29 C
Phnom Penh

ដោយ​​​សារតែ​​​តុលាការ​​​តម្កល់​​​សាលក្រម​​​ផ្ដន្ទា​​​ទោស​​​ប្រ​​​ពន្ធ​​​របស់​​​ខ្លួន លោក ខូវ ជឺលី ត្រូវ​​​ចូល​​​មន្ទីរ​​​ពេទ្យ

ដោយ ឌឹ ខេមបូឌា ដេលី

បទវិភាគ

​ពេល​​​កំពុង​​​សម្រាក​​​ព្យាបាល​​​ជំជឺនៅ​​​ក្នុង​​​គ្លីនិក ណាហ្គា ក្នុង​​​រាជធានី​​​ភ្នំពេញ​​​កាល​​​ពី​​​ម្សិល​​​មិញ លោក ខូវ​​​ ជឺលី សេដ្ឋ​​​ីល្បី​​​ឈ្មោះ​​​ក្នុង​​​​​​ស្រុក​​​ម្នាក់​​​មាន​​​ប្រសាសន៍​ថា ​​​លោក​​​ប្រហែល​​​ជា​​​អំពាវ​​​នា​​​វសុំ​​​ឲ្យ​​​លោកនាយក​​​រដ្ឋ​​​មន្ត្រី​​​ជួយ​​​អន្ដរា​​​គម​​​ន៍​​នៅ​ក្នុង​​​​ការ​តម្កល់​សាល​ក្រម​ផ្តន្ទា​ទោស​​​​​​ប្រ​​​ពន្ធ​​​របស់​​​លោកពី​​​បទ​​​ប៉ុនប៉ង​​​មនុស្ស​​​ឃាត​​​កាល​​​ពី​​​ថ្ងៃ​​​សុក្រ។ 

​​​​​​​​លោក ជឺលី អាយុ​​​៨៣​​​ឆ្នាំ នៅ​​​តែ​​​បន្ដ​​​អះអាងពី​ភាព​គ្មាន​​​ទោស​​​របស់​ប្រ​​​ពន្ធ​​​​លោក​​​​ចាប់​​​​តាំង​ពី​រឿង​ក្តី​នេះ​​បាន​ដំណើរ​​ការ​ក្នុង​តុលាការ​អស់​រយៈពេល​ពីរ​ឆ្នាំ​មក ហើយ​​​លោក​​​មាន​​​ប្រសាសន៍​​​កាល​​​ពី​​​ម្សិល​​​មិញ​​​ថា ​​​ការ​​​សម្រេច​​​របស់​​​តុលាការ​​កំពូល​ក្នុង​ការ​តម្កល់​​​សាល​​​ក្រម​​​​ផ្តន្ទា​ទោស​​​​ប្រ​​​ពន្ធ​​​របស់​​​លោក​នោះ បាន​​​ធ្វើ​​​ឲ្យលោក​​​តក់​​​ស្លុត​​​រហូត​​​ត្រូវ​​​ចូលសម្រាក​​​ព្យា​​​បាល​​​នៅ​​​មន្ទីរ​​​ពេទ្យ។

លោក​​​ក៏​​​បាន​​​មានប្រសាសន៍​​​ផង​​​ដែរ​​​ថា ​​​លោកជឿជាក់​​​ថា កូន​​​ប្រ​​​សា​​​របស់​​​លោក គឺ​​​លោក​​​ ស៊ុន ចាន់​​​ថុល អនុប្រធាន​​​ក្រុម​​​ប្រឹក្សា​​​អភិវឌ្ឍន៍​កម្ពុជា​ នឹង​​​ “ ស្ងប់​​​​អារម្មណ៍” បើ​​​មិន​​​អ៊ីចឹង​​​ទេ លោក​​​នឹង​​​អំពាវ​​​នាវ​​​សុំ​​​ឲ្យ​​​លោក​​នាយក​​​រដ្ឋ​​​មន្ត្រី ហ៊ុន សែន រក​​​យុត្តិ​​​ធម៌​​​ឲ្យ​​​រូប​​​លោក និង​​​ប្រ​​​ពន្ធ​​​របស់​​​លោក​​​ដែល​​​កំពុង​​​ជាប់​​​ពន្ធ​​​នាគារ។

ដោយ​​​​ហៅ​​​កូន​​​ប្រសារបស់​លោក​​​​ថា ជា​​​ “ បុរស​​​ល្អ” លោក ជឺលី ​​​មាន​​​ប្រសាសន៍​​​ថា​​​ជម្លោះ​ក្នុង​គ្រួសារ​នាំ​ឲ្យ​ុ​មាន​បញ្ហា​នេះ ​​​ហើយ​​​​​លោក​​​សង្ឃឹម​​​ថា កូន​​​ប្រ​​​សា​​​របស់​​​លោក​​​នឹង​​​មិន​​​ត្រូវ​​​បាន​​​គេ​​​ប្រើ​​​ឲ្យ​​​ប្ដឹងបន្ត​​​ទៀត​​​នោះទេ​​​។

