មូលនិធិរូបិយវត្ថុអន្តរជាតិហៅកាត់ថា IMF បានលើកឡើងកាលពីថ្ងៃសុក្រថា ការនាំចេញបានច្រើន ចំនួនភ្ញៀវទេសចរកើនឡើងនិងវិស័យអចលនទ្រព្យរើបឡើងវិញ កំពុងតែជំរុញកំណើនសេដ្ឋកិច្ចឲ្យរឹងមាំក្នុងឆ្នាំនេះប៉ុន្តែ ទស្សនវិស័យអំពីកំណើនផលិតផលក្នុងស្រុកសរុបនៅតែអាចរងផលប៉ះពាល់ដោយសារអស្ថិរភាពសេដ្ឋកិច្ចពិភពលោក។
ថ្លែងទៅកាន់ក្រុមអ្នកយកព័ត៌មាននៅចុងបញ្ចប់នៃបេសកកម្មរយៈពេល១១ថ្ងៃ ដើម្បីវាយតម្លៃអំពីសេដ្ឋកិច្ចក្នុងប្រទេសកម្ពុជា លោកអូឡាហ្វ អាន់ធើរ៉ូបឺឌ័រស្ទ័រ (Olaf Unteroberdorster) អនុប្រធាន IMF ប្រចាំតំបន់អាស៊ីប៉ាស៊ីហ្វិក បានព្រមានថា ការធ្វើនិយតកម្មបន្ថែមទៀតនឹងត្រូវអនុវត្តដោយធនាគារកណ្តាលដើម្បីបញ្ចៀសរំហូរឥណទានច្រើនពេកក្នុងវិស័យធនាគារ។
មូលនិធិ IMF ព្យាករថា កំណើនផលិតផលក្នុងស្រុកសរុបរបស់កម្ពុជា នឹងឡើងដល់៦,៥ ភាគរយក្នុងឆ្នាំនេះ ស្របតាមការព្យាករ ដែលរដ្ឋាភិបាលបានធ្វើឡើងកាលពីខែកុម្ភៈ។ លោក អាន់ធើរ៉ូបឺឌ័រស្ទ័រ មានប្រសាសន៍តាមការព្រាងទុកថា “ ក្នុងរយៈពេលពីរបីខែនេះ អត្រាកំណើនក្នុងប្រទេសកម្ពុជា អាចឡើងដល់ប្រហែល៧,៥ភាគរយ ដរាបណាបន្តមានការរីកចម្រើនក្នុងបរិយាកាសពាណិជ្ជកម្ម ហេដ្ឋារចនាសម្ព័ន្ធ និងការផ្តល់សេវាសាធារណៈ”។
លោក អាន់ធើរ៉ូបឺឌ័រស្ទ័រ មានប្រសាសន៍នៅឯការិយាល័យរបស់មូលនិធិ IMF ប្រចាំរាជធានីភ្នំពេញថា “ ហានិភ័យ ដែលអាចកើតមានក្នុងប្រទេសកម្ពុជា អាចជាកត្តាស្មុគស្មាញមួយ ដោយភាគច្រើនកើតចេញពីអស្ថិរភាពក្នុងទីផ្សារការងារ អាកាសធាតុមិនល្អ និងការបង្កើនឥណទានយ៉ាងឆាប់រហ័ស ដែលធ្វើឲ្យប៉ះពាល់ភាពរឹងមាំរបស់ធនាគារ”។
ស្ថិតលើផ្លូវឆ្ពោះទៅរកអត្រាកើនឡើងជាង៣០ភាគរយក្នុងឆ្នាំនេះ ការបញ្ចេញឥណទានក្នុងប្រទេសកម្ពុជាស្ថិតក្នុងអត្រាខ្ពស់បំផុតនៅអាស៊ី។លោកមានប្រសាសន៍ថា កំណើនយ៉ាងឆាប់រហ័សនៃវិស័យធនាគារត្រូវការការឃ្លាំមើលឲ្យបានដិតដល់។
លោកបន្តថា “ វាក៏ប្រហែលជាទាមទារឲ្យមានការចាត់វិធានការបន្ថែមទៀតដែរ ដើម្បីទប់ទល់ការប្រថុយប្រថានហួសហេតុពីបណ្តាធនាគារនានា។ការឃ្លាំមើលដែលមានការសម្របសម្រួលបានល្អ ក្នុងចំណោមបណ្តាទីភ្នាក់ងារប្រឹក្សាយោបល់ពាក់ព័ន្ធទាំងអស់ ក៏សំខាន់ណាស់ដែរ ចំពោះការធ្វើឲ្យប្រាកដថា មានស្ថិរភាពក្នុងប្រព័ន្ធហិរញ្ញវត្ថុដែលកើនឡើងយ៉ាងឆាប់រហ័ស”។
