មន្ត្រីតុលាការម្នាក់ បាននិយាយកាលពីម្សិលមិញថា តុលាការបានសាកសួរអតីតវរសេនីយ៍ឯកនៃកងយោពលខេមរភូមិន្ទម្នាក់ ដែលត្រូវបានផ្តន្ទាទោសឲ្យជាប់ពន្ធនាគាររយៈពេល១០ឆ្នាំ ពីបទប៉ុនប៉ងមនុស្សឃាតនៅក្នុងរឿងក្តីសម្លាប់អ្នកកាសែតម្នាក់។
សាលាដំបូងខេត្តរតនគិរីនៅសប្តាហ៍នេះ បានសាកសួរសាក្សីមួយចំនួនជុំវិញការសម្លាប់អ្នកយកព័ត៌មានឈ្មោះ ហង្សសិរីឧត្តម ដែលសាកសពមានស្នាមវាយដំរបស់គាត់ត្រូវបានគេប្រទះឃើញនៅក្នុងឃ្លុបរថយន្តរបស់គាត់កាលពីថ្ងៃទី១១ ខែកញ្ញា។លោក អាន ប៊ុនហេង អតីតអនុសេនីយ៍ឯកកងរាជអាវុធហត្ថនិងប្រពន្ធរបស់គាត់ឈ្មោះ ស៊ឹម វីត្រូវបានចោទប្រកាន់ពីបទមនុស្សឃាត។
លោកចៅក្រមសាកសួរឡុចឡៅ បានបញ្ជាក់ថាលោក សាតសឿន អតីតមន្ត្រីយោធារហស្សនាម សឿនផែនដី ត្រូវបានសាកសួរ ក្នុងនាមជាសាក្សីនៅក្នុងតុលាការកាលពីថ្ងៃអង្គារ។
លោក ឡុចឡៅ បានមានប្រសាសន៍ថា “ លោកសឿន ត្រូវបានសាកសួរ ក្នុងនាមជាសាក្សីម្នាក់”។ លោកបានបដិសេធមិនបរិយាយលម្អិតទេ ព្រោះលោកជាប់រវល់សាកសួរសាក្សីជាច្រើននាក់ទៀត។
លោកប៉ែន បុ៊ណ្ណារ៍អ្នកសម្របសម្រួលរបស់អង្គការសិទ្ធិមនុស្សអាដហុក ប្រចាំខេត្តនេះ បានមានប្រសាសន៍ថា ទាំងលោក សាតសឿននិងលោក គីងសៀងឡាយមន្ត្រីកងរាជអាវុធហត្ថ ដែលជាកូនចុងរបស់លោកគឹមរស្មី មេបញ្ជាការកងរាជអាវុធហត្ថខេត្ត ត្រូវបានសាកសួរកាលពីថ្ងៃអង្គារ។
លោកហង្សសិរីឧត្តម ដែលជាអ្នកយកព័ត៌មានប្រចាំកាសែត វីរជនខ្មែរ បានចេញផ្សាយអត្ថបទមួយអំពីការជាប់ពាក់ព័ន្ធរបស់លោកសៀងឡាយ ក្នុងការរកស៊ីកាប់ឈើខុសច្បាប់នៅក្នុងខេត្តនេះ។ លោក ប៊ុណ្ណារ៍ មានប្រសាសន៍ថា “ យើងមិនទាន់បានទទួលព័ត៌មានពិស្តារអំពីអ្វីដែលពួកគេបានប្រាប់តុលាការទេ”។
លោក សាតសឿនមិនអាចទាក់ទងសុំការអត្ថាធិប្បាយបានទេ។គាត់ត្រូវបានផ្តន្ទាទោសឲ្យជាប់ពន្ធនាគាររយៈពេល១០ឆ្នាំពីបទប៉ុនប៉ុងធ្វើឃាតវរសេនីយ៍ទោកងយោធពលខេមរភូមិន្ទម្នាក់កាលពីឆ្នាំ២០០៤។ បណ្តឹងឧទ្ធរណ៍របស់គាត់ត្រូវបរាជ័យ បើទោះមានការទាញហេតុផលក្នុងតុលាការថា ប្រសិនបើខ្លួនចង់សម្លាប់ជនរងគ្រោះនោះ ខ្លួនសម្លាប់បានទៅហើយ។
យោងតាមអង្គការសិទ្ធិមនុស្សក្នុងស្រុកលីកាដូបានឲ្យដឹងថា លោកសាតសឿន ក៏ត្រូវបានចោទប្រកាន់ដែរ ប៉ុន្តែ ក្រោយមកត្រូវបានសម្រេចឲ្យរួចពីការចោទប្រកាន់វិញនៅក្នុងការធ្វើឃាតលោក ចាន់តារាអ្នកកាសែតកោះសន្តិភាព ដែលបានសរសេរអត្ថបទអំពីការរកស៊ីឈើ និងកៅស៊ូ ពាក់ព័ន្ធនឹងយោធា។
លោក សាត សឿន តាមសេចក្តីរាយការណ៍ថា ពេលនេះកំពុង ធ្វើការជាមេការរបស់អ្នកជំនួញល្បីឈ្មោះម្នាក់គឺលោកទ្រីភាព ដែលទទួលបានដីសម្បទានដ៏ចម្រូងចម្រាសនៅក្នុងតំបន់ព្រៃ “ កន្ទុយនាគ” នៅភាគខាងជើងខេត្តរតនគិរី ជិតព្រំប្រទល់វៀតណាម និងឡាវ។
យោងតាមលោកហុក ផល្លាមេធាវីតំណាងឲ្យគ្រួសារអ្នកស្លាប់ បានឲ្យដឹងថានៅឯសាលាដំបូងខេត្តរតនគិរី កាលពីម្សិលមិញកូនស្រីអាយុ១៥ឆ្នាំរបស់លោកហង្សសិរីឧត្តម ឈ្មោះ សានម៉ារឌីក៏បានចូលរួមសវនាការនេះដែរ។
លោក ផល្លាបានរាយការណ៍ថា ម៉ារឌីបានរៀបរាប់នៅក្នុងតុលាការអំពីការសន្ទនាតាមទូរស័ព្ទចុងក្រោយជាមួយឪពុករបស់នាងមុនពេលគាត់ត្រូវបានគេសម្លាប់បន្តិច។ម៉ារឌី បាននិយាយថា នាងបានឮឪពុករបស់នាងនិយាយទៅកាន់បុរសម្នាក់ទៀតថា “ ឯងចង់បានអី?”។ មេធាវីរូបនេះ បាននិយាយថាម៉ារឌី បានឮបុរសរូបនោះឆ្លើយតបមុនពេលបិទទូរស័ព្ទថា “ អញមិនដឹងទេ ចាំមើលទៅ”៕
ប្រែសម្រួលដោយ ចេវប៊ុននី