26.3 C
Phnom Penh

អ្នក​ជំនាញ​លើកយកចំណុច​ធ្វើ​វិសោធនកម្ម​​អំ​ពី​សេចក្តី​ព្រាងច្បាប់​​ស្តី​ពី​ការ​ការ​ពារអ្នកបម្រើតាមផ្ទះ

ដោយ ឌឹ ខេមបូឌា ដេលី

បទវិភាគ

ក្រុម​មន្ត្រី​មក​ពី​អង្គភាពរបស់​រដ្ឋាភិបាល​​ អង្គការ​សហ​ប្រជា​ជាតិ ​​និង​មក​ពី​អង្គការ​ក្រៅ​រដ្ឋាភិបាល​​ កាល​ពី​ថ្ងៃ​សុក្រ​ បាន​លើក​យកចំណុចធ្វើវិសោធន​កម្ម​​​ក្នុងសេចក្តី​ព្រាង​ច្បាប់​ស្តី​ពី​អនុស្សរណៈ​នៃការ​យោគយល់​គ្នា ​ដែល​ត្រូវ​បានតាក់តែង​ឡើង​ ដើម្បី​ការ​ពារ​ប្រ​ជា​ពល​រដ្ឋ​ខ្មែរ ដែល​ទៅ​ធ្វើ​ការ​ជាអ្នក​បម្រើ​តាមផ្ទះ​នៅ​ប្រទេស​ម៉ាឡេស៊ី។

ខណៈដែលសេចក្តីព្រាង​ច្បាប់​ដើម​ធ្វើ​ឡើង​ដោយ​រដ្ឋាភិបាល​ប្រទេស​ម៉ាឡេស៊ី​ បាន​ទម្លាក់ការ​ទទួល​ខុសត្រូវ​អំពី​សុវត្ថ​ិភាព​ដល់​អ្នកទាំងនោះ ទៅលើ​និយោជក​ និង​ភ្នាក់​ងារ​ជ្រើស​រើសពលករ​​ ស្រាប់តែ​អ្នក​ជំនាញ​ចូល​រួមក្នុង​សិក្ខាសាលា​នៅ​រាជ​ធានី​ភ្នំពេញ​ កាល​ពី​ថ្ងៃ​សុក្រ​ បាន​ពិនិត្យ​ឡើង​វិញ​អំពី​អនុស្ស​រណ​ៈ​ ហើយបាន​លើក​ឡើង​ថា​ សេចក្តី​​ព្រាង​ច្បាប់​នេះ​ គួរបញ្ជាក់​លម្អិត​ថែម​ទៀត​អំពី​បរិមាណ​ប្រាក់​ឈ្នួល​ទាប​បំផុត​ ថ្លៃទិដា្ឋការ​និ​ងការ​ទទួល​ខុស​ត្រូវ​របស់​និយោ​ជក​ចំពោះ​អ្នកបម្រើតាម​ផ្ទះ​របស់​ពួក​គេ​។

លោក ហូ វណ្ឌី អនុប្រធាន​នាយកដ្ឋាន​ការ​ងារ​របស់ក្រសួង​ការងារ​ ដែល​បាន​ចូល​រួម​ក្នុង​សិក្ខាសាលានោះ​មាន​ប្រសាសន៍​ថា “ ​យើង​បាន​ពិនិត្យ​គ្រប់​ចំណុច​ទាំង​អស់​ ​បើ​សិន​យើង​ឃើញ​មានចំណុច​ណា​មួយមិន​សម​រម្យ​ ឬ​មិន​សម​ស្រប​តាម​ច្បាប់​ យើង​ដូរ​ចំណុច​នោះ​​ដើម្បី​ការពារ​ប្រយោជន៍​របស់កម្មករ​ និង​ដើម្បី​ការ​ពារ​ពួក​គេ”។

សេចក្តីព្រាង​ច្បាប់​ស្ដី​ពី​អនុស្សរណៈ​នេះ​ ធ្វើឡើង​បន្ទាប់​ពី​លោក​នាយក​រដ្ឋ​មន្ត្រី​ ហ៊ុន សែន បាន​ផ្អាក​ការ​បញ្ជូន​ស្ត្រី​អ្នក​បម្រើតាម​ផ្ទះ​​ទៅ​កាន់​ប្រទេស​ម៉ាឡេស៊ី មួយ​រយៈ​សិន​ កាល​ពី​ខែ​តុលា ​ឆ្នាំ​មុន បន្ទាប់​ពី​មាន​ករណី​នៃ​ការ​រំលោភ​បំពានលើរាង​កាយ​ និង​ការ​រំលោភ​​បំពាន​ផ្លូវ​ភេទ​មក​លើ​ស្ត្រីខ្មែរ​អ្នក​បម្រើ​តាម​ផ្ទះ​​ និង​មាន​សេចក្តីរាយការណ៍អំពីការធ្វើ​អត្ត​​ឃាតផង​ដែរ​​ ដែល​ធ្វើ​ឲ្យ​មាន​ការ​ចាប់​អារម្មណ៍​​ពី​សាធារណជន។

លោក​ស្រី​ ជេនណា ហូលីដេ (Jenna Holliday) ទី​ប្រឹក្សាផ្នែក​ស្ត្រីរបស់​អង្គការ​សហ​ប្រជា​ជាតិ​​មាន​ប្រសាសន៍​ថា ការ​កែប្រែ​គឺការ​ចាំ​បាច់​ដើម្បី​ធ្វើឲ្យ​អនុស្សរណៈ​នេះ​កាន់តែ​ល្អ​។

លោក​ស្រី ហូលីដេ បាន​ថ្លែង​បន្ដ​ថា “ ​មាន​​មាត្រា​មួយបាន​ចែង​មិន​ច្បាស់​លាស់​អំពី​ប្រាក់​​ឈ្នួល​ជា​មូល​ដ្ឋាន​ ដោយ​គ្រាន់​តែ​ចែង​ថា គួរ​តែ​មាន​ការ​យល់​ព្រម​​គ្នា​ រវាងនិយោជក និងនិយោជិត”។ លោក​ស្រី​កត់​សម្គាល់​ថា ប្រាក់​ឈ្នួល​ទាប​បំផុតក្នុងប្រទេស​ម៉ាឡេស៊ី គឺ​២៩៧​ដុល្លារ​ក្នុង​មួយ​ខែ​ ​ហើយ​អ្នក​ចូល​រួម​សិក្ខាសាលា​ទាំង​អស់​ បានយល់​ព្រម​ឲ្យ​ស្ត្រី​ខ្មែរអ្នកបម្រើតាមផ្ទះ ​គួរ​តែ​ទទួល​បាន​នូវ​សិទ្ធិ​ដូច​គ្នា​ និងជនជាតិ​ម៉ាឡេស៊ី​ដែរ​។

លោកស្រី ហូលីដេ ​បន្ដ​ទៀត​ថា  “ ​ទោះ​​បី​ជា​អនុស្សរណៈ​នៃ​ការ​យោគ​យល់​គ្នា​បាន​ផ្ដល់​ការ​ការ​ពារ​នៅ​លើ​ពិភព​លោក​ក៏ដោយ​ ក៏រដ្ឋាភិបាល​គួរ​តែ​យក​ចិត្ត​ទុក​ដាក់​គិត​គូរអំពី​ការ​ការ​ពារ​នៅថ្នាក់ជាតិ​​ និងគួរពិនិត្យមើល​ចំណុច​ចន្លោះ​ប្រហោង​នៅមុន​ពេល​ចាប់​ផ្ដើម​​ការ​ពិភាក្សា​ថា តើ​ពេល​ណា​គួរ​បញ្ជូន​ស្ត្រី​អ្នកបម្រើតាមផ្ទះ​​ទៅ​ប្រទេស​ម៉ាឡេស៊ី​​ម្ដង​ទៀត​”។

មាត្រា​ផ្សេង​ៗ​ទៀត​ដូច​ជា​ចែងអំពីអាយុ​ទាបបំផុត​២១​ឆ្នាំ​ សម្រាប់​ស្ត្រីអ្នកបម្រើតាម ផ្ទះ​ត្រូវ​បាន​អ្នក​ចូល​រួម​ក្នុងសិក្ខាសាលា​នោះ​យល់​ព្រម​។ ទោះ​ជាយ៉ាងណា​ អ្នក​ដែល​បាន​ចូល​រួម​សិក្ខាសាលា​បាន​លើក​ឡើង​ថា អាយុ​ច្រើន​បំផុត​នៃ​ស្ត្រី​អ្នកបម្រើតាមផ្ទះ​ មាន​អាយុ​​៤៥​ឆ្នាំ​ គួរ​តែ​លុប​ចេញ​ពី​អនុស្សរណៈ​។ អ្នក​ចូល​រួមក្នុង​សិក្ខាសាលា​នោះ​ក៏​បាន​យល់​ព្រម​ផង​ដែរ​ អំពី​ស្ត្រី​ធ្វើការ​ក្នុង​ស្រុក​គួរ​តែ​មាន​សិទ្ធិ​​ឈប់​សម្រាក​មួយ​ថ្ងៃ​ក្នុង​មួួ​យសប្ដាហ៍​។ បច្ចុប្បន្ន​​នេះ​ សេចក្តីព្រាង​ច្បាប់​នោះ​បានលើក​ឡើង​​ថា និយោ​​ជកត្រូវ​តែ​ ផ្ដល់​ឲ្យ​ស្ត្រី​បម្រើ​តាម​ផ្ទះនូវ​ពេល​ឈប់​សម្រាក​ឲ្យបានសម​រម្យ​”។

ចំណុច​មួួយ​ក្នុង​ចំណោម​ចំណុច​សំខាន់​​បំផុត​នៃ​ការ​ពិភាក្សា​នោះ​ គឺ​ពិភាក្សាអំពី​មាត្រា​១១​នៃ​អនុស្សរណៈ​ដែល​ចែង​ថា បើសិន​ជា​ស្ត្រី​អ្នកបម្រើតាមផ្ទះរត់​គេច​ “ ​នោះ​លិខិត​ឆ្លង​ដែន​របស់​ពួក​គេ​ត្រូវ​បាន​ដក​ហូត ហើយ​​មិន​អនុញ្ញាត​ឲ្យ​ចូល​ទៅ​ធ្វើ​ការ​នៅ​ប្រទេស​ម៉ាឡេស៊ី​ទៀតទេ​”៕

ប្រែសម្រួល​ដោយ ឃិន ណៃ

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស