កាលពីម្សិលមិញ សាលាដំបូងខេត្តកោះកុងបានផ្តន្ទាទោសសន្តិសុខឯកជនម្នាក់ ពីបទសម្លាប់ដោយចៃដន្យនូវមន្ត្រីកងរាជអាវុធហត្ថម្នាក់ ដែលបានបាញ់សម្លាប់លោក ឈុត វុទ្ធី សកម្មជនការពារបរិស្ថានដ៏លេចធ្លោបំផុត កាលពីក្នុងខែមេសា និងត្រូវបានផ្តន្ទាទោសឲ្យជាប់ពន្ធនាគាររយៈពេលពីរឆ្នាំ។
ក៏ប៉ុន្តែភ្លាមៗនោះ ចៅក្រមប្រធានក្រុមប្រឹក្សាជំនុំជម្រះ លោក ខាំ សុផារី បានព្យួរទោសរយៈពេល១៨ខែនៃទោសពីរឆ្នាំ មានន័យថា ឈ្មោះ រ៉ាន់ បូរ័ត្ន ដែលត្រូវបានចាប់ខ្លួនកាលពីថ្ងៃទី២៧ ខែមេសា អាចត្រូវដោះលែងនៅថ្ងៃសៅរ៍នេះ។
ចៅក្រម សុផារី បានមានប្រសាសន៍ពេលទាក់ទងតាមទូរស័ព្ទបន្ទាប់ពីប្រកាសសាលក្រមកាលពីម្សិលមិញថា “ តុលាការផ្តន្ទាទោស រ៉ាន់បូរ័ត្ន រយៈពេលពីរឆ្នាំ ដោយជាប់ពន្ធនាគាររយៈពេលប្រាំមួយខែ គិតចាប់ពីថ្ងៃចាប់ខ្លួន”។ លោកបានបដិសេធមិនធ្វើអត្ថាធិប្បាយថែមទៀតទេ។ តាមក្រមព្រហ្មទណ្ឌ ទោសអតិបរមាពីបទសម្លាប់ដោយចៃដន្យ គឺត្រូវជាប់ពន្ធនាគាររយៈពេលបីឆ្នាំ។
កាលពីម្សិលមិញ អង្គការសិទ្ធិមនុស្សបានបន្ទោសតុលាការ ចំពោះសាលក្រមប្រកាសកាលពីម្សិលមិញ និងដំណើរការសវនាការជំនុំជម្រ ះកាលពីថ្ងៃទី៤ ខែតុលា ដែលលោកចៅក្រម សុផារី ក៏បានប្រកាសដែរថា លោក បានបិទការស៊ើបអង្កេតករណីបាញ់សម្លាប់លោក ឈុត វុទ្ធី កាលពីថ្ងៃទី២៦ ខែមេសា ពីព្រោះមន្ត្រីរូបនេះដែលសង្ស័យថា អ្នកសម្លាប់នេះ បានស្លាប់ទៅហើយ។ លោកចៅក្រម សុផារី បានមានប្រសាសន៍នៅពេលនោះថា ការស៊ើបអង្កេតករណីបាញ់សម្លាប់សកម្មជនប្រឆាំងនឹងការកាប់ឈើរូបនេះបានបញ្ចប់ ពីព្រោះមន្ត្រីយោធា ដែលសង្ស័យថា បានបាញ់សម្លាប់លោក ឈុត វុទ្ធី បានស្លាប់ហើយ។
លោក ឈុត វុទ្ធី ដែលជារឿយៗឈ្លោះជាមួយអាជ្ញាធរ ដោយសារតែការងារការពារព្រៃឈើរបស់គាត់ បានស៊ើបអង្កេតសេចក្តីរាយការណ៍អំពីការកាប់ឈើខុសច្បាប់នៅក្នុងតំបន់ដាច់ស្រយាលមួយនៅតាមជួរភ្នំក្រវាញក្នុងខេត្តកោះកុង នៅពេលលោកត្រូវទាហានបាញ់ស្លាប់ កាលពីថ្ងៃទី២៦ ខែមេសា។
តំបន់ដែលលោកស៊ើបអង្កេត គឺស្ថិតនៅក្រោមការត្រួតត្រារបស់ក្រុមហ៊ុនTimber Greenដែលឈ្មោះ រ៉ាន បូរ័ត្ន ជាអ្្នកយាម។
