រថយន្ដនិងម៉ូតូរាប់ពាន់គ្រឿងបានកកស្ទះរាប់ម៉ោង នៅតាមបណ្ដោយផ្លូវជាតិលេខ១នៅទីប្រជុំជនអ្នកលឿង ខេត្តព្រៃវែង កាលពីម្សិលមិញ ដើម្បីរង់ចាំជិះស្រឡាងឆ្លងទន្លេមេគង្គ មុនពិធីបុណ្យភ្ជុំបិណ្ឌ។
លោក សេង ឈួន អនុប្រធានកំពង់ចម្លងអ្នកលឿងបានមានប្រសាសន៍ថា ការកកស្ទះចរាចរណ៍នេះបានចាប់ផ្ដើមតាំងពីពេលព្រឹកព្រលឹម ដោយមានម៉ូតូប្រហែល១០.០០០គ្រឿង និងរថយន្ដប្រហែល២.០០០គ្រឿងត្រូវតម្រង់ជួររង់ចាំឆ្លងស្រឡាងនេះចន្លោះពីបីទៅបួនម៉ោង។
លោកសេងឈួនបានមានប្រសាសន៍ថា “ មានការកកស្ទះចរាចរណ៍យ៉ាងខ្លាំង ព្រោះយើងមានស្រឡាងែតបួនគ្រឿងដែលស្រឡាងនីមួយៗ “ អាចផ្ទុករថយន្ដបានប្រហែល២៦គ្រឿង”។ លោកបន្ថែមថា មកទល់ល្ងាចម្សិលមិញ យានយន្តរង់ចាំឆ្លងស្រឡាងបានថយចុះមកត្រឹមប្រហែល៥០០គ្រឿងប៉ុណ្ណោះ ។
នគរបាលបានឲ្យដឹងថា ខ្លួនកំពុងត្រៀមខ្លួនសម្រាប់ការកកស្ទះចរាចរណ៍បន្ថែមទៀតនៅប៉ុន្មានថ្ងៃខាងមុខ ខណៈដែលប្រជាពលរដ្ឋជាច្រើនចាកចេញពីភ្នំពេញនិងធ្វើដំណើរទៅជនបទដើម្បីប្រារព្ធពិធីបុណ្យភ្ជុំបិណ្ឌ និងចុះឈ្មោះបោះឆ្នោតសម្រាប់ការបោះឆ្នោតឆ្នាំក្រោយ។
ការកកស្ទះចរាចរណ៍បានចាប់ផ្ដើមនៅតាមផ្លូវនានាចេញពីភ្នំពេញ កាលពីថ្ងៃពុធ នៅពេលដែលប្រជាពលរដ្ឋប្រញាប់ប្រញាល់នាពេលចុងសប្ដាហ៍ចេញទៅតាមខេត្តឲ្យបានមុនមួយថ្ងៃ។ ទំហំចរាចរណ៍នេះបង្ហាញថា ចំនួនប្រជាពលរដ្ឋនៅភ្នំពេញកំពុងកើនឡើងលឿនជាងការអភិវឌ្ឍហេដ្ឋារចនាសម្ព័ន្ធនៅរាជធានី។
លោក ប៉ែន ឃុន នាយរងការិយាល័យនគរបាលចរាចរណ៍រាជធានីភ្នំពេញបានមានប្រសាសន៍ថា “ ចាប់តាំងពីយប់ថ្ងៃពុធមកយើងបានដាក់កម្លាំងនគរបាលបន្ថែមនៅតាមផ្លូវសំខាន់ៗចេញពីរាជធានីភ្នំពេញ ដើម្បីសម្រួលចរាចរណ៍។ ប៉ុន្ដែ ផ្លូវបានកកស្ទះប្រហែលមួយម៉ោងពេលដែលប្រជាពលរដ្ឋចាប់ផ្ដើមចាកចេញដំណាលគ្នា”។
