ក្រសួងការបរទេសសហរដ្ឋអាមេរិកបានបញ្ជាក់ថា លោកប្រធានាធិបតី បារ៉ាក់អូបាម៉ា (Barack Obama) មានគម្រោង ដើម្បីចូលរួមក្នុងកិច្ចប្រជុំកំពូលអាស៊ាននៅក្នុងរាជធានីភ្នំពេញ នៅខែក្រោយនេះ ខណៈពេលដែលការគាំទ្រញត្តិតាមប្រព័ន្ធអុីនធើណិត ដែលជំរុញឲ្យលោកអូបាម៉ាលុបចោលដំណើរទស្សកិច្ចនេះ កំពុងតែកើនឡើង បើសិនជារដ្ឋាភិបាលកម្ពុជាមិនកែទម្រង់ប្រព័ន្ធបោះឆ្នោតទេនោះ។
យោងតាមច្បាប់ចម្លងមួយនៃសេចក្ដីប្រកាសព័ត៌មានដែលផ្សាយតាមគេហទំព័ររបស់ក្រសួងការបរទេសសហដ្ឋអាមេរិកបានឲ្យដឹងថា មន្ត្រីម្នាក់នៅបុរីញូវយ៉ក កាលពីថ្ងៃព្រហស្បតិ៍ បានបញ្ជាក់អំពីគម្រោងរបស់លោកប្រធានធិបតី ដើម្បីចូលរួមក្នុងកិច្ចប្រជុំកំពូលក្នុងតំបន់នៅរាជធានីភ្នំពេញ។
ពាក់ព័ន្ធនឹងកិច្ចប្រជុំរវាងរដ្ឋមន្ត្រីការបរទេសសហរដ្ឋអាមេរិក លោកស្រីហ៊ីលឡារីគ្លីនតុន (Hillary Clinton) កាលពីថ្ងៃព្រហស្បតិ៍សប្តាហ៍មុន និងថ្នាក់រដ្ឋមន្ត្រីការបរទេសមកពីបណ្តាប្រទេសអាស៊ាននោះ មន្ត្រីរូបនោះថ្លែងឲ្យដឹងថា ព្រឹត្តិការណ៍នោះគឺជាឱកាសមួយក្នុងចំណោមព្រឹត្តិការណ៍ផ្សេងៗទៀត ដើម្បី “រៀបចំដំណើរទស្សនកិច្ចរបស់លោកប្រធានាធិបតីទៅកាន់ប្រទេសកម្ពុជា ដើម្បីចូលរួមកិច្ចប្រជុំកំពូលអាស៊ាន”។
នៅក្នុងកិច្ចប្រជុំវេទិកាប្រចាំឆ្នាំដែលមានថ្នាក់ដឹកនាំកំពូលៗមកពីបណ្ដាប្រទេសជាសមាជិកអាស៊ាន និងបណ្តាមេដឹកនាំមកពីប្រទេសក្នុងតំបន់អាស៊ីប៉ាស៊ីហ្វិចជាច្រើនទៀតរួមមានប្រទេសចិន និងសហរដ្ឋអាមេរិក ធ្វើឡើងក្នុងពេលជាមួយគ្នានៅឆ្នាំនេះ ក្នុងកិច្ចប្រជុំកំពូលអាស៊ានចាប់ពីថ្ងៃទី១៨ ដល់ថ្ងៃទី២០ខែវិច្ឆិកា។
រហូតមកដល់ល្ងាចថ្ងៃព្រហស្បតិ៍ស្ថានទូតសហរដ្ឋអាមេរិកប្រចាំរាជធានីភ្នំពេញ បញ្ជាក់ថា សេតវិមានមិនទាន់បានបញ្ជាក់អំពីការចូលរួមរបស់លោកប្រធានាធិបតី អូបាម៉ានៅឡើយទេ។ ស្ថានទូតសហរដ្ឋអាមេរិកបានលើកឡើងកាលពីម្សិលមិញថា ឥឡូវនេះស្ថានទូត “ សង្ឃឹម” ថា លោកប្រធានាធិបតីនឹងចូលរួមក្នុងកិច្ចប្រជុំនេះ។
ប៉ុន្ដែសមាជិកសភាមកពីគណបក្សប្រឆាំងបានជំរុញឲ្យលោកប្រធានាធិបតី អូបាម៉ាលុបចោលគម្រោងបំពេញទស្សនកិច្ចរបស់លោក បើសិនជារដ្ឋាភិបាលមិនព្រមធ្វើកំណែទម្រង់គណៈកម្មាធិការជាតិរៀបចំការបោះឆ្នោត ដែលពួកគេចោទថា លម្អៀងទៅគណបក្សប្រជាជនកម្ពុជាដែលកំពុងកាន់អំណាចរបស់លោកនាយករដ្ឋមន្ត្រី ហ៊ុនសែនទេនោះ។
គណបក្ស សម រង្ស៊ី បានធ្វើញត្តិមួយ ហើយផ្សព្វផ្សាយតាមប្រព័ន្ធអុីនធើណិត កាលពីថ្ងៃពុធ ដោយលោកស្រីមូរសុខហួរ បានទាក់ទាញអ្នកគាំទ្រចំនួន៧៤២នាក់ បើគិតត្រឹមល្ងាចម្សិលមិញ។
ញត្តិដែលផ្ញើជូនចំពោះលោកប្រធានាធិបតីអូបាម៉ានោះ មានខ្លឹមសារថា”មិនត្រូវអនុញ្ញាតឲ្យរដ្ឋាភិបាលផ្ដាច់ការបង្ហាញអំពីដំណើរបំពេញទស្សនកិច្ចរបស់លោក ដើម្បីគាំទ្រការរំលោភសិទ្ធិមនុស្ស និងការលួចបន្លំក្នុងការបោះឆ្នោតឡើយ”។
សារមួយទៀតរបស់លោក សម រង្ស៊ី ប្រធានគណបក្ស សម រង្ស៊ី ដែលផ្សាយក្នុងគេហទំព័រគណបក្ស កាលពីថ្ងៃសុក្រ បានជំរុញឲ្យប្រជាពលរដ្ឋខ្មែរសញ្ជាតិអាមេរិកទាំងអស់ចុះហត្ថលេខាលើញត្តិនេះ ដើម្បីជំរុញលោកប្រធានាធិបតី អូបាម៉ា ឲ្យលុបចោលដំណើរបំពេញទស្សនកិច្ចរបស់លោក បើសិនជាមិនមានការកែទម្រង់ប្រព័ន្ធបោះឆ្នោតឲ្យបានត្រឹមត្រូវទេនោះ។
រដ្ឋាភិបាលបានច្រានចោលម្តងហើយម្ដងទៀតចំពោះសំណើឲ្យធ្វើកំណែទម្រង់គណៈកម្មាធិការជាតិរៀបចំការបោះឆ្នោតនេះ ដោយលើកឡើងថា គណៈកម្មាធិការនេះពិតជាឯករាជ្យ និងមិនលម្អៀង។
ឆ្លើយតបទៅនឹងញត្តិនោះ លោក ប៉ែនងឿន សមាជិកអង្គភាពព័ត៌មាន និងប្រតិកម្មរហ័សនៃទីស្ដីការគណៈរដ្ឋមន្ត្រីបានផ្សាយទស្សនៈបែបចំអកតាមគេហទំព័ររបស់ទីស្ដីការគណៈរដ្ឋមន្ត្រី ដោយបានហៅលោកស្រីមូរ សុខហួរ ថា “ ជាមនុស្សមិនចេះគួរសម និងក្រអឺតក្រទម”។
លោក ងឿន ក៏លើកឡើងផងដែរអំពីញត្តិនោះថា “ ជាការយល់ខុសមួយគួរឲ្យស្អប់ខ្ពើម” ដោយសារបានរំខានដល់លោកប្រធានាធិបតីអូបាម៉ា ដែលលោកកំពុងធ្វើយុទ្ធនាការបោះឆ្នោតបេក្ខភាពប្រធានាធិបតីម្តងទៀត។
លោក ងឿន ក៏បានលើកឡើងសំដៅចំពោះលោក សុរិយា ស៊ូបេឌី ប្រេសិតសិទ្ធិមនុស្សអង្គការសហប្រជាជាតិប្រចាំប្រទេសកម្ពុជា ដែលបានអំពាវនាវឲ្យមានការធ្វើកំណែទម្រង់នៅក្នុងប្រទេសកម្ពុជា ជាពិសេសគណៈកម្មាធិការជាតិរៀបចំការបោះឆ្នោត។
លោកងឿន បានសរសេរបន្ដថា “ លោកសុរិយា ស៊ូបេឌី គីជាក្មេងទំនើងដែលចង់បំផ្លាញតុក្កតាដ៏ល្អមួយ ហើយលោកស្រី មូរសុខហួរ ពេញចិត្តនឹងគាំទ្រអាកប្បកិរិយារបស់ក្មេងទំនើងនេះ”៕
ប្រែសម្រួលដោយឃិនណៃ