ទោះជាយ៉ាងណា លោក អាន់ធើរ៉ូបឺឌ័រស្ទ័របានមានប្រសាសន៍ថា ធនាគារជាតិ នៃកម្ពុជា បានអនុវត្តតាមសេចក្តីផ្តួចផ្តើមមួយចំនួន ដើម្បីពង្រឹងនិយតកម្មក្នុងវិស័យធនាគារ។ លោកថ្លែងថា “ ការបង្កើតការិយាល័យឥណទានក្នុងពេលថ្មីៗនេះ កំពុងធ្វើឲ្យប្រសើរឡើងនូវការគ្រប់គ្រងហានិភ័យ និងការបែងចែកឥណទានពីសំណាក់ធនាគារ និងស្ថាប័នមីក្រូហិរញ្ញវត្ថុនានា”។
IMF លើកឡើងថា វិស័យកាត់ដេរក្នុងប្រទេសកម្ពុជាបន្តទទួលបានកំណើនពីរខ្ទង់ គឺកើនឡើងរហូតដល់ទៅ១៤ភាគរយក្នុងរយៈពេលប្រាំមួយខែដើមឆ្នាំនេះ ដោយសារមានតម្រូវការយូរអង្វែងនៅសហរដ្ឋអាមេរិក និងអឺរ៉ុប។ប៉ុន្តែលោក អាន់ធើរ៉ូបឺឌ័រស្ទ័រ បានព្រមានថា ខណៈពេលមានភាពរឹងមាំនោះ សេដ្ឋកិច្ចរបស់កម្ពុជាមិនទាន់ទទួលឥទ្ធិពលពីផលប៉ះពាលនៃក្តីបារម្ភក្នុងប្រទេសទាំងនោះ កំពុងតស៊ូពុះពារជម្នះនឹងឱនភាពសេដ្ឋកិច្ចខ្ពស់និងបណ្តាសេដ្ឋកិច្ចដែលដើរយឺតទៅៗ។
ហើយបន្ទាប់ពីព្យាយាមបានប៉ុន្មានឆ្នាំ ប្រទេសកម្ពុជា នៅតែធ្វើបានតិចតួចណាស់ក្នុងការធ្វើឱ្យសេដ្ឋកិច្ចរបស់ខ្លួនមានភាពសម្បូរបែប ដែលពឹងផ្អែកភាគច្រើនទៅលើសម្លៀកបំពាក់ដើម្បីរកប្រាក់ចំណូល។
ទឹកជំនន់ខ្លាំងទូទាំងប្រទេសកាលពីឆ្នាំមុន បានបង្ខំឲ្យរដ្ឋាភិបាលពិនិត្យសើរើទស្សនវិស័យស្តីពីផលិតផលក្នុងស្រុកសរុបរបស់ខ្លួនសម្រាប់ឆ្នាំ២០១១ ដោយបន្ទាបពី៧ភាគរយមកនៅត្រឹម៦ភាគរយវិញនៅមុននេះក្នុងឆ្នាំនោះ។ប៉ុន្តែ លោកអាន់ធើរ៉ូបឺឌ័រស្ទ័រ ថ្លែងថាផលប៉ះពាល់រយៈវែងនៃទឹកជំនន់កាលពីឆ្នាំមុន មិនធ្ងន់ដូចការរំពឹងទុកពីដំបូងនោះទេ។
លោកមានប្រសាន៍ថា “ កសិកម្មបន្តដើរតួនាទីសំខាន់មួយក្នុងសេដ្ឋកិច្ចនេះ។ការវាយតម្លៃរបស់យើងគឺថា ឆ្នាំនេះនឹងនាំមកនូវកំណើនដូចពេលកន្លងមកដែរហលយយើងជឿថា ឆ្នាំក្រោយ នឹងបន្តកើនឡើងប្រហែល៣ទៅ៤ភាគរយ”។
បន្ថែមពីលើការប្រសើរឡើងក្នុងវិស័យកាត់ដេរ ចំនួនភ្ញៀវទេសចរបានកើនឡើង២៧ភាគរយក្នុងត្រីមាសដំបូងដើមឆ្នាំ២០១២ បើប្រៀបធៀបទៅនឹងរយៈពេលដូចគ្នាកាលពីឆ្នាំមុន។ មានការរំពឹងទុកថា អតិផរណានឹងឈានដល់៣,៥ភាគរយនៅឆ្នាំនេះ និង៤ភាគរយក្នុងឆ្នាំ២០១៣៕
ប្រែសម្រួលដោយតែមសុខុម