34.8 C
Phnom Penh

នគរ​បាល​បញ្ឃប់​ចលនា​យុវ​ជន​របស់​គណបក្ស​ សម រង្ស៊ី មិន​ឲ្យ​ដង្ហែ​ក្បួន​ទៅ​កាន់​ព្រះ​បរម​រាជវាំង

ដោយ ឌឹ ខេមបូឌា ដេលី

បទវិភាគ

​កម្លាំង​កង​រាជអាវុធហត្ថ​ និង​នគរ​បាល​បង្ក្រាប​កុប​កម្ម​រាប់​រយ​នាក់​ កាល​ពី​​ព្រឹក​ម្សិល​មិញ បាន​រារាំង​សមាជិក​ចល​នា​យុវជន​របស់​គណបក្ស​ សមរង្ស៊ីជាង​១០០​នាក់​មិន​ឲ្យ​ដង្ហែ​​ក្បួន​​ក្នុង​រាជធានី​ភ្នំពេញ ដែល​ទាមទារ​​ឲ្យ​ដោះ​លែង​អ្នក​ទោស​នយោបាយ​ទាំង​អស់។

លោកសួងសោភ័ណប្រធាន​ចល​នា​យុវ​ជន​​របស់​គណបក្ស​ សមរង្ស៊ី ​​លើក​ឡើង​ថានៅ​ពេល​អ្នក​តវ៉ាព្យាយាម​ចាក​ចេញ​ពីសួន​សេរី​ភាព​ទៅ​កាន់​ព្រះ​បរម​រាជវាំង​ជាទី​ដែល​ពួក​គេ​គ្រោង​ដាក់​ញត្តិថ្វាយព្រះ​មហាក្សត្រ​ព្រះ​បាទនរោត្តម​ សីហមុនី ពេល​នោះ អាជ្ញា​​ធរ​​បាន​មក​ដល់​ ហើយ​​ភាគី​ទាំង​ពីរ​បាន​ប៉ះទង្គិច​គ្នា​។

លោកសោភ័ណ ​លើកឡើង​ថា “ ញត្តិ​នេះ​គឺ​ដើម្បី​ថ្វាយ​ព្រះ​មហាក្សត្រ។យើង​ចង់​ទូល​ព្រះ​មហា​ក្សត្រសុំ​ការ​ព្រះរាជ​ទាន​លើក​លែង​​ទោស​ដល់​​អ្នក​ទោស​នយោ​បាយ”។​ ជាពិសេសអ្នក​តវ៉ាបាន​អំពាវ​នាវ​សុំឲ្យ​មាន​ការ​ព្រះ​រាជទានលើក​លែង​​ទោស​ដល់​មេដឹក​នាំ​គណ​បក្ស​ប្រឆាំង​ គឺ​លោកសមរង្ស៊ីដែល​សព្វ​ថ្ងៃ​កំពុង​រស់​នៅ​ដោយ​និរទេស​ខ្លួន​ឯង​នៅ​ក្នុង​ប្រទេស​បារាំង ដើម្បី​គេច​ពី​ការ​ផ្ដន្ទា​ទោស​ឲ្យ​ជាប់​ពន្ធ​នាគារ​រយៈពេល​១១​ឆ្នាំ​ពី​បទ​ផ្ដល់​ព័ត៌មាន​មិន​ពិត ញុះញង់ ​និង​បំផ្លាញ​ទ្រព្យសម្បត្តិ​សាធារណៈ។

ពួកគេក៏​ចង់​ឲ្យ​រដ្ឋា​ភិបាលធ្វើ​ការ​​ដោះ​លែង​លោក​ម៉មសូណង់​ដូម្ចាស់​ស្ថានីយវិទ្យុ​សម្បុកឃ្មុំ ដែល​ត្រូវ​បាន​ផ្ដន្ទាទោស​ឲ្យ​ជាប់​ពន្ធ​នាគារ​រយៈពេល​២០​ឆ្នាំ​ពីបទដឹក​នាំ​បង្កើត​ចលនាអបគមន៍ក្នុងខេត្តក្រចេះ។

លោកមឿងសុនប្រធានមូលនិធិ​អរិយ​ធម៌ខ្មែរ ដែលកំពុងរស់នៅដោយនិរទេស​ខ្លួនក្នុងប្រទេសបារាំងហើយត្រូវ​បាន​តុលា​ការ​ផ្តន្ទាទោសឲ្យជាប់ពន្ធនាគាររយៈពេល​ពីរ​ឆ្នាំពីបទញុះញង់ ​ព្រមទាំង​អ្នក​ស្រី​ យ៉ម​ បុប្ផានិងអ្នក​ស្រីទឹមសាក់​មុនីសកម្មជន​ប្រឆាំង​ការ​បណ្ដេញ​ចេញ​ក៏​ត្រូវ​បានរាប់បញ្ចូល​នៅ​ក្នុង​ញត្តិ​របស់​គណបក្ស​ សមរង្ស៊ីដែលសុំឲ្យ​ដោះ​លែង​អ្នក​ទោស​នយោ​បាយ​ផងដែរ។

អំឡុង​ការ​ប្រឈម​មុខ​ដាក់​គ្នា​ជាមួយ​នគរ​បាល​បង្ក្រាប​កុបកម្ម​ អាជ្ញាធរ​រាជធានី​ភ្នំពេញ​​ប្រ​កាស​តាម​ឧគ្ឃោសនសព្ទថា ការ​អនុញ្ញាតឲ្យ​​ដង្ហែ​ក្បួន​បន្ដទៅទៀតគឺមាន​ន័យ​ថាជាទង្វើ​មិន​គោរពដល់ព្រះ​វិញ្ញាណក្ខន្ធ​សម្ដេចឪ​ ព្រះ​បាទ​ នរោត្តមសីហនុដែល​ព្រះបរមសព​របស់​ព្រះ​អង្គកំពុងតម្កល់នៅ​ក្នុង​ព្រះ​បរម​រាជវាំង​។

លោកស្រីមូរសុខហួរសមាជិក​សភាមក​ពី​គណបក្ស សមរង្សុីដែល​មាន​វត្តមាន​នៅ​ក្នុង​ការ​តវ៉ា​ កាល​ពីម្សិល​មិញ​ដែរនោះបាន​មានប្រសាសន៍ថា មេដឹក​នាំ​រដ្ឋា​ភិបាល​ក្នុង​ប្រទេស​កម្ពុជាគួរ​តែ​ក្រឡេក​​មើល​ការ​បោះ​ឆ្នោត​ កាល​ពី​ថ្ងៃ​អង្គារ​ របស់​​សហរដ្ឋ​អាមេរិក​រួចមកធ្វើជាគំរូ​សម្រាប់អនុវត្តសិទ្ធិ​សេរីភាព​ផ្នែក​នយោ​បាយ។

លោក​ស្រីបាន​បន្ថែម​ថា “ លោកបារ៉ាក់អូបាម៉ា (Barack Obama)​ មិន​ដែល​ព្យាយាម​ចាប់​​ខ្លួន​ លោកមីតរ៉ុមនី (Mitt Romney) នោះទេហើយ​លោករ៉ុមនីក៏​មិន​ដែល​ព្យាយាម​ទម្លាក់​លោកអូបាម៉ាពីអំណាចដែរ។ផ្ទុយទៅវិញពួកគេ​ប្រើតែពាក្យ​​សម្ដី​ដាក់គ្នា​ទៅវិញ​ទៅ​មក​ប៉ុណ្ណោះ”៕

ប្រែ​សម្រួល​ដោយស៊ាស៊ុយ​ឈាង​

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស