របាយការណ៍ប្រចាំឆ្នាំរបស់ធនាគារពិភពលោក (World Bank) ស្តីអំពី “ ការធ្វើអាជីវកម្ម” ដែលត្រូវបានចេញផ្សាយកាលពីថ្ងៃអង្គារ បានបង្ហាញថា ប្រទេសកម្ពុជាឡើងចំណាត់ថ្នាក់ប្រសើរជាងមុនចំនួនប្រាំលេខ ពោលគឺស្ថិតនៅចំណាត់ថ្នាក់ទី១៣៣ ក្នុងចំណោម១៨៥ប្រទេស ហើយវិស័យធនាគារបានរួមចំណែកច្រើនជាងគេបន្ទាប់ពីការបើកឲ្យដំណើរការដោយជោគជ័យនូវការិយាល័យផ្តល់ព័ត៌មានឥណទានរបស់ប្រទេសកម្ពុជា។
បើប្រៀបធៀបទៅនឹងប្រទេសផ្សេងៗទៀតនៅក្នុងតំបន់ ប្រទេសកម្ពុជាស្ថិតនៅក្នុងលំដាប់ថ្នាក់អន់ជាងប្រទេស វៀតណាម និងប្រទេសថៃ ដែលប្រទេសទាំងពីរនេះជាប់ចំណាត់ថ្នាក់ទី៩៩ និងទី១៨ ក៏ប៉ុន្តែ ប្រទេសកម្ពុជា ជាប់ចំណាត់ថ្នាក់ប្រសើរជាងប្រទេសឡាវយ៉ាងច្រើន ដោយប្រទេសឡាវជាប់ចំណាត់ថ្នាក់ទី១៦៣។ ប្រទេសសិង្ហបុរីជាប់ចំណាត់ថ្នាក់ទី១នៅក្នុងការធ្វើអាជីវកម្ម។
របាយការណ៍នេះបានចាត់ចំណាត់ថ្នាក់របស់ប្រទេសនីមួយៗ ដោយផ្អែកលើ១០ចំណុច ដែលជាចំណុចវាស់វែងអំពីភាពងាយស្រួលនៅក្នុងការធ្វើអាជីវកម្ម ហើយប្រទេសកម្ពុជាលោតឡើងបានចំនួន៤៥ថ្នាក់ ដោយទទួលបានចំណាត់ថ្នាក់ទី៥៣នៅលើពិភពលោកលើចំណុច ដែលវាស់វែងអំពីភាពងាយស្រួលក្នុងការខ្ចីប្រាក់ឥណទាន។ ធនាគារពិភពលោក បានបង្ហាញថា ចាប់តាំងពីខែមីនាមក ការខ្ចីប្រាក់ឥណទាន កាន់តែមានភាពងាយស្រួលជាងមុន ដោយសារធនាគារទាំងឡាយអាចទទួលព័ត៌មានស្តីអំពីប្រវត្តិឥណទានរបស់អ្នកខ្ចីប្រាក់ ដែលមានចំនួន១,១លាននាក់។
របាយការណ៍នេះបានបង្ហាញដោយមានខ្លឹមសារដូច្នេះទៀតថា “ លើសពីនេះទៅទៀត បទប្បញ្ញត្តិលើការចែកចាយព័ត៌មាន ដែលត្រូវបានដាក់ចេញកាលពី ខែឧសភា ឆ្នាំ២០១១ អនុញ្ញាតឲ្យអ្នកខ្ចីប្រាក់មានសិទ្ធត្រួតពិនិត្យមើលទិន្នន័យស្តីអំពីប្រវត្តិខ្ចីប្រាក់របស់ខ្លួន”។
ប្រទេសកម្ពុជា ក៏មានការចាត់ចែងល្អខាងការធ្វើពាណិជ្ជកម្មឆ្លងដែនផងដែរ ដោយកម្ពុជាឡើងចំណាត់ថ្នាក់ចំនួន២លេខ ពោលគឺទទួលបានចំណាត់ថ្នាក់ទី១១៨នៅលើពិភពលោក ខណៈដែលប្រាក់ចំណូលសរុបពីការធ្វើពាណិជ្ជកម្មបានកើនឡើងចំនួន២០ភាគរយ នៅក្នុងរយៈពេលប្រាំបួនខែដំបូងឆ្នាំនេះ បើធៀបនឹងរយៈពេលដូចគ្នាកាលពីឆ្នាំ២០១១។
ក៏ប៉ុន្តែ របាយការណ៍នេះ បានបង្ហាញថា ប្រទេសកម្ពុជានៅតែមិនមានការរីកចម្រើនខាងវិស័យដឹកជញ្ជូនទំនិញចេញចូលប្រទេសនៅឡើយ។ ដូចកាលពីឆ្នាំ ២០១១ដែរ ក្រុមហ៊ុនអាជីវកម្មនានា ត្រូវតែបំពេញទម្រង់បែបបទចំនួនប្រាំបួន ដើម្បីនាំទំនិញចេញ ហើយដើម្បីឲ្យទំនិញអាចចេញពីប្រទេសកម្ពុជារួច ជាមធ្យមគេនៅតែត្រូវចំណាយពេលចំនួន២២ថ្ងៃដូចមុន ហើយតាមពិតទៅការបញ្ជាទិញត្រូវបានធ្វើឡើងនៅពេលទំនិញត្រូវបានដឹកជញ្ជូនដាក់លើនាវាររួចរាល់។ របាយការណ៍នេះ ក៏បានបង្ហាញទៀតថា ការឡើងថ្លៃប្រេងឥន្ធនៈ បានធ្វើឲ្យចំណាយលើការនាំទំនិញចេញកើនឡើង ពោលគឺបានកើនឡើងពីចំនួន៧៣២ដុល្លារដល់ចំនួន៧៥៥ដុល្លារក្នុងមួយកុងតឺណ័រនាពេលបច្ចុប្បន្ននេះ។
ប្រទេសកម្ពុជាពិតបានធ្លាក់ចំណាត់ថ្នាក់ក្នុងចំណុចនៅសល់ចំនួនប្រាំពីរទៀត ដូចជា ការជួយសម្រួលក្នុងការចុះបញ្ជីអចលនទ្រព្យ ការទទួួលបានថាមពលអគ្គិសនីប្រើប្រាស់ ដំណោះស្រាយលើកង្វះថវិកា ការបើកអាជីវកម្ម ដំណោះស្រាយលើការអនុញាតក្នុងការសាងសង់ ការពារវិនិយោគិន ការបង់ពន្ធដារ ព្រមទាំងការបង្ខិតបង្ខំឲ្យចុះកិច្ចសន្យា។