ការបើកសវនាការរបស់សាលាដំបូងរាជធានីភ្នំពេញ ដើម្បីជំនុំជម្រះ លោក ម៉មសូណង់ដូម្ចាស់ស្ថានីយវិទ្យុសម្បុកឃ្មុំបានឈានចូលថ្ងៃទី២ហើយ កាលពីម្សិលមិញ តែការផ្តល់សក្ខីកម្ម គឺផ្តោតលើជនជាប់ចោទឈ្មោះប៊ុនរដ្ឋា មេដឹកនាំបង្កើតតំបន់អបគមន៍ដែលនៅមិនទាន់ចាប់ខ្លួនបាននៅឡើយ។
លោកសូណង់ដូនិងលោក រដ្ឋារួមជាមួយមនុស្សចំនួនប្រាំបីនាក់ទៀត ត្រូវបានតុលាការចោទប្រកាន់ពីបទដឹកនាំអ្នកភូមិនៅក្នុងខេត្តក្រចេះ ដើម្បីបំបែកខ្លួនពីការគ្រប់គ្រងរបស់រដ្ឋាភិបាល ជាការចោទប្រកាន់ ដែលពួកគាត់បានបដិសេធ។
អង្គការសិទ្ធិមនុស្ស បានច្រានចោលចំពោះការចោទប្រកាន់ចំពោះការបង្កើតអបគមន៍ថាគ្រាន់តែជាលេសរបស់រដ្ឋាភិបាល ដើម្បីបណ្តេញប្រជាពលរដ្ឋចំនួន៦០០គ្រួសារ ចេញពីភូមិប្រម៉ា ហើយបានហៅការចោទប្រកាន់មកលើលោក ម៉មសូណង់ដូថាជាគម្រោងការណ៍មួយ ដើម្បីបំភិតបំភ័យអ្នករិះគន់រដ្ឋាភិបាលផ្សេងទៀត។
សាក្សីចំនួនប្រាំបីនាក់ទៀត ដែលលោកសុកសំអឿន មេធាវីរបស់លោក ម៉មសូណង់ដូបានហៅមកនោះ បានបដិសេធនៅក្នុងសវនាការកាលពីម្សិលមិញថា លោកមិនមានជាប់ពាក់ព័ន្ធទេ។
លោក វិចគឹមឆនរស់នៅក្នុងភូមិប្រម៉ា និងជាសមាជិករបស់អង្គការក្រៅរដ្ឋាភិបាលរបស់លោក សូណង់ដូគឺសមាគមអ្នកប្រជាធិបតេយ្យ លើកឡើងថា “ លោកសូណង់ដូមិនមានជាប់ពាក់ព័ន្ធនៅក្នុងរឿងក្តីនេះទេពីព្រោះលោកមិនដែលចុះទៅខេត្តក្រចេះទេ ហើយលោកក៏មិនមានជាប់ពាក់ព័ន្ធនឹងសកម្មភាពរបស់លោកប៊ុនរដ្ឋាដែរ។លោកមិនដែលលើកទឹកចិត្តប្រជាពលរដ្ឋឲ្យធ្វើអ្វីមិនល្អនោះទេ”។
ប៉ុន្តែយោងតាមការរៀបរាប់របស់ព្រះរាជអាជ្ញាសក្ខីកម្មភាគច្រើនបំផុតនៅថ្ងៃនេះបានផ្តោតសំខាន់លើលោករដ្ឋា ដែលបានអវត្តមានក្នុងសវនាការថា ជាមេខ្លោងក្នុងគម្រោងការណ៍បង្កើតតំបន់អបគមន៍។លោកផនពន្លឺមន្ត្រីនគរបាលស្រុកឆ្លូង បានរៀបរាប់អំពីការធ្វើដំណើររបស់លោកចូលក្នុងភូមិប្រមា៉ មុនពេលមានការបណ្តេញចេញ ដើម្បីស៊ើបអង្កេត ចំពោះការតវ៉ារបស់អ្នកភូមិថា រដ្ឋាភិបាលបានប្រគល់ដីទៅឲ្យក្រុមហ៊ុនចម្ការកៅស៊ូឯកជនមួយ។
លោកបានមានប្រសាសន៍ថា “ នៅពេលខ្ញុំកំពុងប្រមូលព័ត៌មានពីប្រជាពលរដ្ឋពីរគ្រួសារនៅក្នុងភូមិប្រមា៉ស្រាប់តែប៊ុនរដ្ឋា បានដឹកនាំអ្នកភូមិប្រហែល១០០នាក់ មានកាន់ពូថៅនិងកាំបិតផ្គាក់ មកព័ទ្ធជុំវិញខ្ញុំ ហើយហែកឯកសាររបស់ខ្ញុំចោល។
ប៊ុនរដ្ឋា បាននិយាយថា មុនពេលអ្នកឯងមកជួបអ្នកភូមិ សូមនិយាយជាមួយខ្ញុំមុនសិន”។ លោកគង់វណ្ណៈអ្នកភូមិប្រម៉ាម្នាក់ទៀត ដែលត្រូវបានតុលាការចោទប្រកាន់ក្នុងករណីនេះដែរ និយាយថាលោក រដ្ឋាបានជ្រើសរើសគាត់ឲ្យជួយដាក់របាំងផ្លូវនៅជុំវិញសហគមន៍នៅចំថ្ងៃមានការបណ្តេញចេញ ។ លោកមានប្រសាសន៍ថា “ ខ្ញុំកាន់កាំបិតផ្គាក់មួយ ដើម្បីយាមការពាររបាំង ហើយអ្នកឯទៀតកាន់ស្នា។ប៊ុន រដ្ឋា បានប្រាប់អ្នកភូមិថានៅពេលយើងឃើញទាហានមកដល់ សូមរាយការណ៍ប្រាប់គាត់ ដើម្បីឲ្យយើងអាចទប់ទល់ជាមួយទាហានទាំងនោះ”។
ប៉ុន្តែលោកវណ្ណៈ បានបដិសេធចំពោះគំនិតបំបែកខ្លួនពីរដ្ឋាភិបាល។ លោកបាននិយាយថា “ ខ្ញុំគ្មានបំណងធ្វើសកម្មភាពប្រឆំាងរដ្ឋាភិបាល ឬបង្កើតតំបន់អបគមន៍ទេ។ គោលបំណងរបស់ខ្ញុំ គឺចង់បានដីតែប៉ុណ្ណោះ”។
នៅចំកណ្តាលបន្ទប់ក្នុងចន្លោះ រវាងភាគីចុងចោទ និងចៅក្រមមានថង់ចំនួនបួន ពេញដោយ “ អាវុធ” ដែលក្រុមអ្នកភូមិបានប្រើប្រាស់សម្រាប់ធ្វើស្រែចម្ការ ដូចជាប៉ែលនិងចបរួមជាមួយស្នា និងកាំភ្លើងខ្យល់ផងដែរ។
យោងតាមលោក សំអឿន និងលោកសំអាត ជាបុគ្គលិកសិទ្ធិមនុស្ស ដែលបានចូលរួមតាមដានដំណើរការបើកសវនាការនេះ បានឲ្យដឹងថាសាក្សីកាលពីថ្ងៃអង្គារ បានលើកឡើងថា ឧបករណ៍ទាំងនេះ គេបានប្រើតែធ្វើស្រែចម្ការ និងបាញ់សត្វទេ តែបន្ទាប់ពីការបណ្តេញចេញ នគរបាលបានបង្ខំឲ្យអ្នកខ្លះឈរកាន់ស្នា ដើម្បីថតរូប។
