30 C
Phnom Penh

ពាណិជ្ជករ​​​មាន​​​អារម្មណ៍​​​តាន​​​តឹង​​​ដោយ​​​សារ​​​តែ​​​ការ​​​បិទ​​​កំណាត់​​​ផ្លូវ​​​លេខ​​​១៩​​​ខាង​​​ក្រោយ​​​ព្រះ​​​បរម​​​រាជវាំង

ដោយ ឌឹ ខេមបូឌា ដេលី

បទវិភាគ

​​​ម្ចាស់ហាង​​​នៅ​​​តាមកំណាត់​​​ផ្លូវ​​​លេខ​​​១៩​​​ខាង​​​ក្រោយ​​​ព្រះ​​​បរម​​​រាជវាំងបាន​​​និយាយ​​​កាល​​​​​​ពី​​​ម្សិល​​​មិញ​​​ថា ពួកគេ​​​កំពុងតស៊ូ​​​បន្ដ​​​បើក​​​ហាង​​​របស់​​​ខ្លួន​​​ បន្ទាប់​​​ពី​​​អាជ្ញាធរ​​​បាន​​​បិទ​​​ផ្លូវ​​​នេះ​​​រយៈពេល​​​បី​​​ខែ ដើម្បី​​​​​​កាន់មរណទុក្ខ​​​ និង​​​​​គោរពព្រះ​​​វិញ្ញាណក្ខន្ធ​​​ព្រះ​មហា​វីរក្សត្រ​ ​​​នរោត្តម​​​ សីហនុ។

លោក ហ្វីលីព វីកម៉ែន (Philippe Weeckmans) អគ្គ​​​នាយក​​​​ភោជនីយ​​​ដ្ឋានអូភិនវាញ (Open Wine Restaurant) មាន​​​ប្រសាសន៍ថា “យើង​​​មិន​​​អាច​​​រស់​​​នៅ​​​ដោយ​​​របៀប​​​នេះ​​​បាន​​​ទេ។​​​ យើង​​​មិន​​​ប្រាកដ​​​ថាតើ​​​យើង​​​អាច​​​បន្ដ​​​បើករបៀប​​​នេះ​​​រហូត​​​ផុត​​​រយៈពេល​​​បី​​​ខែ​​​នេះ​​​ឬ​​អត់នោះ​​​ទេ​​​”។

លោកវីកម៉ែនបាន​​​ដាក់​​​សញ្ញា​​​នៅ​​​លើ​​​របាំងបិទ​​​ផ្លូវ​​​របស់​​​នរគបាល​​​ ព្រមទាំង​បាន​​​ផ្ញើ​​​អុីម៉េល​​​ប្រាប់​​​អតិថិជនថា ភោជនីយ​​​ដ្ឋាន​​​នៅ​​​តែបន្ត​​​បើក​​​ដដែល។លោក​​​​​​មាន​​​ប្រសាសន៍​​​​​​ ថា“ជាធម្មតា​​​យើង​​​មានអតិថិជន​​​ពី​​​៦០​​​នាក់​​​ទៅ​​​៧០​​​នាក់​​​ក្នុង​​​មួយ​​​ថ្ងៃ។ពេល​​​នេះ​​​យើង​​​មាន​​​​ត្រឹម​​​តែ​​​២០​​​នាក់​​​ប៉ុណ្ណោះ។យើង​​​បាត់​​​បង់​​​ប្រាក់​​​ចំណូល​​​៦០​​​ភាគរយ​​​ ចាប់​​​តាំង​​​ពី​​​បិទ​​​ផ្លូវ​​​នេះ​​​មក ”។ ​​​​​​​​​​​​​​​​​​​​​​​​

លោកជួនសុវណ្ណស្នង​​​ការ​​​នរគបាល​​​រាជ​​​ធានី​​​ភ្នំពេញ​​​បាន​​​មាន​​​ប្រ​​​សាសន៍ថាកំណាត់​​​ផ្លូវ​​​លេខ​​​១៩​​​ដែល​​​ជាធម្មតា​​​មមា​ញឹក​​​នោះ​​​មាន​​​ភោជនីយដ្ឋាន​​​ និង​​​ហាង​​​ជាង​​​១០​​​តាំង​​​នៅ​​​ម្ខាង​​ផ្លូវ​​​ សម្រាប់​​​បម្រើ​​​អតិថិ​ជន​​​ក្នុង​​​មូល​​​ដ្ឋាន​​​និង​​​ភ្ញៀវទេសចរ។​​​ ចំណែក​​​ម្ខាង​​​ទៀត​​​គឺ​​​ជា​​​ជញ្ជាំង​​​របង​​​ព្រះ​​​បរម​​​រាជវាំង​​​ ហើយ​​​អាជ្ញា​​​ធរ​​​បាន​​​បិទ​​​ផ្លូវ​​​នេះ​​​ដោយ​​​សារ​​​តែ​​​ការ​​​បារម្ភ​​​អំពី​​​បញ្ហា​​​សន្ដិសុខ​​​ និង​​​ “ការ​​​រំខាន​​​ដល់​​​ដំណើរ​​​ការ​​​នៃ​​​ព្រះ​​​រាជពិធី​​​កាន់មរណ​​​ទុក្ខ”។ លោក​​​​​​មាន​​​ប្រ​​​សាសន៍​​​កាល​​​ពី​ម្សិល​​​មិញ​​​ថា“យើង​​​នឹង​​​បិទ​​​ផ្លូវ​​​នេះ​​​រហូត​​​ដល់​​​ពិធី​​​បូជា​​​ព្រះបរម​​​សព​​​ចប់​​​សព្វ​​​គ្រប់ [ក្នុង​​​ខែ​​​កុម្ភៈ​​​]”។​

កំណាត់​​​ផ្លូវ​​​​​​ប្រាំមួយ​​​ទៅ​​​ប្រាំពី​​​រកំណាត់​​​នៅ​​​​​​ជំុវិញ​​​ព្រះរាជ​​​វាំង​​​ត្រូវ​​​បាន​​​បិទ​​​ កាល​​​ពី​​​ថ្ងៃ​​​ទី​​​១៧ខែ​​​តុលារួមទាំង​​​កំណាត់​​​ផ្លូវ​​​លេខ​​​១៩​​​ផង​​​​​ដែរ​​​ ដើម្បីកាត់​​​បន្ថយ​​​សំឡេង​​​រំខានអំឡុង​​​ពេល​​​កាន់​​​ទុក​​​្ខប្រាំពីរ​​​ថ្ងៃ​​​។ផ្លូវ​​​ដទៃ​​​ទៀត​​​បាន​​​បើក​​​ឲ្យ​​​ប្រើ​​​ប្រាស់​​​វិញហើយ​ ​​លើក​​​លែង​​​តែ​​​កំណាត់​​​ផ្លូវ​​​លេខ​​​១៩​​​ និង​​​មួយ​​​ចំណែក​​​​​​នៃ​​​កំណាត់ផ្លូវ​​​លេ​ខ​​​២៤០​​​ នៅជាប់​​​នឹង​​​ព្រះ​​​បរម​​​រាជ​​​វាំង​​​ និង​​​ឧទ្យាន​​​វត្ត​​​បទុម​​​ ដែល​​​នៅ​​​ទី​​​នោះ​​​ពុំមាន​ការ​​​ប្រកប​​​របរ​​​អ្វី​​​ច្រើន​​​ទេ​​​​​​​​​។

ព្រះ​​​អង្គម្ចាស់​​​ ស៊ីសុវត្ថិធម្មិកោប្រធាន​​​ខុទ្ទកាល័យ​​​សម្ដេច​​​ឪបាន​​​មានព្រះ​​​​​​បន្ទូល​​​ថា សួន​​​ច្បារក្នុង​​​​​​ព្រះ​​​បរមរាជ​​​វាំង​​​ និង​​​ដំណាក់​​​របស់​​​ព្រះ​​​វររាជ​​​មាតា​​​ស្ថិត​​​នៅកៀក​​​របងព្រះ​​​បរមរាជ​​​វាំង​​​​​​ជាប់​​​នឹង​​​កំណាត់​​​ផ្លូវ​​​លេខ​​​១៩​​​។ ​​​ព្រះ​​​អង្គ​​​ម្ចាស់​​​ ធម្មិកោបាន​​​មាន​ព្រះបន្ទូល​​​ដោយ​​​​​​មិន​​​លម្អិត​​​ថា ​​​ខ្ញុំ​​​សោក​​​ស្តាយ​​​ខ្លាំង​​​ណាស់​​​​​​ចំពោះ​​​ការ​​​ប៉ះពាល់​​​ដល់​​​អាជីវកម្ម​​​នៅ​​​ជំុវិញ​​​ព្រះ​​​បរមរាជ​​​វាំង​​​ ប៉ុន្ដែដោយ​​​សារ​​​តែ​​​មាន​​​ការ​​​ព្រួយ​​​បារម្ភ​​​ពី​​​សុវត្ថិភាព​​​”។

ទន្ទឹម​​​គ្នានេះ​​​ដែរម្ចាស់ហាង​​​​​​និយាយ​​​ថា ​​​ពួក​​​គេ​​​ព្យាយាម​​​រក​​​ដំណោះ​​​ស្រាយ​​​ ដើម្បី​​​បន្ដ​​​បើក​​​ហាង​​​របស់​​​ខ្លួន​​​រហូត​​​ដល់​​​ផ្លូវ​​​នេះ​​​បើក​​​ឲ្យ​​​ប្រើ​​​ប្រាស់​​​ឡើង​​​វិញ​​​។

អ្នកស្រីហិុន ដានី អាយុ​​​២៣​​​ឆ្នាំ អ្នក​​​គ្រប់​​​គ្រង​​​ហាង​​​លក់​​​ផលិត​​​ផល​​​សូត្រ​​​ឈ្មោះ ​​​សាយ័ន​​​ស៊ីលវើក​​​ (Sayon Silkworks) បាន​​​និយាយ​​​ថា “ យើង​​​គ្មាន​​​ប្រាក់​​​គ្រប់​​​គ្រាន់​​​ ដើម្បី​​​បង​់​​​ថ្លៃ​​​ជួល​​​ហាង​​​នោះ​​​ទេ​​​។យើង​​​នឹង​​​​​​ព្យាយាម​​​ជួប​​​ជា​​​មួយ​​​​​​នឹង​​​ម្ចាស់ផ្ទះ​​​ក្រែង​​​លោ​​​គាត់​​​អាច​​​បន្ថយ​​​ថ្លៃ​​​ឈ្នួល​​​ខ្លះ”។អ្នកស្រីដានី​​​ បាននិយាយ​​​បន្ថែម​​​ទៀត​​​ថាគ្រួសារ​​​របស់​​​នាង​​​ចំណាយ​​​ប្រាក់​​​៧០០​​​ដុល្លារ​​​ក្នុង​​​មួយ​​​ខែ​​​ ដើម្បី​​​ជួល​​​ហាង​​​នេះ​​​  “​​​របរ​​​រក​​​ស៊ី​​​របស់​​​ខ្ញុំ​​​មិន​​​ដំណើរ​​​ការ​​​ទេ​​​ ពេល​​​បិទ​​​ផ្លូវ​​​នេះ​​​”។

លោកអុីនូ ណុប អាយុ​​​២៤​​​ឆ្នាំ​​​ ម្ចាស់​​​ហាង​​​អាយធី (Itea Shop) ​​​ដែល​​​លក់​​​កាហ្វេតែនិង​​​សម្លៀក​​​បំពាក់​​​បាន​​​និយាយ​​​ថារបរ​​​រក​​​ស៊ី​​​របស់​​​ខ្លួន ​​​[ក្ស័យ​​​ធន]។ គាត់​​​បាន​​​និយាយ​​​ថា“យើង​​​បាន​​​​​​ពិភាក្សា​​​ជាមួយ​​​នឹង​​​ម្ចាស់​​​ហាង​​​ ដើម្បី​​​បន្ថយ​​​ថ្លៃ​​​ឈ្នួល​​​ទម្រាំដល់​​​ផ្លូវ​​​នេះ​​​បើក​​​វិញ​​​ ប៉ុន្ដែ យើង​​​នៅ​​​តែ​​​គ្មាន​​​អតិថិជន​​​ដដែល​​​។ហើយ​​​ប្រសិន​​​បើ​​​យើង​​​​​​បិទ​​​ យើង​​​នឹង​​​ត្រូវ​​​បិទ​​​រហូត​​​៕

ប្រែសម្រួល​​​ដោយ ហម សុផាណ្ណា

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស