កាលពីម្សិលមិញ ក្រុមអ្នកតវ៉ាប្រឆាំងនឹងការបណ្ដេញចេញបានបោះជំរំនៅខាងមុខស្ថានទូតអាមេរិកក្នុងរាជធានីភ្នំពេញជាលើកទី២ ប៉ុន្ដែបានបញ្ចប់ការតវ៉ារបស់ខ្លួនវិញនៅក្នុងពេលល្ងាចពេលញត្តិ ផ្ញើជូនលោក បារ៉ាក់អូបាម៉ា (Barack Obama) ត្រូវបានមន្ត្រីសន្ដិសុខស្ថានទូតទទួលយកទៅខាងក្នុងស្ថានទូត។
អ្នកស្រី ទេព វន្នី អ្នកភូមិបឹងកក់ ដែលនៅទីនោះមានការបណ្ដេញចេញក្នុងរយៈពេលប៉ុន្មានឆ្នាំថ្មីៗនេះ លើកឡើងថា “ សន្ដិសុខស្ថានទូតអាមេរិកបានចេញមកទទួលយកញត្តិរបស់យើងទៅជូនលោកឯកអគ្គរដ្ឋទូត”។
អ្នកស្រីបន្ដថា “ យើងចាកចេញពីស្ថានទូតអាមេរិកបន្ទាប់ពីបានដាក់ញត្តិរួច។ នេះមិនមែនមានន័យថា យើងខ្លាច ឬរងការគំរាមកំហែងពីអាជ្ញាធរនោះទេ”។ អ្នកស្រីរៀបរាប់ថា ញត្តិនោះអំពាវនាវឲ្យលោកអូបាម៉ា ជួយដោះស្រាយការចាប់យកដីក្នុងប្រទេសកម្ពុជា និងដាក់សម្ពាធលើរដ្ឋាភិបាលឲ្យដោះលែងសកម្មជនប្រឆាំងនឹងការបណ្ដេញចេញដែលកំពុងជាប់ពន្ធនាគារពីរនាក់។
អ្នកស្រីវន្នីបានឲ្យដឹងផងដែរថាអ្នកស្រី និងអ្នកតវ៉ាប្រហែល៥០នាក់ផ្សេងទៀត ដែលបោះជំរំខាងមុខស្ថានទូតនោះបានចាកចេញនៅម៉ោង៦ល្ងាច បន្ទាប់ពីដាក់ញត្តិដែលក្នុងនោះ ក៏បានស្នើសុំជួបលោក វីលលៀមថដ (William Todd) ឯកអគ្គរដ្ឋទូតសហរដ្ឋអាមេរិក ផងដែរ។
មន្ត្រីស្ថានទូតអាមេរិក ទោះជាយ៉ាងណា មិនបានបញ្ជាក់ថាបានទទួលញត្តិនោះទេ។ លោកសៀនម៉ាកគិនតុស (Sean McIntosh) អ្នកនាំពាក្យស្ថានទូតសហរដ្ឋអាមេរិកបានមានប្រសាសន៍ថា “ ពេលនេះយើងមិនអាចបញ្ជាក់ថា យើងបានទទួលញត្តិនោះទេ”។
នៅពេលសួរថាតើមានតំណាងស្ថានទូតណាមួយរួមទាំងឯកអគ្គរដ្ឋទូត វីលលៀមថដផងនោះ បានជួបជាមួយនឹងក្រុមអ្នកតវ៉ា ឬអត់នោះ លោកម៉ាកគិនតុសបានមានប្រសាសន៍ថា “ ដើម្បីសន្ដិសុខរបស់បុគ្គលិក យើងមិនអាចជួបជាមួយនឹងភ្ញៀវ ដែលមកកាន់ស្ថានទូតដោយគ្មានការប្រកាសឲ្យដឹងមុននោះទេ”។
ក្រុមអ្នកតវ៉ាបានបោះជំរំនៅខាងក្រៅស្ថានទូតលើកទី១ កាលពីថ្ងៃពុធ ប៉ុន្ដែបានរំសាយនៅពេលយប់វិញ ដោយសារនគរបាលបង្ក្រាបកុបកម្មរាប់រយនាក់បានដាក់ពង្រាយ កាលពីល្ងាចថ្ងៃពុធដើម្បីបណ្ដេញពួកគេចេញ។
ដោយអង្គុយនៅក្រោមដំបូលតង់ចំនួនពីរ កាលពីម្សិលមិញ អ្នកតវ៉ាបានលើកបដាសរសេរដោយដៃ ដោយអំពាវនាវឲ្យរដ្ឋាភិបាលសហរដ្ឋអាមេរិកជួយអន្ដរាគមន៍ក្នុងជម្លោះដីធ្លីរបស់ខ្លួន។ បដានោះមានន័យថា “ សូមលោកបារ៉ាក់ អូបាម៉ាជួយអន្ដរាគមន៍ទៅលើរដ្ឋាភិបាល ដើម្បីស្វែងរកដំណោះស្រាយផង”។
លោកអូបាម៉ានឹងមកបំពេញទស្សនកិច្ចក្នុងប្រទេសកម្ពុជា ដើម្បីចូលរួមកិច្ចប្រជុំកំពូលអាស៊ាន និងអាស៊ី-បូពា៌ ដែលនឹងប្រព្រឹត្តទៅចាប់ពីថ្ងៃទី១៨ ដល់ថ្ងៃទី២១ ខែវិច្ឆិកា។
អ្នកស្រី វន្នីបានលើកឡើងថា “ យើងចង់ឲ្យលោកប្រធានាធិបតី អូបាម៉ា ជួយដោះស្រាយបញ្ហាជម្លោះដីធ្លី ដែលកំពុងតែកើតឡើងក្នុងប្រទេសកម្ពុជា យើងចង់ឲ្យលោកជួយដោះស្រាយបញ្ហារំលោភសិទ្ធិមនុស្ស ជាពិសេស ក្នុងករណីរបស់អ្នកស្រីយ៉មបុប្ផានិងអ្នកស្រី ទឹមសាក់មុនី”។
សកម្មជនទាំងពីរនាក់ គឺអ្នកស្រីបុប្ផានិងអ្នកស្រីសាក់មុនីត្រូវបានតុលាការចោទប្រកាន់ និងឃុំខ្លួនក្នុងពន្ធនាគារដោយសារករណីផ្សេងពីគ្នា កាលពីខែកញ្ញា។អង្គការសិទ្ធិមនុស្សនានា បាននិយាយថាការចាប់ខ្លួននេះ គឺជាការប៉ុនប៉ងបំបិទមាត់អ្នកទាំងពីរ ចំណែកឯរដ្ឋាភិបាលវិញអះអាងថាអ្នកទាំងពីរ គឺជាអ្នកគំរាមកំហែងដល់សង្គមជាតិ។
អ្នកស្រី បុប្ផាត្រូវបានចោទប្រកាន់ពីបទប្រើអំពើហិង្សាដោយចេតនា ដោយសារអ្នកស្រីមានជាប់ពាក់ព័ន្ធក្នុងការវាយអ្នករត់ម៉ូតូឌុបពីរនាក់ ចំណែកឯអ្នកស្រី សាក់មុនីវិញត្រូវបានចោទប្រកាន់ពីបទផ្តល់សេចក្ដីប្រកាសក្លែងបន្លំ។
ការបោះជំរំមុខស្ថានទូតអាមេរិក កាលពីថ្ងៃពុធនោះបានកើតឡើងបន្ទាប់ពីសាលាឧទ្ធរណ៍បានបដិសេធសំណើសុំឲ្យដោះលែងអ្នកស្រី បុប្ផា និងអ្នកស្រី សាក់មុនីឲ្យនៅក្រៅឃុំជាបណ្ដោះអាសន្ន។
កាលពីម្សិលមិញ នគរបាលលើកឡើងថាការដាក់ពង្រាយកម្លាំងនគរបាលបង្ក្រាបកុបកម្ម និងការបណ្ដេញក្រុមអ្នកតវ៉ាកាលពីល្ងាចថ្ងៃពុធ មានសារៈសំខាន់ណាស់សម្រាប់ការការពារសន្ដិសុខដល់ស្ថានទូតអាមេរិក។ លោក ជួនសុវណ្ណ ស្នងការនគបាលរាជធានីភ្នំពេញ មានប្រសាសន៍ថា “ នៅពេលថ្ងៃ គេមានសិទ្ធិក្នុងការតវ៉ា ប៉ុន្ដែក្នុងពេលយប់ យើងមិនអនុញ្ញាតឲ្យមានការតវ៉ាបែបអនាធិបតេយ្យ ដែលធ្វើឲ្យប៉ះពាល់ដល់សន្ដិសុខរបស់ស្ថានទូតនោះទេ”៕
ប្រែសម្រួលដោយហមសុផាណ្ណា