លោក សូណង់ដូ មើលទៅមានស្មារតីរឹងមាំ និងមានទឹកមុខញញឹម និងគ្រវីដៃដាក់ក្រុមអ្នកយកព័ត៌មាន ពេលចេញពីតុលាការ។ នៅក្នុងសវនាការ បុរសវ័យ៧១ឆ្នាំ ពាក់អាវដៃខ្លី និងពាក់ក្រវ៉ាត់ក យ៉ាងស្អាតសមរម្យ អង្គុយយ៉ាងស្ងាត់ស្ងៀម មិនមាត់កអ្វីទេ ក្នុងពេលផ្តល់សក្ខីកម្មអស់រយៈពេលប្រាំបីម៉ោង។
កាលពីថ្ងៃអង្គារ ព្រះរាជអាជ្ញា សន្និដ្ឋានភ្ជាប់លោកសូណង់ដូទៅនឹងការបង្កើតតំបន់អបគមន៍នៅក្នុងខេត្តក្រចេះ ដែលពេលនោះសាក្សីម្នាក់បានអះអាងថា លោករដ្ឋា បានកោះប្រជុំ ដោយមានកាន់រូបថតលោក ម៉មសូណង់ដូមួយសន្លឹកហើយនិយាយថា“ នេះជារូបថតមេដឹកនាំរបស់យើង”។
ពួកគេក៏បានអះអាងថាលោករដ្ឋាបានសម្លុតអ្នកភូមិឲ្យចូលរួមជាមួយអង្គការក្រៅរដ្ឋាភិបាលរបស់លោកម៉មសូណង់ដូ។
លោកជាបំរុង នាយករងអង្គការក្រៅរដ្ឋាភិបាលនេះ បានមានប្រសាសន៍កាលពីម្សិលមិញថា លោក រដ្ឋា គឺជាអ្នកស្ម័គ្រចិត្តរបស់សមាគមនេះ ប៉ុន្តែ គាត់ឈប់ធ្វើការដោយសារតែហេតុផលផ្ទាល់ខ្លួនកាលពីក្នុងខែធ្នូ ប៉ុន្មានខែបន្ទាប់ពីមានការចោទប្រកាន់ពីសកម្មភាពបង្កើតតំបន់អបគមន៍។
នៅពេលចាកចេញពីបន្ទប់សវនាការ លោកសំអឿន បានថ្លែងថា សំណុំរឿងចោទប្រកាន់កូនក្តីរបស់លោក មិនមានឯកសារគ្រប់គ្រាន់ទេ “ ដោយគ្រាន់តែផ្អែកភាគទៅលើអ្វី ដែលពួកគេ [ សាក្សី ] បានឮហើយព្រះរាជអាជ្ញាភាគច្រើន សួរសំណួរដឹកមុខ”។
ទោះជាយ៉ាងណាលោក សំអឿនបានមានប្រសាសន៍ថា លោកបារម្ភអំពីលទ្ធផលនៃការកាត់ក្តី។ លោក សំអឿន បានមានប្រសាសន៍ថា “ នៅក្នុងប្រទេសកម្ពុជា នៅតែគ្មានគំនិតចេះសង្ស័យឲ្យចំពោះហេតុផល” ដែលអយ្យការអាចបន្ថូរបន្ថយចំពោះការសង្ស័យ នៅក្នុងបទចោទប្រកាន់ ដើម្បីឲ្យរួចផុតពីការផ្តន្ទាទោស។
លោក យ៉េង វីរៈ នាយកប្រតិបត្តិមជ្ឈមណ្ឌលអប់រំច្បាប់សម្រាប់សហគមន៍ដែលបានចូលរួមស្តាប់សវនាការនេះដែរ បានហៅភស្តុតាងចោទប្រកាន់ថា“មិនរឹងមាំឡើយ”។ លោកបានបន្ថែមថា “ សក្ខីកម្ម គឺផ្អែកលើអ្វី ជាពាក្យថាខ្ញុំគ្រាន់តែបានឮប៉ុណ្ណោះ”។សវនាការបន្តនៅព្រឹកនេះទៀត៕
ប្រែសម្រួលដោយ ចេវប៊ុននី