27 C
Phnom Penh

អតីត​​​ចៅ​​​ក្រម​​​ត្រូវ​​​បាន​​​តែងតាំង​​​ជា​​​សមាជិក​​​​​ក្នុង​​​គ.ជ.ប ថ្វី​​​បើ​​​គណបក្ស​​​ប្រឆាំង​​​ធ្វើ​​​ពហិការ​​​ក្ដី

ដោយ ឌឹ ខេមបូឌា ដេលី

បទវិភាគ

រដ្ឋ​​​សភា​​​កាល​​​ពី​​​ម្សិលមិញ បាន​​អនុម័ត​យល់ព្រមជាឯកឆន្ទតាមការតែងតាំងតំណែង​​​អតីត​​​​ចៅ​​​ក្រម​​​ចំនួន​​​ពីរ​​​រូបនៅ​​​ក្នុង​​​គណៈ​កម្មា​ធិការ​​​ជាតិ​​​រៀប​​​ចំ​​​ការ​​​បោះ​​​ឆ្នោត​​​ (គ.ជ.ប) ​​​នៅមុន​​​ការ​​​បោះ​​​ឆ្នោត​​​ជាតិដែល​​​​​​នឹង​​​មក​​​ដល់​​​នៅ​​​ឆ្នាំ​​​ក្រោយ ថ្វី​​​បើ​​​មាន​​​ការ​​​ធ្វើ​​​ពហិការ​​​ពី​​​សមាជិក​​​សភា​​​មក​​​ពី​​​គណបក្ស​​​ប្រឆាំង​​​ក្ដី។

សមាជិក​​​សភា​​​ចំនួន​​​២៩​​​រូប​​​មក​​​ពី​​​គណបក្ស​​​ប្រឆាំង​​​ គឺ​​​គណបក្ស​​​ សម រង្ស៊ី និង​​​គណប​​​ក្ស​​​សិទ្ធិ​​​មនុស្ស​​​បាន​​​បដិសេធ​​​មិន​​​ចូល​​​រួម​​​នៅ​​​ក្នុង​​​ការ​​​បោះ​​​ឆ្នោត​​​ឡើយ​​​ ដើម្បី​​​តវ៉ា​​​ចំពោះ​​​ភាព​​​លម្អៀង​​​របស់​​​គ.ជ.ប​​​ ដែលងាកទៅ​​​រក​​​​គណបក្ស​​​កាន់​​​អំណាច​​​ គឺ​​​គណបក្ស​​​ប្រជា​​​ជន​​​កម្ពុជា​​​ និង​​​តវ៉ា​​​ចំពោះ​​​កង្វះ​​​តម្លា​​​ភាព​​​នៅ​​​ក្នុង​​​ការ​​​ជ្រើស​​​រើស​​​សមាជិក​​​ថ្មី​​​។

ថ្វី​​​បើ​​​មាន​​​ការ​​​ធ្វើ​​​ពហិការ​​​ក្ដី​​​ បេក្ខជន​​​គ.ជ.ប​​​ចំនួន​​​ពីរ​​​រូប​​​ គឺ​​​លោក​​​ ស៊ិន ឌឹម  និង​​​លោក សោ សុភរី ត្រូវ​​​បាន​​​ជ្រើស​​​រើស​​​ដោយ​​​មិន​​​មាន​​​ការ​​​ពិភាក្សា​​​ និង​​​​​​ទទួល​​​បានការយល់ព្រមពី​​​សមាជិក​​​សភា​​​ចំនួន​​​៨៧​​​រូប​​​ផ្សេង​​​ទៀត​​​ដែល​​​មាន​​​វត្ត​​​មាន​​​នៅ​​​ក្នុង​​​ពេល​​​បោះ​​​ឆ្នោត​​​។

ពួក​​​លោក​​​នឹង​​​ត្រូវ​​​ជំនួស​​​តំណែង​​​​​​លោក ឃ្លោក ប៊ុតឌី អតី​​​ត​​​សមាជិក​​​សភា​​​មក​​​ពី​​​គណបក្ស​​​ហ្វុន​​​ស៊ិនប៉ិច និង​​​ជា​​​អតីត​​​ប្រធាន​​​ខុទ្ទការល័យ​​​ក្រសួង​​​មហាផ្ទៃ​​​ និង​​​លោក​​​ស្រី កុយ វ៉េត អតី​​​ត​​​ប្រធាន​​​នាយក​​​ដ្ឋាន​​​​​ក្រសួង​​​អប់​​​រំ។

