ប្រជាពលរដ្ឋប្រហែល១០០នាក់ ដែលពាក់ព័ន្ធក្នុងជម្លោះដីធ្លីក្នុងរាជធានីភ្នំពេញបានដាក់ញត្តិមួយទៅស្ថានទូតអាមេរិកកាលពីម្សិលមិញ ស្នើឲ្យលោកប្រធានាធិបតីសហរដ្ឋអាមេរិក បារ៉ាក់ អូបាម៉ា (Barack Obama) លើកឡើងពីបញ្ហាបណ្តេញចេញ និងការកែទម្រង់គោលនយោបាយដីសម្បទាននៅក្នុងប្រទេស នៅពេលលោកធ្វើទស្សនកិច្ចនៅប្រទេសកម្ពុជានៅចុងខែនេះ។
ការស្នើសុំនេះ ធ្វើឡើងបន្ទាប់ពីសេចក្តីសម្រេចមួយអនុម័តដោយសភាអឺរ៉ុប កាលពីខែមុន ដែលបានបន្ទោសសម្បទានដីសេដ្ឋ កិច្ចផ្តល់ឲ្យក្រុមហ៊ុនកសិពាណិជ្ជកម្មចំពោះការបណ្តេញប្រជាពលរដ្ឋប្រមាណ៤០០.០០០គ្រួសារចេញពីដីរបស់ពួកគាត់ក្នុងរយៈពេល១០ឆ្នាំមកនេះ។
លោក ង៉ែត ឃុន អាយុ៧២ឆ្នាំ ដែលជាអ្នកតវ៉ាម្នាក់ក្នុងចំណោមអ្នកតវ៉ាជាច្រើននាក់មកពីសហគមន៍បឹងកក់ បុរីកីឡា និងសហគមន៍ថ្មគោល ដែលឈរគ្រវីទង់ជាតិអាមេរិកដ៏ធំមួយនៅក្រៅស្ថានទូតបានមានប្រសាសន៍ថា “ រដ្ឋាភិបាលរបស់យើងបានអនុម័តសម្បទានដីច្រើនណាស់។ ខ្ញុំសូមអំពាវនាវឲ្យលោក អូបាម៉ា មកពិនិត្យស្ថានភាពនេះ ហើយកុំជឿអ្វីដែលក្រុមមន្ត្រីរដ្ឋាភិបាលនិយាយប្រាប់លោក”។
បន្ទាប់ពីក្រុមអ្នកតវ៉ាបានដាក់ញត្តិទៅស្ថានទូតនេះ ពួកគាត់បានដើរក្បួនទៅព្រះបរមរាជវាំង ហើយត្រូវបានកងកម្លាំងនគរបាលជាច្រើនរារាំងនៅតាមមហាវិថីព្រះនរោត្តម។ ខណៈពេលដែលពួកគាត់ឈរនៅមុខអាជ្ញាធរ ក្រុមអ្នកតវ៉ាបានស្រែកថា “ យើងកំពុងរស់នៅក្រោមគំនាបរបស់រដ្ឋាភិបាលនេះ។សូមលោកប្រធានាធិបតី អូបាម៉ា ជួយពួកយើងផង”។
លោក អូបាម៉ា គ្រោងនឹងធ្វើទស្សនកិច្ចនៅរាជធានីភ្នំពេញដើម្បីចូលរួមក្នុងកិច្ចប្រជុំកំពូលអាស៊ាន និងអាស៊ីបូពា៌ ដែលនឹងប្រព្រឹត្តទៅនៅពេលដំណាលគ្នាពីថ្ងៃទី១៨ ខែវិច្ឆិកា ដល់ថ្ងៃទី២១ខែវិច្ឆិកា។
មុនការតវ៉ាកាលពីម្សិលមិញ ក្រុមមន្ត្រីសាលារាជធានីបាននិយាយថា រដ្ឋាភិបាលមានផែនការបណ្តេញប្រជាពលរដ្ឋចំនួន១៨០គ្រួសារក្នុងភូមិថ្មគោល សង្កាត់ចោមចៅ មុនកិច្ចប្រជុំកំពូលនៅខែនេះ ដើម្បីរៀបចំសន្តិសុខឲ្យបានប្រសើរឡើងនៅជុំវិញអាកាសយានដ្ឋានអន្តរជាតិភ្នំពេញ។
ប៉ុន្តែ លោក វ៉ា សារ៉ាង ចៅសង្កាត់រងចោមចៅ ដែលជាសមាជិកគណៈកម្មការរួមដែលត្រូវបានបង្កើតឡើងដើម្បីធ្វើការបណ្តេញចេញេនះ បានមានប្រសាសន៍ថា ផែនការបណ្តេញអ្នកស្រុកចេញ មុនកិច្ចប្រជុំកំពូលនេះមិនមានទៀតទេ។
លោក សារ៉ាង មានប្រសាសន៍ថា “ យើងគ្មានផែនការបណ្តេញប្រជាពលរដ្ឋមុនកិច្ចប្រជុំកំពូលទេ ព្រោះយើងនឹងពង្រឹងសន្តិសុខនៅខាងក្នុងអាកាសយានដ្ឋាន”។ លោកបន្តថា លោកមិនដឹងថា តើការបណ្តេញចេញនេះនឹងធ្វើឡើងពេលអនាគត ឬយ៉ាងណាទេ។
លោក ណុប សារិន អាយុ៤១ឆ្នាំ ជាអ្នកស្រុកនៅក្នុងភូមិថ្មគោល បានមានប្រសាសន៍នៅក្រៅស្ថានទូតអាមេរិកថា “ យើងគ្រាន់តែព្រួយបារម្ភថា ថ្ងៃណាមួយយើងនឹងភ្ញាក់ខ្លួន ហើយពួកគេនឹងបោសសម្អាតដីរបស់យើង និងបំផ្លាញផ្ទះរបស់យើង”។
លោក សៀន ម៉ាកគិនតុស (Sean Mclntosh) អ្នកនាំពាក្យស្ថានទូតអាមេរិកបានបញ្ជាក់ថា ស្ថានទូកបានទទួលញត្តិនេះហើយ។ លោកបានលើកឡើងនៅក្នុងអុីម៉េលមួយថា “ ជាទូទៅ យើងបារម្ភអំពីបញ្ហាសិទ្ធិដីធ្លី និងពិនិត្យតាមដានពីការវិវឌ្ឍនៃបញ្ហានេះយ៉ាងដិតដល់បំផុត។វាមានសារៈសំខាន់ក្នុងការដោះស្រាយជម្លោះដីធ្លីដោយឯករាជភាពនិងប្រកបដោយតម្លាភាព ដែលសាធារណជនបានយល់ដឹងយ៉ាងច្បាស់ និងអនុវត្តចំពោះប្រជាជនកម្ពុជាទាំងអស់ឲ្យស្មើភាពគ្នា និងស្របតាមច្បាប់”៕
ប្រែសម្រួលដោយ ចេវ ប៊ុននី