លោកនាយករដ្ឋមន្ត្រី ហ៊ុន សែន បានបញ្ជាក់ក្នុង អំឡុងថ្លែងសុន្ទរកថាមួយនៅខេត្តសៀមរាប កាលពីម្សិលមិញថាមេដឹកនាំប្រទេសម្ចាស់ជំនួយធំបំផុតពីរសម្រាប់ប្រទេសកម្ពុជាគឺប្រទេស ចិននិងប្រទេសជប៉ុន នឹងមកចូលរួមក្នុងកិច្ចប្រជុំកំពូលអាស៊ាន និងអាស៊ីបូព៌ានៅរាជធានី ភ្នំពេញ។
វត្តមានរបស់ប្រធានាធិបតីអាមេរិកលោក បារ៉ាក់អូបាម៉ា(Barack Obama) នៅក្នុងកិច្ចប្រជុំកំពូលនេះមិនត្រូវបានលោក ហ៊ុនសែន លើកមកធ្វើអត្ថាធិប្បាយទេ ដែលលោកហ៊ុនសែនបានប្រកាសកាលពីសប្តាហ៍មុន ក្នុងលិខិតអបអរសាទរមួយផ្ញើជូន លោកអូបាម៉ា នៅពេលលោកបានជាប់ឆ្នោតជាថ្មីម្តងទៀតថា អ្នកទាំងពីរអាចជួបប្រជុំជាទ្វេភាគីនៅក្រៅកិច្ចប្រជុំកំពូលផងដែរ។
មន្ត្រីសេតវិមានបានបញ្ជាក់ថាលោកអូបាម៉ានឹងមកបំពេញទស្សនកិច្ចក្នុងប្រទេសកម្ពុជាចាប់ពីថ្ងៃទី១៧ខែវិច្ឆិកាដល់ថ្ងៃទី២០ខែវិច្ឆិកាប៉ុន្តែ មិនបានធ្វើសេចក្តីអត្ថាធិប្បាយអំពីការជួបប្រជុំរវាងមេដឹកនាំនៃប្រទេសទាំងពីរនោះទេ។
លោកហ៊ុនសែនបានមានប្រសាសន៍ក្នុងអំឡុងថ្លែងសុន្ទរកថា ក្នុងស្រុកបន្ទាយស្រីដែលជាចំណុចចុងក្រោយក្នុងកម្មវិធីចែកប័ណ្ណកម្មសិទ្ធិដីធ្លីរបស់លោកនៅទូទាំងប្រទេសថា“ លោកនាយករដ្ឋមន្ត្រីចិន វេនជាប៉ាវ(Wen Jiabao) នឹងមកបំពេញទស្សនកិច្ចជាផ្លូវការនៅថ្ងៃទី១៨ ខែវិច្ឆិកា ហើយនាយករដ្ឋមន្ត្រីជប៉ុនលោកយូសុីហីុកុណូដា (Yoshihiko Noda)នឹងមកចូលរួមក្នុងកិច្ចប្រជុំកំពូលអាស៊ាននៅថ្ងៃទី២០ខែវិច្ឆិកា”។
លោកនាយករដ្ឋមន្ត្រីបានលើកឡើងផងដែរថា កិច្ចប្រជុំកំពូលអាស៊ានអាចជាឱកាសមួយសម្រាប់ប្រទេសកម្ពុជាដើម្បីបង្ហាញនៅលើឆាកអន្តរជាតិ។ លោកបានមានប្រសាសន៍បន្តថា “ ការដឹកនាំកិច្ចប្រជុំកំពូលអាស៊ាន យើង [ប្រជាពលរដ្ឋកម្ពុជា] ត្រូវតែធ្វើយ៉ាងណាឲ្យមានមោទនភាពរបស់យើងនូវគ្រប់កិច្ចការទាំងអស់ដែលយើងត្រូវតែធ្វើក្នុងខណៈយើងជាប្រធានទទួលខុសត្រូវសម្រាប់គ្រប់សកម្មភាពអាស៊ានទាំងមូល”។
រដ្ឋមន្ត្រីការពារជាតិ លោកទៀបាញ់នឹងដឹកនាំកិច្ចប្រជុំថ្នាក់រដ្ឋមន្ត្រីការពារជាតិក្នុងខេត្តសៀមរាប ដែលចាប់ផ្តើមពីថ្ងៃព្រហស្បតិ៍រហូតដល់ថ្ងៃសៅរ៍ចំណែកលោក ហ៊ុនសែននឹងដឹកនាំកិច្ចប្រជុំនៅរាជធានីភ្នំពេញដោយទទួលថ្នាក់ដឹកនាំពិភពលោកនិងរដ្ឋមន្ត្រីកំពូលៗជាច្រើនរូបទៀត ក្នុងកិច្ចប្រជុំកំពូលអាស៊ាន និងអាស៊ីបូព៌ា ដែលនឹងចាប់ផ្តើមនៅសប្តាហ៍ក្រោយនេះ។
ប្រធានាធិបតី រុស្ស៊ីលោកវ៉្លាឌីមៀពូទីន(Vladimir Putin) និងលោកនាយករដ្ឋមន្ត្រីឥណ្ឌាលោកម៉ានមូហានស៊ីង(Manmohan Singh) បានប្រកាសអំពីការចូលរួមក្នុងកិច្ចប្រជុំជាបន្តបន្ទាប់ផងដែរ។ក្នុងអំឡុងពេលឈប់សំចតនៅខេត្តសៀមរាបលោកហ៊ុនសែនបានផ្តល់ប័ណ្ណកម្មសិទ្ធិដីធ្លីចំនួន១.១៧៨ជូនប្រជាពលរដ្ឋក្នុងតំបន់នោះ ហើយលោកនាយករដ្ឋមន្ត្រីបានលើកឡើងដោយកំប្លែងផងដែរថាលោកប្រហែលជាត្រូវត្រៀមសម្លៀកបំពាក់ទុកនៅទីស្តីការគណៈរដ្ឋមន្ត្រីដែលនៅទីនោះមានមន្ត្រីការទូតចូលរួមក្នុងកិច្ចប្រជុំកំពូលអាស៊ានដើម្បីអនុវត្តតាមកម្មវិធីដ៏មមាញឹករបស់លោក។
លោកបានថ្លែងបន្តទៀតថា “ បើសិនជាខ្ញុំមើលកម្មវិធី ដែលចាប់ផ្តើមនៅថ្ងៃទី១៨ខែវិច្ឆិកានោះគឺវារវល់ណាស់ ដូច្នេះខ្ញុំត្រូវតែរៀបចំសម្លៀកបំពាក់ថែមទៀតទុកនៅទីស្តីការគណៈរដ្ឋមន្ត្រី។ លោកនាយករដ្ឋមន្ត្រីក៏ចេះបែកញើសដែរ”៕
ប្រែសម្រួលដោយឃិនណៃ