លោក ជឺលី មានប្រសាសន៍ថា “ ខ្ញុំ​​​គិត​​​ថា កូន​​​ប្រសារបស់​​​ខ្ញុំ​​​នឹង​​​ស្ងប់​​​​អារម្មណ៍ ​​​ហើយ​​​ថា ​​​គាត់​​​នឹង​​​មិន​​​បំផ្លាញ​​​ខ្ញុំ​​​និង​​​ប្រពន្ធ​​​ខ្ញុំ​​​ទៀត​​​ទេ”។

អ្នក​​​ស្រី ខូវ សេង​​​ចន្ដា អាយុ​​​៥០​​​ឆ្នាំ ​​​ប្រពន្ធ​​​​​​របស់​​​លោក ជឺលី ត្រូវ​​​បាន​​​ចាប់​​​ខ្លួន​​​កាល​​​ពីខែ​​​កក្កដា​​​ ឆ្នាំ២០១០ពីបទ​​​រៀប​​​ចំ​​​ផែន​​​ការ​​​សម្លាប់​​​​​​កូន​​​ស្រី​​​របស់​​​លោក​​ ជឺលី ឈ្មោះ ស៊ុន សុថា ​​​ប្រពន្ធ​​​របស់​​​លោក ស៊ុន​ចាន់ថុល ព្រម​​​ទាំង​​​កូន​​​ស្រី​​​អាយុ​​​៩​​​ឆ្នាំ​​​របស់​ពួកគាត់។​​​

កាលពីខែ​​​កុម្ភៈ ឆ្នាំ​​​២០១១ អ្នក​​​ស្រី​​​ សេង​​​ចន្ដា ត្រូវ​​​បាន​​​ផ្ដន្ទាទោស​​​ពីបទ​​​សម​​​គំនិត​​​ជា​​​​​​មួយ​​​​​​ស្ត្រី​​​អ្នក​​​បម្រើ​​​ឈ្មោះ ចាន់ សុខា ដើម្បី​​​ជួល​​​ស្ត្រី​​​អ្នក​​​បម្រើម្នាក់​​​ទៀត​​​ឈ្មោះ​​​ នាង ​​​ស៊ីណាត ដែល​​​ធ្វើការ​​​ឲ្យ​​​លោក​​​ ចានថុល ​​​ដើម្បី​​​​​​​​​ឲ្យ​​​អ្នក​​​សមគំនិត​​​ទី៤ ​​​ឈ្មោះ ​​​សុខ ​​​លក្ខណ៍ ​​​អាច​​​​ចូល​​​ទៅ​ក្នុង​​​ផ្ទះ​​​របស់​​​លោក ចាន់​​​ថុល​​​ នៅ​​​យប់​​​រៀបចំ​ផែន​​​ការ​​​ធ្វើ​​​ឃាត​​​នេះ​ កា​​ល​ពី​​​ខែ​​​មិថុនា ឆ្នាំ​​​២០១០។

អ្នក​​​ស្រី​​​ សេង​​​ចន្ដា និង​​​ សុខ លក្ខណ៍​ មាន​​​​ទោស​​​ជាប់​​​ពន្ធ​​​នាគារ​​​រយៈពេល​​​២០​​​ឆ្នាំ ពី​​​បទ​ចូល​រួម​​​​​ក្នុង​​​ផែន​​​ការ​​​ធ្វើ​​​ឃាត​នេះ​។​​​ ចំណែក​​​នាង សុខា និង​​​នាង ស៊ីណាត ម្នាក់ៗ​​​ត្រូវ​​​ជាប់​​​ពន្ធ​​​នាគារ​​​រយៈ​​​ពេល​​​១៨​​​ឆ្នាំ។

នាង សុខា ក៏​​​បាន​​​ភ្ជាប់​​​លោក ជឺលី ក្នុង​​​ផែន​​​ការ​​​ធ្វើឃាត​​​នេះ​​​ដែរ។ ​អំឡុង​​​ពេល​​​ សវ​​​នាការ​​​ជំនុំ​​​ជម្រះ​​​នៅ​​​ឯសាលា​​​ឧទ្ធរណ៍ ​​​នាង សុខា ​​​បាន​​​​​​និយាយថា ខ្លួន​​​ធ្វើតា​​​បញ្ជា​របស់​​​អ្នក​​​ស្រី​​​សេង​​​ ចន្ដា ហើយ​​​ថា លោក ជឺលី និង​​​សាច់​​​ញាតិ​​​បីនាក់​​​ផ្សេង​​​ទៀត ក៏​​​បាន​​​ពាក់​​​ព័ន្ធ​​​ក្នុង​​​ផែន​​​​​​ការ​​​ធ្វើ​​​ឃាត​​​នេះ​​​ដែរ។

