ប្រជាពលរដ្ឋរាប់រយគ្រួសារមកពីសហគមន៍ជាង១០ បានចូលរួមជាមួយបណ្ដាអង្គការការពារសិទ្ធិមនុស្សក្នុងស្រុក កាលពីម្សិលមិញ នៅពេលពួកគេនាំគ្នាតវ៉ានៅខាងក្រៅរដ្ឋសភា ក្នុងទិវាសិទ្ធិលំនៅដ្ឋានពិភពលោក (World Habitat Day) ដើម្បីអំពាវនាវឲ្យបញ្ចប់ការបណ្ដេញចេញពីដីធ្លីទាំងបង្ខិតបង្ខំ ក្នុងរាជធានីភ្នំពេញ។
ដៃកាន់ផ្កាឈូក និងពាក់អាវយឺតពណ៌ខ្មៅ ដែលមានសរសេរអក្សរថា “ តំបន់គ្មានការបណ្ដេញចេញ” ក្រុមអ្នកតវ៉ា ដែលមានគ្នាប្រហែល៧០០នាក់នេះបានស្រែកបន្ទរឡើងថា “ យើងត្រូវការផ្ទះ យើងត្រូវការដី យើងទាំងអស់គ្នាក៏មានសិទ្ធិដែរ”។
គេឃើញអ្នកតវ៉ាមួយចំនួនក្នុងចំណោមនេះ ពាក់មួកក្រដាសមានរាងជាផ្ទះ នៅពេលពួកគេដើរក្បួនឆ្ពោះទៅកាន់រដ្ឋសភា ដើម្បីដាក់ញត្តិស្នើសុំអន្ដរាគមន៍ក្នុងវិវាទដីធ្លី ដែលកំពុងបន្ដកើតមានក្នុងរាជធានីភ្នំពេញ។
អ្នកស្រី ជុំ ឡៃអុីម អាយុ៤៧ឆ្នាំ ជាតំណាងម្នាក់ក្នុងចំណោមតំណាងប្រាំនាក់ដែលមានវត្តមាននៅពេលដាក់ញត្តិនេះ និយាយថា “ យើងបានជួបជាមួយមន្ត្រីរដ្ឋបាលរបស់រដ្ឋសភាម្នាក់ ហើយគាត់បានសន្យាជាមួយពួកយើងថា គាត់នឹងបញ្ជូនលិខិតរបស់យើងទៅថ្នាក់លើ ហើយគាត់នឹងឲ្យយើងដឹងក្នុងពេលឆាប់ៗនេះ”។
ក្នុងចំណោមអ្នកតវ៉ាទាំងនោះ មានអ្នកខ្លះមកពីសហគមន៍បឹងកក់ និងសហគមន៍បុរីកីឡា ដែលកំពុងជាប់ពាក់ព័ន្ធក្នុងវិវាទដីធ្លី ជាមួយក្រុមហ៊ុនអចលនទ្រព្យដ៏មានឥទ្ធិពល បន្ទាប់ពីត្រូវបានបណ្ដេញចេញទាំងបង្ខិតបង្ខំពីផ្ទះសំបែងរបស់ខ្លួន។ អ្នកតវ៉ាមកពីអតីតសហគមន៍ក្រុម៧៨ និងដីក្រហម ដែលត្រូវបានបណ្ដេញចេញដោយហិង្សានៅក្នុងឆ្នាំ២០០៩ ក៏មានវត្តមានក្នុងការតវ៉ានេះដែរ។
ក្រុមចុងក្រោយដែលកំពុងទទួលរងការគំរាមកំហែងពីការបណ្ដេញចេញ មកពីសង្កាត់ចោមចៅ ខណ្ឌពោធិ៍សែនជ័យដែលមានភូមិចំនួនបីនៅជិតនឹងអាកាសយានដ្ឋានអន្ដរជាតិភ្នំពេញ ត្រូវប្រឈមនឹងការបណ្ដេញចេញនៅក្នុងពេលឆាប់ៗនេះ ដើម្បីការពារសុវត្ថិភាពជូនបណ្ដាមេដឹកនាំពិភពលោកនៅមុនកិច្ចប្រជុំកំពូលអាស៊ាន និងកិច្ចប្រជុំកំពូលអាស៊ីបូពា៌ ដែលនឹងប្រព្រឹត្តទៅនៅខែក្រោយនេះ។
អ្នកស្រី ច្រាយ និន អាយុ៣៤ឆ្នាំ តំណាងប្រជាពលរដ្ឋរស់នៅក្បែរអាកាសយានដ្ឋានបានដាក់ញត្តិមួយទាមទារសំណងឲ្យបានសមរម្យ ប្រសិនបើពួកគាត់ត្រូវបណ្ដេញចេញ។ ខណៈដែលអ្នកភូមិនិយាយថា ខ្លួនមានឯកសារបញ្ជាក់ថា ពួកគាត់ជាម្ចាស់កម្មសិទ្ធិលើដីនៅតំបន់នោះ មន្ត្រីមូលដ្ឋានបានទទូចថា ប្រជាពលរដ្ឋទាំងនេះរស់នៅទីនោះដោយខុសច្បាប់។
អ្នកស្រី ច្រាយ និន បាននិយាយថា“យើងមកទីនេះ ដោយសារតែយើងឮថា អាជ្ញាធរនឹងចាប់ផ្ដើមអនុវត្តការបណ្ដេញចេញឆាប់ៗនេះ។ ប្រសិនបើពួកគេផ្ដល់សំណង វាមិនអីទេ។ ប៉ុន្ដែ ប្រសិនបើមិនផ្ដល់សំណងទេ យើងនឹងបន្តតវ៉ា”។កាលពីថ្ងៃព្រហស្បតិ៍ រដ្ឋាភិបាលសម្រេចឲ្យរុះរើផ្ទះនៅជុំវិញអាកាសយានដ្ឋាន។
លោក អៀង សួស្ដី អនុរដ្ឋលេខាធិការនៃរដ្ឋលេខាធិការដ្ឋានអាកាសចរណ៍ស៊ីវិល បានមានប្រសាសន៍ថា “ យើងបានបញ្ជូនរបាយការណ៍ទៅជូនលោកឧបនាយករដ្ឋមន្ត្រី សុខ អាន រួចហើយ ហើយការរុះរើនឹងចាប់ផ្ដើមក្នុងឆាប់ៗនេះ”។ បណ្ដាអង្គការសិទ្ធិមនុស្សក្នុងស្រុកបានអំពាវនាវសុំឲ្យរដ្ឋាភិបាលបញ្ឈប់ការបណ្ដេញចេញនេះ។
លោក អុី សារុំ មន្ត្រីសម្របសម្រួលរបស់សមាគមធាងត្នោត ដែលជាអង្គការក្រៅរដ្ឋាភិបាល សម្រាប់ការពារសិទ្ធិលំនៅដ្ឋានបានមានប្រសាសន៍អំឡុងការតវ៉ានេះថា “យើងចង់បញ្ជូនសារទៅដល់រដ្ឋសភា ដើម្បីធ្វើឲ្យប្រាកដថា រដ្ឋាភិបាលធានាផ្ដល់លំនៅដ្ឋានសមរម្យដល់ប្រជាពលរដ្ឋ និងគោរពច្បាប់។ សូមបញ្ឈប់អំពើហិង្សា ហើយគោរពសិទ្ធិប្រជាពលរដ្ឋផង”៕
ប្រែសម្រួលដោយ តែម សុខុម