មុន​​​ពេល​​​បោះ​​​ឆ្នោត​​​លោក ស ខេង រដ្ឋ​​​មន្ត្រី​​​ក្រសួង​​​មហាផ្ទៃ​​​ ដែល​​​ក្រសួង​​​របស់​​​លោក​​​បាន​​​ជ្រើស​​​រើស​​​បេក្ខ​​​ជន​​​ចំនួន​​​ពីរ​​​រូប​​​ដោយ​​​សម្ងាត់​​​នោះ​​​ បាន​​​ថ្លែង​​​ថា គ.ជ.ប​​​ដែល​​​ត្រូវ​​​បាន​​​រៀប​​​ចំ​​​ឡើង​​​វិញ​​​ នឹង​​​ជួយ​​​ពង្រឹងលទ្ធិ​​​ប្រជា​​​ធិបតេយ្យ​​​របស់​​​ប្រទេស​​​កម្ពុជា​​​។

លោក ស ខេង បាន​​​មាន​​​ប្រសាសន៍​​​ថា “​​​ការ​​​ធ្វើ​​​កំណែរ​​​ទម្រង់​​​គ.ជ.​​​ឡើង​​​វិញ​​​នៅ​​​ពេល​​​នេះ គឺ​​​ជា​​​ការ​​​ធ្វើ​​​កំណែរ​​​ទម្រង់​​​លទ្ធិ​​​ប្រជា​​​ធិបតេយ្យ​​​ក្នុង​​​ប្រទេស​​​កម្ពុជា​​​”។

បន្ទាប់​​​មក​​​លោក អឹុម សួស្ដី ប្រធាន​​​គ.ជ.ប​​​ ដែលត្រូវតាំង​​​ជាយូរ​​​មក​​​ហើយ​​​ ​​និង​​ ស៊ិន ជុំបូរ អនុប្រធាន​​​គ.ជ.ប ព្រម​​​ទាំង​​​សមាជិក​​​ប្រាំ​​​រូប​​​ផ្សេង​​​ទៀតរបស់​​​គ.ជ.ប​​​ដែល​​​បាន​​​រក្សា​តំណែង​​​របស់​​​ខ្លួន​​​បាន​​​ថ្លែង​​​អំណរ​​​គុណ​​​ដល់​​​រដ្ឋ​​​សភា​​​ ដែល​​​បាន​​​សម្រេច​​​ឲ្យ​​​ពួក​​​លោក​​​បានបន្តកាន់​​​​​​តំណែង​​​ដដែល​​​នោះ​​​។

លោក សួស្ដី ដែល​​​មាន​​​ទំនាក់​​​ទំនង​​​ជា​​​យូរ​​​មក​​​ហើយ​​​ជា​​​មួយ​​​គណបក្ស​​​កាន់​​​អំណាច​​​ គឺ​​​គណបក្ស​​​ប្រជាជន​​​កម្ពុជា​​​ បាន​​​បដិសេធ​​​ពី​​​ការ​​​លើក​​​ឡើង​​​ថា  គ.ជ.បមាន​​​ភាព​​​លម្ងៀង​​​។

លោក​​​បាន​​​ប្រាប់​​​អ្នក​​​យក​​​ព័ត៌មាន​​​នៅ​​​ក្រៅ​​​រដ្ឋសភា​​​ថា “​​​ការ​​​អះអាង​​​ទាំង​​​នេះ​​​មិន​​​មែន​​​ថ្មី​​​នោះ​​​ទេ។ អ្វី​​​ដែល​​​យើង​​​បាន​​​ធ្វើ​​​តាំង​​​ពី​​​យូរ​​​មក​​​ហើយ​​​ គឺ​​​គោរព​​​តាម​​​ច្បាប់​​​”។

លោក អុឹម សួស្ដី បានថ្លែង​​​ថា លោក​​​មិន​​​មាន​​​មតិ​​​អ្វី​​​អំពី​​​របៀប​​​ដែលក្រសួង​​​មហាផ្ទៃ​​​​​​បាន​​​ជ្រើស​​​រើស​​​លោក​​​ ស៊ិន ឌឹម និង​​​លោក សោ សុភរី អតីត​​​ចៅ​​​ក្រម​​​តុលាការ​​​កំពូល​​​ និង​​​ប្រធាន​​​សាលាដំបូង​​​រាជ​​​ធានី​​​ភ្នំពេញ​​​​​​​​​នោះ​​​ឡើយ។

មន្ត្រី​​​ក្រសួង​​​មហាផ្ទៃ​​​បាន​​​បដិសេធ​​​មិន​​​ធ្វើ​​​អត្ថាធិប្បាយអំពីដំណើរ​​​ការ​​​ជ្រើ​​សរើស​​​ឡើយ​​​។

ច្បាប់​​​បោះឆ្នោត​​បាន​​​ផ្ដល់​​​សិទ្ធិ​​​ទៅ​​​ឲ្យ​​​ក្រសួង​​​មហាផ្ទៃ​​​ ដើម្បី​​​ជ្រើស​​​រើស​​​បេក្ខជន​​​ពី​​​អ្នក​​​មាន​​មុខ​​​តំណែង​​​​​ខ្ពស់​​​ ដែល​​​មាន​​បទ​​​ពិសោធ​​ន៍​​​ច្រើន​​​នៅ​​​ក្នុង​​​ជួរ​​​រដ្ឋាភិបាល​​​​​​សម្រាប់ទទួលតំណែងក្នុង​​​គ.ជ.ប​​​ ប៉ុន្ដែ មិន​​​បាន​ពន្យល់​​​បញ្ជាក់​​​ឲ្យ​​​បាន​​​ច្បាស់​​​អំពី​​​លក្ខណ្ឌ​ផ្សេង​​​ទៀត​​​ឡើយ​​​។

គណបក្ស​​​ប្រឆាំង​​​បាន​​​លើកឡើង​​​ជា​​​យូរ​​​មក​​​ហើយ​​​ថា សមាសភាពនៅ​​​ក្នុង​​​គ.ជ.ប​​​ភាគ​​​ច្រើនពី​​​មុន​​​មកជា​អតីត​សមាជិក​​​​​​​​​មក​​​ពី​​​គណបក្ស​​​ប្រជា​​​ជន​​​កម្ពុជា ​​​ គឺជា​​​ភ័ស្ដុតាង​​​នៃ​​ភាព​​​​​​លម្អៀង​​​ទៅ​​​រក​​​គណបក្ស​​​កាន់​​​អំណាច។ កាល​​​ពី​​​បីបួន​​​សប្ដាហ៍​​​មុន​​​ការ​​​បោះ​​​ឆ្នោត​​​​​ម្សិលមិញ​​​​​​ រដ្ឋាភិបា​​ល​​​បាន​​​ច្រាន​​​ចោល​​​​​​​​​ម្ដង​​​ហើយ​​​ម្ដង​​​ទៀតនូវ​​​សំណើ​​​​​​​​​ ដែល​​​សុំ​​​ឲ្យ​​​មាន​​​ការ​​​បង្កើត​​​គណៈកម្មាធិការ​​​​​​មាន​​​សមាជិក​​​ចម្រុះ​​​មក​​​ពី​​​គណបក្សផ្សេង​​​ៗ​​​ ដើម្បី​​​ជ្រើស​​​សមាជិក​​​គ.ជ.ប​​​ថ្មី។

ដោយ​​​មាន​​​ការ​​​ធ្វើ​​​ពហិការ​​​មិន​​​ព្រម​​​ចូល​​​រួម​​​ការ​​​បោះ​​​ឆ្នោត​​​កាល​​​ពីម្សិលមិញ លោក​​​ យឹម សុវណ្ណ សមាជិក​​​សភា​​​មក​​​ពី​​​គណបក្ស​​ សម រង្ស៊ី បាន​​​ថ្លែង​​​ថា គណបក្ស​​​ប្រឆាំង​​​សូមច្រាន​​​ចោលនូវភាពស្របច្បាប់របស់​​​សមាជិក​​​​​​ថ្មី​​​របស់​​​គ.ជ.ប ហើយយើង​​​នៅ​​​​​​តែ​​​ចង់​​​ឲ្យ​​​រដ្ឋា​​​ភិបាល​​​បង្កើត​​​គណៈកម្មាធិការ​​​ជ្រើស​​​រើស​​មួយ​​​​ ដែល​​​មាន​​​ការ​​​ចូល​​​រួម​​​ពី​​​គណបក្ស​​​ផ្សេង​​​ៗ​​​។

