លោកនាយករដ្ឋមន្ត្រី ហ៊ុន សែន បានបណ្តេញមន្ត្រីក្រសួងមហាផ្ទៃម្នាក់ ដោយសារព្យាយាមប្រើក្រុមនិស្សិតស្ម័គ្រចិត្តឲ្យដោះស្រាយជម្លោះដីធ្លីផ្ទាល់ខ្លួន នៅក្នុងខេត្តពោធិ៍សាត់។
លោកហ៊ុនសែនបានមានប្រសាសន៍កាលពីថ្ងៃសៅរ៍ នៅឯពិធីប្រគល់ប័ណ្ណកម្មសិទ្ធិដីធ្លីដល់ប្រជាពលរដ្ឋចំនួន១.០៥៧គ្រួសារនៅក្នុងស្រុកស្ទឹងត្រង់ ខេត្តកំពង់ចាមថា ឧត្តមសេនីយ៍ឯកនគរបាល លោកឌឿង សុវណ្ណ ជាទីប្រឹក្សារបស់ក្រសួងមហាផ្ទៃនឹងត្រូវដកតួនាទីទាំងអស់។
លោក ហ៊ុនសែន ប្រកាសថា “ កាលពីម្សិលមិញ ខ្ញុំបានស្នើព្រះមហាក្សត្រដកលោកឧត្តមសេនីយ៍ឯកឌឿង សុវណ្ណ ពីតួនាទីជា ទីប្រឹក្សាក្រសួងមហាផ្ទៃ ហើយក៏នឹងបណ្តេញចេញពីនគរបាលជាតិទៀត”។
លោក ហ៊ុនសែន បានមានប្រសាសន៍បន្តថា កាលពីថ្ងៃទី២ ខែតុលាលោកឧត្តមសេនីយ៍ឯកសុវណ្ណបានសរសេរលិខិតមួយច្បាប់ទៅមន្ទីររៀបចំដែនដី នគរូបនីយកម្ម និងសំណង់ខេត្តពោធិ៍សាត់ ដោយស្នើឲ្យនិស្សិតស្ម័គ្រចិត្ត ដែលបច្ចុប្បន្នកំពុងវាស់វែងបោះព្រំដីនៅទូទាំងប្រទេសទៅវាស់វែងក្បាលដីមួយកន្លែង ដែលលោកអះអាងថា ជារបស់លោកក្នុងឃុំថ្មដា ស្រុកវាលវែង ហើយដីនោះមានជម្លោះជាមួយប្រជាពលរដ្ឋចំនួនប្រាំបួនគ្រួសារ។
ក្នុងលិខិតស្វែងរកវត្តមានរបស់និស្សិតនោះលោកឧត្តមសេនីយ៍ឯកសុវណ្ណបានសំដៅដល់សុន្ទរកថាមួយ ដែលលោកនាយករដ្ឋមន្ត្រីបានធ្វើឡើងនៅក្នុងខេត្តពោធិ៍សាត់អំពីជម្លោះដីធ្លី ហើយលោកក៏បានព្រមានផងដែរថា ប្រសិនបើក្រុមនិសិ្សតមិនមកទេលោកនឹងប្តឹងប្រជាពលរដ្ឋប្រាំបួនគ្រួសារនេះ។ នៅពេលណាជម្លោះដីធ្លី កំពុងជាប់ពាក់ព័ន្ធជាមួយតុលាការហើយនោះ និស្សិតគ្មានសិទ្ធិវាស់វែងបោះព្រំដីនោះទេ។
លោក ហ៊ុនសែនបានសួរនៅពេលថ្លែងសុន្ទរកថាថា “ ហេតុអ្វីឧត្តមសេនីយ៍ឯកមួយរូបគិតថា ខ្លួនមានសិទ្ធិបញ្ជាឲ្យនិស្សិតវាស់វែងដីរបស់គាត់ ហើយគំរាមប្តឹងទៀត ប្រសិនករណីនោះមិនបានជោគជ័យ?”។
លោកមានប្រសាសន៍ថា “ នេះជាសារមួយសម្រាប់អ្នកគ្រប់គ្នានៅទូទាំងប្រទេស។ការវាស់វែងដីត្រូវអនុវត្តតាមនីតិវិធី ហើយគ្មាននរណាម្នាក់តម្រូវឲ្យគេវាស់វែងដីដោយប្រើឈ្មោះខ្ញុំបានទេ”។
លោក ហ៊ុនសែនបានប្រកាសពីគម្រោងវាស់វែងដី និងគម្រោងចេញប័ណ្ណកម្មសិទ្ធិដីធ្លីកាលពីក្នុងខែឧសភា ដោយបញ្ជូននិស្សិតស្ម័គ្រចិត្តរាប់ពាន់នាក់ទៅជនបទ ដើម្បីផ្តល់ប័ណ្ណកម្មសិទ្ធិដីឲ្យអ្នកភូមិ ប្រសិនបើដីនោះមិនជាប់ពាក់ព័ន្ធក្នុងរឿងក្តីតុលាការទេនោះ។
លោកហ៊ុនសែនបានថ្លែងថាលោកអុឹមឈុនលឹមរដ្ឋមន្ត្រីក្រសួងរៀបចំដែនដី នគរូបនីយកម្ម ក៏ត្រៀមប្តឹងលោក សុវណ្ណដែរ ហើយនគរបាលត្រូវតាមដានគាត់ ដើម្បីកុំឲ្យគាត់រត់គេចខ្លួន។
លោកឧត្តមសេនីយ៍ឯក សុវណ្ណមិនអាចទាក់ទងសុំការពន្យល់បានទេ។ នៅពេលលោកហ៊ុនសែន មានប្រសាសន៍នៅក្នុងខេត្តពោធិ៍សាត់កាលពីថ្ងៃទី១ ខែតុលា លោកបានណែនាំប្រជាពលរដ្ឋដែលចង់បានប័ណ្ណកម្មសិទ្ធិដីដើម្បីចៀសវាងជម្លោះ ពីព្រោះកម្មវិធីវាស់វែងដីរបស់រដ្ឋាភិបាលនឹងមិនបានជោគជ័យទេប្រសិនបើជម្លោះផ្ទាល់ខ្លួនរឿងដីធ្លីពាក់ព័ន្ធនឹងដំណើរការ។
កម្មវិធីប្រគល់ប័ណ្ណកម្មសិ្ធិដីធ្លីរបស់លោកនាយករដ្ឋមន្ត្រីបានចាប់ផ្តើមឡើងនៅពេលមានបញ្ហាកាន់តែខ្លាំងឡើងនៅតាមជនបទជុំវិញដីសម្បាទានសេដ្ឋកិច្ចរវាងក្រុមហ៊ុនដែលទទួលបានដីសម្បទានទាំងនេះនិងកសិករនៅតាមមូលដ្ឋាន ដែលចោទក្រុមហ៊ុនថាបានប្លន់យកដីរបស់ខ្លួន៕
ប្រែសម្រួលដោយ ចេវប៊ុននី