លោកចៅក្រមទទួលបន្ទុកស៊ើបអង្កេតក្នុងករណីឃាតកម្មសម្លាប់អ្នកកាសែតបានមានប្រសាសន៍ កាលពីម្សិលមិញថា សាលាដំបូងខេត្តរតនគិរីនឹងកោះហៅសាក្សីយ៉ាងហោចណាស់ប្រាំនាក់បន្ថែមទៀតរួមទាំងមន្ត្រីរដ្ឋាភិបាលផងដែរ ដែលពាក់ព័ន្ធក្នុងករណីសម្លាប់លោក ហង្ស សេរីឧត្តម អ្នកយកព័ត៌មានឲ្យកាសែតវីរជនខ្មែរ។
អ្នកយកព័ត៌មានឲ្យកាសែតវីរជនខ្មែររូបនេះ ដែលលោកបានសរសេរអត្ថបទចោទប្រកាន់មន្ត្រីក្នុងតំបន់នោះថា មានជាប់ពាក់ព័ន្ធក្នុងការរកសុីដឹកឈើខុសច្បាប់ ត្រូវបានគេប្រទះឃើញស្លាប់ដោយសារគេកាប់នឹងពូថៅ រួចញាត់ចូលក្នុងឃ្លុបរថយន្តរបស់លោក កាលពីថ្ងៃទី១១ ខែកញ្ញា។ អតីតអនុសេនីយ៍ឯកកងរាជអាវុធហត្ថឈ្មោះ អាន ប៊ុនហេងនិងប្រពន្ធរបស់លោកគឺអ្នកស្រី ស៊ីមវីត្រូវបានតុលាការចោទប្រកាន់ពីបទបានសម្លាប់អ្នកកាសែត វីរជនខ្មែរ ប្រចាំថ្ងៃ រូបនេះនៅសប្តាហ៍បន្ទាប់មក។
លោក ឡុច ឡៅ ចៅក្រមស៊ើបសួរបានមានប្រសាសន៍ថា “យើងនឹងកោះហៅមនុស្សប្រាំ ឬប្រាំមួយនាក់ទៀត មកសាកសួរក្នុងពេលឆាប់ៗនេះ។ជនសង្ស័យខ្លះក្នុងចំណោមជនសង្ស័យទាំងនោះពាក់ព័ន្ធនឹងការរកស៊ីដឹកឈើ និងខ្លះទៀតមានជាប់ពាក់ព័ន្ធជាមួយមន្ត្រីក្នុងមូលដ្ឋាន។បច្ចុប្បន្ននេះ យើងកំពុងខិតខំធ្វើរឿងនេះ ហើយយើងមិនអាចផ្តល់ព័ត៌មានលម្អិតថែមទៀតបានទេ”។
លោកមានប្រសាសន៍បន្តថា ក្នុងអំឡុងពេលសាកសួរ លោក ប៊ុនហេង និងប្រពន្ធរបស់លោកឈ្មោះវីដែលបានបដិសេធការចោទប្រកាន់នោះថា មានអ្នកផ្សេងទៀតជាប់ពាក់ព័ន្ធក្នុងអំពើឃាតកម្មនេះដែរ ប៉ុន្តែបានបដិសេធមិនប្រាប់ឈ្មោះពួកគេទេ។
មន្ត្រីកងរាជអាវុធហត្ថជាច្រើននាក់ និងបុគ្គលិកក្រុមហ៊ុនទ្រីភាពម្នាក់ដែលជាក្រុមហ៊ុនសម្បទានដ៏ចម្រូងចម្រាសនោះក៏ត្រូវបានតុលាការកោះហៅមកសាកសួរផងដែរនៅក្នុងករណីនេះ។
លោក ប៉ែន ប៊ុណា្ណរ៍ មន្ត្រីសម្របសម្រួលប្រចាំអង្គការសិទ្ធិមនុស្សរបស់អង្គការសិទ្ធិមនុស្សអាហុក ដែលបានតាមដានករណីនេះយ៉ាងយកចិត្តទុកដាក់នោះ បានមានប្រសាសន៍ថាការស៊ើបអង្កេតរបស់តុលាការគឺអូសបន្លាយពេលយូរពេក។
លោក ប៊ុណ្ណារ៍ មានប្រសាសន៍បន្តថា “ខ្ញុំចង់ឲ្យតុលាការជំរុញការងាររបស់ខ្លួនក្នុងការស៊ើបអង្កេតករណីនេះ ប៉ុន្តែវាអាស្រ័យលើឆន្ទៈរបស់លោកចៅក្រមទេ។វាត្រូវតែមានតម្លាភាពក្នុងការដោះស្រាយករណីនេះពីព្រោះយើងដឹងថា តុលាការកម្ពុជាអាចស្ថិតក្រោមឥទ្ធិពលមន្ត្រីមានអំណាច”។
អ្នកស្រីអុឹមចន្ធីភរិយារបស់លោកហង្សសេរីឧត្តម មានប្រសាសន៍ថា អ្នកស្រីសង្ឃឹមថា នឹងបានឃើញតុលាការចាត់វិធានការឲ្យបានលឿន និងដោះស្រាយដោយយុត្តិធម៌ចំពោះករណីឃាតកម្មនេះ។
អ្នកស្រីចន្ធីបានបន្តថា“ ខ្ញុំចង់ឲ្យតុលាការធ្វើការឲ្យបានល្អជាងនេះនៅក្នុងករណីនេះ។ ប្តីរបស់ខ្ញុំត្រូវបានគេសម្លាប់ជាយូរមកហើយ…។ខ្ញុំចង់ឲ្យតុលាការរកយុត្តិធម៌ឲ្យខ្ញុំឲ្យបានឆាប់”។
លោកទេព មុនីជាតិមេធាវីការពារឲ្យជនជាប់ចោទពីរនាក់ប្តីប្រពន្ធនេះ បានមានប្រសាសន៍ថាសាក្សីដែលពាក់ព័ន្ធជាមួយចុងចោទក្នុងសំណុំរឿងឃាតកម្មនេះបាននិយាយថា ពួកគេមិនបានឃើញចុងចោទនៅកន្លែងកើតហេតុនោះទេ ហើយភ័ស្តុតាង បានមកពីការធ្វើកោសល្យវិច័យ ក៏មិនបានបង្ហាញថាមានពាក់ព័ន្ធជាមួយពួកគេក្នុងឃាតកម្មសម្លាប់អ្នកកាសែតរូបនេះដែរ។ លោកអះអាងថា“ខ្ញុំគិតថាតុលាការមិនមានភ័ស្តុតាងគ្រប់គ្រាន់ដើម្បីចោទប្រកាន់កូនក្តីរបស់ខ្ញុំទេ”៕
ប្រែសម្រួលដោយឃិនណៃ