លោក ស៊ុន ចាន់​​​ថុល បាន​​​ដាក់​​​ពាក្យ​​​បណ្ដឹង​​​​​​ដាច់​​​ដោយ​​​ឡែក​​​ពីគ្នា កាល​​​ពី​​​ខែ​​​មករា ឆ្នាំ​​​២០១២​​​ ប្តឹង​​​​លោក ជឺលី ​​​លោក ​​​ខូវ ​​​ផល្លា​​​បុត្រ ​​​ដែល​ជា​កូន​​ប្រុស​របស់​​​​លោក​ អ្នក​​​ស្រី ​​​លី ​​​ហួង ​​​ប្រពន្ធ​​​របស់​​លោក ផល្លាបុត្រ និង​​​ឈ្មោះ ​​​ហ៊ុយ សុខលាភ កូន​​​​​​ស្រី​​ចុង​​​របស់​​​លោក ​​​ជឺលី ​​​ពីបទ​​​​រួម​គំនិត​​​​​​​​ធ្វើ​​​ឃាតនេះ។

លោក ចាន់ថុល មិន​​​អាច​​​ទាក់​​​ទង​​​សុំ​​ការ​អត្ថាធិប្បាយ​​​បាន​​​ទេ កាល​​​ពី​​​ម្សិល​​​មិញ។  នៅ​​​ខាង​​​ក្រៅ​​​តុលាការ​​​កំពូល​​​ កាល​​​ពី​​​ថ្ងៃ​​​សុក្រ លោក ចាន់​​​ថុល ​​​បាន​​​បដិសេធថា ពាក្យ​​​បណ្ដឹង​​​​​​នោះ​​គ្មាន​​​អ្វី​​​ពាក់ព័ន្ធ​​​ជាមួយ​​​ជម្លោះ​​​គ្រួសារ និង​​​មរតករបស់​​​លោក ជឺលី​​​ នោះ​​​ទេ​​​។​​​​​​​​​​​​​​​​​​​​​​​​​​​​​​​​​​​​​​​លោក ចាន់​​​ថុល ​ប្រាប់​​​អ្នក​​​យក​​​ព័ត៌មាន​​​​​​ថា “ ខ្ញុំ​​​សូម​​និយាយថា ស៊ុន ចាន់​​​ថុល និង​​​ គ្រួសារ​​​របស់​​​ ស៊ុន ចាន់ថុល មិន​​​ចង់​​​បាន​​​លុយ​​​មួយ​​​សេន ពី​​​ឧកញ៉ា ខូវ ជឺលី​​​ នោះទេ”។

លោក ប៉ាល់ ច័ន្ទតារា មេធាវី​​​របស់​​​លោក ​​​ចាន់​​​ថុល បាន​​​បញ្ជាក់​​​ថា រឿង​ក្តី​ប្តឹង​លោក ​​​ជឺលី និង​​​អ្នក​​​ផ្សេង​​​ទៀត​​​នោះ ត្រូវ​​​បានប្ដឹង​​​កាល​ពី​​​ប្រាំមួយ​​​ខែមុន។ លោកបាន​​​មាន​​​ប្រសាសន៍ថា “ខ្ញុំ​​​គិត​​​ថា ​​​រឿង​​​ក្ដី​​​នេះ នៅ​​​មិន​​​ទាន់​​​ចប់​​​ទេ”។

លោក ឯក ឆេង​​​ហួត ព្រះរាជអាជ្ញារង​​​​អម​​​​​​សាលាដំបូង​​​រាជធានី​​​ភ្នំពេញ​​​បាន​​​មាន​​​ប្រសាសន៍ថា សាលាដំបូង​​​រាជធានី​​​ភ្នំពេញ​​​បាន​​​ទទួល​ពាក្យ​​​​បណ្ដឹង​ពី​បទ​​​​ព្រហ្មទណ្ឌ​​​​ដែល​លោក​ ស៊ុន​ ចាន់ថុល បាន​ប្តឹង​លោក ខូវ ​ជឺលី ហើយ​៕

            ប្រែ​​​សម្រួល​​​ដោយ ហម សុផាណ្ណា

​​​​​​

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស