ចលនាយុវជនគណបក្ស សម រង្ស៊ី គ្រោងនឹងធ្វើការតវ៉ានៅសួនសេរីភាព ក្នុងរាជធានីភ្នំពេញ នៅថ្ងៃទី៩ខែវិច្ឆកាដែលជាថ្ងៃបុណ្យឯករាជ្យ ដើម្បីអំពាវនាវឲ្យមានការដោះលែងទណ្ឌិតនយោបាយទាំងអស់។
យោងតាមលោក សួង សោភ័ណ មេដឹកនាំចលនាយុវជនគណបក្ស សម រង្ស៊ី បានឲ្យដឹងថា ក្រុមអ្នកតវ៉ា ដែលគេរំពឹងថា នឹងមានចំនួន១.០០០នាក់នោះ នឹងដាក់ញត្តិទៅព្រះបរមរាជវាំងស្នើសុំឲ្យព្រះមហាក្សត្រ នរោត្តមសីហមុនី ប្រទានការលើកលែងទោសដល់ទណ្ឌិតនយោបាយទាំងអស់។ ពួកគេនឹងដាក់ញត្តិចម្លងមួយច្បាប់ៗទៅក្រសួងយុត្តិធម៌រដ្ឋសភា និងក្រសួងមហាផ្ទៃផងដែរ។
លោក សោភ័ណ លើកឡើងថា “ យើងនឹងទាមទារឲ្យមានការដោះលែងទណ្ឌិតនយោបាយទាំងអស់ និង [ឲ្យមានការលើកលែងទោសដល់]អ្នកការពារសិទ្ធិមនុស្សដែលបានប្រឈមនឹងការចោទប្រកាន់បទព្រហ្មទណ្ឌ ព្រោះការសម្រេចរបស់តុលាការ [ដើម្បីផ្ដន្ទាទោសពួកគេនោះ] ត្រូវបានធ្វើឡើងក្រោមឥទ្ធិពលរបស់គណបក្សកាន់អំណាច”។
ញត្តិនេះនឹងស្នើសុំដោយត្រង់ៗឲ្យមានព្រះរាជទានលើកលែងទោសដល់លោក សមរង្ស៊ី មេដឹកនាំគណបក្ស សម រង្ស៊ី ដែលកំពុងរស់នៅដោយការនិរទេសខ្លួនឯងនៅក្នុងប្រទេសបារាំង តាំងពីឆ្នាំ២០០៩មក ដេើម្បីគេចវេះពីទោសជាប់ពន្ធនាគាររយៈពេល១១ឆ្នាំពីបទញុះញង់ បរិហារកេរ្តិ៍ និងបំផ្លាញទ្រព្យសម្បត្តិសាធារណៈ ។
កាលពីសប្ដាហ៍មុន លោក សម រង្ស៊ី បានផ្ញើលិខិតមួយច្បាប់ទៅទីស្ដីការគណៈរដ្ឋមន្ត្រី និងខុទ្ទកាល័យព្រះមហាក្សត្រ នរោត្តមសីហមុនី ស្នើសុំឲ្យមានការអនុញ្ញាតឲ្យលោកអាចត្រឡប់មកកម្ពុជា ដើម្បីគោរពព្រះវិញ្ញាណក្ខន្ធ សម្ដេចឪ នរោត្តម សីហនុ។
នៅសប្ដាហ៍នេះ ព្រះអង្គម្ចាស់ ស៊ីសុវត្ថិ ធម្មិកោ ប្រធានខុទ្ទកាល័យព្រះមហាវីរក្សត្រនរោត្តម សីហនុ បានមានបន្ទូលប្រាប់ប្រព័ន្ធផ្សព្វផ្សាយថា ដោយសារព្រះមហាក្សត្រនរោត្តម សីហមុនី មិនអាចអន្ដរាគមន៍បានរដ្ឋាភិបាលគួរតែលើកលែងទោសទណ្ឌិតនយោបាយទាំងអស់ ដើម្បីបង្ហាញពីការគោរពចំពោះអតីតព្រះមហាក្សត្រ។
នៅក្នុងបញ្ជីរបស់ចលនាយុវជននេះដែរ ក៏មានឈ្មោះលោក ម៉ម សូណង់ដូ ម្ចាស់ស្ថានីយវិទ្យុឯករាជ្យ ដែលត្រូវបានផ្ដន្ទាទោសឲ្យជាប់ពន្ធនាគាររយៈពេល២០ឆ្នាំពីបទដឹកនាំចលនាអបគមន៍កាលពីដើមឆ្នាំនេះ និងសកម្មជនសហគមន៍បុរីកីឡា និងបឹងកក់។
លោក គុយ ប៊ុនសន អគ្គនាយកនៃអគ្គនាយកដ្ឋានពន្ធនាគារនៃក្រសួងមហាផ្ទៃបានបដិសេធថា គ្មាននរណាម្នាក់នៅក្នុងចំណោមទណ្ឌិតកម្ពុជាជាង១.០០០នាក់នោះជាទណ្ឌិតនយោបាយនោះទេ។ លោក ប៊ុនសន បានមានប្រសាសន៍ថា
“ អ្នកដែលកំពុងជាប់ពន្ធនាគារទាំងនោះ[បានប្រព្រឹត្តបទល្មើស] ដូចជាលោក ម៉ម សូណង់ដូ ជាដើម ជាប់ពន្ធនាគារដោយសារតែគាត់ជាប់ពាក់ព័ន្ធនឹងចលនាអបគមន៍ ចំណែក លោក សម រង្ស៊ី ក៏បានប្រព្រឹត្តបទល្មើសដែរ”។ លោកបានបន្ដថា“ គ្មានទណ្ឌិតនយោបាយណាម្នាក់ជាប់ពន្ធនាគារនៅក្នុងប្រទេសកម្ពុជានោះទេ ពួកគេទាំងអស់ត្រូវបាន[ផ្ដន្ទាទោស]តាមក្រមព្រហ្មទណ្ឌ”៕ ប្រែសម្រួលដោយ ហម សុផាណ្ណា