ក្រុមហ៊ុន​ដឹក​ជញ្ជូន​ទំនិញ​​ប៉ះ​ពាល់​ដោយ​ចំណាយ​ខ្ពស់​នៅ​​ក្នុងកម្ពុជា

បើ​ទោះ​បី​ជា​មាន​ការ​កើន​ឡើង​នៅ​ក្នុង​វិស័យ​ដឹក​ជញ្ជូន​ទំនិញ​ក៏​ដោយ​ ក៏​ក្រុម​ហ៊ុន​ដឹក​ជញ្ជូន​ទំនិញ​ទាំង​ឡាយ​កំពុង​ទទួល​រង​ផល​ប៉ះ​ពាល់​ ពី​ព្រោះ​ភាគ​ច្រើន​នៃ​ក្រុម​ហ៊ុន​ទាំង​នោះ​​នៅ​តែ​ប្រើ​ប្រាស់​រថយន្ត​ចាស់ៗ​ និង​ស៊ី​ប្រេង​ច្រើននៅ​ឡើយ​ ហើយ​ជា​រឿយៗ​តែង​តែ​ត្រូវ​​បាន​មន្ត្រីគយ​ជំរិតឲ្យ​បង់​ប្រាក់​ក្រៅ​ផ្លូវ​ការ​នៅ​តាម​ច្រក​ត្រួត​ពិនិត្យ​ព្រំ​ដែន​ និង​តាម​កំពង់ផែ​ជា​ដើម។តម្លៃ​ដឹក​ជញ្ជូន​​ក្នុង​ប្រទេស​កម្ពុជា​ មាន​​កម្រិត​ខ្ពស់​ជាង​គេ​នៅ​ក្នុង​តំបន់​រួច​ទៅ​ហើយ​ ក៏​ប៉ុន្តែ​កង្វះ​ការ​វិនិយោគ​នៅ​ក្នុង​ក្រុម​ហ៊ុន​ដឹក​ជញ្ជូន​ទំនិញ​មាន​ន័យ​ថា​ ក្រុម​ហ៊ុន​​ដឹក​ជញ្ជូន​ទំនិញ​ជា​ច្រើន​គ្មាន​រថយន្ត​ដឹក​ទំនិញ​គ្រប់​គ្រាន់​ ដើម្បី​ផ្គត់ផ្គង់​បរិមាណ​តម្រូវ​ការ​បច្ចុប្បន្ន​នៅ​ក្នុង​ទី​ផ្សារ។

លោក​ បេនចាមីន​ វីលស៊ុន​ (Benjamin Wilson)​ នាយក​ប្រចាំ​ប្រទេស​កម្ពុជា​របស់​ក្រុម​​ហ៊ុន​ដឹក​ជញ្ជូន​អន្តរ​ជាតិមែក​ (Maersk)​ បាន​មាន​ប្រសាសន៍​ថា​ “ នៅ​ទី​នេះ​យើង​ជួប​ប្រទះ​​និង​បញ្ហា​លទ្ធភាព​ខ្លះ​ ហើយ​គ្មាន​រថយន្ត​ដឹក​ទំនិញ​គ្រប់​គ្រាន់​ទេ​”។​ លោក​បាន​បន្ថែម​ថា​ ក្រុម​ហ៊ុន​របស់​លោក​ជួល​ឈ្មួញ​កណ្តាល​ឲ្យ​ដឹក​ជញ្ជូន​កុងតឺន័រ​តាម​ផ្លូវ​ទៅ​កាន់​កំពង់​ផែ​ស្វយ័ត​ព្រះ​សីហនុ។​ លោក​បន្ត​ទៀត​ថា​ “​ វា​ពិត​​ជា​មាន​បញ្ហា​ ហើយ​វា​គឺ​ជា​វិស័យ​មួយ​ ដែល​​ត្រូវការ​ការ​វិនិយោគ​បន្ថែម​ទៀត​”។

រថយន្ត​ដឹង​ទំនិញ​ខ្លះ​ខូច​ច្រើន​ដង​ពេក​ ដូច្នេះ​វា​ធ្វើ​ឲ្យ​ក្រុម​ហ៊ុន​ត្រូវ​ចំណាយ​ថវិកា​ច្រើន​​ដើម្បី​ជួសជុល​។

លោក​ គួច​ ផេង​ នាយក​ក្រុម​ហ៊ុន​ដឹក​ជញ្ជូន​​ទំនិញ​ អ៊ែត​វ៉ានគ្លរី​ ឡូជីស្ទីក​ (ខេមបូឌា)​ បាន​មាន​ប្រសាសន៍​ថា​ “ វា​មិន​មែន​អាស្រ័យ​លើ​តម្រូវ​ការ​នា​ពេល​បច្ចុប្បន្ន​នោះ​ទេ​ ហើយ​​ជួន​កាល​យើង​មាន​ការ​លំបាក​ក្នុង​ការ​ស្វែងរថយន្ត​​ដឹក​ដឹក​ទំនិញ។​ នៅ​ពេល​យើង​រក​បាន​រថយន្ត​ទាំង​​នោះ​ភាគ​ច្រើន​ជា​រថយន្តចាស់ៗ​ ហើយ​​ជួន​កាល​វា​ខូច​ទៅ​ទៀត​”។

លោក​បាន​បន្ត​ទៀត​ថា​ “​ជា​ពិសេស​ ប្រទេស​កម្ពុជា​គ្មាន​បទ​បញ្ញត្តិ​ស្តីអំពី​ការ​ការ​ផ្ទេរ​ទំនិញ​ ដូច្នេះ​បើសិន​ជា​គេ​ដឹក​កុងតឺណ័រ​មក​ដល់​ទីនេះ​ដោយចៃដន្យ​ នោះ​ត្រូវ​តែ​បង់​ថ្លៃ​នាំ​ចូល​ បង់ពន្ធ​ រួចហើយ​ដាក់​ពាក្យ​សុំ​នាំ​ចូល​សាជា​ថ្មី​”។

លោក​ សុខ​ ឈាង​ ប្រ​ធាន​ប្រតិបត្ត​សមាគមន​ដឹក​ជញ្ជូន​ Cambodia Trucking Association​ បាន​មាន​ប្រសាសន៍​ថា​ បច្ចុប្បន្ន​នេះ​ មាន​ក្រុម​ហ៊ុន​ដឹង​ជញ្ជូន​ទំនិញ​ប្រមាណ​១០០​ក្រុម​ហ៊ុន​ ដែល​កំពុង​ធ្វើ​ប្រតិបត្តិការ​នៅ​ក្នុង​ប្រទេស​កម្ពុជា​ ហើយ​ក្រុម​ហ៊ុន​ភាគ​ច្រើន​គឺ​ជា​ក្រុម​ហ៊ុន​តូចៗ​ ជា​ក្រុម​ហ៊ុន​លក្ខណៈ​គ្រួសារ​ ដែល​មាន​រថយន្ត​ចាស់ៗ​ស៊ី​ប្រេង​ច្រើន​ ជាង​រថយន្ត​ទំនើបៗ។​ ដូច្នេះ​ក្រុម​ហ៊ុន​ដឹក​ជញ្ជូន​តាម​ផ្លូវ​គោក​នៅ​ប្រទេស​កម្ពុជា​ត្រូវ​គិត​ថ្លៃ​ឈ្នួល​ដឹក​ចន្លោះ​ពី​១០​ដុល្លារ​ ទៅ​១៥​ដុល្លារ​ក្នុង​មួយ​តោន​ សម្រាប់​ចម្ងាយ​ផ្លូវ​១០០​គីឡូម៉ែត្រ​ បើ​ធៀប​នឹង​ប្រទេស​វៀត​ណាមនិង​ប្រទេស​ថៃ​ដែល​យក​ថ្លៃ​ត្រឹម​តែ​៤​ដុល្លារ​ និង​៧,៥​ដុល្លារ​ប៉ុណ្ណោះ​ក្នុង​មួយ​តោន​ នេះ​បើ​យោង​តាម​ធនាគារ​អភិវឌ្ឍន៍​អាស៊ី​(ADB)។

ធនាគារ​អភិវឌ្ឍន៍​អាស៊ី​បាន​លើក​ឡើង​នៅ​ក្នុង​របាយ​ការណ៍​មួយ​កាល​ពី​សប្តាហ៍​មុន​ថា​ “​គេ​ក៏​អាច​ពន្យល់​បាន​មួយ​ផ្នែក​ផង​ដែរ​ថា​ មូល​ហេតុ​ដែល​ធ្វើ​ឲ្យ​ការ​ដឹក​ជញ្ជូន​មាន​តម្លៃ​ខ្ពស់​ គឺ​ដោយសារ​ការ​បង់​ប្រាក់​ក្រៅ​ផ្លូវ​ការ​ត្រូវ​បាន​គេ​គិត​បញ្ចូល​ទៅ​ក្នុង​ការ​គិត​ថ្លៃ​ដឹក​ជញ្ជូន​… ហើយ​ក្រុម​ហ៊ុន​នានា​មិន​សូវ​ដឹង​ ឬ​ក៏​មិន​ដឹង​ជា​ត្រូវ​ធ្វើ​ដូចម្តេច​ឡើយ​ គឺ​មាន​តែ​បញ្ចូល​ការ​បង់​ប្រាក់​ក្រៅ​ផ្លូវ​ការ​ចូល​ក្នុង​ការ​គិត​ថ្លៃ​ដឹក​ជញ្ជូន​”។

ចំណាយ​លើ​ការ​ដឹក​ជញ្ជូន​ខ្ពស់​មាន​ន័យ​ថា​ ក្រុម​ហ៊ុន​ដឹក​ជញ្ជូន​មាន​ភាព​ស្ទាក់​ស្ទើរ​មិន​ហ៊ាន​ចូល​មក​ប្រកប​អាជីវកម្ម​នៅ​ក្នុង​ទី​ផ្សារ​ដឹក​ជញ្ជូន។

លោក​ សុខ​ ឈាង​ នៅ​ឯ​សមាគមន​ដឹក​ជញ្ជូន​ Cambodia Trucking Association​ បាន​មាន​ប្រសាសន៍​ថា​ “​ ក្រុម​ហ៊ុន​ដឹក​ជញ្ជូននានា​ ដែល​ប្រហែល​ជា​កំពុង​ពិចារណា​អំពី​ទី​ផ្សារនេះ​ ចាំ​បាច់​ត្រូវ​តែ​ពិនិត្យ​មើល​ថា​ តើ​ខ្លួន​អាច​ប្រកួត​ប្រជែង​ជា​មួយ​ក្រុម​ហ៊ុន​ក្នុង​ស្រុក​បាន​ដែរ​ ឬ​ក៏​អត់​ជា​មុន​សិន​ ហើយ​ពួក​គេ​គិត​ថា​ ពួក​មិន​អាច​ប្រកួត​ប្រ​ជែង​បាន​ទេ​”។​ លោក​បាន​បន្ថែម​ទៀត​ថា​ “​ ចំណុច​មួយ​គឺ​ថា​ ពួក​គេ​មាន​ស្តង់​ដា​ខ្ពស់​ និង​ចំណាយ​លើ​បុគ្គលិក​របស់​ពួក​គេ​ច្រើន​ ខណៈ​ដែល​ត្រូវ​ដោះ​ស្រាយ​ចំពោះ​បញ្ហា​អនុ​ឡោម​តាម​នានា​របស់​ខ្លួន​ថែម​ទៀត​ផង​នោះ​”។

លើស​ពី​នេះ​ទៀត​ ផ្លូវ​ដឹក​ជញ្ជូន​ទំនិញ​សំខាន់ៗ​មួយ​ចំនួន​ ដូច​ជា​រវាង​រាជ​ធានី​ភ្នំ​ពេញ​នឹង​ទី​ក្រុង​បាងកក​ត្រូវ​បាន​ផ្តាច់​មុខ​ដោយ​ក្រុម​ហ៊ុន​ធំៗ​មួយ​ចំនួន​ ដែល​មាន​សំណាង​ទទួល​បាន​អាជ្ញា​ប័ណ្ណ​ដឹក​ជញ្ជូន​ឆ្លង​កាត់​ព្រំ​ដែន។

លោក​ ប៉េ​ សុខ​ហ៊ាន់​ ជំនួយ​ការ​នាយក​ក្រុម​ហ៊ុន​ដឹក​ជញ្ជូន​ទំនិញ​ RSL Global Logistics Co. Ltd​ បាន​ឲ្យ​ដឹង​ថា​ “​ ក្រុម​ហ៊ុន​ធំៗ​មាន​ប្រៀប​ជាង​ក្រុម​ហ៊ុន​តូចៗ​ ពី​ព្រោះ​តែ​អ្វី​ ដែល​ពួក​អាច​ផ្តល់​ជូន​ក្នុង​ការ​ធ្វើ​ឲ្យ​មាន​ទំនុក​ចិត្ត​ ដូច្នេះ​ វា​ជា​ការ​លំបាក​សម្រាប់​យើង​ក្នុង​ការ​ប្រកួត​ប្រជែង​ជា​មួយ​ពួក​គេ”​ ហើយ​លោក​បាន​បន្ថែម​ទៀត​ថា​ ក្រុម​ហ៊ុន​របស់​លោក​អាច​យក​ថ្លៃ​ដឹក​ជញ្ជូន​ពី​ភ្នំ​ពេញ​ទៅ​កាន់​ខេត្ត​ព្រះ​សីហនុ​បាន​ប្រមាណ​ជា​៣០​ដុល្លារ​ក្នុង​មួយ​ជើង។

យោង​តាម​ក្រុម​ហ៊ុន​ដឹក​ជញ្ជូន​ទំនិញ​ជា​ច្រើន​បាន​ឲ្យ​ដឹង​ថា​ បើ​សិន​ជា​មាន​កំហុស​ណា​មួយ​ក្នុង​ការ​សរសេរ​ ឬ​​បច្ចេក​កើត​ឡើង​នៅ​លើង​វិក័យ​ប័ត្រ​ដឹក​ជញ្ជូន​ នោះ​ក្រុម​ហ៊ុន​នឹង​ត្រូវ​បង់​ប្រាក់​ចន្លោះ​ពី​៣០​ដុល្លារ​ ទៅ​ ១០០​ដុល្លារ​ទៅ​ឲ្យ​នាយក​ដ្ឋាន​គយ​ ចំណែក​ឯ​កំហុស​ណា​មួយ​ដែល​កើត​មាន​ឡើង​នៅ​ក្នុង​ឡាំង​កុង​តឺណ័រ​ផ្ទាល់​ វា​អាច​បណ្តាល​ឲ្យ​មាន​ការ​ទាប្រាក់​ចន្លោះ​ពី​២០០​ដុល្លារ​ ទៅ​ ៣០០​ដុល្លារ៕

ប្រែ​សម្រួល​ដោយ​ ហួង​ កុក​ទៀន

© 2012 – 2014, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.