27 C
Phnom Penh

រយៈ​ពេល​ប្រាំ​មួយ​ខែ​បាន​កន្លង​ផុត​ ប៉ុ​ន្តែ​​ឃាត​ករ​សម្លាប់​លោក​ ឈុត​ វុ​ទ្ធី​ នៅ​តែ​មាន​សេរី​ភាព​នៅ​ឡើយ​​

ដោយ ឌឹ ខេមបូឌា ដេលី

បទវិភាគ

រ៉ាន់​ បូ​រ័ត្ន ជា​ ជន​​សង្ស័យ​​តែ​ម្នាក់​​គត់​ដែល​ត្រូវ​បាន​តុលាការ​ផ្តន្ទាទោស​​ពីរ​ករណី​​ពី​​បទ​សម្លាប់​លោក ឈុត​ វុទ្ធី​ សកម្ម​ជន​ការ​ពារបរិ​ស្ថាន​ដ៏​ល្បី​​​ក្នុង​​ប្រ​​ទេស​កម្ពុជា​​​និង​មន្រ្តី​កង​រាជ​អា​វុធ​ហត្ថ​ម្នាក់​ កាល​ពី​ប្រាំ​មួយ​ខែ​​​មុន​ ហើយ​កាល​ពី​ថ្ងៃ​សុក្រ​​​ត្រូវ​បាន​​ដោះ​លែង​ពី​ពន្ធ​នា​គារ​​ បន្ទាប់ពី​​សា​លា​ដំ​បូងខេត្ត​​កោះ​កុង​ចេញ​បទ​បញ្ជាឲ្យធ្វើ​ការ​​ដោះ​លែង​ជន​នេះ​។

ជន​សង្ស័យ​ឈ្មោះ​ បូ​​រ័ត្ន​ ​សន្តិ​សុខ​​របស់​​​​ក្រុម​ហ៊ុន​កាប់​ឈើ​​​ថែមប៊ើ​ហ្គ្រីន​​(Timber Green Logging Firm)​ ត្រូវបាន​តុលាការ​ផ្តន្ទា​ទោស​ពី​បទ​សម្លាប់​​លោក​​ អុិន​ រតនា​ មន្រ្តី​កង​រាជ​អា​វុធ​ហត្ថ​ដោយ​អ​ចេត​នា​​ ​ដែល​​គេ​ចោទ​​ប្រ​កាន់​ថា​បាន​បាញ់​សម្លាប់​ លោក ឈុត​ វុ​ទ្ធី​​​ នៅ​តំ​បន់​ដាច់​ស្រ​យាល​មួយ​ក្បែ​រ​ជួរ​ភ្នំ​ដង​រែក​ក្នុង​​ខេត្ត​កោះ​កុង​​។

លោក​ ទ្រី​ ប៊ុ​នថា​ អនុ​ប្រ​ធាន​ពន្ធ​នាគារ​​​​ខេត្ត​កោះ​កុង បាន​មាន​ប្រ​សាសន៍​ថា​ “ សា​លា​ដំ​បូង​​បាន​ចេញ​ដី​កា​ដោះ​លែង​ ឈ្មោះ​ រ៉ាន់​ បូ​​រ័ត្ន​​ រួច​ហើយ​ និង​ ​បាន​ដោះ​លែង​​នៅ​ថ្ងៃ​នេះ​ហើយ​​”។ លោក បាន​បន្ត​ទៀតថា​ “ លោក បូ​រ័ត្ន​ បាន​ទទួល​ទោស​ជាប់​ពន្ធ​នា​គារ​រួច​រាល់​ហើយ ​​​​និង​នៅ​ពេលនេះ​ដល់​ពេល​​ត្រូវ​ដោះ​លែង​​លោក​​”។

កាល​ពីថ្ងៃ​ទី​២២​​ខែ​តុ​លា​ ឈ្មោះ​ បូ​​រ័ត្ឋ​ ត្រូវ​បានតុលាការ​​ផ្ត​ន្ទា​​ទោស​ឲ្យ​ជា​ប់​ពន្ធ​នា​គារ​រយៈ​ពេល​ពីរ​ឆ្នាំ​ពី​បទ​សម្លាប់​ លោក​ អុីន រតនា​ ប៉ុ​ន្តែ​ លោក ចៅ​ក្រម​ ​ខេម​ សុ​ផា​​រី​ មិន​បាន​ធ្វើ​ការ​ពន្យល់​អំ​ពី​សេចក្តី​​សម្រេច​​របស់​លោក​​នោះ​ទេ ​ក្រោយ​ពី​បាន​​ព្យូរ​ទោស​​រយៈ​ពេល​១៨​ឆ្នាំ​ចំ​ពោះ​ការ​ផ្តន្ទា​ទោស​នោះ​​។

ការ​ផ្តន្ទា​ទោស​នេះ​​​ទទួល​រង​​នូវ​ការរិះ​គន់យ៉ាង​ខ្លាំង​​ពី​សំណាក់​​ក្រុមអង្គ​ការ​​សិទ្ធិ​មនុស្ស​​នា​នា​​ដែល​បាន​​​និយាយ​ថា ការ​សើុប​អ​ង្កេត​លើ​ករណី​​សម្លាប់​​​លោក ឈុត​ វុ​ទ្ធី​ ចាំ​បាច់​ត្រូវ​តែ​បន្ត​។

ទោះ​ជា​យ៉ាង​ណា​ ​តុ​លា​ការ​បាន​បញ្ឈប់​​ការ​សើុប​អ​ង្កេត​ដោយ​សម្ងាត់​ លើ​ករណី​​សម្លាប់​លោក​ ឈុត​ វុ​ទ្ធី​​ កាល​ពី​ប៉ុ​ន្មាន​ខែ​កន្លង​ទៅ​។ មន្រ្តី​តុ​លា​ការ​បាន​លើក​ឡើង​ថា ពេល​នេះ​​​​មិន​ចាំ​បាច់​​បន្ត​ការ​​​សើុប​អ​ង្កេតទៀតទេ​ ​ដោយ​សារ​​ឃាត​ករ​បាន​ស្លាប់​បាត់​ទៅ​ហើយ​​​។​

ការ​ដោះ​លែង​លោក​​ បូ​​រ័ត្ន​ នាំ​ឲ្យ​អង្គ​ការ​​សិទ្ធិ​មនុស្ស​​​នា​នា​បញ្ចប់​​​ការរិះ​គន់​ដល់​ប្រ​ព័ន្ធ​​យុ​ត្តិ​ធម៌​​ និង​ការ​​សើុប​អ​ង្កេត​​របស់​តុ​លា​ការ​​ដែលនាំ​ឲ្យ​មាន​ការ​ចោទ​ជា​​សំ​ណួរ​ច្រើន​ជាង​ចម្លើយ​ចំ​ពោះ​ការ​សម្លាប់​លោក ឈុត វុ​ទ្ធី​។

លោក ឈុត វុ​ទ្ធី​ បានរួម​ដំ​ណើរ​ជា​មួយ​​អ្នក​សារ​ព័ត៌​មានពីរ​នាក់​មក​ពី​​ កា​សែត​​​​​ ខេម​បូ​ឌា​ ដេ​លី ដើម្បី​​សើុប​អ​ង្កេត​សកម្ម​ភាព​​កាប់​ឈើ​ខុ​ស​ច្បាប់​នៅ​ក្នុង​ខេត្ត​កោះ​កុង​​ កាល​ពី​ថ្ងៃ​ទី​២៦​ខែ​មេ​សា​ ដែល​ពេល​នោះ​អ្នក​ទាំង​បី​​ត្រូវ​បាន​មន្ត្រី​កង​រាជ​អា​វុ​ធ​ហត្ថ​​ និង​សនិ្ត​សុខ​ឃាត់​ខ្លួន ​និង​​ដក​យក​​ម៉ាស៊ីន​ថត​​ពី​​ពួក​គេ​។

​អ្នក​សារ​​ព័ត៌​មាន​ និង​លោក ឈុត វុ​ទ្ធី​​កំ​ពុង​អង្គុយ​ក្នុង​រថ​យន្ត​​របស់​លោក​​ ​ខណៈ​ពេលដែល​​ អុិន​ ​រត​នា ​មន្ត្រីកង​រាជ​អា​វុ​ធ​ហត្ថ​​​​​បាញ់​សម្លាប់​​។​លោក អំ​ សំ​អាត អ្នក​គ្រប់​គ្រង​បច្ចេក​ទេស​​ប្រ​ចាំ​អង្គ​ការ​សិទ្ធិ​មនុស្ស​លី​កា​ដូ​បាន​មាន​ប្រ​សាសន៍​កាល​ពី​ថ្ងៃ​សុក្រ​ថា​ “ចំ​ពោះ​ករ​ណី​ដោះ​លែង​​​ រ៉ាន់​ បូ​​រ័ត្ន​ ​រដ្ឋា​ភិ​បាល​និង​តុ​លា​ការ​មាន​បំ​ណង​​បិទ​បាំង​ករណី​សម្លាប់​​លោក​ឈុត​ វុទ្ធី​​ និងសកម្ម​ភាព​កាប់​ឈើ​ខុ​ស​ច្បាប់”៕

ប្រែ​សម្រួល​ដោយ​ ថូ​ ណា​រឿន​​​​​​​​​​​​​​​​​​​​​​​​​​​​​​​​

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស