37.6 C
Phnom Penh

​ជន​ជាតិ​ចិន​ទី​២​ត្រូវ​បាន​ចាប់​ខ្លួន​​ពី​បទ​​បំផ្លាញ​ព្រះ​ឆាយាល័ក្ខណ៍​

ដោយ ឌឹ ខេមបូឌា ដេលី

បទវិភាគ

​មន្ត្រីនគរបាល​បាននិយាយ​ថា​ អ្នក​គ្រប់​គ្រង​រោងចក្រ​ជាជន​ជាតិ​ចិនទី​២​​​ត្រូវ​បាន​ចាប់​​​​ខ្លួន​​កាល​ពី​ម្សិល​មិញ ​​ពី​បទ​​បាន​បំផ្លាញ​ព្រះ​ឆាយាល័ក្ខណ៍​របស់​សម្តេច​ឪ​ នរោត្តម​ សីហនុ ខណៈដែល​ស្ត្រី​ជនជាតិ​ចិន​ម្នាក់​ ដែល​​​ ​បាន​បំផ្លាញ​ព្រះ​ឆាយាល័ក្ខណ៍​​របស់​ព្រះ​មហា​​​វីរក្សត្រ​យាង​ចូល​ទិវង្គត​នៅ​ឯ​រោង​ចក្រ​កាត់​ដេរ​​មួយ​ក្នុង​រាជ​ធានី​ភ្នំ​ពេញ ​កាលពី​ថ្ងៃច័ន្ទ ត្រូវ​​បាន​តុលាការផ្តន្ទាទោស ​​និង​ព្យួរ​ទោស​​រយៈពេល​មួយឆ្នាំ​ ។

​លោក ​អុិន ដារា៉​​ ប្រ​ធាន​រដ្ឋបាល​របស់​រោង​​​​ចក្រ​នេះ​ បានមាន​ប្រ​សាសន៍​ថា​ស្រ្តី​អ្នក​គ្រប់​គ្រង​ជាជន​ជាតិ​ចិនម្នាក់​ របស់​រោង​ចក្រ​ស៊ុនលុង​ (Sunn Lung) នៅ​ក្នុង​ខណ្ឌ​មាន​ជ័យ​​រាជ​ធានី​ភ្នំ​ពេញ ដែល​នគរបាល​មិន​ប្រាប់​ឈ្មោះ​នោះ​ ត្រូវ​បាន​ចោទ​ប្រកាន់​ពី​បទ​បាន​បំផ្លាញ​រូប​ថតមួយ​​​ ដែល​មាន​ព្រះ​ភក្ត្រ​ព្រះ​មហាវីរក្សត្រ​នៅ​ក្នុង​ព្រះ​ចន្ទ​។

លោកឧត្តមសេនីយ៍ឯក​ ជួន ​សុវណ្ណ​ ស្នង​​​ការ​នគរបាល​រាជ​ធានី​ភ្នំ​ពេញ ​មាន​ប្រ​សាសន៍​ថា​ កម្មករ​កម្មការិនី​រាប់​រយ​នាក់​នៅ​ឯ​រោង​ចក្រ​​នោះ​បាន​ផ្ទុះ​កំហឹង ​​ហើយ​បាន​បង្ខំ​ឲ្យ​ស្រ្តី​រូប​នោះ​ទៅ​​​ព្រះ​បរម​រាជ​​វាំង​ជា​មួយ​ពួក​គេ ​ដើម្បី​​​​​​ក្រាប​សំពះ​នៅ​មុខ​ព្រះ​ឆាយា​ល័ក្ខណ៍​ព្រះ​មហាវីរក្សត្រ​ នរោត្តម​ សីហនុ​ ដែល​នៅ​ទី​​​នោះ​​ក្រោយ​មក​គាត់​ត្រូវ​នគរបាល​ស្នង​​​ការ​​​រាជធានី​ភ្នំ​ពេញ​ចាប់ឃុំ​ខ្លួន​។

លោក​ឧត្តមសេនីយ៍ឯក​​ សុវណ្ណ​ មាន​បាន​​​ប្រ​សាសន៍​បន្តថា​ “ ​គាត់​បាន​ហែក​រូប​ថត​មួយ​សន្លឹក​ ដែល​មាន​​ព្រះ​ភក្ត្រ​ព្រះ​មហា​វីរក្សត្រ​យាង​ចូល​ទិវង្គត​នៅក្នុងព្រះ​ចន្ទ​”។

លោក​ គៀត ច័ន្ទថារិទ្ធ​​ អ្នក​នាំពាក្យ​អគ្គស្នង​​​ការនគរបាល​ជាតិ​​បាន​បញ្ជាក់​​ក្រោយ​មក​ថា​ស្រ្តី​ជនជាតិ​ចិន​រូប​នោះ​ត្រូវ​បាន​​ចាប់​ខ្លួន​​ និង​កំពុង​ត្រូវ​នគរបាល​រាជ​ធានី​ភ្នំ​ពេញឃុំ​ខ្លួន​បណ្តោះអាសន្ន​។

នៅមុខ​ព្រះ​បរមរាជវាំង​មាន​កម្មករ​រាប់​រយ​នាក់​មក​ពី​រោង​ចក្រ​ ស៊ុន លុង​ បាន​ឡោម​​​ព័ទ្ធស្ត្រី​ជា​ជនជាតិចិន​រូប​នោះ​ ដើម្បី​បង្ខំ​​​ឲ្យ​គាត់​កោរសក់​​នៅ​មុន​ពេលត្រូវ​បាន​​នគរ​បាល​ជាង​១០នាក់​ ជួយសង្គ្រោះ​គាត់ដោយ​ចាប់ទាញ​​ចេញ​​​ពីក្រុម​កម្មករដ៏មាន​កំហឹង​​ទាំង​នោះ​។ ដោយ​ស្លៀក​ពាក់​ខោខូវប៊យ និង​ពាក់​អាវ​​យឺត​ ត្រូវបានមន្ត្រីនគរបាល​ពីរនាក់​ចាប់​គាត់​ដាក់​លើ​ម៉ូតូ​ រួចបើក​ចេញ​ទៅ​។

លោក ណុប វន្នី​​ អាយុ​២៤​ឆ្នាំ​ជា​កម្មករ​ម្នាក់​​នៅ​រោង​ចក្រ​ស៊ុន​លុងបាននិយាយ​ថា​ លោក​ និង​កម្មករ​កម្មការិនី​ប្រ​ហែល​២០០​នាក់​​​ចង់​ឲ្យ​​​អ្នក​គ្រប់​គ្រងជា​ជន​ជាតិ​ចិន​​រូប​នេះកោរ​សក់​ និង​សុំ​ទោសនៅខាងមុខព្រះ​ឆាយល័ក្ខណ៍​។

លោក ណុប វន្នី​ បាន​និយាយ​បន្តថា​ “ ​ខ្ញុំ​កំពុង​កាន់​រូប​ថត ​ដែល​មាន​ព្រ​ះភក្រ្ត​ព្រះ​មហា​ក្សត្រ​នៅ​ក្នុងព្រះចន្ទ​មួយ​សន្លឹក​​ ហើយ​គាត់​បាន​ដើរ​ចូល​មក​​ក្នុង​បន្ទប់​ រួចយក​រូប​ថត​ពី​ខ្ញុំ​​ហើយ​ហែក​ចោល​តែ​ម្តង​។​យើង​ទាំង​អស់​គ្នា​​ចង់​ឲ្យ​គាត់​កោរ​សក់​​នៅ​មុខ​ព្រះ​បរម​រាជ​វាំង​​ដើម្បី​សុំ​ទោស​ចំ​ពោះ​ព្រះ​មហា​​​វីរក្ស​​​ត្រ​​ដែល​​បាន​យាង​ចូល​ទិវង្គត”។

លោក អុិន ដារ៉ា ​ប្រ​ធាន​រដ្ឋបាល​នៅ​រោង​ចក្រ​នេះ​មាន​ប្រ​សាសន៍​ថា ​​ស្ត្រី​ជនជាតិ​ចិន ដែល​គេ​មិន​ប្រាប់​ឈ្មោះ​ឲ្យ​ដឹង​នោះ​​បាន​ប្រ​ព្រឹត្តិ​កំហុស​។ លោកបាន​មាន​ប្រ​សាសន៍​បន្ត​ថា “ ​​គាត់​មិន​បាន​ដឹង​ថា​ រូបថត​នោះ​មាន​​ព្រះ​ភក្ត្រ​​​ព្រះ​មហាវីរ​ក្សត្រ​ទេ​”។

កាល​ពី​ម្សិល​មិញ​​ ​សាលា​ដំបូង​រាជ​ធានី​ភ្នំ​ពេញ​បាន​ចំណាយពេល​មិន​ដល់​១៥​នាទី​ផង​ ដើម្បី​​បើកសវនាការជំនុំ​ជម្រះ​ទោស​ស្ត្រី​ជន​ជាតិ​ចិន​ម្នាក់​ទៀត​​ឈ្មោះ​វ៉ាង​ជាវ​ជាវ​​ ហើយ​​​បានរកឃើញ​ពិរុទ្ធភាព​ធ្វើឲ្យ​​​ខូចខាត​ដោយ​​ចេតនា តាមរយៈការហែក​បំផ្លាញ​ព្រះ​​ឆា​​​យា​​​ល័ក្ខណ៍​ព្រះ​មហាវីរក្សត្រ​​ ហើយ​ទោស​​នោះ​​​មានចែងក្នុងក្រមព្រហ្មទណ្ឌ។

កាលពីថ្ងៃច័ន្ទ មាន​កម្មករ​ កម្មការិនី​ជាង​១.០០០នាក់​មក​ពី​រោង​ចក្រចំនួន​បីនៅ​ក្នុង​​​ខណ្ឌមាន​ជ័យ​រាជធានីភ្នំពេញ​​បាន​នាំគ្នាធ្វើ​កូដកម្ម​តវ៉ាមួយ​បន្ទាប់ពី​​អ្នក​ស្រី​ វ៉ាង​ ជាវជាវ អាយុ​៤៣​ឆ្នាំ​​ បាន​ហែក​ព្រះ​ឆាយាល័ក្ខណ៍​ព្រះ​មហា​វីរក្សត្រព្រះបាទ​សម្តេច​​ នរោត្តម​ សីហនុ​ នៅ​ក្នុង​រោង​ចក្រ​ថប់​វើល​។

លោក សឿ វ៉ាន់នី ព្រះ​រាជអាជ្ញារង​អម​​​សាលា​​​ដំបូងរាជធានី​​មាន​ប្រសាសន៍ថា អ្នក​ស្រី​ វ៉ាង​ ជាវជាវ ​ត្រូវ​បាន​ផ្តន្ទាទោស​​និង​ព្យួរ​ទោស​រយៈ​ពេល​មួយ​ឆ្នាំ​​ និង​ពិន័យ​ជា​ប្រាក់​ចំនួន២,៥លាន​រៀល​និង​បង្គាប់​ឲ្យ​​​សង​​​សំណង​​​​ទៅ​ម្ចាស់​ព្រះឆាយា​ល័ក្ខណ៍ពីរ​សន្លឹក​ឈ្មោះ សៀង​ សេង​លី ចំនួន​២លាន​រៀល​។

អ្នកស្រី​វ៉ាង ជាវជាវ នឹង​ត្រូវ​បណ្តេញ​​​ចេញពីប្រទេសកម្ពុជា ឲ្យត្រឡប់​ទៅ​ប្រទេស​​​ចិន​វិញ​ ដែល​បច្ចុប្បន្ន​កំពុង​ត្រូវ​ឃុំ​ខ្លួន​នៅ​នាយក​ដ្ឋាន​នគរបាល​អន្តោប្រវេសន៍​។

អ្នក​ស្រី វ៉ាង ជាវជាវ ​ប្រាប់​តុលា​​​ការ​​​ថា “ ខ្ញុំ​មិន​បាន​ធ្វើ​អ្វី​ខុស​ទេ។ ខ្ញុំ​មិន​បាន​ដឹង​ថា រូប​ថត​នេះ​ជា​ព្រះ​ឆាយាល័ក្ខណ៍សម្តេចឪ​ដែល​ប្រជា​ពលរដ្ឋ​ខ្មែរគោរព​ និង​រំឭក​ពី​ព្រះអង្គនោះទេ”។

កម្មការិនី​រោង​ចក្រ​​ឈ្មោះ សៀង សេងលីអាយុ​៣៩​ឆ្នាំ ដែលបានថតរូប​អ្នក​ស្រី​ វ៉ាង ជាវជាវ​ ពេលកំពុងហែក​ព្រះ​ឆាយា​​​ល័ក្ខណ៍​​​ព្រះ​មហា​ក្សត្រ​​បាន​និយាយថា នាង​ពេញ​​​ចិត្ត​​​នឹងសេចក្តី​សម្រេច​របស់​តុលាការ​។

នាង​និយាយបន្តថា “ គាត់​បាន​ហែក​ព្រះ​ឆាយាល័ក្ខណ៍​ព្រះ​សម្តេច​ឪ​ ក្រោយ​​​ពី​​​ដណ្តើម​​​ពី​ដៃ​របស់​ខ្ញុំ​ ពេលខ្ញុំ​ចាប់​ផ្តើម​ធ្វើការ…ដូច្នេះ​ខ្ញុំ​​មកតុលាការ ​ដើម្បី​ឲ្យ​ដឹង​ច្បាស់​ថា គាត់​ពិតជាត្រូវបាន​ផ្តន្ទា​ទោស​តាមច្បាប់ ហើយ​បញ្ជូន​គាត់​ត្រឡប់​ទៅ​ប្រទេសចិនវិញ”។

កាលពីម្សិលមិញ មានករណី​ទី​បី​ស្រដៀង​​​គ្នា​នេះ​ដែរ​​ ដែលអ្នក​គ្រប់​គ្រង​ម្នាក់​ទៀត ​របស់រោងចក្រមួយនៅ​ក្នុងស្រុក​អង្គស្នួល​ខេត្ត​​​​កណ្តាល​ត្រូវបាន​នាំខ្លួនមកសាកសួរ​ពី​បទ​បំផ្លាញ​ព្រះ​ឆាយាល័ក្ខណ៍ព្រះ​មហា​​​វីរ​​​ក្សត្រនៅ​ក្នុង​រោង​ចក្រ​ អគីដេថ្មី ។

លោក ហៃ សុធាន មេបញ្ជាការ​កង​រាជ​​​អាវុធហត្ថ​ស្រុក​ ព្រមទាំងសាក្សី​ផ្សេងទៀត​នៅក្នុង​រោងចក្រ​បាន​និយាយថា ជន​ជាតិចិន​រូប​នោះ​ឈ្មោះ លាវ គុយឈាង អាយុ​៤៥​​​ឆ្នាំ​​​​ដែលសង្ស័យ​ថា បាន​រឹប​អូស​ និងញី​ព្រះ​ឆាយាល័ក្ខណ៍​ព្រះ​មហាក្សត្រ​ ហើយ​ដាក់​នៅ​ក្នុង​ហោប៉ៅ ជំនួយ​ការរបស់​គាត់​នៅ​ចំពោះ​​​មុខកម្មករ​ប្រហែល​២០នាក់​ បាន​បណ្តាល​ឲ្យកម្មករខឹងយ៉ាងខ្លាំង។លោក មាន​ប្រសាសន៍ថា “ គាត់​មិន​បាន​ហែក​ព្រះ​ឆាយាល័ក្ខណ៍ទេ”។ លោក​បានបន្ថែម​ថា ស្ត្រីនោះ​ត្រូវបាន​​ឃុំ​ខ្លួន​ដើម្បី​សុវត្ថិភាព​។

កម្មការិនីម្នាក់​ឈ្មោះ​ មឿង ហេង អាយុ​២១​ឆ្នាំ​បាន​និយាយថា ស្ត្រីជាជន​ជាតិចិន​​​នោះ​ត្រូវបានកម្មករចាប់​បង្ខំ​ឲ្យក្រាប​សំពះ​នៅមុខ​ព្រះ​ឆាយាល័ក្ខណ៍​ព្រះ​មហាវីរក្សត្រ​ ព្រះបាតសម្តេច នរោត្តម​ សីហនុ នៅ​ខាង​ក្រៅ​រោង​ចក្រ​មុន​ពេលមន្ត្រី​កង​រាជ​​​អាវុធ​​​ហត្ថ​នាំខ្លួនគាត់​ចេញ​ទៅ​។

លោក ខេង ទីតូ អ្នក​នាំ​ពាក្យ​កង​រាជ​​​អាវុធ​​​ហត្ថ​លើផ្ទៃប្រទេសបាន​មាន​ប្រសាសន៍ថា អ្នក​គ្រប់គ្រង​ជាជនជាតិចិន​រូប​នេះ​នឹង​ត្រូវ​បញ្ជូន​ទៅ​សាលាដំបូង​រាជធានី​​​ភ្នំពេញ​​​នៅ​​​ថ្ងៃនេះ ​ដើម្បី​សាកសួរ​អំពី​ករណីនេះ៕

(រាយការណ៍ដោយ ហៃ ស៊ីណា ឃួន ណារីន កាំង ម៉េងហ៊ុន និង​ Joshua Wilwohl)

ប្រែសម្រួលដោយ ឃិន ណៃ

 

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស