មន្ត្រីនគរបាល និងមន្ត្រីតុលាការនិយាយថា ស្នងការនគរបាលខេត្តព្រះវិហារ ត្រូវបានដោះលែងភ្លាមៗ កាលពីព្រឹកម្សិលមិញ បន្ទាប់ពីនគរបាលក្រុងសៀមរាបបានចាប់ខ្លួនគាត់តែប៉ុន្មានម៉ោង ដោយសារគាត់ទាញកាំភ្លើងខ្លីបាញ់នៅខាងក្នុងសណ្ឋាគារមួយក្នុងក្រុងសៀមរាប។
លោកសោតណោឌីស្នងការនគរបាលខេត្តសៀមរាប មានប្រសាសន៍ថា នៅវេលារំលង អធ្រាត្រយប់ថ្ងៃអាទិត្យ លោកម៉ៅពៅនៅពេលស្រវឹងជោក បានដកកាំភ្លើងខ្លីបាញ់ចំនួនពីបួនគ្រាប់ទៅប្រាំមួយគ្រាប់នៅខាងក្នុងសណ្ឋាគារម៉ែនបូរា៉ន់ ក្រុងសៀមរាប។ លោក ណោឌី ថ្លែងថា “ គាត់បានបាញ់ឡើងលើ ពីព្រោះគាត់ខឹងមេឃ”។
លោកទី សុវិនថាល់ ព្រះរាជអាជ្ញាអមសាលាដំបូងខេត្តសៀមរាប មានប្រសាសន៍ថា“ លោក ម៉ៅ ពៅ ផឹកច្រើនណាស់ ហើយស្រវឹងជោក គាត់បាត់ម្ចាស់ការនិងឈ្លោះប្រកែកជាមួយដៃគូរបស់គាត់ ដែលជានគរបាលមកពីក្រសួងមហាផ្ទៃ”។
លោក សុវិនថាល់បានមានប្រសាសន៍ថា ការបាញ់នេះបានធ្វើឲ្យខូចខាតពិដាន និងទ្វារមួយនៅក្នុងសណ្ឋាគារ។ លោកបន្ថែមថា ម្ចាស់សណ្ឋាគារមិនចង់ប្តឹងចំពោះការខូចខាតនេះទេ។
លោកសុវិនថាល់ បានបន្ថែមថាលោកបានដោះលែងលោកម៉ៅពៅ ពីមន្ទីរឃុំឃាំងកាលពីព្រឹកម្សិលមិញ។ លោកបានមានប្រសាសន៍ថា “ ខ្ញុំបានដោះលែងគាត់ តែក្នុងករណីរដ្ឋប្បវេណីប៉ុណ្ណោះប៉ុន្តែ គាត់នឹងត្រូវទទួលទោសពីបទបាញ់បោះសេរី និងខុសច្បាប់។លោក ម៉ៅពៅអាចប្រឈមនឹងការដាក់ទោសបែបរដ្ឋបាលរបស់នគរបាល ហើយគាត់អាចជាប់ពន្ធនាគារ”។
លោក រ័ត្នសុភា ប្រធានមន្ទីរព័ត៌មានខេត្តព្រះវិហារ បានមានប្រសាសន៍ថា លោកគ្រាន់តែឮថា លោកស្នងការត្រូវបានចាប់ខ្លួនមួយរយៈខ្លី។ លោកបានបន្ថែមថាលោកម៉ៅពៅបានលុបចោលការប្រជុំជាមួយមន្ត្រីខេត្ត ដែលគ្រោងនឹងធ្វើឡើងកាលពីម្សិលមិញ ដោយសារតែការចាប់ខ្លួនគាត់។
លោកម៉ៅពៅដែលជាស្នងការនគរបាលជាយូរមកហើយ ត្រូវបានគេគិតថាមានខ្នងក្រាស់។លោកម៉ៅ ចាន់តារាត្រូវជាបងប្រុសរបស់គាត់ គឺជាឧត្តមសេនីយ៍ឯកនគរបាលក្រសួងមហាផ្ទៃ។
ការបាញ់នេះ គឺជាហេតុការណ៍ចុងក្រោយបំផុតមួយបន្ទាប់ពីមានការបាញ់បោះពីសំណាក់មន្ត្រីរដ្ឋាភិបាលដ៏មានអំណាចនៅកម្ពុជា។
កាលពីខែមុន បុរសម្នាក់ដែលបើកបររថយន្តប្រណីតមួយគ្រឿង បានបាញ់ប្រហារដោយសារជម្លោះចរាចរណ៍បន្តិចបន្តួច។នគរបាលបានបដិសេធមិនប្រាប់ឈ្មោះបុរសរូបនោះឡើយ ហើយបុរសនោះមិនត្រូវបានចាប់ខ្លួនទេ។
នៅក្នុងខែមុននោះដែរ អភិបាលរងខេត្តតាកែវ បានបាញ់នៅក្នុងហាងខារា៉អូខេមួយកន្លែងនៅក្នុងខេត្ត ដោយបង្កឲ្យម្ចាស់ហាងរងរបួស។ លោកមិនត្រូវបានតុលាការចោទប្រកាន់់់ទេ។
ថ្លែងក្នុងសុន្ទរកថាកាលពីថ្ងៃទី២០ខែកញ្ញា លោកនាយករដ្ឋមន្ត្រីហ៊ុនសែនបានព្រមានចំពោះការបាញ់បោះ ដោយខុសច្បាប់ជាពិសេសនៅតាមទីកន្លែងមួយចំនួន ដូចជានៅក្នុងភោជនីយដ្ឋាន ដែលអាចបង្កផលប៉ះពាល់ជាអវិជ្ជមានដល់ក្តីសង្ឃឹមរបស់ប្រទេសកម្ពុជា ក្នុងការខិតខំធ្វើឲ្យប្រទេសក្លាយជាគោលដៅទេសចរណ៍ដ៏សំខាន់មួយ។
លោកណោឌី បានមានប្រសាសន៍ថានៅពេលលោកម៉ៅពៅបាញ់នោះគ្មានភ្ញៀវទេសចរបរទេសណានៅក្បែរកន្លែងកើតហេតុនោះទេ។
លោកលើកឡើងថា “ សណ្ឋាគារនោះមានតែភ្ញៀវខ្មែរ គ្មានជនបរទេសស្នាក់នៅឡើយ។ ដូច្នេះ កាលពីយប់មិញ គ្មានការចលាចលទេ ពីព្រោះភ្ញៀវទេសចរបរទេសសម្រាកនៅទីកន្លែងផ្សេងពីទីនោះ”៕
ប្រែសម្រួលដោយ ចេវប៊ុននី