យោងតាមក្រុមហ៊ុន អាកាសយានដ្ឋានកម្ពុជា (Cambodia Airports) ដែលជាក្រុមហ៊ុន គ្រប់គ្រង និងធ្វើប្រតិបត្តិការអាកាសយានដ្ឋាននៅក្នុងប្រទេសកម្ពុជា បានឲ្យដឹងថា នៅពេលឆាប់ៗខាងមុខនេះ ក្រុមហ៊ុនអាកាសចរណ៍អន្តរជាតិចំនួនបីទៀត នឹងចាប់ផ្តើមធ្វើប្រតិបត្តិការហោះហើរមកកាន់អាកាសយានដ្ឋានអន្តរជាតិចំនួនពីររបស់ប្រទេសកម្ពុជា។
ក្រុមហ៊ុនអាកាសយានដ្ឋានកម្ពុជា បានប្រកាសនៅក្នុងសប្តាហ៍នេះថា ក្រុមហ៊ុន អាកាសចរណ៍ ឡាវ (Lao CentralAirlines) និងក្រុមហ៊ុន កាតា អ៊ែរវេ (Qatar Airways) នឹងផ្តល់សេវាកម្មហោះហើរមកកាន់រាជធានីភ្នំពេញ ហើយក្រុមហ៊ុន ខុនឌ (Condor) ដែលមានមូលដ្ឋាននៅទីក្រុង ហ្វ្រែងហ្វឺត (Frankfurt) ប្រទេសអាល្លឺម៉ង់ នឹងផ្តល់សេវាកម្មហោះហើរដោយផ្ទាល់មកកាន់ខេត្តសៀមរាប។
ក្រុមហ៊ុន ខុនឌ គឺជាក្រុមហ៊ុនអាកាសចរណ៍មួយ ក្នុងចំណោមក្រុមហ៊ុនអាកាសចរណ៍ទាំងបី ដែលនឹងហោះហើរមកចុះចតនៅក្នុងប្រទេសកម្ពុជាមុនគេ។ ក្រុមហ៊ុននេះ ផ្តល់សេវាកម្មហោះហើររៀងរាល់សប្តាហ៍ ពីទីក្រុង ហ្វ្រែងហ្វឺត ដោយប្រើយន្តហោះធុន បូ៊អុីង ៧៦៧អេស (Boeing 767s) ហើយនឹងចាប់ផ្តើមការហោះហើរនៅថ្ងៃទី៣ ខែវិច្ឆិកា ហើយក្រុមហ៊ុនពីរផ្សេងទៀត នឹងចាប់ផ្តើមធ្វើប្រតិបត្តិការហោះហើរតាមក្រោយ។
ក្រុមហ៊ុនអាកាសយានដ្ឋានកម្ពុជាបានឲ្យដឹងថា ក្រុមហ៊ុន អាកាសចរណ៍ឡាវ និងក្រុមហ៊ុន កាតា អ៊ែរវេ កំពុងស្ថិតនៅក្នុងដំណាក់កាលរង់ចាំសេចក្តីសម្រេចពីអគ្គលេខាធិការដ្ឋានអាកាសចរណ៍ស៊ីវិល ដែលជានិយតករអាកាសចរណ៍របស់ប្រទេសកម្ពុជានៅឡើយ។
ក៏ប៉ុន្តែ ក្រុមហ៊ុន កាតា អ៊ែរវេ បានឲ្យដឹងកាលពីថ្ងៃព្រហស្បតិ៍នៅលើបណ្តាញទំនាក់ទំនងសង្គមទ្វីតធើ (Twitter)ថា ខ្លួននឹងចាប់ផ្តើមហោះហើរមករាជធានីភ្នំពេញនៅ ខែកុម្ភៈ៕
ប្រែសម្រួលដោយ ហួង កុកទៀន