អ្នករត់រ៉ឺម៉កម៉ូតូ និងអ្នករត់ម៉ូតូឌុបជាង១០០នាក់ដែលជាសមាជិកនៃសហជីពមិនសូវល្បីឈ្មោះមួយ បានផ្ញើលិខិតមួយច្បាប់ទៅស្ថានទូតអាមេរិក និងគណៈប្រតិភូសហភាពអឺរ៉ុប កាលពីម្សិលមិញ ដោយស្នើឲ្យពួកគេកុំឲ្យធ្វើអន្ដរាគមន៍ក្នុងសំណុំរឿងរបស់អ្នកស្រីយ៉មបុប្ផាសកម្មជនមកពីសហគមន៍បឹងកក់។
នេះមិនមែនជាលើកដំបូងទេដែលក្រុមសម្ពន្ធសមាគមអភិវឌ្ឍន៍កម្ពុជាបានចេញមកតាមផ្លូវ ដើម្បីទាមទារឲ្យមានការផ្ដន្ទាទោសអ្នកស្រី យ៉មបុប្ផាដែលពួកគេបានចោទប្រកាន់ថា បានប្រើអំពើហិង្សាលើសមាជិកពីររូបរបស់សម្ពន្ធសហគមន៍អភិវឌ្ឍន៍កម្ពុជានោះ។
លោកអីុសុភស្សប្រធានសម្ពន្ធសហគមន៍អភិវឌ្ឍន៍កម្ពុជាបានថ្លែងថា“ខ្ញុំសង្ឃឹមថាស្ថានទូតអាមេរិកនិងសហភាពអឺរ៉ុប នឹងពិនិត្យមើលសំណុំរឿងរបស់អ្នកស្រី យ៉ម បុប្ផា ពីព្រោះនេះមិនមែនជាជម្លោះដីធ្លីនោះឡើយវាគឺជាបទល្មើលព្រហ្មទណ្ឌ”។លោកបន្ដថា“ខ្ញុំចង់ឲ្យស្ថានទូតអាមេរិកនិងសហភាពអឺរ៉ុបកុំឲ្យចូលមកពាក់ព័ន្ធក្នុងសំណុំរឿងនេះ ហើយកុំឲ្យដាក់សម្ពាធណាមួយទៅលើរដ្ឋាភិបាល”។
លិខិតនេះ បានលើកឡើងថា“កាលពីថ្ងៃទី៧ខែសីហាឆ្នាំ២០១២វេលាម៉ោង៧និង១០នាទីយប់ មានការប្រើអំពើហិង្សាដោយចេតនាមួយទៅលើសមាជិកពីររូបរបស់សម្ពន្ធសហគមន៍អភិវឌ្ឍន៍កម្ពុជា គឺលោកវ៉ាត់ ថៃសៀងអាយុ២៤ឆ្នាំនិងលោក ង៉ែត ចិត្ត អាយុ២៨ឆ្នាំនៅពេលពួកគេទាំងពីរកំពុងតែរង់ចាំដឹកម៉ូយរបស់ខ្លួន ហើយត្រូវអ្នកស្រី យ៉មបុប្ផានិងប្ដីរបស់អ្នកស្រីព្រមទាំងប្អូនប្រុសពីរនាក់របស់អ្នកស្រីបានចោទប្រកាន់ពួកគេថាជាចោរ ហើយបានយកតួណឺវីសចាក់ពួកគេ និងបានយកពូថៅវាយពួកគេឲ្យរងរបួសធ្ងន់”។
លោកវ៉ាត់សារ៉ាត់ឪពុករបស់លោកថៃសៀងបានដាក់ពាក្យបណ្ដឹងទៅសាលាដំបូងរាជធានីភ្នំពេញ ហើយអ្នកស្រី យ៉មបុប្ផាត្រូវបានចាប់ខ្លួនកាលពីថ្ងៃទី៧ខែកញ្ញា។
ប៉ុន្ដែអ្នកភូមិមកពីសហគមន៍បឹងកក់បានអះអាងថាអ្នកស្រីយ៉មបុប្ផាត្រូវបានចាប់ដាក់ពន្ធនាគារដោយសារតែតួនាទីរបស់អ្នកស្រីជាសកម្មជនប្រឆាំងការបណ្ដេញចេញ ហើយអង្គការសិទ្ធិមនុស្ស រួមទាំងអង្គការលើកលែងទោសអន្ដរជាតិ និងអង្គការឃ្លាំមើលសិទ្ធិមនុស្សបានហៅការចោទប្រកាន់នេះថាគួរឲ្យសង្ស័យ ហើយក៏បានអំពាវនាវឲ្យមានការដោះលែងអ្នកស្រីផងដែរ។
កាលពីថ្ងៃច័ន្ទអ្នកភូមិមួយចំនួនមកពីសហគមន៍បឹងកក់ បានដាក់ញត្តិទៅកាន់ស្ថានទូតអាមេរិកដោយស្នើឲ្យប្រធានាធិបតីអាមេរិកលោកបារ៉ាក់ អូបាម៉ា (Barack Obama) លើកឡើងអំពីបញ្ហាពាក់ព័ន្ធនឹងការបណ្ដេញចេញពីដីធ្លី រួមទាំងសំណុំរឿងរបស់អ្នកស្រី យ៉មបុប្ផាផងដែរនៅពេលមកបំពេញទស្សនកិច្ចនៅខែនេះ។
លោកវ៉ាត់សារ៉ាត់បាននិយាយកាលពីម្សិលមិញថា“ខ្ញុំគិតថា រឿងនេះគឺជារឿងព្រហ្មទណ្ឌពីព្រោះអ្នកស្រី យ៉មបុប្ផាមានបំណងសម្លាប់កូនប្រុសរបស់ខ្ញុំ។ខ្ញុំទាមទារប្រាក់សំណងជំងឺចិត្តចំនួន២.០០០ដុល្លារ”។
លោកវ៉ាត់នឿនអ្នករត់ម៉ូតូឌុបមួយរូបដែលបានប្រមូលផ្ដុំគ្នាជាមួយនឹងអ្នករត់ម៉ូតូឌុបផ្សេងៗទៀត នៅខាងក្រៅស្ថានទូតអាមេរិក កាលពីម្សិលមិញ បាននិយាយថាលោកគ្រាន់តែមកចូលរួមការប្រមូលផ្ដុំនេះតែប៉ុណ្ណោះពីព្រោះគេនឹងឲ្យលុយលោក។លោកបាននិយាយថា“ខ្ញុំមកតាមពួកគេ ពីព្រោះពួកគេសន្យាថាពួកគេនឹងមានរបស់សម្រាប់ឲ្យខ្ញុំ”។ អ្នកស្រីយ៉មបុប្ផាត្រូវបានគេកំណត់ពេលឲ្យបង្ហាញខ្លួននៅសាលាឧទ្ធរណ៍ថ្ងៃនេះ ដើម្បីចូលរួមស្តាប់សវនាការអំពីសំណើសុំដោះលែងអ្នកស្រីឲ្យនៅក្រៅឃុំ៕
ប្រែសម្រួលដោយស៊ាស៊ុយឈាង