មន្ត្រី​សម្រប​សម្រួល​របស់អង្គការសិទ្ធិមនុស្ស​អាហុដ​ប្រចាំ​ខេត្ត​នេះ​ បានមាន​ប្រសាសន៍ថា​ ជន​រង​គ្រោះ​បាន​​ធ្វើការ​រាយការណ៍ទាក់​ទង​នឹងការ​​កាប់​បំផ្លាញ​ព្រៃឈើ​និង​ការ​ជួញ​ដូរ​ឈើ​ប្រណិត​ខុសច្បាប់​ជា​ច្រើន​​​ករណី ដែល​ធ្វើឲ្យប៉ះពាល់​ដល់​សុវត្ថិភាព​របស់​គាត់។

លោកប៊ុណ្ណារ៍មាន​ប្រសាសន៍​បន្ថែម​ថា “ បទ​ល្មើស​ព្រៃ​ឈើនិង​ការ​កាប់​ឈើប្រណីត​​ខុស​ច្បាប់​បែបជាប្រព័ន្ធ​ ដែល​ជាប់​ទាក់​ទង​នឹងបុគ្គលមាន​អំណាច​ និងអ្នក​មាន​។ ខេត្ត​រតនគិរី គឺជាខេត្ត​ដ៏គ្រោះ​ថ្នាក់​សម្រាប់​អ្នក​​យក​ព័ត៌មាន និង​សកម្មជន​ការ​ពារ​ព្រៃ​ឈើ​ដែល​ធ្វើការ​ប្រយុទ្ធ​ប្រឆាំង​នឹងការ​កាប់​ឈើ​និងការ​រាន​ដី​ដោយខុសច្បាប់​”។

អ្នកយកព័ត៌មាន​ចុងក្រោយ​ ដែល​ត្រូវបាន​​សម្លាប់​នៅក្នុង​ប្រទេសកម្ពុជា ​គឺ​លោក ឃឹមសំបូរ ជាអ្នក​យក​ព័ត៌មាន​ឲ្យកាសែត​ប្រឆាំង​ត្រូវបានគេ​បាញ់សម្លាប់​កាល​ពីខែកក្កដា ឆ្នាំ​២០០៨នៅមុន​ការ​បោះ​ឆ្នោតជាតិ។

លោកឃឹមសំបូរត្រូវ​បានគេបាញ់​យ៉ាង​កៀកចំនួន​បីគ្រាប់​ និង​បាន​សម្លាប់​កូនប្រុសរបស់​លោក​អាយុ​២១ឆ្នាំ​ផង​ដែរ ​ដោយ​ស្នាដៃ​​ខ្មាន់កាំភ្លើង​ជិះ​ម៉ូតូ ​ដែល​មិនទាន់​ចាប់​ខ្លួនបាន​នៅឡើយ​ ​ចាប់​តាំង​ពី​ពេលនោះ​មក​។

យោង​តាម​របាយការណ៍ចេញ​កាលពីឆ្នាំ​២០០៩ របស់​អង្គការ​សិទ្ធិ​មនុស្ស​លីកាដូបានឲ្យដឹង​ថា អ្នក​យក​ព័ត៌មាន​១០នាក់​ត្រូវបាន​សម្លាប់​នៅក្នុងប្រទេស​កម្ពុជា​ចាប់​តាំងពី​ឆ្នាំ​១៩៩៣​មក ​ហើយ​មានករណី​​គំរាម​កំហែង​ចំពោះ​សុវត្ថិភាព​ផ្ទាល់​ខ្លួន​របស់​ពួកគេ​ជាច្រើនករណី​ទៀត​។​

មិន​មាន​ជន​ល្មើសណាម្នាក់​ត្រូវបាន​នាំ​ខ្លួនមក​កាត់​ទោស​ពីបទធ្វើ​ឃាត​អ្នក​យក​ព័ត៌មាន​នៅក្នុងប្រទេស​កម្ពុជា​ទេ។លោកប៉ែនសមិទ្ធិប្រធាន​ក្លឹប​អ្នក​កាសែត​កម្ពុជា បាន​មាន​ប្រសាសន៍ថា “ [ឃាត​កម្ម​] គឺ​ជាបញ្ហា​កង្វល់​ដ៏ធំ​មួយ​ ហើយ​ខ្ញុំ​ព្រួយ​បា​រម្ភ​អំពីសុវត្ថិ​ភាព​របស់​អ្នក​យក​ព័ត៌មាន​ដទៃ​ទៀត​​នៅក្នុងប្រទេសកម្ពុជា​”៕

ប្រែសម្រួលដោយឃិនណៃ

 

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស