ក្រុមមន្ត្រីបាននិយាយកាលពីម្សិលមិញថា អាជីវករលក់កាសែតជាច្រើននៅជិតវិទ្យាស្ថានជាតិអប់រំតាមផ្លូវលេខ៥១ ក្នុងរាជធានីភ្នំពេញ ត្រូវបានជូនដំណឹងឲ្យរើចេញក្នុងរយៈពេលមួយសប្តាហ៍។
ខណៈដែលគេមិនបានដឹងពីមូលហេតុពិតប្រាកដដែលអាជ្ញាធរខណ្ឌដូនពេញចេញសេចក្តីជូនដំណឹងដល់អាជីវករអំពីការបណ្តេញចេញនេះកាលពីម្សិលមិញ លោក ឡុង ឌីម៉ង់ អ្នកនាំពាក្យសាលារាជធានីភ្នំពេញ បានមានប្រសាសន៍ថា វាជាសេចក្តីសម្រេចរបស់ក្រសួងអប់រំ។
លោកបានបន្តថា“ ខ្ញុំគ្រាន់តែដឹងថា វិទ្យាស្ថានជាតិអប់រំមានផែនការសាងសង់អ្វីមួយថ្មី ប៉៉ុន្តែខ្ញុំមិនដឹងថាហេតុអ្វីពួកគេមានផែនការបណ្តេញអ្នកលក់កាសែតនៅជិតរបងវិទ្យាស្ថានចេញនោះទេ”។
កាលពីម្សិលមិញ អ្នកលក់កាសែតបាននិយាយថា ពួកគាត់បារម្ភណាស់ បន្ទាប់ពីត្រូវបានជូនដំណឹងអំពីការបណ្តេញពួកគាត់ចេញ និងខា្លចបាត់បង់ការរកស៊ីរបស់ខ្លួន។
អាជីករម្នាក់ឈ្មោះ ហុង សុវណ្ណារ៉ា បាននិយាយថា“ខ្ញុំមិនអាចទទួលយកសេចក្តីជូនដំណឹងពីអាជ្ញាធរេនះបានទេ។ ខ្ញុំនឹងបាត់បង់ការងាររបស់ខ្ញុំ។ ខ្ញុំនឹងសុំឲ្យលោកនាយករដ្ឋមន្ត្រីជួយ”។
អាជីវករម្នាក់ទៀតឈ្មោះ សេរី រ័ត្ន បាននិយាយថា អ្នកស្រីព្រួយបារម្ភអំពីការផ្គត់ផ្គង់គ្រួសាររបស់អ្នកស្រី។អ្នកស្រីបាននិយាយថា “ខ្ញុំលក់កាសែតនៅទីនេះអស់រយៈពេល១០ឆ្នាំហើយ ប្រសិនបើខ្ញុំត្រូវបណ្តេញចេញ ខ្ញុំគ្មានប្រាក់ចិញ្ចឹមកូនពីរនាក់របស់ខ្ញុំទេ”៕
ប្រែសម្រួលដោយ ចេវ ប៊ុននី