40.3 C
Phnom Penh

លោក ង៉ោ ស្រ៊ុន ទីប្រឹក្សា​របស់​លោក​ ជា ស៊ីម​ ត្រូវ​បាន​ដក​​ចេញពី​តំណែង​នៅទី​ស្តី​ការ​គណៈរដ្ឋមន្ត្រី

ដោយ ឌឹ ខេមបូឌា ដេលី

បទវិភាគ

យោង​តាម​ព្រះរាជក្រឹត្យ​ចំនួន​ពីរ​ ដែល​ឡាយ​ព្រះហស្តដោយ​ព្រះ​មហាក្សត្រ បានឲ្យ​ដឹងថា ​លោក ង៉ោ ស្រ៊ុន​ រដ្ឋ​លេខា​​ធិការ​នៅ​​ឯទីស្តី​ការ​គណៈរដ្ឋមន្ត្រី​ និង​ជាទីប្រឹក្សា​​ជាយូរ​មក​ហើយ​របស់​លោក ​ជា ស៊ីម​ ប្រធាន​ព្រឹទ្ធ​សភា​ ត្រូវ​បាន​បណ្តេញ​ចេញពី​តំណែង​ទាំងពីរ​។

នៅក​្នុង​ព្រះរាជ​ក្រឹត្យ​ចុង​ក្រោយ​បំផុត​លោក ង៉ោ ស្រ៊ុន​ បាន​បាត់​បង់​តំណែង​របស់​លោក​ជា​រដ្ឋ​លេខា​ធិការ​​ កាល​ពី​ថ្ងៃ​១០ ខែ​តុលាគឺ​ទើប​តែ​ពីរ​ខែ​បន្ទាប់​ពីព្រះ​មហាក្សត្រ​​បាន​ចេញ​​​ព្រះ​រាជ​ក្រឹត្យ​ស្រដៀង​គ្នា​មួយ ដោយ​បាន​ដក​តំណែង​របស់​លោក​ជា​ទី​ប្រឹក្សា​​របស់​ប្រធាន​ព្រឹទ្ធ​សភា។

ព្រះរាជ​ក្រឹត្យ​កាល​ពី​ខែ​តុលា​ ​បង្ហាញ​ថា “ ​បទប្បញ្ញត្តិទាំងឡាយណាដែល​ផ្ទុយ​ទៅ​នឹង​​​ព្រះរាជ​ក្រឹត្យ​នេះ​ត្រូវ​ទុកជានិរាករណ៍​”។ មន្ត្រី​មួយ​ចំនួន​នៅ​ទី​ស្ដី​ការ​គណៈ​រដ្ឋ​មន្ត្រី​កាល​ពី​ថ្ងៃ​សុក្រ ​បដិសេធ​មិន​ធ្វើ​អត្ថា​ធិប្បាយ​ ហើយ​បានលើក​ឡើង​ថា ពួក​គេ​មិន​បាន​ដឹង​អំពី​មូល​ហេតុ​​នៅ​ពី​ក្រោយការ​ដក​លោកង៉ោស្រ៊ុននោះ​ទេ​។

លោកសយសុខារដ្ឋ​លេខាធិការ​នៅ​ទី​ស្ដី​​ការ​គណៈ​រដ្ឋ​មន្ត្រី​ ​លើក​ឡើង​ថា “ ខ្ញុំ​មិន​បាន​ដឹង​ពី​មូល​ហេតុ​នៅ​ពី​ក្រោយ​ការ​ដក​តំណែង​​​លោក​ឡើយ​ ប៉ុន្ដែ ខ្ញុំ​មាន​តួនាទី​ត្រូវ​អនុវត្ត​តាមព្រះរាជ​ក្រឹត្យ​ និង​ច្បាប់​ផ្សេង​ៗ​ទៀត”។

អស់​រយៈ​ពេល​ជា​ច្រើន​ឆ្នាំ​ដែល​បាន​ធ្វើ​ការ​នៅ​ក្នុង​រដ្ឋា​ភិបាល​ លោកង៉ោស្រ៊ុនមិន​ដែល​មាន​ដំណើរ​ជីវិត​ងាយ​ស្រួល​នោះ​ទេ​។ កាល​ពី​ឆ្នាំ​២០០៨​ លោក​ទទួល​រង​ការ​វាយ​ប្រហារ​ដោយ​ទឹក​អាស៊ីត​ នៅ​ឯ​យាន​ដ្ឋាន​មួយ​តាម​បណ្ដោយ​ផ្លូវ​កម្ពុជា​ក្រោម​ នៅ​ពេល​លោក​កំពុង​តែ​រង​់ចាំ​​ជាង​ប្ដូ​រកង់​រថយន្ដ​ម៉ាក​ឡិចស៊ីស​របស់​លោក​។

លោក​ ង៉ោស្រ៊ុនត្រូវ​ទឹក​អាស៊ីត​ធ្វើ​ឲ្យ​រលាក​មុខ​ផ្នែក​ខាង​ឆ្វេង​ ត្រចៀក​ និង​ទ្រូង តែទោះ​ជា​យ៉ាង​ណា​ លោក​បាន​ជាសះ​ស្បើយ​វិញ​។ ចាប់​តាំង​ពី​ពេលនោះ​មក​ គ្មាន​ជន​ណា​ម្នាក់​ត្រូវ​ចាប់​ខ្លួន​ ឬ​ក៏​ត្រូវនាំមកផ្ដន្ទាទោស​ពីបទ​វាយ​ប្រហារ​ដោយ​ទឹក​អាស៊ីត​ឡើយ​ហើយមូល​ហេតុ​នៃ​ការ​វាយ​ប្រហារ​ស្ថិតក្នុង​ភាព​អាថ៌កំបាំង​រហូត​មក​ដល់​ថ្ងៃ​នេះ។

ការ​ដក​លោក​ ង៉ោស្រ៊ុនជា​ការ​ដកតំណែងនៅក្នុងរដ្ឋាភិបាលនាពេលថ្មី​ៗ​បំផុត​ សម្រាប់​មន្ត្រី​​ដែល​នៅ​កៀក​នឹង​លោក​ ជាស៊ីម។

កាល​ពី​ខែ​ធ្នូ​ សាលាដំបូង​រាជ​ធានី​ភ្នំពេញ​បាន​ផ្ដន្ទា​ទោសលោកស្រីផេងគន្ធាបុរីអាយុ​​៥៦​ឆ្នាំ ​អតីត​នាយិកា​ពិធីការ​របស់​លោក​ ជាស៊ីមពីបទ​ឆបោក​ និង​អតីត​បុគ្គលិក​បី​រូប​ផ្សេង​​ទៀត​របស់​ប្រធាន​ព្រឹទ្ធសភា​ រួម​មាន​លោក​ទី​ប្រឹក្សាចាន់កុសលអាយុ៦០​ឆ្នាំ​ លោក​ទី​ប្រឹក្សា ​ហូពន្លក​ អាយុ​៥៨​ឆ្នាំនិង​លោកខៀវបូរ៉ាអាយុ​៥០​ឆ្នាំ ជំនួយ​ការ​របស់​លោកស្រី​​ គន្ធាបុរី។ ប្រធាន​កង​អង្គរក្ស​របស់​លោក​ ជាស៊ីម ក៏​ត្រូវ​បានដក​តំណែង​ និង​ត្រូវ​ផ្ដន្ទា​ទោស​​កាល​ពី​ឆ្នាំ​មុន​ពី​បទ​ប្រើ​ប្រាស់​អាវុធ​ខុស​ច្បាប់​ និង​បទ​ល្មើស​ផ្សេង​ៗ​ទៀត​៕

ប្រែសម្រួល​ដោយស៊ាស៊ុយឈាង

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស