អ្នកនាំពាក្យគណបក្ស សម រង្ស៊ី ម្នាក់បាននិយាយកាលពីម្សិលមិញថា លិខិតមួយច្បាប់ដែលលោក សម រង្ស៊ី មេដឹកនាំគណបក្ស សមរង្ស៊ី បានផ្ញើជូនលោកនាយករដ្ឋមន្ត្រី ហ៊ុន សែនស្នើសុំវិលត្រឡប់មកប្រទេសកម្ពុជាវិញ ដោយសុវត្ថិភាព ដើម្បីគោរពព្រះវិញ្ញាណក្ខន្ធ សម្តេចព្រះ មហាវីរក្សត្រ នរោត្តម សីហនុ នោះ ត្រូវបានបញ្ជូនទៅស្នាក់ការគណបក្សវិញកាលពីថ្ងៃសៅរ៍។
លោក សម រង្ស៊ី ដែលបច្ចុប្បន្នរស់នៅជានិរទេសខ្លួនក្នុងទីក្រុងប៉ារីស ដើម្បីគេចពីការផ្តន្ទាទោសឲ្យជាប់ពន្ធនាគាររយៈពេល១២ឆ្នាំនោះ បានធ្វើសំណើ ជូនលោក ហ៊ុន សែន និង ព្រះមហាក្សត្រ នរោត្តម សីហមុនី តាមរយៈលិខិតពីរដោយឡែកពីគ្នាកាលពីថ្ងៃព្រហស្បតិ៍ ដែលមួយច្បាប់ផ្ញើទៅទីស្តីការគណៈរដ្ឋមន្ត្រី និងមួយច្បាប់ទៀតទៅខុទ្ទកាល័យរបស់ព្រះមហាក្សត្រ នរោត្តម សីហមុនី។
ព្រះអង្គម្ចាស់ ស៊ីសុវត្ថិ ធម្មិកោ ប្រធានខុទ្ទកាល័យរបស់សម្តេចឪ ដែលយាងចូលទិវង្គត បានបញ្ជាក់ថាបានទទួលលិខិតនេះកាលពីថ្ងៃព្រហស្បតិ៍ ប៉ុន្តែមានបន្ទូលថា រឿងនេះមិនស្ថិតនៅលើអំណាចរបស់ព្រះមហាក្សត្រទេ។
កាលពីម្សិលមិញ លោក យឹម សុវណ្ណ អ្នកនាំពាក្សគណបក្ស សម រង្ស៊ី មានប្រសាសន៍ថាលិខិតផ្ញើជូនលោក ហ៊ុន សែន ត្រូវបានបញ្ជូនត្រឡប់មកទីស្នាក់ការគណបក្សវិញកាលពីថ្ងៃសៅរ៍ ដោយមានចំណារតូចមួយពីលោក ពូជ សារុន ប្រធាននាយកដ្ឋានរដ្ឋបាលនៅទីស្តីការគណៈរដ្ឋមន្ត្រី។ លោក សារុន បានលើកឡើងក្នុងចំណារនោះថា លិខិតនេះត្រូវបានបញ្ជូនទៅវិញ ពីព្រោះគ្មានអាសយដ្ឋានរបស់លោក សម រង្ស៊ី។
លោកបានមានប្រសាសន៍ថា “ យើងនឹងផ្ញើលិខិតនេះទៅលោកនាយករដ្ឋមន្ត្រីនៅថ្ងៃនេះ។ យើងនឹងផ្ញើអាសយដ្ឋានរបស់លោក សម រង្ស៊ី នៅក្នុងប្រទេសកម្ពុជា និងអាសយដ្ឋានរបស់លោកក្នុងទីក្រុងប៉ារីស”។ លោកបានបន្ថែមថា លោកដឹងថា សំណើនេះ ចម្លែក។
លោក ផៃ ស៊ីផាន អ្នកនាំពាក្យទីស្តីការគណៈរដ្ឋមន្ត្រីបានថ្លែងថា ការដាក់បញ្ចូលអាសយដ្ឋាននៅលើលិខិតផ្លូវការជូនចំពោះលោក ហ៊ុន សែន ជានីតិវិធីសមស្រម ពីព្រោះនាយកដ្ឋានរដ្ឋបាលចាំបាច់ត្រូវបញ្ជាក់ប្រភពលិខិត មុនពេលបញ្ជូនទៅនាយករដ្ឋមន្ត្រី។
ដោយសំដៅដល់ព័ត៌មានអំពីលិខិតនេះដែលត្រូវបានរាយការណ៍តាមប្រព័ន្ធផ្សព្វផ្សាយនោះ លោកបានថ្លែងថា “ ពួកគេ(អ្នកផ្ញើ) គួរតែយល់ថា ទំនាក់ទំនងផ្លូវការគួរតែជារឿងឯកជន ប៉ុន្តែពួកគេធ្វើសំណើនេះជាសាធារណៈមុន” ។
លោកក៏បានជំទាស់នឹងការអត្ថាធិប្បាយរបស់ព្រះអង្គម្ចាស់ ធម្មិកោ អំពីលិខិតនេះដែរ ដោយមានប្រសាសន៍ថា ការថ្លែងជាសារធារណៈអំពីបញ្ហានយោបាយ មិនគួរធ្វើឡើង អំឡុងពេលកាន់ទុក្ខព្រះបរមសពសម្តេចឪទេ។
លោកបានថ្លែងថា “ ព្រះអង្គមិនគួរធ្វើឲ្យរឿងនយោបាយពាក់ព័ន្ធនឹងព្រះរាជពិធីបុណ្យព្រះបរមសពនៅពេលនេះទេ។ រដ្ឋាភិបាលរបស់ខ្ញុំ កំពុងតែព្យាយាមយកចិត្តទុកដាក់លើការរៀបចំព្រះរាជពិធីបុណ្យព្រះបរមសព”។
លោក ខៀវ កាញារីទ្ធ រដ្ឋមន្ត្រីក្រសួងព័ត៌មានបានមានប្រសាសន៍ថា ស្រេចតែលោក សម រង្ស៊ី ទេថាតើគាត់ចង់មកកម្ពុជាវិញ ឬយ៉ាងណា។
លោកបានលើកឡើងក្នុងសារមួយនៅលើគេហទំព័រ Facebookថា “ លោក សម រង្ស៊ី ដឹងច្បាស់ថា គ្មាននរណាហាមឃាត់គាត់មិនឲ្យចូលក្នុងប្រទេសកម្ពុជានោះទេ។ លិខិតនេះមានបំណងចង់ឲ្យមតិសាធារណៈអន្តរជាតិយល់ខុស ជាពិសេសមតិបរទេស ដែលថា លោក សម រង្ស៊ី គឺជាជនរងគ្រោះពីការធ្វើទុកបុកម្នេញផ្នែកនយោបាយ ជំនួសឲ្យអ្នកមានទោស”។
លោក សម រង្ស៊ី ត្រូវបានផ្តន្ទាទោសឲ្យជាប់ពន្ធនាគារសរុប១២ឆ្នាំ តាមការចោទប្រកាន់ពីបទញុះញង់ ការផ្សព្វផ្សាយព័ត៌មានមិនពិត និងពីបទបំផ្លិចបំផ្លាញទ្រព្យសម្បត្តិសាធារណៈ ចំពោះការដកបង្គោលតម្រុយព្រំដែនជាមួយវៀតណាម និងបង្ហោះផែនទីព្រំដែនតាមអុីនធឺណិត។
លោក រង្ស៊ី និងក្រុមអ្នកគាំទ្រ លើកឡើងថា ការចោទប្រកាន់ និងការផ្តន្ទាទោសមេដឹកនាំគណបក្សប្រឆាំងដ៏ធ្ងន់បែបនេះ គឺជារឿងនយោបាយ៕(រាយការណ៍បន្ថែមដោយ ឃួន ណារីម)
ប្រែសម្រួលដោយ ចេវ ប៊ុននី