យោងតាមនគរបាលបានឲ្យដឹងកាលពីម្សិលមិញថា មនុស្សចំនួនប្រាំមួយនាក់បានស្លាប់ និង១៤នាក់ទៀតរងរបួសនៅក្នុងគ្រោះថ្នាក់រថយន្ដពីរករណី កាលពីថ្ងៃសុក្រនិងថ្ងៃសៅរ៍។
លោក ប៉ែន ឃុន អនុប្រធាននគរបាលចរាចរណ៍រាជធានីបានមានប្រសាសន៍ថា ក្នុងរាជធានីភ្នំពេញ រថយន្ដម៉ាកតូយ៉ូតាកាមរីមួយគ្រឿងដែលមានអ្នកបើកបរម្នាក់ និងអ្នកជិះជាមួយបីនាក់ដែលគេជឿថា កំពុងតែផឹកស្រានោះបានបុកប្ដីប្រពន្ធពីរនាក់ដែលកំពុងជិះម៉ូតូទៅផ្ទះតាមផ្លូវជាតិលេខ២ ក្នុងខណ្ឌមានជ័យវេលាម៉ោងប្រហែលជា៣ទៀបភ្លឺកាលពីថ្ងៃសុក្រ។
លោកបានថ្លែងថា បុរសចំនួនបីនាក់នៅក្នុងរថយន្ដបានស្លាប់នៅពេលនគរបាលបានទៅដល់កន្លែងកើតហេតុ ហើយបុរសទី៤នៅក្នុងរថយន្ដ និងប្ដីប្រពន្ធពីរនាក់ត្រូវបានគេបញ្ជូនទៅមន្ទីរពេទ្យកាល់មែ៉តទាំងរបួសធ្ងន់ ហើយក្រោយមកបុរសជាប្ដីបានស្លាប់នៅទីនោះ។
លោក ប៉ែន ឃុន បានមានប្រសាសន៍ថា “រថយន្ដបានបុកម៉ូតូ រួចហើយបានជ្រុលទៅបុកដើមឈើពីរដើមនៅចិញ្ចើមផ្លូវ បន្ទាប់មកទៀតក៏បានជ្រុលទៅបុកបង្គោលប៉ាណូ”។ លោកបានបន្ដថា “ ប្ដីដែលបើកម៉ូតូបានស្លាប់កាលពីថ្ងៃសៅរ៍ ហើយគ្រូពេទ្យបានប្រាប់ថាខ្លួននឹងកាត់ជើងម្ខាងរបស់ប្រពន្ធគាត់។ យើងគិតថា បុរសទាំងអស់នៅក្នុងរថយន្ដកាមរីនេះមានសភាពស្រវឹងខ្លាំង ហើយបានបើកបរយ៉ាងលឿន”។ លោកបានថ្លែងថា នគរបាលបានរកឃើញគម្របដបស្រាបៀរជិត៤០នៅក្នុងរថយន្ដនោះ។
នគរបាលស្រុកភ្នំស្រួចបានឲ្យដឹងថា នៅក្នុងគ្រោះថ្នាក់ចរាចរណ៍មួយករណីទៀតកាលពីថ្ងៃសៅរ៍ ក្នុងខេត្តកំពង់ស្ពឺ មនុស្សពីរនាក់បានស្លាប់ និង១២នាក់ផ្សេងទៀតរងរបួសនៅពេលរថយន្ដម៉ាកហីឡុចវីហ្គោ បានបុកជាមួយនឹងរថយន្ដវ៉ែនមួយគ្រឿង ដែលធ្វើដំណើរបញ្ច្រាសទិសគ្នានៅពេលមានភ្លៀងធ្លាក់ខ្លាំងតាមបណ្ដោយផ្លូវជាតិលេខ៤ក្នុងស្រុកភ្នំស្រួច។
លោក សួស អូន ប្រធាននគរបាលចរាចរស្រុកភ្នំស្រួចមានប្រសាសន៍ថា “យើងបានឃើញថា អ្នកបើករថយន្ដវីហ្គោ បានស្លាប់នៅក្នុងរថយន្ដ ហើយអ្នករងរបួសនៅក្នុងរថយន្ដទាំងពីរត្រូវបានបញ្ជូនទៅកាន់មន្ទីរពេទ្យបង្អែកខេត្ត ក្រោយមកជនរងគ្រោះម្នាក់ក្នុងចំណោមជនរងគ្រោះទាំងអស់បានស្លាប់នៅទីនោះ”។
លោក សួស អូន បានមានប្រសាសន៍បន្ថែមទៀតថា ជនរងគ្រោះប្រាំបួននាក់ក្នុងចំណោមជនរងគ្រោះទាំងអស់ដែលរងរបួសធ្ងន់ ក្រោយមកត្រូវបានបញ្ជូនបន្តទៅមន្ទីរពេទ្យកាល់មែ៉ត។
លោក ស៊ិន វ៉ាន់ស៊ី ប្រធាននគរបាលចរាចរខេត្តកំពង់ស្ពឺបានឲ្យដឹងថា “យើងមិនអាចនិយាយបានថា ភាគីណាត្រូវ ឬក៏ខុសនោះទេពីព្រោះយើងកំពុងតែស៊ើបអង្កេត”៕
ប្រែសម្រួលដោយ ស៊ា ស៊ុយឈាង