ទីស្ដីការគណៈរដ្ឋមន្ត្រី កាលពីថ្ងៃសុក្រ បានចុះហត្ថលេខាលើគម្រោងស្ថានីយ៍វារីអគ្គិសនីសេសានក្រោម២ នៅក្នុងខេត្តស្ទឹងត្រែង ថ្វីបើអង្គការបរិស្ថាន បានរិះគន់ជាយូរមកហើយប្រឆាំងនឹងគម្រោងនេះក្ដី ដោយលើកឡើងថា គម្រោងនេះអាចនឹងធ្វើឲ្យប៉ះពាល់ដល់ផលនេសាទរបស់ប្រជាពលរដ្ឋចំនួន១០០.០០០នាក់។
ទីស្ដីការគណៈរដ្ឋមន្ត្រីបានលើកឡើងក្នុងសេចក្ដីប្រកាសព័ត៌មានណ៍មួយថា ទំនប់វារីអគ្គិសនីកម្លាំង៤០០មេហ្គាវ៉ាត់ ដែលស្ថិតនៅលើដៃទន្លេមួយក្នុងចំណោមដៃទន្លេសំខាន់ៗ បំផុតរបស់ទន្លេមេគង្គ នឹងមានការវិនិយោគក្នុងទឹកប្រាក់ចំនួន៧៨១,៥២លានដុល្លារ ជាភាគហ៊ុនរបស់ពីក្រុមហ៊ុនដ៏ធំនៅក្នុងស្រុក គឺក្រុមហ៊ុនរ៉ូយាល់គ្រុប ហើយទំនប់នេះនឹងត្រូវចំណាយពេលយ៉ាងតិចណាស់ប្រាំឆ្នាំ ដើម្បីបញ្ចប់ការសាងសង់។
សេចក្ដីថ្លែងការណ៍នេះបានលើកឡើងបន្ដថា “ រដ្ឋាភិបាលបានផ្ដល់គម្រោងស្ថានីយ៍វារីអគ្គិសនីសេសានក្រោម២ទៅឲ្យក្រុមហ៊ុនដែលមានការរួមគ្នាមួយរវាងក្រុមហ៊ុនក្នុងស្រុកមួយចំនួន និងក្រុមហ៊ុនមួយចំនួនទៀតមកពីប្រទេសវៀតណាម ព្រមទាំងក្រុមហ៊ុនវារីអគ្គិសនីដ៏ធំមួយមកពីប្រទេសចិន ដើម្បីវិនិយោគក្នុងទឹកប្រាក់៧៥១,៧លានដុល្លារ។
ទីស្ដីការគណៈរដ្ឋមន្ត្រីក៏បានលើកឡើងដែរថា រដ្ឋាភិបាលរំពឹងថា នឹងអាចទទួលបានប្រាក់ចំណូលដោយសារតែដកពន្ធពីទំនប់នេះ ក្នុងមួយឆ្នាំៗ២៩,៥លានដុល្លារ នៅពេលណាដែលទំនប់វារីអគ្គិសនីក្នុងឃុំភ្លុក ស្រុកសេសាន អាចបង្កើតអគ្គិសនីបាន។
សេចក្ដីថ្លែងការណ៍នេះមិនបានលើកឡើងទេថា តើនៅពេលណាការងារពិតប្រាកដនឹងត្រូវចាប់ផ្ដើមទៅលើទំនប់នេះ ហើយក៏មិនបានប្រាប់អំពីការរើទីលំនៅរបស់អ្នកភូមិរាប់ពាន់នាក់ ដែលនឹងទទួលរងផលប៉ះពាល់ពីគម្រោងដ៏ធំសម្បើមនេះដែរ។ គម្រោងដែលមានទីតាំងពីក្រោមការប្រសព្វគ្នានៃទន្លេសេសាន និងទន្លេស្រែពក នឹងក្លាយជាទំបន់វារីអគ្គិសនីកម្ពុជាលើកដំបូងដែលសាងសង់ឡើងឆ្លងកាត់ទន្លេចំនួនបី គឺទន្លេសេសាន ទន្លេស្រែពក និងទន្លេសេកុង ដែលគេឲ្យឈ្មោះថា ស្រុីអេស បាស់ស៊ីន (3S Basin) ហើយនឹងកាត់ផ្ដាច់ទន្លេចំនួនពីរក្នុងចំណោមទន្លេចំនួនបីចេញពីមេគង្គ។ ផលប៉ះពាល់ពីទំនប់វារីអគ្គិសនីនេះ គឺមានច្រើនណាស់។
ការសិក្សាក្នុងឆ្នាំ២០០៩ ដែលអនុវត្តដោយលោក អៀន ប៊ៀត (Ian Baird) ដែលជាអ្នកជំនាញខាងផ្នែកជលផលនៅតាមទន្លេទាំងបី មកពីសាកលវិទ្យាល័យវិស្កុនស៊ីនមេឌីសាន់ (Wisconsin-Madison) បង្ហាញថា គម្រោងវារីអគ្គិសនីនេះ នឹងធ្វើឲ្យអ្នកភូមិចំនួន៥.០០០នាក់ នៅក្នុងស្រុកសេសានតែមួយគត់ផ្លាស់ទីលំនៅ។ ប៉ុន្ដែ ប្រជាពលរដ្ឋចំនួន១០០.០០០នាក់ដែលពឹងផ្អែកលើទន្លេសេសាន ក្នុងខេត្តស្ទឹងត្រែង និងខេត្តរតនគិរី នឹងអាចបាត់បង់លទ្ធភាពនេសាទរបស់ខ្លួន។
ការវាយតម្លៃពីផលប៉ះពាល់បរិស្ថាននៃសំណើគម្រោងវារីអគ្គិសនី បានចាប់ផ្ដើមក្នុងឆ្នាំ២០០៤ ដោយមានគោលបំណងធានាដល់ភាពសុខសាន្ដនៃជីវភាពរស់នៅរបស់ប្រជាពលរដ្ឋដែលទទួលរងផលប៉ះពាល់នៃការសាងសង់នេះ។ ទោះជាយ៉ាងណា ការវាយតម្លៃមិនបានសិក្សាទេថា តើគម្រោងវារីអគ្គិសនីដែលមានកម្ពស់៧០ម៉ែត្រ នឹងផ្ដល់ផលប៉ះពាល់ដល់ការនេសាទយ៉ាងណានោះនៅតាមទន្លេចំនួនបី ហើយគ្រាន់តែទទួលស្គាល់ថា ការនេសាទនៅផ្នែកខាងលើនៃទន្លេក្នុងខេត្តរតនគិរី នឹងទទួលរងផលប៉ះពាល់ដោយប្រជាពលរដ្ឋចំនួន៣០.០០០នាក់ និងបាត់បង់ប្រាក់ចំណូលរបស់ខ្លួន។
ការសាងសង់នៃទំនប់វារីអគ្គិសនីនេះគឺវាស្របតាមគោលនយោបាយថា មពលរបស់រដ្ឋាភិបាលដែលចង់បង្កើនការផលិតថាមពលក្នុងស្រុករបស់ខ្លួនពីកម្លាំងតិចជាង១.០០០មេហ្គាវ៉ាត់ឲ្យបានច្រើនជាងថាមពលសព្វថ្ងៃចំនួន១០.០០០មេហ្គាវ៉ាត់តាមរយៈការសាងសង់ទំនប់វារីអគ្គិសនីឲ្យបានច្រើនជាង២០នៅទូទាំងប្រទេស។
ទីស្ដីការគណៈរដ្ឋមន្ត្រីបានលើកឡើងនៅក្នុងសេចក្ដីប្រកាសព័ត៌មានរបស់ខ្លួនកាលពីថ្ងៃសុក្រថា ទំនប់វារីអគ្គិសនីសេសានក្រោម២ នឹងធ្វើឲ្យមានសន្ដិសុខថាមពល និងការអភិវឌ្ឍសេដ្ឋកិច្ច ហើយប្រជាពលរដ្ឋនៅក្នុងរាជធានីភ្នំពេញខេត្តកំពង់ចាមក្រចេះនិងខេត្តស្ទឹងត្រែង នឹងទទួលបានថាមពលប្រើប្រាស់គ្រប់គ្រាន់។
សេចក្ដីប្រកាសព័ត៌មាននេះបានបន្ដថា “ គម្រោងនេះ នឹងផ្ដល់ការងារដល់ប្រជាពលរដ្ឋកម្ពុជារាប់ពាន់នាក់អំឡុងពេលសាងសង់”។ ប៉ុន្ដែ វាទំនងជាផ្ដល់ផលប៉ះពាល់ដល់ប្រជាពលរដ្ឋរាប់ពាន់នាក់ដែលអាស្រ័យលើទន្លេទាំងនេះសម្រាប់ជីវភាពរស់នៅរបស់ខ្លួន។
លោក ចាន់ ថន អាយុ៧០ឆ្នាំ តំណាងអ្នកភូមិមកពីឃុំស្រែគរ ស្រុកសេសាន បានមានប្រសាសន៍កាលពីថ្ងៃសុក្រថា អ្នកភូមិជាង៤០០គ្រួសារនៅក្នុងភូមិចំនួនពីរ ក្នុងឃុំរបស់គាត់ នឹងត្រូវផ្លាស់ទីលំនៅដោយសារតែការសាងសង់ទំនប់វារីអគ្គិសនីនេះ។ លោកបាននិយាយថា “រដ្ឋាភិបាលនិងអាជ្ញាធរបានអះអាងម្ដងទៀតអំពីការសាងសង់ទំនប់វារីអគ្គិសនីសេសានក្រោម២ថា នឹងកាត់បន្ថយភាពក្រីក្រ និងជំរុញការអភិវឌ្ឍ ប៉ុន្ដែ យើងបានគិតខុសពីនេះ។ យើងនឹងត្រូវផ្លាស់ទីលំនៅ ហើយមុខរបរនេសាទត្រីបែបប្រពៃណីរបស់យើង នឹងទទួលរងផលប៉ះពាល់ជាមិនខាន”។
លោក ចាន់ ថន និងជនជាតិព្នងម្នាក់បាននិយាយថា អ្នកភូមិមិនដែលត្រូវបានគេពិភាក្សាជាមួយអំពីការបណ្ដេញចេញ ហើយរដ្ឋាភិបាលជាយូរមកហើយក៏មិនដែលបាននិយាយអំពីសំណងដ៏សមរម្យសម្រាប់ការផ្លាស់ទីលំនៅរបស់ពួកគាត់ដែរ។
លោក ទី ងិញ មេឃុំស្រែគរ បានមានប្រសាសន៍ថា លោកមិនច្បាស់ទេថា អ្នកភូមិចំនួនប៉ុន្មាននឹងត្រូវផ្លាស់ទីលំនៅ ដោយសារទំនប់វារីអគ្គិសនីនេះ ប៉ុន្ដែ បានទទួលស្គាល់ថា រដ្ឋាភិបាលកំពុងតែធ្វើការ ដើម្បីស្វែងរកតំបន់ថ្មីសម្រាប់គ្រួសារដែលរងផលប៉ះពាល់។
លោកបានលើកឡើងថា “ ខ្ញុំមានសុទិដ្ឋិនិយមថា អ្នកភូមិរបស់ខ្ញុំនឹងទទួលបានការងារធ្វើតាមរយៈការសាងសង់ទំនប់នេះ ហើយយើងសង្ឃឹមថា មានអគ្គិសនីប្រើប្រាស់នៅក្នុងសហគមន៍របស់យើង”។ យោងតាមទីស្តីការគណៈរដ្ឋមន្ត្រីបានឲ្យដឹងថា គ្រួសារដែលនឹងផ្លាល់ទីលំនៅនឹងត្រូវផ្តល់ដីឲ្យទំហំដល់ទៅ៥ហិកតា៕
ប្រែសម្រួលដោយ ស៊ា ស៊ុយឈាង