លោក​​​បាន​​​មាន​​​ប្រសាសន៍​​​ថា​​​ “​​​យើង​​​មិន​​​ទទួល​​​ស្គាល់​​​សមាសភាព​​​របស់​​​គ.ជ.ប​​​កាល​​​ពី​​​ព្រឹក​​​មិញ​​​នេះ​​ទេ​​​ យើង​​​នៅ​​​តែទាម​​​ទារ​​​ឲ្យ​​​មាន​​​ការ​​​ចូល​​​រួម​​​ពី​​​គណបក្ស​​​ផ្សេង​​​នៅ​​​ក្នុង​​​ការ​​​ជ្រើស​​​រើស​​​សមាជិក​​​ថ្មី​​​ទាំង​​​នេះ”។

ថ្វីបើ​​​ការ​​​ធ្វើ​​​ពហិការ​​​មិន​​​អាច​​​បញ្ឈប់​​​ការ​​​បោះ​​​ឆ្នោត​​​ក្ដី​​​ លោក យឹម សុវណ្ណ បាន​​​ថ្លែង​​​ថា គណបក្ស​​​ប្រឆាំង​​​សង្ឃឹម​​​ថា នឹង​​​អាច​​​ទាញ​​​ចំណាប់​​​អារម្មណ៍​​​ចំពោះ​​​កា​​រ​​​មិន​​​ពេញ​​​ចិត្ត​​​របស់​​​ខ្លួន​​​។

លោក​​​បាន​​​មាន​​​ប្រសាសន៍​​​ថា “​​​ថ្នាក់​​​ដឹក​​​នាំ​​​គ.ជ.ប​​ គឺ​​​នៅ​​​ដដែល​​​ ហេតុ​​​ដូច្នេះ​​​យើង​​​នឹង​​​ជួប​​​បញ្ហា​​​ដដែល​​​ គឺ​​​ការ​​​បោះ​​​ឆ្នោត​​មិន​​​សេរី និង​​​មិន​​​យុត្តិធម៌​​​ដូច​​​កាល​​​ពី​​​មុន​​​”។

ការ​​​បោះ​​​ឆ្នោត​​​ជាតិ​​​ឆ្នាំ​​​ក្រោយ​​​ គ្រោង​​​នឹង​​​ធ្វើ​​​ឡើង​​​នៅ​​​ខែ​​​កក្កដា ហើយ​​​ការ​​​ចុះ​​​ឈ្មោះ​​​អ្នក​​​បោះ​​​ឆ្នោត​​​បាន​​​បញ្ចប់​​​នៅ​​​ថ្ងៃ​​​នេះ​​​។

លោកស្រី ឡូរ៉ា ថនតុន (Laura Thornton) នាយក​​​ប្រចាំ​​​ប្រទេស​​​របស់​​​វិទ្យាស្ថាន​​​ជាតិ​​​ ដើម្បី​​​លទ្ធិ​​​ប្រជា​​​ធិបតេយ្យ​​​ដែល​​​មាន​​​មូល​​​ដ្ឋាន​​​នៅ​​​សហរដ្ឋ​​​អាមេរិក​​​បាន​​​មាន​​​ប្រសាសន៍​​​ថា វា​​​ពិត​​​ជា​​​មាន​​​បញ្ហា​​​ដែល​​​ការ​​​បោះ​​​ឆ្នោត​​​សភា​​​ធ្វើ​​​ឡើង​​​ត្រឹម​​​តែ​​​ប៉ុន្មាន​​​សប្ដាហ៍​​​ បន្ទាប់​​​ពី​​​គ.ជ.ប​​​បាន​​​សុំ​​​ជំនួយ​​​ពី​​​ម្ចាស់​​​ជំនួយ​​​អន្ដរជាតិ​​​ ដើម្បី​​​យក​​​មក​​​រៀប​​​ចំ​​​ការ​​​បោះ​​​ឆ្នោត​​​ នៅឆ្នាំ​​​ក្រោយ​​​ ដោយ​​​សន្យា​​​ថា នឹង​​​ធ្វើឲ្យមានការ​​​បោះ​​​ឆ្នោត​​​ដោយ​​​សេរី​​​នឹង​​​យុត្តិ​​​ធម៌​​​។

លោក​​​ស្រីបាន​​​ថ្លែង​​​ថា “ប្រទេស​​​កម្ពុជា​​​មាន​​​ដំណើរ​​​ការ​​​ជ្រើស​​​រើស​​​សមាជិក​​​ថ្មី​​​សម្រាប់​​​គ.ជ.ប​​​ ដែល​​​នេះ​​​គឺ​​​វា​​​ផ្ទុយ​​​ទាំង​​​ស្រុង​​​ទៅ​​​នឹង​​​អ្វី​​​ដែល​​​គ.ជ.​​ប​​​បាន​​​សន្យា​​​ ហើយ​​​វា​​​ពិត​​​ជាខ្វះតម្លាភាព​​​”។

លោកស្រី ថនតុនបាន​​​មាន​​​ប្រសាសន៍​​​ថា លោកស្រី និង​​​បុគ្គលិក​​​របស់​​​លោក​​​​​​ស្រី​​​បាន​​​ខិត​​​ខំ​​​ប្រើ​​​គ្រប់​​​មធ្យោបាយ​​​ ដើម្បី​​​រក​​​ឲ្យ​​​ឃើញ​​​អំពី​​​របៀប​​​​​​ក្រសួង​​​មហាផ្ទៃ​​​​​​ជ្រើស​​​រើស​​​សមាជិកថ្មី​​​​​​សម្រាប់​​​គ.ជ.ប ហើយ​​​បន្ទាប​់​​​ពី​​​ការ​​​បោះ​​​ឆ្នោត​​​កាល​​​ពី​​​ម្សិលមិញ​​​ វា​​​នៅ​​​មិន​​​ទាន់​​​មាន​​ការ​​​បញ្ចាក់​​​ឲ្យបាន​​​​​លំអិត​​​​​​​​​​​អំពី​​​សាវតា​​​របស់​​​អតីត​​​ចៅ​​​ក្រម​​​នៅ​​​ឡើយ​​​ទេ។

លោក​​​ស្រី​​​ ថន​​​តុន បាន​​​ថ្លែង​​​ថា​​​ ការ​ជ្រើសរើស​​​​មិន​​​បាន​​​ផ្ដោត​​​ទៅ​​​លើ​​​ការ​​​ស្វែង​​​រក​​​បេក្ខជន​​​គ.ជ.ប ​​​ដែល​​​ប្រកប​​​ដោយ​​​ភាព​​​ឯករាជ្យ​​​នោះ​​​ទេ។ លោក​​​ស្រី​​​បាន​​​បន្ថែម​​​ថា នៅ​​​សហរដ្ឋ​​​អាមេរិក​​​គណៈកម្មការ​​​ជាតិ​​​រៀបចំ​​​ការ​​​បោះ​​​ឆ្នោត​​​ ត្រូវបែង​​​ចែក​​​​ឲ្យបាន​​​​​​ច្បាស់​​​រវាង​​​សមាជិក​​​មក​​​ពី​​​គណបក្ស​​​ធំៗ​​​ពីរ​​​។

លោកស្រី​​​បាន​​​ថ្លែង​​​ថា អ្វី​​​ដែល​​​ប្រទេស​​​កម្ពុជា​​​ត្រូវ​​​ការ​​ គឺ​​​ដំណើរ​​​ការ​​​ជ្រើស​​​រើស​​​ដែល​​ប្រកបដោយ​​​​​ភាព​​​ប្រកួត​​​ប្រជែង​​​ ដោយ​​​​​​​​​បើក​​​ចំហរ​​​ឲ្យ​​​មាន​​​ការ​​​ចូល​​​រួម​​​ពាក់​​​ព័ន្ធ​​​ពី​​​សង្គម និង​​​ឲ្យ​​​មាន​​​តម្លាភាព​​​។  លោក​​​ស្រី​​​បាន​​​បន្ថែម​​​ថា “​​​ត្រូវ​​​ ឬក៏ខុស​​​មាន​​​តែ​​​ប្រជាពលរដ្ឋ​​​នៅ​​​ក្នុង​​​ប្រទេស​​​នេះ​​​ទេ​​​ ដែល​​ជាអ្នក​​​កំណត់លើ​​​​​​ការ​​​បោះ​​​ឆ្នោត​​​​​​​​​​”៕

ប្រែសម្រួល​​​ដោយ ស៊ា ស៊ុយឈាង​

© 2023, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស