ភរិយារបស់លោក ម៉ម សូណង់ដូ និងមន្ត្រីពន្ធនាគារម្នាក់ បាននិយាយកាលពីម្សិលមិញថា លោក ម៉ម សូណង់ដូ ម្ចាស់សា្ថនីយវិទ្យុឯករាជ្យដែលការជាប់ពន្ធនាគាររយៈពេល២០ឆ្នាំរបស់គាត់បានធ្វើឲ្យមានការថ្កោលទោសពីអន្តរជាតិកាលពីដើមខែនេះ ចំពោះតុលាការកម្ពុជានោះ បានបឹ្តងឧទ្ធរណ៍ហើយ។
លោក ម៉ម សូណង់ដូ ម្ចាស់វិទ្យុសម្បុកឃ្មុំ ត្រូវបានសាលាដំបូងរាជធានីភ្នំពេញផ្តន្ទាទោសពីបទបង្កើតចលនាអបគមន៍ក្នុងខេត្តក្រចេះ។
អង្គការសិទ្ធិមនុស្ស បានលើកឡើងថា រឿងក្តីនេះពាក់ព័ន្ធនឹងរឿងនយោបាយ និងមានបំណងបំបិទមាត់អ្នករិះគន់រដ្ឋាភិបាល។ ប្រទេសផ្តល់ជំនួយខ្លះក្នុងចំណោមប្រទេសផ្តល់ជំនួយបរទេសសំខាន់ៗរបស់ប្រទេសនេះ ក៏បានថ្កោលទោសសាលក្រមនេះដែរ និងបានអំពាវនាវឲ្យមានការដោះលែងលោក ម៉ម សូណង់ដូ។
លោក ស្រ៊ុន លាង ប្រធានពន្ធនាគារព្រៃស ដែលឃុំខ្លួនលោក ម៉ម សូណង់ដូនោះ បានមានប្រសាសន៍ថា “ លោក ម៉ម សូណង់ដូ បានសម្រេចប្តឹងឧទ្ធរណ៍តាមរយៈពន្ធនាគារ ហើយយើងបានបញ្ជូនបណ្តឹងឧទ្ធរណ៍នេះកាលពីថ្ងៃពុធ ទៅសាលាឧទ្ធរណ៍ហើយ”។
អ្នកស្រី ឌឹន ផាន់ណារ៉ា ភរិយារបស់លោក សូណង់ដូ មានប្រសាសន៍ថា ប្តីរបស់អ្នកស្រីបានសម្រេចប្តឹងឧទ្ធរណ៍ ហើយថា បណ្តឹងឧទ្ធរណ៍នេះត្រូវបានបញ្ជូនជាផ្លូវការតាមរយៈពន្ធនាគារទៅតុលាការកាលពីថ្ងៃទី ១២ ខែតុលា។
អ្នកស្រីបានបន្តថា “ យើងសង្ឃឹមថា សាលាឧទ្ធរណ៍នឹងដោះលែងគាត់ ពីព្រោះគាត់មិនបានធ្វើអ្វីខុសទេ និងមិនបានធ្វើអ្វីដូចដែលព្រះរាជអាជ្ញាចោទប្រកាន់គាត់នោះទេ”។ អំឡុងសវនាការជំនុំជម្រះលោកកាលពីក្នុងខែកញ្ញា សំណុំរឿងរបស់អយ្យការផ្អែកលើសក្ខីកម្មរបស់សហចុងចោទពីរបីនាក់ប៉ុណ្ណោះ ដែលទោសជាប់ពន្ធនាគាររបស់ពួកគេត្រូវបានព្យួរ ជាថ្នូរនឹងការភ្ជាប់រឿងនេះទៅលោក សូណង់ដូ។ អយ្យការក៏បានលើកឡើងពីអង្គហេតុជាច្រើនផងដែរ ដែលថា លោក ម៉ម សូណង់ដូ បានចូលរួមកិច្ចប្រជុំមួយរបស់ក្រុមប្រឆាំងដែលជាជនជាតិខ្មែរសញ្ជាតិអាមេរិកនៅក្នុងសហរដ្ឋអាមេរិក។
អង្គការក្នុងស្រុក និងអន្តរជាតិដែលតាមដានរឿងក្តីនេះ បានលើកឡើងថា ការចោទប្រកាន់នេះគឺជា “ រឿងប្រឌិត” ហើយមិនមានភ័ស្តុតាងគ្រប់គ្រាន់សម្រាប់ការចោទប្រកាន់លោក សូណង់ដូ បែបនេះទេ។ ប្រទេសបារាំង អាល្លឺម៉ង់ សហភាពអឺរ៉ុប និងអាមេរិក ក៏បានរិះគន់សេចក្តីសម្រេចរបស់តុលាការផងដែរ។
ទោះបីជាយ៉ាងណា ចាប់តាំងពីមានការប្រកាសសាលក្រមមក លោកនាយករដ្ឋមន្ត្រី ហ៊ុន សែន បានចោទប្រកាន់លោក សូណង់ដូ ជាសាធារណៈ ពីបទបះបោរ កាលពីខែមិថុនា និយាយការពារសេចក្តីសម្រេចរបស់តុលាការក្នុងការផ្តន្ទាទោសម្ចាស់ស្ថានីយវិទ្យុរូបនេះ។
លោក សែម សុផាត ក្រឡាបញ្ជីនៅសាលាឧទ្ធរណ៍ ដែលកាន់សំណុំរឿងព្រហ្មទណ្ឌ មានប្រសាសន៍កាលពីម្សិលមិញថា លោកមិនដឹងថា លោក សូណង់ដូ ប្តឹងឧទ្ធរណ៍នោះទេ៕
ប្រែសម្រួលដោយ ចេវ ប៊ុននី