ទោះបីជាគ្មានបុណ្យជាតិក៏ដោយ ក៏មានការកកស្ទះចរាចរណ៍នៅក្នុងរាជធានីដែរ។ ហួសពីអាកាសយានដ្ឋានអន្ដរជាតិភ្នំពេញបន្ដិច នៅតាមផ្លូវជាតិលេខ៤ កាលពីល្ងាចថ្ងៃពុធ រថយន្ដរាប់សិបគ្រឿងដឹកកម្មករពីរោងចក្រក្បែរៗនោះ បានបណ្ដាឲ្យមានការកកស្ទះចរាចរណ៍ចាប់ពីម៉ោងប្រហែល៤ រសៀលទៅ ដោយរថយន្ដអាចបើកបរទៅមុខយឺតៗដូចខ្យងវារអ៊ីចឹង។
នៅតាមបណ្ដោយផ្លូវសហព័ន្ធរុស្ស៊ី អ្នកបើកបរម៉ូតូបានបើកតាមផ្លូវថ្មើរជើង ដើម្បីគេចពីការកកស្ទះចរាចរណ៍ ហើយអ្នកបើករឺុម៉កម៉ូតូ បានពន្លត់ម៉ាស៊ីនដើម្បីសន្សំសាំង។ទេសចរបរទេសដែលធ្វើដំណើរទៅជិះយន្ដហោះបានចុះពីតាក់ស៊ី និងរឺុម៉កម៉ូតូរត់តាមបណ្ដោយផ្លូវនោះដោយមានស្ពាយអីវ៉ាន់ ដើម្បីទៅឲ្យទាន់ជើងហោះហើររបស់ខ្លួន។
ដោយសារតែមានមនុស្សជាច្រើននាំគ្នាផ្លាស់ពីជនបទមករស់នៅរាជធានីភ្នំពេញ និងដោយសារតែអ្នកមានប្ដូរពីជិះម៉ូតូមកជិះរថយន្ដកាន់តែច្រើននោះ គេរំពឹងថា ការកកស្ទះចរាចរណ៍នឹងកាន់តែយ៉ាប់យ៉ឺនទៅៗ។ លោក ព្រាប ចាន់វិបុល ប្រធាននាយកដ្ឋានដឹកជញ្ជូនផ្លូវគោក នៃក្រសួងសាធារណការនិងដឹកជញ្ជូន មានប្រសាសន៍ថា“ យើងបារម្ភថា កំណើនយានយន្ដនៅតាមដងផ្លូវនឹងបណ្តាលឲ្យមានការកកស្ទះចរាចរណ៍កាន់តែខ្លាំង និងបណ្ដាលឲ្យមានគ្រោះថ្នាក់កាន់តែច្រើនផងដែរ”។
លោកបានឲ្យដឹងថា ពេលនេះមានយានយន្ដដែលបានចុះបញ្ជីរួចចំនួន២,១លានគ្រឿង គឺមានរថយន្ដជាង៣៤០.០០០គ្រឿងនិងម៉ូតូចំនួន១,៧លានគ្រឿង ហើយគេជឿថា មានយានយន្ដជាច្រើនទៀត ដែលមិនបានចុះបញ្ជី។ តួលេខយានយន្ដទាំងនោះនឹងបន្ដកើនឡើងថែមទៀត។ យោងតាមលោក ចាន់វិបុល បានឲ្យដឹងថា ក្នុងរយៈពេលប្រាំបួនខែដំបូងនៃឆ្នាំនេះ ក្រសួងបានចុះបញ្ជីរថយន្ដថ្មីចំនួន៣០.៨៦៣គ្រឿង និងម៉ូតូថ្មីចំនួន១៨០.០២៦គ្រឿង គឺមានរថយន្តចុះបញ្ជីច្រើនជាងឆ្នាំមុនជិត៤.០០០គ្រឿង ក្នុងអំឡុងពេលដូចគ្នានេះកាលពីឆ្នាំមុន៕
(រាយការណ៍បន្ថែមដោយ Kate Bartlett)
ប្រែសម្រួលដោយ ហម សុផាណ្ណា