ប្រជាពលរដ្ឋរាប់រយគ្រួសារ ដែលរស់នៅជិតអាកាសយានដ្ឋានអន្តរជាតិភ្នំពេញ កំពុងប្រឈមមុខនឹងការបណ្តេញចេញពីលំនៅដ្ឋានរបស់ខ្លួន ខណៈដែលការរៀបចំផ្នែកសន្តិសុខបានចាប់ផ្តើមសម្រាប់ថ្នាក់ដឹកនាំពិភពលោក ដែលនឹងអញ្ជើញមកចូលរួមកិច្ចប្រជុំកំពូលអាស៊ាននិងអាស៊ីបូពា៌នៅខែក្រោយ។
លោក សុខ សុធឿន ប្រធានខុទ្ទកាល័យរដ្ឋលេខាធិការដ្ឋានអាកាសចរណ៍សីុវិល បានមានប្រសាសន៍ថា ប្រជាពលរដ្ឋសរុបចំនួន៣៨៧គ្រួសាររស់នៅលើដីទំហំ៦,៣ហិកតាខាងកើតអាកាសយានដ្ឋានត្រូវបានជូនដំណឹងឲ្យរុះរើលំនៅដ្ឋានរបស់ខ្លួនដើម្បីសាងសង់ផ្លូវការពារសុវត្ថិភាព និងពង្រីកផ្លូវរត់ឲ្យបានវែងជាងមុន ដែលគេហៅថា
“ តំបន់ទ្រនាប់” សម្រាប់យន្តហោះដឹកគណៈប្រតិភូអន្តរជាតិរួមទាំងលោក បារ៉ាក់ អូបាម៉ា (Barack Obama) ប្រធានាធិបតីសហរដ្ឋអាមេរិកផងដែរ។
លោកបានមានប្រសាសន៍ថា “ យើងត្រូវការពង្រីកផ្លូវរត់ ហើយយើងគ្រោងនឹងសាងសង់ផ្លូវសម្រាប់ការពារសុវត្ថិភាពដល់គណៈប្រតិភូអន្តរជាតិ ដែលមកបំពេញទស្សនកិច្ចក្នុងប្រទេសកម្ពុជាដើម្បីចូលរួមកិច្ចប្រជុំកំពូលនៅថ្ងៃក្រោយ។ យើងសង្ឃឹមថា លោកប្រធានាធិបតី បារ៉ាក់ អូបាម៉ា នឹងអញ្ជើញមកតាមការអញ្ជើញផងដែរ”។
លោក សុខ សុធឿន បានបន្តថា កិច្ចប្រជុំមួយរវាងលោក ឧបនាយករដ្ឋមន្ត្រី សុខអាន និងមន្ត្រីនានាមកពីរដ្ឋលេខាធិការដ្ឋានអាកាសចរណ៍សីុវិលគ្រោងនឹងធ្វើឡើងនៅថ្ងៃនេះនៅឯទីស្តីការគណៈរដ្ឋមន្ត្រី ដើម្បីពិភាក្សាអំពីផែនការបណ្តេញប្រជាពលរដ្ឋ ព្រមទាំងការរៀបចំផ្នែកសន្តិសុខដល់ថ្នាក់ដឹកនាំពិភព លោកដែលនឹងមកដល់រាជធានីភ្នំពេញ ដើម្បីចូលរួមកិច្ចប្រជំុកំពូល ពីថ្ងៃទី១៨ដល់ថ្ងៃទី២១ ខែវិចិ្ឆកា ។
នៅពេលមានប្រសាសន៍ប្រាប់អ្នកយកព័ត៌មាន កាលពីថ្ងៃព្រហស្បតិ៍នៅបុរីញូវយ៉កមន្ត្រីក្រសួងការបរទេសសហរដ្ឋអាមេរិកបញ្ជាក់អំពីការចូលរួមរបស់លោក អូបាម៉ា នៅក្នុងកិច្ចប្រជុំកំពូលអាស៊ាន នារាជធានីភ្នំពេញ ដែលជាដំណើរទស្សនកិច្ចលើកដំបូងនិងមិនធ្លាប់មាននៅក្នុងប្រទេសកម្ពុជារបស់ប្រធានធិបតីសហរដ្ឋអាមេរិក។ លោក វេន ជាប៉ាវ (Wen Jiabao) នាយករដ្ឋមន្ត្រីចិន លោក វ៉្លាឌីមៀ ពូទីន (Vladimir Putin) ប្រធានាធិបតីរុស្សុី និងលោក ម៉ាន់មូហាន សុីង (Manmohan Singh) នាយករដ្ឋមន្ត្រីឥណ្ឌា ក៏គ្រោងនឹងអញ្ជើញមកចូលរួមកិច្ចប្រជុំកំពូលនេះដែរ។
ប្រជាពលរដ្ឋចំនួន៣៨៧គ្រួសារមកពីភូមិព្រៃជីសាក់ ភូមិថ្មគោល និងភូមិគោកចំបក់ក្នុងសង្កាត់ចោមចៅ ត្រូវបានដូនដំណឹងឲ្យរុសរើលំនៅដ្ឋានរបស់ខ្លួនលើកទី១កាលពីខែកក្កដា។ នៅពេលនោះ អាជ្ញាធរប្រាប់ពួកគេថា ការបណ្តេញចេញនេះ គឺដើម្បីពង្រីកអាកាសយានដ្ឋានឲ្យបានបីហិកតាថែមទៀតសម្រាប់ធ្វើផ្លូវរត់ និងចំណតយន្តហោះ។
កាលពីខែកញ្ញា រដ្ឋាភិបាលបានផ្អាកការអនុវត្តគម្រោងនេះ និងបានប្រាប់ប្រជាពលរដ្ឋចំនួន១៨២គ្រួសារឲ្យរុះរើលំនៅដ្ឋានរបស់ខ្លួនចេញ ដោយសារគម្រោងសាងសង់ផ្លូវសុវត្ថិភាពនៅជំុវិញអាកាសយានដ្នានសម្រាប់ដំណើរទស្សនកិច្ចរបស់លោក អូបាម៉ា។
លោក វ៉ាសារ៉ង ចៅសង្កាត់រងសង្កាត់ចោមចៅ បានមានប្រសាសន៍ថា បទបញ្ជាពង្រឹងសន្តិសុខជំុវិញអាកាសយានដ្ឋានសម្រាប់ថ្នាក់ដឹកនាំពិភពលោកទើបតែបានជូនដំណឹងដល់អាជ្ញាធរមូលដ្ឋានក្នុងពេលថ្មីៗនេះ។
លោកបានមានប្រសាសន៍ថា “ ពីមុនមកយើងមានគម្រោង ដើម្បីពង្រីកអាកាសយានដ្ឋានយូរដែរហើយ ប៉ុន្តែ យើងមិនដែលនិយាយអំពីសន្តិសុខទេ។ យើងទើបតែបានទទួលការណែនាំពីថ្នាក់លើ”។
លោក សៀន មា៉កគិនតុស (Sean McIntosh)អ្នកនាំពាក្យស្ថានទូតអាមេរិក ក្នុងរាជធានីភ្នំពេញបានបង្វែរសំណួរអំពីផែនការបណ្តេញប្រជាពលរដ្ឋ ទៅសួររដ្ឋាភិបាលកម្ពុជាវិញ។លោកមានប្រសាសន៍ថា “ ដើម្បីសន្តិសុខកិច្ចប្រជំុកំពូលអាសីុអាគ្នេយ៍ ខ្ញុំសូមបង្វែរសំណួរទៅសួររដ្ឋាភិបាលវិញ។យ៉ាងនេះ គឺជាការចាត់វិធានការរបស់រដ្ឋាភិបាលកម្ពុជា។ នេះមិនមែនសម្រាប់តែការអញ្ជើញមកដល់របស់លោក ប្រធានាធិបតីអូបាម៉ាប៉ុណ្ណោះទេ នេះក៏សម្រាប់ថ្នាក់ដឹកនាំពិភពលោកផងដែរ”។
លោក ម៉ាកគិនតុស បានបន្ថែមថា លោកមិនបានដឹងអំពីកិច្ចប្រជុំរវាងមន្ត្រីកម្ពុជា និងមន្ត្រីសហរដ្ឋអាមេរិក ស្តីអំពីការបណ្តេញប្រជាពលរដ្ឋ ឬការត្រៀមការពារសន្តិសុខដល់លោក អូបាម៉ា នោះទេ។ លោកបានមានប្រសាសន៍ថា “ យើងមិនដែលធ្វើសំណើបែបនោះទេ”។
នៅពេលសួរថា តើគម្រោងពង្រីកអាកាសយានដ្ឋាននៅក្នុងរាជធានីភ្នំពេញនេះកើតឡើង ឬយ៉ាងណានោះលោក ខែក នរិនដា ប្រធានទំនាក់ទំនងរបស់អាកាសយានដ្ឋានកម្ពុជា ដែលជាអ្នកគ្រប់គ្រងអាកាសយានដ្ឋានជាតិបានមានប្រសាសន៍ថា “ ការបណ្តេញប្រជាពលរដ្ឋពីសំណាក់អាជ្ញាធរមូលដ្ឋាននេះធ្វើឡើងដោយផ្អែកលើមូលដ្ឋានសុវត្ថិភាព និងសន្តិសុខ ដែលតម្រូវឲ្យស្របតាមបញ្ញត្តិរបស់អង្គការអាកាសចរណ៍សីុវិលអន្តរជាតិ”។
គ្រួសារដែលប្រឈមនឹងការបណ្តេញនេះ បានដាក់ពាក្យបណ្តឹងមករដ្ឋាភិបាលប្រឆាំង និងមន្ត្រីមូលដ្ឋាន ដែលពួកគេបាននិយាយថា ជាច្រើនឆ្នាំមកនេះបានអនុញ្ញាតឲ្យពួកគេសង់លំនៅដ្ឋានលើដីនេះតាំងពីដំបូងមក។ទោះជាយ៉ាងណាមន្ត្រីមូលដ្ឋាន
បានអះអាងថា គ្រួសារទាំងនេះកំពុងរស់នៅលើដីនេះដោយខុសច្បាប់ដែលការចោទប្រកាន់នេះកំពុងត្រូវបានសកម្មជនសិទ្ធិមនុស្សជំទាស់។ ប្រជាពលរដ្ឋក្នុងតំបន់នេះបាននិយាយកាលពីម្សិលមិញនេះថា ពួកគេមិនចេញពីផ្ទះដោយងាយៗនោះទេ។
អ្នកភូមិម្នាក់ឈ្មោះ ទេស តឿ អាយុ៧០ឆ្នាំ ដែលផ្ទះរបស់គាត់ស្ថិតក្នុងភូមិព្រៃជីសាក់ហើយកំពុងប្រឈមនឹងការឈូសបំផ្លាញចោល សម្រាប់គម្រោងពង្រីកអាកាសយានដ្ឋាននេះថា “ ខ្ញុំនឹងធ្វើអត្តឃាតដោយដុតខ្លួនឯងប្រសិនបើអាជ្ញាធរបំផ្លាញផ្ទះរបស់ខ្ញុំ ដោយមិនឲ្យប្រាក់សំណងទេនោះ”។
អ្នកស្រី ទេស តឿ បាននិយាយថា អ្នកស្រីបានទិញដីឡូត៍ទំហំ៨ម៉ែត្រគុណនឹង១៩ម៉ែត្រក្នុងតម្លៃ១៣.៥០០ដុល្លារ ការពីទសវត្សរ៍ឆ្នាំ១៩៨០ ។ អ្នកស្រី ច្រាយ និន អាយុ៣៤ឆ្នាំ តំណាងឲ្យប្រជាពលរដ្ឋក្នុងភូមិថ្មគោល និយាយថា “ យើងមិនព្រមចាកចេញទេ ប្រសិនបើអាជ្ញាធរបង្ខំយើងឲ្យចេញដោយគ្មានសំណងទេនោះ”។ អ្នកស្រីបន្ថែមថា ប្រជាពលរដ្ឋជិត៤០០គ្រួសារនឹងជួបជុំគ្នាតវ៉ានាថ្ងៃច័ន្ទ នៅមុខរដ្ឋសភាដែលនៅទៅនោះពួកគេនឹងដាក់ញត្តិប្រឆាំងនឹងគម្រោងពង្រីកអាកាសយានដ្ឋាននេះ៕
ប្រែសម្រួលដោយ ហម សុផាណ្ណា