បន្ទាប់ពីបើកសវនាការជំនុំជម្រះរយៈពេលខ្លី ដែលមិនមានភ័ស្តុតាងអ្វីថ្មីត្រូវយកមកបង្ហាញនោះ សាលាឧទ្ធរណ៍ កាលពីម្សិលមិញ បានផ្អាកប្រកាសសាលដីការបស់ខ្លួននៅក្នុងការបើកសវនាការជំនំុជម្រះឡើងវិញនូវសំណុំរឿងឃាតកម្ម លោក ជា វិជ្ជាមេដឹកនាំសហជីពដ៏ល្បីនៅកម្ពុជា កាលពីឆ្នាំ២០០៤។
នៅក្នុងការបើកសវនាការរយៈពេលពីរម៉ោង កាលពីម្សិលមិញ បង្ហាញឲ្យឃើញថាមិនបានរកឃើញភ័ស្តុតាងថ្មីទេ អំឡុងការសើុបអង្កេតឡើងវិញរយៈពេលបីឆ្នាំនេះ។
លោក តាន់ សេណារ៉ុង ព្រះរាជអាជ្ញាអមសាលាឧទ្ធរណ៍បានមានប្រសាសន៍ថា ការសើុបអង្កេតលើកទី២ គឺវាមិនខុសទៅនឹងការសើុបអង្កេតលើកដំបូងឡើយ ដែលលោកការសើុបអង្កេតលើកដំបូងឡើយ ដែលលោកប៊ន សំណាង និងលោក សុខ សំអឿន នៅតែមានពិរុទ្ធភាពពីបទធ្វើឃាតលោក ជា វិជ្ជា។
លោក សេណារ៉ុង បានមានប្រសាសន៍ថា “ការសើុបអង្កេតរបស់ចៅក្រមសាលាដំបូងរាជធានីភ្នំពេញ មិនបានផ្តល់ចម្លើយថ្មីនោះទេ វាមិនខុសពីចម្លើយចាស់ឡើយ”។
កាលពីឆ្នាំ២០០៥ សាលាដំបូងរាជធានីភ្នំពេញបានរកឃើញថា លោក ប៊ន សំណាង និងលោក សុខ សំអឿន មានពិរុទ្ធ ភាពពីបទធ្វើឃាតមេដឹកនាំសហជីពដ៏ល្បី ទាំងកណ្តាលថ្ងៃត្រង់ កាលពីខែមករា ឆ្នាំ២០០៤ ហើយបានផ្តន្ទាទោសពួកគេឲ្យជាប់ពន្ធនាគារម្នាក់ៗរយៈពេល២០ឆ្នាំ។
ដោយដឹងជាទូទៅថា ការចោទប្រកាន់ពីបទធ្វើឃាតនេះ គឺជាការទម្លាក់កំហុសនោះ អង្គការសិទ្ធិមនុស្សទាំងក្នុងស្រុក និងអន្តរជាតិបានតវ៉ាអស់រយៈពេលជាច្រើនឆ្នាំ ចំពោះការចោទប្រកាន់មកលើបុរសទាំងពីររូបនេះ។
ដោយប្រឈមមុខទៅនឹងសេចក្តីសម្រេចមួយនៅក្នុងចំណោមសេចក្តីសម្រេចដ៏ចម្រូងចម្រាសបំផុតរបស់តុលាការក្នុងរយៈពេលជាច្រើនឆ្នាំមកនេះ តុលាការកំពូល កាលពីចុងឆ្នាំ២០០៨ បានតម្កល់សាលក្រមផ្តន្ទាទោស ប៉ុន្តែ បានដោះលែងបុរសទាំងពីរឲ្យនៅក្រៅឃុំ ហើយបានបង្គាប់ឲ្យសាលាឧទ្ធរណ៍បើកការសើុបអង្កេតឡើងវិញ លើសំណុំរឿងឃាតកម្មទាំងមូល។
កាលពីចុងឆ្នាំ២០០៩ សាលាឧទ្ធរណ៍បានបង្វិលសំណុំរឿងឃាតកម្មនេះត្រឡប់ទៅកាន់សាលាដំបូងរាជធានីភ្នំពេញវិញ ដោយបង្វិលទៅឲ្យមនុស្សដដែល ដែលជាអ្នកបានចោទប្រកាន់ លោក ប៊ន សំណាង និង លោក សុខ សំអឿន ដោយសំអាងលើភ័ស្តុតាងមិនគ្រប់គ្រាន់ និងមិនជាប់ពាក់ព័ន្ធ កាលពីឆ្នាំ២០០៥។ ប៉ុន្តែ កំហុសរបស់តុលាការ មិនមែនមានតែក្នុងករណីសើុបអង្កេតសំណុំរឿងលើលោក ជា វិជ្ជា នោះទេ។
មន្ត្រីនគរបាលសើុបអង្កេតដំបូងលើសំណុំរឿងឃាតកម្មលោក ជា វិជ្ជា ត្រូវបានដឹកនាំដោយលោក ហេង ពៅ អតីតស្នងការរាជធានីភ្នំពេញ ដែលឥឡូវកំពុងទទួលទោសជាប់ពន្ធនាគារ១០០ឆ្នាំពីបទឧក្រិដ្ឋជាច្រើន រួមទាំងករណីធ្វើឃាត លោកចៅក្រមមួយរូបផងដែរ។
កាលពីឆ្នាំ២០០៦ នៅពេលកំពុងរត់គេចខ្លួន និងមុនពេលត្រូវបានចាប់ខ្លួននោះ លោកហេង ពៅ បានផ្តល់បទសម្ភាសពិសេសមួយជាមួយនឹងទស្សនាវដ្តីព័ត៌មានបារាំងឈ្មោះ ឡិក្សប្រេ៉ស (L’ Express) ហើយបានអះអាងថា លោក ហុក ឡងឌី អតីតអគ្គស្នងការនគរបាលជាតិ ដែលបានស្លាប់ក្នុងឧបទ្ទវហេតុធ្លាក់ឧទ្ធម្ភាគចក្រ កាលពីឆ្នាំ២០០៨ បានចេញបទបញ្ជាឲ្យលោកទម្លាក់កំហុសលើ លោក ប៊ន សំណាង និងលោក សុខ សំអឿន ថា ជាអ្នកធ្វើឃាតលោក ជា វិជ្ជា។
លោក ហេង ពៅ បានប្រាប់ទស្សនាវដ្តីបារំាងនេះថា “ខ្ញុំមិនត្រូវពេលវេលាច្រើន ដើម្បីស្វែងយល់ថា ជនសង្ស័យទាំងពីរគឺ ប៊ន សំណាង និង សុខ សំអឿន មិនបានធ្វើអ្វីជាប់ពាក់ព័ន្ធក្នុងអំពើឃាតកម្មនេះឡើយ”។
លោក ហេង ពៅ ដែលក្រោយមកត្រូវបានដំឡើងទៅជារដ្ឋលេខាធិការ ក្រសួងមហាផ្ទៃ និងជាទីប្រឹក្សារបស់លោកនាយករដ្ឋមន្ត្រី ហ៊ុន សែន បានលើកឡើងដែរថា គ្មានការសើុបអង្កេតឲ្យបានដិតដល់លើសំណុំរឿងឃាតកម្មនេះទេ ។
នៅពេលសំណំុរឿងនេះ ត្រូវតុលាការកំពូលបង្គាប់ឲ្យសើុបអង្កេតឡើងវិញ នៅពេលនោះសាលាដំបូងរាជធានីភ្នំពេញ ក៏បានសាកសួរលោក ហេង ពៅ ដែរ កាលពីឆ្នាំ២០១០ តែទោះជាយ៉ាងណា ទាំងសាលាដំបូង និងអតីតស្នងការនគរបាលមិនបាននិយាយលម្អិតអំពីរឿងនេះឡើយនៅពេលនោះ។
កាលពីម្សិលមិញ លោកព្រះរាជអាជ្ញា សេណារ៉ុង បានប្រាប់តុលាការថា លោក ហេង ពៅ មិនបាននិយាយអ្វីនោះទេនៅក្នុងបទសម្ភាស កាលពីពេលនោះ។
លោក សេណារ៉ុង បានមានប្រសាសន៍ថា “ចម្លើយលោក ហេង ពៅ មិនអាចយកមកប្រើក្នុងសំណុំរឿងនេះបានទេ ពីព្រោះលោកមិនបានឆ្លើយអ្វីឡើយ”។ លោកព្រះរាជអាជ្ញាបានបន្តថា “ លោកមិនឆ្លើយ ព្រោះលោកឈប់ជឿព្រះពុទ្ធសាសនាទៀតហើយ ហើយបែរជាទៅកាន់សាសនាគ្រិស្តវិញ”។
លោក ហេង ពៅ មិនបានចូលរួមសវនាការ កាលពីម្សិលមិញ ដើម្បីនិយាយការពារខ្លួននោះឡើយ។
លោក កៅ ទី មេធាវីតំណាងឲ្យគ្រួសារលោក ជា វិជ្ជា បានមានប្រសាសន៍ថា លោកបានការកត់ត្រាសម្តីជាច្រើន របស់លោក ហេង ពៅ ដែលបានអះអាងពីអ្វីដែលលោកបានឆ្លើយក្នុងបទសម្ភាស។
កាលពីម្សិលមិញ មានតែភស្តុតាងតែមួយគត់ បានមកពីសាក្សីម្នាក់ ដែលជាម្ចាស់ផ្ទះសំណាក់ ត្រូវបានតុលាការយក មកអានក្នុងសវនាការ ដែលភស្តុតាងនោះបានលើកឡើងថា លោក ប៊ន សំណាង បានស្នាក់នៅមួយយប់ ក្នុងរាជធានីភ្នំពេញ មុនថ្ងៃលោក ជា វិជ្ជា ត្រូវបានគេសម្លាប់។
តែទោះជាយ៉ាងណា លោក ប៊ន សំណាង និងលោក សុខ សំអឿន បានប្រកែកតាំងពីយូរមកហើយថា ខ្លួនគ្មានកំហុសនោះទេ។
លោក សុខ សំអឿន បានទទួចថា ខ្លួនគ្មានកំហុសតាំងពីដើមមកម្លេ៉ះ។ លោក ប៊ន សំណាង ដំបូងឡើយ បានសារភាព ប៉ុន្តែ កាលពីឆ្នាំ២០០៨ លោកបានប្រាប់តុលាការកំពូលថា ខ្លួនក៏គ្មានកំហុសដែរ ប៉ុន្តែ នគរបាលបានវាយដំខ្លួន ដើម្បីឲ្យខ្លួនសារភាព។
កាលពីម្សិលមិញ លោក ប៊ន សំណាង បានប្រាប់តុលាការថា លោក ហ៊ុន សុង អតីតអធិការរងនគរបាល ខណ្ឌទួលគោក និងលោក លី រ៉ាសីុ អតីតមន្ត្រីនគរបាលព្រហ្មទណ្ទកម្រិតស្រាល រាជធានីភ្នំពេញ ដែលកំពុងតែជាប់ពន្ធនាគារជាមួយលោក ហេង ពៅ បានមកសួរសុខទុក្ខខ្្លួននៅពន្ធនាគារបេ៉ហ្សុី ដើម្បីយកស្រីមកឲ្យដេកជាមួយ ព្រម ផ្តល់អាហារ និងលុយកាក់ទៀត ដើម្បីឲ្យលោករក្សាសម្តីសារភាពរបស់ខ្លួន។
នៅក្នុងសក្ខីកម្ម ដែលក្រឡាបញ្ជីយកមកអានក្នុងសវនាការលោក ហ៊ុន សុង លោក លី រ៉ាសុី និងលោកស្រី វត្ថា អតីតប្រធានពន្ធនាគារបេ៉ហ្សុី សុទ្ធតែបានបដិសេធថាមិនបាននាំស្រីទៅឲ្យ លោក ប៊ន សំណាង ឡើយ។
លោក ប៊ន សំណាង ក៏បានប្រាប់តុលាការដែលថា ខ្លួនបាននៅជាមួយមិត្តស្រីរបស់ខ្លួននៅក្នុងក្រុងអ្នកលឿង ខេត្តព្រៃវែង ដែលមានចម្ងាយ៦០គីឡូម៉ែត្រ ពីភាគអាគ្នេយ៍នៃរាជធានីភ្នំពេញ នៅមុនថ្ងៃ លោក ជា វិជ្ជា ត្រូវគេបាញ់សម្លាប់។
លោក ជួន ស៊ុនឡេង ប្រធានក្រុមប្រឹក្សាជំនុំជម្រះ បានលើកឡើងពីសក្ខីកម្ម របស់សង្សារលោក ប៊ន សំណាង ។