29 C
Phnom Penh

ការ​យាង​ចូល​ទិវង្គតរបស់​សម្ដេចឪ​ គឺ​ជា​បាត់​បង់​មហាវីរបុរស​ជាតិ​

ដោយ ឌឹ ខេមបូឌា ដេលី

បទវិភាគ

ព្រះបរមសពព្រះករុណា​ ព្រះ​បាទ​សម្តេច​​នរោត្តម​ សីហនុ ព្រះ​មហាវីរក្សត្រ​ ព្រះ​វរ​រាជ​​​បិតាជាតិ​ខ្មែរ បាន​យាង​និវត្ត​ជា​លើក​ចុង​ក្រោយ​មក​កាន់​ប្រទេសកម្ពុជា​ ជាទី​ស្រឡាញ​់​របស់​ព្រះអង្គវិញ​ កាល​ពីម្សិលមិញ ដោយ​មាន​​ការ​ចាំដង្ហែពី​ប្រជា​ពលរដ្ឋ​ប្រមាណ១​លាន​នាក់​ ដែល​បាន​ឈរអម​យា៉ងស្រងូតស្រងាត់ តាម​ដងមហាវិថី ដើម្បីគោរពព្រះបរមសព​ព្រះ​មហាវីរ​ក្សត្រ ដ៏​ជា​ទីស្រឡាញ់​បំផុត​របស់​​ប្រជាជន​កម្ពុជា​​​ ។​

ប្រជាពលរដ្ឋ​ខ្មែរ​គ្រប់​វ័យ​បាន​ឈរ​យ៉ាង​ស្រងូតស្រងាត់ អមតាមដងមហាវិថី​ ខណៈ​ព្រះ​បរមសព​សម្តេច​ឪ​​ ដែលជា​ក្សត្រមួយ​អង្គបាន​ទាម​ទារ​ឯករាជ្យ​មក​ជូន​ប្រទេសជាតិ របស់ព្រះអង្គ​ក្នុង​ឆ្នាំ​១៩៥៣​ ត្រូវ​បាន​ដង្ហែ ទៅកាន់​ព្រះ​បរម​រាជវាំង​ ហើយ​​ព្រះបរម​សព​​របស់​ព្រះ​អង្គ​នឹង​ត្រូវ​តម្កល់​នៅ​ទី​នោះ​យ៉ាង​តិច​ណាស់​រយៈពេល​បីខែ។

ព្រះ​បាទសម្តេច នរោត្តម​ សីហនុ បាន​យាង​​ចូល​ទិវង្គត​ដោយ​សារ​គាំង​បេះ​ដូងនៅ​ក្នុង​ព្រះ​ជន្មា​យុ​៨៩ព្រះ​វស្សា​ នៅ​វេលា​ម៉ោង​១​និង​២០នាទី​ រំលងអធ្រាត្រ កាល​ពីថ្ងៃច័ន្ទ ក្នុង​ទីក្រុង​បេ៉កាំង​។

ក្នុង​នាម​ជា​ប្រជាពលរដ្ឋ​ខ្មែរ​ ដែល​បាន​នាំ​គ្នា​ចេញ​មក​តាមដង​​មហាវិថីយ៉ាង​​​​ច្រើន​​​ហួសពីការ​ស្មាន​​ ដើម្បី​ចូលរួម​ព្រះ​រាជ​ពិធី​ ​ដង្ហែព្រះ​បរមសព ព្រះករុណា​ ព្រះ​បាទ​សម្តេច​​​នរោត្តម​ សីហនុ ព្រះ​មហា​វីរក្សត្រ​ ព្រះ​វរ​រាជ​​បិតាជាតិ​ខ្មែរ ប្រជាពលរដ្ឋ​ភាគច្រើន​មិន​ ដែល​ធ្លាប់​ជួបប្រទះការ​យាង​ចូលទិវង្គត​របស់​ព្រះ​មហាក្សត្រ​នោះ​ បាន​​មក​ប្រមូល​ផ្តុំ​គ្នា​ ដើម្បី​ចូលរួមកាន់​មរណទុក្ខ​​​ ចំពោះព្រះ​បរមសព​ព្រះបាទ​សម្តេច នរោត្តម​ សីហនុ។

សាលារាជធានីភ្នំពេញ​ បាន​លើក​ឡើង​ថា ខ្លួន​បាន​រៀបចំ​សម្រាប់​អ្នក​ចូល​រួម​ប្រមាណ​មួយ​សែននាក់ ប៉ុន្តែ​កាលពី​ម្សិលមិញ ចំនួន​អ្នកចូលរួមកាន់មរណទុក្ខ​បានកើនឡើង ១០​ដងលើសពីការ​ប៉ាន់​ស្មាន​របស់​មន្ត្រី​សាលា​រាជធានីភ្នំពេញ​​។

លោក ឡុង​ ឌីម៉ង់ អ្នក​នាំ​ពាក្យ​សាលា​រាជ​ធានីភ្នំពេញ​បាន​ឲ្យ​ដឹង​ថា “ មន្ត្រី​នគរ​បាល​បាន​រាយការណ៍ថា មាន​ប្រជា​ពល​រដ្ឋ​ជិត១​​​លាន​នាក់បាន​ចូលរួម​ ដង្ហែព្រះ​បរម​សព​របស់​សម្តេច​ឪ​ពី​អាកាស​យានដ្ឋាន​អន្តរជាតិ​ភ្នំពេញ​ រហូត​ដល់​ព្រះ​បរម​រាជវាំង។

នៅ​វេលាម៉ោង​២និង​៥០នាទី​រសៀល​ យន្ត​ហោះ​ដឹក​អ្នក​ដំណើរ​ធុនធំមួយគ្រឿង របស់ចិន​​​បាន​ចុះ​ចត​នៅ​ឯ​អាកាស​យានដ្ឋាន​អន្តរជាតិ​ភ្នំពេញ​ ហើយ​បាន​ចាប់​ផ្តើម​ពិធី​ដ៏​ឧឡារិក​ ជា​ផ្លូវការ​មួយ​ដែល​អូស​បន្លាយ​ពេល​ ​រហូត​ដល់​ពេល​ល្ងាច​។

ដោយ​ជួបជុំ​គ្នា​នៅ​លើ​វាលចុះចត ​ដើម្បី​ទទួលស្វាគមន៍​យន្ត​ហោះ​ដឹក​ព្រះ​បរម​សព​ និងស្វាគមន៍ការ​យាង​និវត្ត​របស់​រាជ​វង្សា​នុ​វង្ស​នោះ​​ មន្ត្រី​រដ្ឋា​ភិបាល​ជា​ច្រើន​បាន​ស្លៀក​ពាក់​ក្នុង​ឯក​សណ្ឋាន​ពណ៌ស​ និងមាន​មន្ត្រី​សង្ឃ​​ជាន់​ខ្ពស់​ជា​ច្រើន​អង្គ​ រួមទាំង​រាជវង្សានុវង្ស​ និង​មន្ត្រី​ទូត​បរទេស​មួយ​ចំនួន​ផង​ដែរ​។

ព្រះ​មហាក្សត្រី​ ​នរោត្តម​ មុនីនាថ សីហនុ ​​​្រ​ព្រះវរ​រាជ​មាតា​ជាតិ​ខ្មែរ​ បាន​​យាង​ចេញ​ពី​យន្ត​ហោះ​ដោយ​ព្រះភក្ត្រ​យ៉ាង​​ក្រៀម​ក្រំ​ ដោយ​បុត្រារបស់​ព្រះ​អង្គ​ គឺព្រះ​មហាក្សត្រ សីហមុនីជួយទប់​ព្រះ​កាយ​យាង​ចុះ​ពី​លើ​យន្ត​ហោះ។

លោក​នាយករដ្ឋមន្ត្រី​ ហ៊ុន សែន​ បានអម​ដំណើរ​សម្តេច​ម៉ែ និង​ព្រះ​មហា​ក្សត្រ​ នរោត្តម សីហ​មុនី​​ យ៉ាង​កៀកក្រោមការ​ទទួល​ស្វាគម​ន៍​ពីមន្ត្រី​រដ្ឋាភិបាល​ និង​រាជវង្សានុវង្ស​ ជាច្រើន​ទៀតនៅ​ឯអាកាស​យាន​ដ្ឋាន។ នៅ​ទីនោះ សំឡេងព្រះសង្ឃ​បង្សុកូុលតាម​ព្រះ​ពុទ្ធ​សាសនា ​​បាន​បន្លឺឡើង​ យ៉ាងកងរំពងតាម​រយៈ​ប្រព័ន្ធ​ឧគ្ឃោសនសព្ទ​​។

មន្ត្រី​ព្រះបរមរាជវាំង បានសែងព្រះ​មញ្ជូសា​​ពណ៌មាស​ តម្តល់​ព្រះបរមសពព្រះ​បាទ​សម្តេច​ នរោត្តម សីហនុ ដោយមាន​ការ​​តុប​តែង​លម្អ​ទៅ​ដោយ​ផ្កាម្លិះ​យ៉ាង​ច្រើន​ ចេញ​ពី​ផ្នែក​ខាង​ក្រោយយន្តហោះ​។​ មានទង់​របស់​​ព្រះ​បរម​រាជ​វាំងគ្រប​ពី​លើ​ព្រះ​មញ្ជូសា​។

ពេល​ព្រះ​មញ្ជូសា ត្រូវ​បាន​សែង​ដោយ​​ប្រុង​ប្រយ័ត្ន​បំផុត​ចុះ​ពី​យន្ត​ហោះ​ មានការ​ផ្លុំ​ត្រែ​ទទួលស្វាគមន៍ពី​កង​កិតិ្តយស​ជា​ច្រើន​ផងដែរ។ មន្ត្រីព្រះបរម​រាជវាំង បន្ទាប់​មក​បាន​​​លើកព្រះមញ្ជូសា​ដោយ​ក្តី​គោរព​បំផុត​ទៅ​​ដាក់​លើ​ព្រះ​ទីនាំង​ព្រះ​បរម​សព ​ដែល​មាន​​ការ​តុប​​​​តែង​លម្អ​ជា​រាង​សត្វ​ហង្ស​។​ បន្ទាប់​​ពី​ឈប់​បាន​មួយ​ភ្លែត ក្រុម​ភ្លេង​ពិណពាទ្យ​បាន​ចាប់​​ផ្តើម​ប្រគំ ដើម្បីលើកព្រះបរម​សព​ដាក់​​​លើ​ព្រះ​ទីនាំ​ង​មួយ​ផ្សេង​ទៀត​ រួចហើយ​ចាប់​ផ្តើម​​​ព្រះ​រាជពិធី​ដង្ហែ​ទៅតាម​ដង​​​មហា​​​វិថី ចេញ​ពី​​​អាកាស​យាដ្ឋាន​​​ទៅ​កាន់​ព្រះ​បរម​រាជ​វាំង​។

ព្រះ​តេជគុណ​ សៅរ៍ ចន្ទ​ថុល្ល ព្រះចៅ​អធិការវត្តលង្កា​ ក្នុង​រាជ​ធានីភ្នំពេញ បាន​មាន​​សង្ឃដីកាថា “ ព្រះ​សង្ឃ​បាន​បង្សុកូលថ្វាយ​សម្តេច​ឪ ​ហើយ​បាន​បួង​សួង​ដល់​សម្តេច​ឪ​ឲ្យ​លោកបាន​យាង​ទៅកាន់​ឋាន​សុគតិភព មុន​នឹង​​លើក​ព្រះ​បរមសព​ដាក់​លើ​ព្រះ​ទីនាំង​”។​ មុន​​ពេល​ព្រះ​បរម​សព​របស់​សម្តេច​ឪ​បាន​មក​ដល់ ​ព្រះ​តេជ​គុណ​ សៅរ៍​ ចន្ទ​ថុល្ល មាន​សង្ឃ​ដីកា​ថា ​ព្រះ​សង្ឃ​បាន​នាំគ្នាសូត្រធម៌​ដើមបី​ឧទ្ទិស​កុសល​ដល់​សម្តេច​ឪ​ចាប់​តាំង​ពី​​ទទួល​ដំណឹង​ពីការ​យាង​ចូល​ទិវង្គត​របស់​ព្រះ​អង្គមក​ម្លេ៉ះ​។

នៅ​ឯអាកាស​យានដ្ឋាន​អន្តរជាតិ​ភំ្នពេញ អ្នក​ស្រី​​ ផង់​ ផល្លី ​អាយុ៦៦ឆ្នាំ អញ្ជើញមក​ពីខេត្ត​កណ្តាល​ ដែល​ឈរ​​​ជាមួយ​ប្រ​ជា​ពល​រដ្ឋ​ផ្សេង​ទៀត​ ដោយ​កាន់​ព្រះ​ឆាយាលក្ខណ៍​របស់​ព្រះ​មហាវីរ​ក្សត្រ​​នរោត្តម​សីហនុ​ បាន​និយាយ​​ដោយ​​ខ្សឹក​ខ្សួល​ អំពី​សេចក្តី​ស្រឡាញ់​​របស់​អ្នក​ស្រី​ចំពោះ​​ព្រះ​មហាវីរក្សត្រ​ដែល​បានយាង​ចូល​ទិវង្គត​នៅ​ពេល​។

អ្នក​ស្រី​បាន​និយាយ​​ដោយ​មាន​ប្រសាស​ន៍​ដោយ​សំអាង​លើ​រឿង​ក្តី​ ដែល​ព្រះ​មហាវីរក្សត្រ​បាន​ប្តឹង​ទៅ​តុលាការ​យុត្តិធម៌​អន្តរជាតិ​​​ ដែល​បាន​ប្រ​គល់​​​​ប្រាសាទ​ព្រះ​វិហារ​​មក​កម្ពុជា​វិញ​កាល​ពី​ឆ្នាំ​១៩៦២​ថា​ “​ព្រះ​មហា​វីរក្សត្រ​បានធ្វើ​ការឲ្យយើងច្រើនណាស់ ហើយ​បាន​ទាមទារ​​​ប្រាសាទ​ព្រះ​វិហារពី​ប្រទេស​ថៃមក​វិញ”។ ​

ប្រ​ជា​ពលរដ្ឋជាងមួយលាននាក់ ​បាន​ឈរអមតាម​ដង​មហាវិថី​សហព័ន្ធ​រុស្ស៊ី​​ចាប់​ពី​អាកាស​យានដ្ឋាន​អន្តរជាតិ​​ព្រះបរមរាជវាំង ​​​និង​​នៅ​កន្លែង​ខ្លះ​មាន​ប្រជាពលរដ្ឋឈរ​ដង្ហែរជាពី​បួន​ទៅ​ប្រាំ​ជួរ។

ប្រជាពលរដ្ឋដែល​មកចូលរួម​ដង្ហែ​ព្រះ​បរមសព​ភាគ​ច្រើន​ស្លៀកពាក់​ពណ៌ស តាមពៃណី​សម្រាប់​កាន់​ទុក្ខ​​ ដោយ​​មាន​ពាក់​សញ្ញាកាន់មរណទុក។​ ប្រជា​ពលរដ្ឋបានលើក​ដៃ​សំពះ​​បួងសួង​ ខ្លះ​កាន់​ទង់ជាតិ ឬកាន់​ផ្កាឈូក ចំណែកឯ​ខ្លះ​ទៀតបាន​បង្ហូរ​ទឹក​ភ្នែក​។​ ប្រជាពលរដ្ឋ​បាន​ឈរ​សម្លឹង​មើល​យ៉ាង​ស្រងូតស្រងាត់​ពេល​ព្រះ​ទីនាំង​ដឹក​​ព្រះ​មញ្ជូសា​បាន​មកដល់​។

ការ​ដង្ហែ​ព្រះ​បរម​សព​របស់​ព្រះ​មហាវីរក្សត្រ​បាន​ចំណាយ​ពេល​ជាង​មួយ​ម៉ោង​​ ទើប​មក​​ដល់​ព្រះ​បរម​រាជវាំង​នៅ​វេលាម៉ោង​ប្រហែល​៥និង២០នាទី​ល្ងាច​។ ប្រជា​ពលរដ្ឋ​ជាងមួយលាននាក់​ ​បាន​ឈរ​រង់ចាំ​​អស់​រយៈ​ពេល​ជា​ច្រើន​ម៉ោង​នោះ​​ ​ដើម្បីទទួលស្វាគមព្រះបរមសព ​​​ដ៏គួរឲ្យរុំ​ជួលចិត្ត​បំផុត​។

បរិយាកាស​នៅ​ជុំ​វិញ​ព្រះ​បរម​រាជវាំង​ពោ​ពេញ​ទៅ​ដោយ​ការ​ទួញសោក​សង្រែង​នៅ​ពេល​ព្រះ​ទីនាំងដឹក​ព្រះបរម​សព​បាន​មកដល់​តំណាក់​កាល​ចុងក្រោយ​បន្ទាប់ពីបាន​ដង្ហែ​ក្នុងចម្ងាយ​១០គីឡូម៉ែត្រ​រួចមក។

ប្រជា​ពលរដ្ឋ​ ដែលបានចូលរួមដង្ហែ​ព្រះ​បរមសព​​ភាគ​ច្រើន​​អង្គុយ​យ៉ាង​ស្រងូតស្រងាត់ នៅ​ពេល​ក្បួន​ដង្ហែ​ព្រះ​បរមសព​បាន​ឆ្លង​កាត់​ឆ្ពោះ​ទៅ​កាន់​ព្រះ​បរមរាជ​វាំង​​​​ ដោយមាន​​ព្រះ​សង្ឃរាប់​រយ​អង្គ​ ដែល​រង់​ចយ៉ាង​អន្ទះសារ​​ចាប់​តាំង​ពី​ថ្ងៃ​ត្រង់​មក។​ ព្រះ​សង្ឃ​​បាន​ចាប់​ផ្តើម​សូត្រ​ធម៌​នៅ​ពេល​ព្រះ​ទីនាំង​ដឹក​ព្រះ​បរម​សព អមដោយព្រះបាទនរោត្តម សុីហមុនី និងលោកនាយករដ្ខមន្ត្រី ហ៊ុន សែន ​បាន​រំកិលមក​ដល់​មាត់​ទ្វារ​ព្រះ​បរម​រាជវាំង​។

​ព្រះ​រាជ​បុត្រ​របស់​​ព្រះ​មហាវីរក្សត្រ​ គឺព្រះ​អង្គម្ចាស់​នរោត្តម​ រណឫទ្ធិ បាន​យាង​ចុះ​ពី​រថយន្ត​ជាមួយ​បុត្រ​របស់​ព្រះ​អង្គ​​ ហើយស្វាគមន៍​អ្នក​ដង្ហែ​ព្រះ​សព​​នៅខាងមុខ​ទ្វារ​ព្រះ​បរមរាជ​វាំង​​។

នៅ​ខណៈ​ពេល​ព្រះ​បរមសព​នៃ​ព្រះ​មហាវីរ​ក្សត្រ​បាន​ចូលដល់​ក្នុង​បរិវេណ​ព្រះ​បរម​រាជវាំង​ អំពូល​ភ្លើង​ពណ៌​លឿង​​ដែល​ដាក់​នៅ​តាម​របង​ព្រះ​បរមរាជវាំង​ត្រូវ​បាន​បើក​បំភ្លឺឡើង​។​ ប្រជាពលរដ្ឋ​ដែល​ពពាក់ពពូន​​នៅ​មុខ​ទ្វារ​ព្រះ​បរម​រាជវាំង​នោះ​បាន​ចាប់​ផ្តើម​បំបែក​គ្នា​ និង​ដើរ​ទៅ​កាន់កន្លែង​ដាក់​​តាំងព្រះ​ឆាយាលក្ខណ៍​របស់ព្រះ​មហាវីរក្សត្រ​តាំងនៅខាងមុខ​ព្រះបរម​រាជវាំង​ ។

ព្រះ​បរមសព​របស់​សម្តេច​ឪ​នឹង​ត្រូវ​តំកល់​ទុក​យ៉ាង​ហោច​ណាស់​រយៈពេល​បី​ខែ​ ហើយ​បន្ទាប់​មក​​នឹង​ធ្វើពិធីបូជា​លើ​វាល​ព្រះមេរុ​ ខាង​មុខ​សារមន្ទីរជាតិ​។

ដោយ​ជូត​ទឹក​ភ្នែក​ចេញ​​​ថ្ពាល់អ្នក​ស្រី​ភឿន​ វណ្ណ​អាយុ​៤០ឆ្នាំ​​ អញ្ជើញមក​ពី​ខេត្ត​កណ្តាល​​បាន​រំឮកអំពីការ​ដឹក​នាំ​របស់​ព្រះ​បហាវីរក្សត្រ​នរោត្តម​សីហនុ។

អ្នក​ស្រី​មាន​ប្រសាសន៍​ថា​”​ឥឡូវ​នេះ​ព្រះ​អង្គ​បាន​យាង​ចូល​ទិវង្គត​ហើយ​​ខ្ញុំ​មិន​មាន​អារម្មណ៍​​ ឬ​ទំនុក​ចិត្ត​ចង់​បោះ​ឆ្នោត​ទេ​។​វា​កាន់​តែ​ពិបាក​រស់​នៅ​ណាស់។​ប្រ​ជា​ពលរដ្ឋ​កាន់​ក្រ​ទៅៗ​។អំឡុង​ពេល​ក្រោម​ការ​ដឹក​នាំ​របស់​ព្រះ​អង្គ​​ ខ្ញុំមិន​ធ្លាប់ពិបាក​អ៊ីចឹងទេ​។​យើង​រស់​នៅ​យ៉ាង​សប្បាយ​។​អ្វីៗ​ថោក​ជាង​នេះ​ឆ្ងាយ​ណាស់​៕

ប្រែសម្រួលដោយ ស៊ាន ស៊ុយឈាង និង ឃិន ណៃ

 

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស