កាលពីម្សិលមិញលោកទៀ បាញ់រដ្ឋមន្ត្រីក្រសួងការពារជាតិ បានមានប្រសាសន៍ថា លោកមានផែនការប្រើថវិកាមួយចំនួនធំក្នុងចំណោមទឹកប្រាក់ចំនួន៤៥.១២លានដុល្លារ ដែលត្រូវបានស្នើសម្រាប់ក្រសួងរបស់លោកក្នុងច្បាប់ថវិកាឆ្នាំ២០១៣ ដើម្បីពង្រឹងសមត្ថភាពយោធាតាមព្រំដែនថៃ។
យោងតាមសេចក្តីព្រាងទី១នៃច្បាប់ថវិកាជាតិឆ្នាំ២០១៣ ការចំណាយរបស់រដ្ឋាភិបាលលើវិស័យការពារជាតិ នឹងកើនឡើង១៥,៧៨បើធៀបនឹងការបែងចែកថវិកានៅឆ្នាំនេះ រីឯថវិកា១៥៥,០៤លានដុល្លារទៀត នឹងផ្តល់ឲ្យទៅក្រសួងមហាផ្ទៃសម្រាប់សន្តិសុខជាតិផ្ទៃក្នុង។
ថវិកាសរុបសម្រាប់ក្រសួងការពារជាតិនិងក្រសួងមហាផ្ទៃស្មើនឹង១៣,៣២ភាគរយនៃថវិកាចំណាយសរុបរបស់រដ្ឋាភិបាលនៅឆ្នាំក្រោយនេះ។
ទោះបីជាលោកឧត្តមសេនីយ៍ ទៀបាញ់ មិនបានបញ្ជាក់ច្បាស់ពីចំនួនថវិកាសម្រាប់ក្រសួងរបស់លោកដើម្បីពង្រឹងសមត្ថភាពយោធាកម្ពុជានៅតាមព្រំដែន ឬថវិកាប៉ុន្មាននឹងត្រូវចំណាយក៏ដោយ ក៏លោកបានមានប្រសាសន៍ថា មានផែនការពង្រីកមូលដ្នានយោធាដែលមានស្រាប់នៅតាមបណ្តោយព្រំដែនថៃ។
ដោយសំដៅដល់ភាពតានតឹងផ្នែកយោធាពីឆ្នាំ២០០៨ដល់ឆ្នាំ២០១១ ជាមួយប្រទេសថៃ និងការប្រយុទ្ធគ្នាដណ្តើមកាន់កាប់ប្រាសាទព្រះវិហារសាងសង់នៅសតវត្សរ៍ទី១១នេះ លោកឧត្តមសេនីយ៍ ទៀបាញ់ថ្លែងថា “ យើងបានឆ្លងកាត់បញ្ហាម្តងហើយ កាលពីប៉ុន្មានឆ្នាំមុន ពីព្រោះយើងគ្មានអាវុធគ្រប់គ្រាន់”។
លោក ទៀ បាញ់ បានមានប្រសាសន៍ថា “ យើងបានលើកសំណើមួយទៅរដ្ឋាភិបាល និងរដ្ឋសភាស្នើបង្កើនថវិកាសម្រាប់សន្តិសុខជាតិឆ្នាំក្រោយ ដើម្បីធានាសុវត្ថិភាពនៅតាមព្រំដែន”។ ទាហានកម្ពុជាយ៉ាងហោចណាស់ជាង២០នាក់ត្រូវបានរាយការណ៍ថា បានស្លាប់នៅក្នុងការប្រយុទ្ធដាច់ដោយឡែកពីគ្នាកាលពីឆ្នាំមុន ជាមួយកងកម្លាំងថៃនៅក្បែរប្រាសាទព្រះវិហារនិងក្នុងខេត្តឧត្តរមានជ័យ។
កាលពីថ្ងៃសុក្រ លោកឧត្តមសេនីយ៍ ទៀបាញ់ មានប្រសាសន៍ថា ថវិកាចំនួន២៤៥,១២លានដុលា្លារេនះតិចជាងចំនួនដែលក្រសួងបានស្នើពីទីស្តីការគណៈរដ្ឋមន្ត្រី។
យោងតាមសេចក្តីព្រាងច្បាប់ថវិកា ដែលត្រូវបានបង្ហាញនៅរដ្ឋសភាកាលពីថ្ងៃព្រហស្បតិ៍បានឲ្យដឹងថា ការចំណាយរបស់រដ្ឋាភិបាលលើវិស័យអប់រំ នឹងកើនដល់២៧៩,៨៩លានដុល្លារនៅឆ្នាំ២០១៣ គឺកើនឡើង១៤,២៤ភាគរយពីថវិកាជាតិឆ្នាំ២០១២។ ការចំណាយទៅលើវិស័យសុខាភិបាលនៅឆ្នាំក្រោយនឹងកើនឡើង១៦,៧៧ភាគរយ គឺកើនដល់២២៥,៣៧លានដុល្លារ។
លោក យឹមសុវណ្ណអ្នកនាំពាក្យគណបក្សសមរង្ស៊ី បានថ្លែងថាការបង្កើនថវិកាសម្រាប់សន្តិសុខនៅតាមព្រំដែនថៃ និងសន្តិសុខទូទៅគឺជាការចាំបាច់ ប៉ុន្តែមិនត្រូវឲ្យលើសពី១៣ភាគរយនៃថវិកាជាតិទេ។
លោកថ្លែងថា “ ខ្ញុំមិនយល់ថា ហេតុអ្វីបានជារដ្ឋាភិបាលបង្កើនថវិកាច្រើនបែបនេះសម្រាប់វិស័យការពារជាតិ ខណៈដែលប្រទេសរបស់យើងគ្មានសង្គ្រាម”។ លោកបន្ថែមថា គួរតែមានការចំណាយថែមទៀតទៅលើវិស័យសំខាន់ៗផ្សេងទៀត ដូចជាវិស័យអប់រំនិងសុខាភិបាលជាដើម។
លោកមានប្រសាសន៍ថា “ រដ្ឋាភិបាលគួរតែសហការឲ្យបានដិតដល់ថែមទៀតជាមួយអង្គការសហប្រជាជាតិនិងរកដំណោះស្រាយការទូតថែមទៀតជាមួយប្រទេសថៃ ជាជាងបង្កើនការចំណាយផ្នែកយោធាដើម្បីដោះស្រាយបញ្ហាព្រំដែន”៕
ប្រែសម្រួលដោយ ចេវប៊ុននី