លោក ឈុត វុទ្ធីបានធ្វើដំណើរជាមួយអ្នកយកព័ត៌មានពីរនាក់ ពីកាសែតខេមបូឌា ដេលី នៅពេលមានការបាញ់សម្លាប់នោះ។ ការបាញ់ប្រហារនោះ កើតឡើងក្រោយពីលោក រ៉ាន់ បូរ័ត្ន និងកងរាជអាវុធហត្ថ និងទាហានខ្លះផង បានរឹបអូសម៉ាស៊ីនថតពីអ្នកយកព័ត៌មាន និងលោក ឈុត វុទ្ធី និងហាមមិនឲ្យពួកគេចាកចេញពីតំបន់នោះឡើយ។
នៅក្នុងសវនាការជំនុំជម្រះ កាលពីថ្ងៃទី៤ ខែតុលា លោក រ៉ាន់ បូរ័ត្ន បានអះអាងថា មន្ត្រីកងរាជអាវុធហត្ថឈ្មោះ អុិន រតនា បានយកកាំភ្លើងអាកា៤៧ មកបាញ់លោក ឈុត វុទ្ធី បន្ទាប់ពីបានឈ្លោះប្រកែកគ្នាយ៉ាងក្តៅគគុករវាងបុរសទាំងពីរ។ដើម្បីទប់ស្កាត់កុំឲ្យមានការបាញ់ប្រហារថែមទៀត លោក រ៉ាន់ បូរ័ត្ន បានអះអាងថា ខ្លួនពេលនោះបានព្យាយាមដណ្តើមកាំភ្លើងពី អុិន រតនា ដែលពេលនោះហើយកាំភ្លើងបានរាលកៃដោយអចេតនា ហើយទៅត្រូវចំទ្រូង អុិន រតនាចំនួនពីរគ្រាប់។
ប៉ុន្តែមន្ត្រីអង្គការសិទ្ធិមនុស្ស បានលើកឡើងអំពីការមន្ទិលសង្ស័យថា ការលើកឡើងអំពីការសម្លាប់លោក ឈុត វុទ្ធី និង អិុន រតនា ចាប់តាំងពីកើតហេតុភ្លាមម៉្លេះ កាលពីក្នុងខែឧសភា នៅពេលគណៈកម្មការពិសេសមួយ របស់រដ្ឋាភិបាល ត្រូវបានបង្កើតឡើងដើម្បីស៊ើបអង្កេតករណីបាញ់សម្លាប់អ្នកទាំងពីរនេះ។
នៅក្នុងសេចក្តីប្រកាសមួយកាលពីម្សិលមិញ អង្គការសិទ្ធិមនុស្សក្នុងស្រុកលីកាដូ បានហៅដំណើេរការកាត់ក្តីទាំងស្រុងនេះចាប់ពីការស៊ើបអង្កេតការសម្លាប់ទ្វេរហូតដល់ការផ្តន្ទាទោសកាលពីម្សិលមិញថាជា “ ការចំអករបស់តុលាការចាប់ពីថ្ងៃដំបូងមកម៉្លេះ”។
លោកស្រី ណាលី ពីឡូក លើកឡើងក្នុងសេចក្តីប្រកាសមួយថា “ ការបាញ់ប្រហារនេះធ្វើឲ្យសកម្មជនការពារបរិស្ថានដ៏លេចធ្លោម្នាក់និងមន្ត្រីកងរាជអាវុធហត្ថម្នាក់ស្លាប់ ហើយលទ្ធផលនៃការស៊ើបអង្កេត គឺថា បុគ្គលិកសន្តិសុខឯកជនម្នាក់ ដែលគ្មានអាវុធសោះអំឡុងឧប្បត្តិហេតុនោះ ត្រូវជាប់ពន្ធនាគាររយៈពេលប្រាំមួយខែ”។ លោកស្រី ពីឡូក បានមានប្រសាសន៍ថា “ នេះជាគំរូគួរឲ្យខ្លាចបំផុតសម្រាប់អ្នកដែលចង់និយាយគ្មានសំចៃមាត់ប្រឆំាងនឹងស្ថានភាពនៅក្នុងប្រទេសកម្ពុជា”។
អង្គការលីកាដូ ក៏បានរិះគន់តុលាការផងដែរពីការបិទសំណុំរឿងករណីបាញ់សម្លាប់លោក ឈុត វុទ្ធី ដោយមិនបានបញ្ជាក់ឲ្យបានច្បាស់លាស់ថា លោក អុិន រតនា ពិតជាឃាតករមែន។
សេចក្តីថ្លែងការណ៍នេះ បានឲ្យដឹងថា “ ប្រសិនបើគ្មានភស្តុតាងទេ វាមិនអាចបញ្ជាក់ឲ្យត្រឹមត្រូវតាមច្បាប់ថា ទង្វើរបស់ បូរ័ត្ន គឺដើម្បីការពារខ្លួន ពេលព្យាយាមដកអាវុធពី អុិនរតនា។ គ្មានភ័ស្តុតាងណាគួរឲ្យជឿបានអំពីកំហុសរបស់លោក រតនាត្រូវបានបង្ហាញនៅក្នុងសវនាការជំនុំជម្រះដែលមានរយៈពេល៩០នាទីនោះទេ។ តាមពិត នៅក្នុងសវនាការនោះគា្មនភ័ស្តុតាងគ្រប់គ្រាន់ទេ”។
សេចក្តីថ្លែងការណ៍នេះបានបន្តដាក់កំហុសលើអាយ្យការ ដោយសារមិនបង្ហាញអំពីការធ្វើកោសល្យវិច័យគ្រាប់កាំភ្លើង ស្នាមមេដៃ និងស្នាមត្រូវគ្រាប់នៅលើទ្រូង អុិន រតនា។ តុលាការក៏គ្មានភ័ស្តុតាងបង្ហាញទីតាំង ឬចំនួនគ្រាប់កាំភ្លើង ដែលបន្សល់ទុកនៅកន្លែងកើតហេតុដែរ។
អង្គការលីកាដូ បានបញ្ជាក់ថា មានតែសាក្សីពិការភ្នែកម្ខាងម្នាក់ប៉ុណ្ណោះ បានរៀបរាប់អំពីការលើកឡើងរបស់លោក បូរ័ត្នហើយថា តុលាការមិនបានបញ្ជាក់មូលហេតុវត្តមានរបស់សាក្សីមួយចំនួនទៀត ដែលមិនបានចូលរួមក្នុងពេលបើកសវនាការជំនុំជម្រះឡើយ។
ការបកស្រាយអំពីព្រឹត្តិការណ៍ ដែលបានបង្ហាញអំឡុងការបើកសវនាការជំនុំជម្រះ ក៏ភ័ស្តុតាង ដែលត្រូវបានរៀបចំដោយអាជ្ញាធររដ្ឋាភិបាល មិនបានច្បាស់លាស់ដែរ។ មុនគណៈកម្មការពិសេសបានចេញសេចក្តីសន្និដ្ឋានរបស់ខ្លួន ក្រុមមន្ត្រីនអះអាងថា បន្ទាប់ពីការបាញ់ប្រហារ លោក ឈុត វុទ្ធី ភ្លាម លោក អុិន រតនា បានយកកាំភ្លើងអាកា៤៧ បាញ់សម្លាប់ខ្លួនឯង។
លោក អំ សំអាត ប្រធានក្រុមបច្ចេកទេសរបស់អង្គការលីកាដូ បានមានប្រសាសន៍ថា អង្គការរបស់លោកនឹងបន្តស៊ើបអង្កេតករណីស្លាប់របស់លោក ឈុត វុទ្ធី ដោយសង្ឃឹមថា អាចឲ្យតុលាការបើកសវនាការជំនុំជម្រះឡើងវិញ។
កូនប្រុសលោក ឈុត វុទ្ធី ឈ្មោះ ចូវ ឧត្តមរស្មី និយាយថា លោក បូរ័ត្ន សមនឹងទទួលទោសធ្ងន់ជាងនេះ ហើយថា ខ្លួនមិនសប្បាយចិត្តចំពោះសេចក្តីសម្រេចរបស់តុលាការ ដែលបិទរឿងក្តីឃាតកម្មឪពុកលោកឡើយ។
គាត់បានបន្តថា “ ខ្ញុំខកចិត្តចំពោះសេចក្តីសម្រេចរបស់តុលាការដែលបានបិទសំណុំរឿងឪពុករបស់ខ្ញុំ ដោយមិនបានស៊ើបអង្កេតថែមទៀត ដើម្បីស្វែងរកឃាតករ ដែលបាញ់សម្លាប់គាត់ ខណៈដែលគាត់កំពុងតាមមើលសកម្មភាពរកសុីកាប់ឈើខុសច្បាប់”៕
(រាយការណ៍បន្ថែមដោយ Zsombor Peter)
ប្រែសម្រួលដោយ ចេវ ប៊ុននី