យោងតាមសារាចរណែនាំ ចុះហត្ថលេខាដោយលោកនាយករដ្ឋមន្ត្រី ហ៊ុន សែន កាលពីម្សិលមិញ បានឲ្យដឹងថា ថ្ងៃទី១៥ ខែតុលាជាថ្ងៃដែលព្រះករុណា សម្ដេចឪ នរោត្តម សីហនុ បានយាងចូលទិវង្គតនោះ នឹងក្លាយជាថ្ងៃកាន់ទុក្ខប្រចាំឆ្នាំ ចំណែកឯបុណ្យចម្រើនព្រះជន្មរបស់ព្រះអង្គ នៅថ្ងៃទី៣១ខែតុលានោះនឹងមិនកំណត់ជាថ្ងៃបុណ្យជាតិទៀតទេ។
លោក ជា គាន អនុប្រធានគណៈកម្មាធិការរៀបចំបុណ្យជាតិ និងអន្ដរជាតិបានមានប្រសាសន៍ថា “ រដ្ឋាភិបាលបានសម្រេចឲ្យឈប់សម្រាកមួយថ្ងៃនៅថ្ងៃទី១៥ ខែតុលាដើម្បីកាន់ទុក្ខចំពោះសម្ដេចឪ”។
សារាចរណែនាំនេះបានបញ្ជាឲ្យស្ថាប័ន ជាតិទាំងនៅក្នុងប្រទេស និងក្រៅប្រទេសកណត់យកថ្ងៃនេះជាថ្ងៃឈប់សម្រាកវិញ។
សារាចរណែនាំបានបន្ដថា “ គ្រប់ក្រសួងរបស់រដ្ឋាភិបាល និងអង្គការក្រៅរដ្ឋាភិបាលទាំងអស់ត្រូវតែរៀបចំពិធីតាមប្រពៃណីខ្មែរនៅថ្ងៃទី១៥ ខែតុលា ដើម្បីសម្ដែងនូវការចូលរួមរំលែកទុក្ខរបស់ខ្លួនចំពោះសម្ដេចឪ”។
សារាចរណែនាំបានបន្ថែមថា ស្ថានទូត ស្ថានកុងស៊ុល វត្តអារាម អាជ្ញាធរស្រុក-ខណ្ឌនិងអាជ្ញាធរឃុំ-សង្កាត់ ក៏ត្រូវតែកំណត់យកថ្ងៃនេះដែរ ហើយថ្ងៃបុណ្យ ចម្រើនព្រះជន្មសម្ដេចឪ នៅថ្ងៃទី៣១ ខែតុលា ដែលពីមុនជាថ្ងៃឈប់សម្រាកនោះ នឹងមិនត្រូវកណត់ជាថ្ងៃឈប់សម្រាកទៀតទេ។
ប្រាំពីរថ្ងៃបន្ទាប់ពីព្រះករុណាសម្ដេចព្រះបាទ នរោត្តម សីហនុ បានយាងចូលទិវង្គតដោយសារគាំងបេះដូងនៅក្នុងមន្ទីរពេទ្យក្នុងទីក្រុងប៉េកាំង នៃសាធារណរដ្ឋប្រជាមានិតចិន ក្នុងព្រះជន្មាយុ៨៩ព្រះវស្សាមកអ្នកកាន់ទុក្ខរាប់លាននាក់បាននាំគ្នាសម្រុកមកកាន់ព្រះបរមរាជវាំង ដែលជាកន្លែងតម្កល់ព្រះបរមសពព្រះករុណា ដើម្បីគោរពព្រះវិញ្ញាណក្ខន្ធ នៅខាងមុខព្រះឆាយាលក្ខណ៍ដ៏ធំរបស់ព្រះអង្គ។
លោក ហោ ណាំហុង រដ្ឋមន្ត្រីក្រសួងការបរទេសកម្ពុជា បានប្រាប់អ្នកយកព័ត៌មាននៅក្រសួងការបរទេសថា កាលពីម្សិលមិញលោក ម៉ាទី ណាតាឡេហ្គាវ៉ា (Marty Natalegawa) រដ្ឋមន្ត្រីការបរទេសឥណ្ឌូណេស៊ី បានដឹកនាំគណៈប្រតិភូមានសមាជិកប្រាំមួយនាក់ មកកាន់ព្រះបរមរាជវាំង ដើម្បីគោរពព្រះវិញ្ញាណក្ខន្ធសម្ដេចឪ។
គណៈប្រតិភូមកពីប្រទេស វៀតណាម ឡាវ ថៃ សិង្ហបុរី ភូមា និងកូរ៉េខាងជើង បានគោរពព្រះវិញ្ញាណក្ខន្ធព្រះករុណានៅឯព្រះបរមរាជវាំងរួចហើយ ខណៈពេលព្រះសង្ឃ២.០០០អង្គបានសូត្រធម៌ឧទិ្ទសកុសលថ្វាយព្រះវិញ្ញាណក្ខន្ធព្រះករុណានៅឯព្រះបរមរាជវាំងកាលពីរសៀលថ្ងៃសៅរ៍៕
ប្រែសម្រួលដោយ ហម សុផាណ្ណា