យោងតាមសេចក្ដីរាយការណ៍របស់ប្រព័ន្ធផ្សព្វផ្សាយជប៉ុន បានឲ្យដឹងថា នគរបាលក្រុងតូក្យូ បានចាប់ខ្លួនជនជាតិជប៉ុន១០នាក់ កាលពីដើមខែនេះ ពីបទឆបោកវិនិយោគិនជាង១.០០០នាក់យកបានទឹកប្រាក់ចំនួន២០លានដុល្លារ តាមរយៈការប្រើប្រាស់គម្រោងវិនិយោគក្លែងក្លាយនៅក្នុងប្រទេសកម្ពុជា។
កាសែតក្យូដូ ញូស (Kyodo News) បានធ្វើសេចក្ដីរាយការណ៍ថាបុរសឈ្មោះស៊ូសាគុ ណាកាមុរ៉ាក់ (Shusaka Nakamura) អតីតប្រធានក្រុមហ៊ុន Japan Honesty Inception និងមនុស្សប្រាំបួននាក់ទៀតត្រូវបាននាយកដ្ឋាននគរបាលក្រុងតូក្យូ ចាប់ខ្លួន នៅឈីយូដាក់ (Chiyoda) កាលពីថ្ងៃទី៧ខែវិច្ឆិកា ដោយជាប់ចោទពីបទឆបោកវិនិយោគិនចំនួន១.១០០នាក់យកប្រាក់បាន១,៦ពាន់លានយ៉េនឬប្រហែល២០លានដុល្លារ។
យោងតាមទូរទស្សន៍រដ្ឋ NHK របស់ជប៉ុនបានឲ្យដឹងថា ក្រុមហ៊ុន Japan Honesty Inception បានផ្ដល់ភាគលាភយ៉ាងក្រាស់ក្រែលសម្រាប់វិនិយោគទុននៅក្នុងគម្រោងនានាដែលមានមូលដ្ឋាននៅក្នុងប្រទេសកម្ពុជា ដូចជាចម្ការកាហ្វេជាដើម។
ទូរទស្សន៍ NHK បានធ្វើសេចក្ដីរាយការណ៍ថានាយកដ្ឋាននគរបាលក្រុងតូក្យូមិនបានរកឃើញភ័ស្តុតាងណាមួយដែលបង្ហាញថា ចំនួនប្រាក់ទាំងនេះត្រូវបានយកទៅវិនិយោគនោះទេ។
មន្ត្រីនគរបាលក្រុងតូក្យូ មួយរូបដែលសុំមិនបញ្ចេញឈ្មោះ ដោយសារតែខ្លួនមិនត្រូវបានអនុញ្ញាតឲ្យនិយាយទៅកាន់ប្រព័ន្ធផ្សព្វផ្សាយនោះបាននិយាយតាមទូរស័ព្ទកាលពីម្សិលមិញថា ពេលនេះរឿងក្ដីកំពុងស្ថិតក្នុងដៃនគរបាលជាតិជប៉ុន។
មន្ត្រីរូបនេះបានលើកឡើងបន្ដទៀតថា “បញ្ហានេះត្រូវបានទីភ្នាក់ងារនគរបាលជាតិចេញផ្សាយរួចហើយ”។ យោងតាមគេហទំព័ររបស់ក្រសួងពាណិជ្ជកម្មបានឲ្យដឹងថាក្រុមហ៊ុន Japan HonestyInception បានរៀបចំសន្និសីទមួយស្ដីពីការវិនិយោគរបស់ជប៉ុន នៅកាស៊ីណូ ណាហ្គាវើល កាលពីខែមីនាឆ្នាំមុន៕
ប្រែសម្រួលដោយ តែម សុខុម