បុរសពីរនាក់ដែលត្រូវបានតុលាការចោទប្រកាន់ កាលពីឆ្នាំ២០០៤ពីបទធ្វើឃាតលោកជាវិជ្ជាមេដឹកនាំសហជីព និងត្រូវបានគេដឹងជាទូទៅថា ជាមនុស្សត្រូវគេទម្លាក់កំហុសលើនោះ នឹងត្រូវបង្ហាញខ្លួននៅសាលាឧទ្ធរណ៍ដើម្បីចូលរួមសវនាការជំនុំជម្រះឡើងវិញនៅថ្ងៃនេះ ដោយគិតមកទល់នឹងពេលនេះ ជិតបួនឆ្នាំហើយ បន្ទាប់ពីតុលាការកំពូលបានដោះលែងពួកគេ ហើយបានបង្គាប់ឲ្យមានការស៊ើបអង្កេតសំណុំរឿងនេះឡើងវិញ។
លោក ប៊ន សំណាង និងលោក សុខសំអឿន ត្រូវបានចាប់ខ្លួនមួយសប្ដាហ៍បន្ទាប់ពីលោកជាវិជ្ជាត្រូវគេបាញ់សម្លាប់នៅក្នុងរាជធានីភ្នំពេញកាលពីថ្ងៃទី២២ខែមករា ឆ្នាំ២០០៤។ ក្រោយមក ក្នុងឆ្នាំដដែលនោះ ពួកគេត្រូវបានតុលាការផ្តន្ទាទោសម្នាក់ៗឲ្យជាប់ពន្ធនាគាររយៈពេល២០ឆ្នាំបើទោះពួកគេប្រកែកថា ជាការទម្លាក់កំហុសក៏ដោយ។
ថ្វីបើបទចោទប្រកាន់ត្រូវបានតម្កល់ ក៏ដោយ តែតុលាការកំពូលបានដោះលែងបុរសទាំងពីរនេះឲ្យនៅក្រៅឃុំ កាលពីចុងឆ្នាំ២០០៨ហើយបានបង្គាប់ឲ្យសាលាឧទ្ធរណ៍បើកការស៊ើបអង្កេតឡើងវិញលើសំណុំរឿងឃាតកម្មនេះ។ សាលាឧទ្ធរណ៍បានបង្វិលសំណុំរឿងនេះត្រឡប់ទៅកាន់សាលាដំបូងរាជធានីភ្នំពេញវិញ ដែលដំបូងឡើយបានចោទប្រកាន់បុរសទាំងពីរនេះ កាលពីឆ្នាំ២០០៩។
សាលាឧទ្ធរណ៍បានកំណត់កាលបរិច្ឆេទបើកសវនាការឡើងវិញ ក្នុងខែសីហា ឆ្នាំ២០១១ប៉ុន្ដែបានផ្អាកទៅវិញ នៅពេលដល់ថ្ងៃកំណត់។
មេធាវីរបស់លោកប៊នសំណងនិង លោកសុខសំអឿនបានលើកឡើងកាលពីម្សិលមិញថា កូនក្ដីរបស់ខ្លួនបានត្រៀមខ្លួនចូលរួមសវនាការនៅថ្ងៃនេះ។ លោកជុំសុវណ្ណាលីមេធាវីរបស់ លោកប៊នសំណាងបានមានប្រសាសន៍ថា “ ខ្ញុំមិនអាចនិយាយបានថា តើខ្ញុំអាចការពារកូនក្ដីរបស់ខ្ញុំ និងអនុញ្ញាតឲ្យគាត់នៅក្រៅឃុំ បានឬក៏អត់នោះទេពីព្រោះខ្ញុំចាំបាច់រង់ចាំទទួលដំណឹងថា តើភ័ស្ដុតាងមានអ្វីខ្លះ ដែលសាលាដំបូងរាជធានីភ្នំពេញបានរកឃើញ”។
លោកកៅទីមេធាវីតំណាងឲ្យគ្រួសារសពលោកជាវិជ្ជាបានលើកឡើងថាលោកសង្ឃឹមថាការបើកសវនាការជំនុំជម្រះឡើងវិញ នឹងទទួលបានជោគជ័យ បន្ទាប់ពីការបើកសវនាការលើកមុនបានបរាជ័យនោះ។ លោកបានមានប្រសាសន៍ថា “ខ្ញុំសង្ឃឹមថាតុលាការនឹងស្វែងរកឲ្យឃើញឧក្រិដ្ឋជនពិតប្រាកដ ដើម្បីផ្ដល់យុត្ដិធម៌ឲ្យគ្រួសារលោកជាវិជ្ជា”។
តាំងពីដំបូងមកម៉្លេះលោកប៊នសំណាងនិងលោកសុខសំអឿនសុទ្ធតែបានអះអាងថា ខ្លួនមិនមានជាប់ពាក់ព័ន្ធនៅក្នុងការស្លាប់របស់មេដឹកនាំសហជីពដ៏ល្បីល្បាញនេះទេហើយបានបង្ហាញតុលាការអំពីការសំអាងដ៏ជាក់ស្ដែង អំឡុងការបើកសវនាការដំបូងរបស់ពួកគេ។
ក្រុមអ្នកអង្កេតការអន្ដរជាតិ និងអង្គការសិទ្ធិមនុស្សក្នុងស្រុកបានលើកឡើងថាទាំងការស៊ើបអង្កេត និងការបើកសវនាការសុទ្ធតែធ្វើឡើង ដោយមិនត្រឹមត្រូវទាល់តែសោះ។សម្ដេចឪព្រះបាទនរោត្ដមសីហនុបានទ្រង់ព្រះលិខិតដោយបានបង្ហាញពីការទុកព្រះទ័យរបស់ព្រះអង្គថា បុរសទាំងពីរនាក់នេះសុទ្ធតែមិនមានកំហុសនៅក្នុងអំពើឃាតកម្មនេះទេ។ហើយកាលពីឆ្នាំ២០០៦លោកហេងពៅអតីតស្នងការនគរបាលរាជធានីភ្នំពេញ ដែលបានដឹកនាំនគរបាលស៊ើបអង្កេតបុរសទាំងពីររូបនេះ ហើយដែលឥឡូវ
កំពុងតែជាប់ពន្ធនាគារយ៉ាងយូរពីបទជាប់ពាក់ព័ន្ធនឹងអំពើឃាតកម្ម និងបទល្មើសធ្ងន់ធ្ងរផ្សេងៗទៀតបានប្រាប់ទស្សនាវដ្ដីបារាំងមួយថា បុរសទាំងពីរនាក់ត្រូវគេទម្លាក់កំហុស៕
ប្រែសម្រួលដោយស៊ាស៊ុយឈាង