អ្នកនាំពាក្យរបស់រដ្ឋាភិបាលនិយាយថាព្រះបរមសពរបស់សម្តេចឪ ព្រះ នរោត្តមសីហនុ ដែលបានយាងចូលទិវង្គតនៅក្នុងមន្ទីរពេទ្យប្រទេសចិន ក្នុងព្រះជន្មាយុ៨៩ព្រះវស្សាកាលពីព្រឹកម្សិលមិញ នឹងយាងនិវត្តមកដល់ប្រទេសកម្ពុជានៅថ្ងៃពុធនេះហើយត្រូវតម្កល់ទុករយៈពេលយ៉ាងតិចបីខែនៅក្នុងបរិវេណព្រះបរមរាជវាំង។
ប៉ុន្មានម៉ោងបន្ទាប់ពីព័ត៌មានអំពីការយាងចូលទិវង្គតរបស់អតីតព្រះមហាក្សត្រត្រូវបានផ្សព្វផ្សាយចេញពីទីក្រុងប៉េកាំង ព្រះមហាក្សត្រ នរោត្តម សីហមុនី និងលោកនាយករដ្ឋមន្ត្រី ហ៊ុន សែន ក្នុងចំណោមគណៈប្រតិភូជាន់ខ្ពស់មួយក្រុម បានយាង និងអញ្ជើញតាមយន្តហោះពិសេសឆ្ពោះទៅទីក្រុងប៉េកាំង។
លោក ខៀវកាញារីទ្ធ រដ្ឋមន្ត្រីក្រសួងព័ត៌មាន និងជាអ្នកនាំពាក្យរបស់រដ្ឋាភិបាលបានមានប្រសាសន៍ថា ព្រះបរមសពរបស់សម្តេចឪ នឹងត្រូវតម្កល់រយៈពេលយ៉ាងតិចបីខែ មុនពេលបូជា ប៉ុន្តែលោកមិនបានបញ្ជាក់ពីការរៀបចំចាត់ចែងនោះទេ។លោក ខៀវកាញារីទ្ធបានលើកឡើងក្នុងសារជាអក្សរមួយថា “ ការកាន់ទុក្ខផ្លូវការលើកដំបូងនឹងចាប់ផ្តើមពីថ្ងៃទី១៧ដល់ថ្ងៃទី២៣ខែតុលា”។
លោកបានបន្ថែមថា សេចក្តីសម្រេចមួយត្រូវបានធ្វើឡើងមិនឲ្យផ្សព្វផ្សាយពិធីតាមកញ្ចក់ទូរទស្សន៍ អំពីការយាងចូលទិវង្គតរបស់សម្តេច នរោត្តមសីហនុ ដើម្បីគោរពតាមព្រះរាជបណ្តាំរបស់ព្រះអង្គ។ ព្រះអង្គម្ចាស់ ធម្មិកោប្រធានខុទ្ទកាល័យរបស់ព្រះមហាវីរក្សត្រដែលចូលទិវង្គតបានមានព្រះបន្ទូលថា សម្តេចឪ នរោត្តម សីហនុ បានយាងចូលទិវង្គតដោយសារគាំងបេះដូង នាវេលារំលងអធ្រាត្រម្សិលមិញនៅឯមន្ទីរពេទ្យក្រុងប៉េកាំង ដែលព្រះអង្គយាងចូលសម្រាកព្យាបាល ។
សម្តេចឪបានយាងចូលនិវត្តពីតួនាទីរបស់ព្រះអង្គជាព្រះមហាក្សត្រក្នុងឆ្នាំ២០០៤ និងបានយាងព្យាបាលព្រះរោគមួយចំនួនមានដូចជាជំងឺមហារីក ទឹកនោមផ្អែម និងជំងឺលើសឈាម។
ព្រះអង្គម្ចាស់ ធម្មិកោបានមានព្រះបន្ទូលនៅក្នុងរាជធានីភ្នំពេញកាលពីម្សិលមិញថា “បេះដូងរបស់ព្រះអង្គខ្សោយណាស់ ដូច្នេះយើងរំពឹងថារឿងនេះនឹងកើតឡើង ប៉ុន្តែយើងគ្រាន់តែភ្ញាក់ផ្អើល ដែលរឿងនេះកើតឡើងលឿនពេក”។ ព្រះអង្គបានមានព្រះបន្ទូលថាព្រះមហាក្សត្រនរោត្តមសីហមុនី លោក ហ៊ុនសែនលោក សខេង រដ្ឋមន្ត្រីក្រសួងមហាផ្ទៃ និងលោកសាយឈុំប្រធានគណៈកម្មាធិការ អចិន្ត្រៃយ៍របស់គណបក្សប្រជាជនកម្ពុជាស្ថិតក្នុងចំណោមមន្ត្រីផ្សេងទៀតដែលបានយាង និងអញ្ជើញតាមជើងយន្តហោះពិសេសមួយទៅទីក្រុងប៉េកាំងនៅវេលាម៉ោង៩និង៣០នាទីព្រឹកម្សិលមិញ។
ព្រះអង្គបានមានបន្ទូលថា “ ព្រះមហាក្សត្រសម្តេចនាយករដ្ឋមន្ត្រី ហ៊ុនសែន បានយាង និងអញ្ជើញទៅទីក្រុងប៉េកាំងនៅព្រឹកនេះ”។ព្រះអង្គម្ចាស់ ធម្មិកោបានបន្តថាសម្តេចព្រះមហាក្សត្រិយានី នរោត្តមមុនីនាថទ្រង់គង់នៅក្នុងទីក្រុងប៉េកាំងស្រាប់ហើយជាមួយព្រះស្វាមីរបស់ព្រះអង្គ ដែលបានយាងចូលទិវង្គត។
ព្រះអង្គម្ចាស់ ធម្មិកោក៏មានព្រះបន្ទូលដែរថាគណៈកម្មាធិការរៀបចំបុណ្យជាតិនិងអន្តរជាតិ នឹងចាត់ចែងពិធីកាន់ទុក្ខការយាងចូលទិវង្គតរបស់សម្តេចឪ។ព្រះអង្គមានបន្ទូលថា “ ពិធីនេះនឹងប្រារព្ធ ធ្វើឡើងទៅតាមប្រពៃណីរបស់រាជវង្សខ្មែរ”។
លោកទិត សុធាអ្នកនាំពាក្យអង្គភាពព័ត៌មាន និងប្រតិកម្មរហ័សរបស់ទីស្តីការគណៈរដ្ឋមន្ត្រី មានប្រសាសន៍ថា បន្ទាប់ពីទទួលបានដំណឹងអំពីការយាងចូលទិវង្គតរបស់សម្តេចឪភ្លាម កិច្ចប្រជុំមួយត្រូវបានធ្វើឡើងនៅទីស្តីការគណៈរដ្ឋមន្ត្រី ដើម្បីពិភាក្សាអំពីការរៀបចំពិធីបុណ្យព្រះបរមសពនិងកំណត់រយៈពេលការកាន់ទុក្ខជាផ្លូវការ។
លោកសុធាបានមានប្រសាសន៍ថា “ មានកិច្ចប្រជុំមួយនៅឯទីស្តីការគណៈរដ្ឋមន្ត្រី ដើម្បីរៀបចំសេចក្តីប្រកាសជាសាធារណៈអំពីពិធីទទួលព្រះបរមសព យាងនិវត្តមកកាន់មាតុប្រទេសវិញ”។ លោកបន្ថែមថាលោកហ៊ុនសែនបានលុបចោលការអញ្ជើញទៅទីក្រុងហូជីមិញដើម្បីចូលរួមជំនួបកំពូលមួយជាមួយប្រទេសវៀតណាម និងឡាវ ស្តីពីគម្រោងអភិវឌ្ឍន៍តំបន់ត្រីកោណនៅថ្ងៃសុក្រ និងថ្ងៃសៅរ៍។
លោកសឺនសូ៊បែរ្តិ៍ទីប្រឹក្សារបស់សម្តេចឪមានប្រសាសន៍ថាក្នុងព្រឹត្តិការណ៍នៃការយាងចូលទិវង្គតរបស់សម្តេចឪព្រះបរមសព នឹងត្រូវតម្កល់ទៅតាមប្រពៃណីរយៈពេលមួយខែ។ លោកបានបន្តថា “ នឹងមានពិធីច្រើនជាបន្តបន្ទាប់សម្រាប់មន្ត្រីអ្នកមុខអ្នកការនិងព្រះសង្ឃ។នោះជាអ្វី ដែលធ្លាប់បានប្រារព្ធធ្វើកាលពីពេលមុន”។
លោកស៊ូបែរ្តិ៍បានមានប្រសាសន៍បន្ថែមទៀតថា អំឡុងពេលនេះជាធម្មតាពិធីបូជាព្រះសពត្រូវធ្វើនៅវាលមេរុ នៅទល់មុខសារមន្ទីរជាតិ ក្នុងរាជធានីភ្នំពេញ។ លោក បានបន្តថា “ ប៉ុន្តែតាមរបៀបថ្មីនេះ ខ្ញុំមិនដឹងទេ”៕
ប្រែសម្រួលដោយ ចេវប៊ុននី