អ្នកចូលរួមក្នុងសិក្ខាសាលាមួយបានលើកឡើងកាលពីម្សិលមិញថារដ្ឋាភិបាល អង្គការអភិវឌ្ឍន៍ និងអង្គការក្រៅរដ្ឋាភិបាលដែលជាប់ពាក់ព័ន្ធនានា ត្រូវតែធ្វើការរួមគ្នា ដើម្បីការពារសិទ្ធិពលករចំណាកស្រុក។
ថ្លែងក្នុងវេទិការបស់សភាជាតិ ធ្វើឡើងក្នុងរាជធានីភ្នំពេញកាលពីម្សិលមិញស្ដីអំពីការពង្រឹង និងការការពារសិទ្ធិរបស់ពលករចំណាកស្រុកលោកហេងសំរិនប្រធានរដ្ឋសភាជាតិថ្លែងថារដ្ឋាភិបាលត្រូវតែប្ដេជ្ញាធ្វើឲ្យប្រាកដថា សិទ្ធិរបស់ពលករចំណាកស្រុកមិនត្រូវបានគេកេងប្រវ័ញ្ចឡើយ។
លោកហេងសំរិនបានមានប្រសាសន៍ថា “ រដ្ឋសភាមានតួនាទីយ៉ាងសំខាន់ក្នុងការការពារ និងគាំទ្រពលករចំណាកស្រុក សិទ្ធិទទួលបានការធ្វើចំណាកស្រុកទៅធ្វើការងារដោយស្របច្បាប់ សិទ្ធិធានាបាននូវសុខុមាលភាពរបស់ពលករចំណាកស្រុក និងត្រូវធ្វើឲ្យប្រាកដថា ច្បាប់ស្តីពីការគ្រប់គ្រងកម្លាំងពលកម្មត្រូវបានប្រទេសដទៃទៀតនៅក្នុងតំបន់គោរព”។
លោកដូហ្គ្លាស់ប្រូដឺរីក (Douglas Broderick)ប្រធានផ្នែកសម្របសម្រួលរបស់អង្គការសហប្រជាជាតិប្រចាំកម្ពុជា មានប្រសាសន៍ថា “ គ្មានស្ថាប័នណាមួយអាចធ្វើការងារនេះជោគជ័យតែម្នាក់ឯងនោះទេ។ យើងត្រូវធ្វើការរួមគ្នានៅក្នុងទិសដៅមួយដែលមានការព្រមព្រៀងគ្នា”។
អំពើរំលោភសិទ្ធិពលករចំណាកស្រុកបានក្លាយទៅជាចំណាប់អារម្មណ៍របស់សាធារណជន កាលពីឆ្នាំមុន នៅពេលមានសេចក្ដីរាយការណ៍ជាច្រើនបានលើកឡើងអំពីពលករកម្ពុជា ដែលធ្វើជាស្ត្រីបម្រើតាមផ្ទះប្រឈមនឹងការបំពានលើរូបរាងកាយ និងអំពើរំលោភផ្លូវភេទនៅក្នុងប្រទេសម៉ាឡេស៊ី។ បន្ទាប់មក រដ្ឋាភិបាលបានសម្រេចផ្អាកជាបណ្ដោះអាសន្ននូវការបញ្ជូនស្ត្រី
បម្រើតាមផ្ទះទៅកាន់ប្រទេសម៉ាឡេស៊ី កាលពីខែតុលាឆ្នាំមុន ហើយរដ្ឋាភិបាលបានព្រាងកិច្ចព្រមព្រៀងមួយទៀត ដើម្បីការពារពលករទាំងនោះ។
លោកស្រីជេនណាហូលីដេ (Jenna Holliday) អ្នកពិគ្រោះយោបល់របស់អង្គការសហប្រជាជាតិសម្រាប់ស្ត្រីអន្ដរជាតិ ដែលកំពុងជួយព្រាងអនុស្សរណៈ នៃការយោគយល់គ្នា មានប្រសាសន៍ក្នុងសិក្ខាសាលាថារដ្ឋាភិបាលមានការរីកចម្រើនប្រកបដោយវិជ្ជមាន។ លោកស្រីក៏បានសង្កត់ធ្ងន់ផងដែរ អំពីសារៈសំខាន់នៃការអនុវត្តឲ្យបានរឹងមាំនូវច្បាប់ និងគោលការណ៍នានាពាក់ព័ន្ធនឹងពលករចំណាកស្រុក។
លោកស្រីហូលីដេ មានប្រសាសន៍ថា “ មានចំណុចជាច្រើន បានកើតឡើង ចំពោះការកែលម្អច្បាប់ និងគោលការណ៍នានា ប៉ុន្ដែ ពេលនេះ គឺជាពេលដែលត្រូវចាប់ផ្ដើមអនុវត្តច្បាប់នេះហើយ និងត្រូវចាប់ផ្ដើមការបណ្ដុះបណ្ដាលដល់អាជ្ញាធរថ្នាក់ក្រោមជាតិអំពីច្បាប់ថ្មី និងដើម្បីចាប់ផ្ដើមផ្សព្វផ្សាយការណែនាំអំពីការធ្វើចំណាកស្រុកប្រកបដោយសុវត្ថិភាព”។
លោកជំទាវហូណូនសមាជិកសភាដែលគណៈកម្មាធិការរបស់លោកស្រី បានជួយព្រាងច្បាប់នេះ មានប្រសាសន៍ថា “ ចំពោះអនុស្សរណៈនៃការយោគយល់គ្នា [ជាមួយប្រទេសម៉ាឡេស៊ី] យើងកំពុងជំរុញឲ្យមានការអនុវត្តឲ្យបានប្រសើរឡើង និងពិនិតឲ្យបានល្អិតល្អន់។ យើងកំពុងធ្វើការប្រកបដោយការសហការគ្នាជាមួយនឹងទីភ្នាក់ងារនិងក្រុមហ៊ុនជ្រើសរើសពលករ…ដើម្បីរាយការណ៍មកឲ្យយើង និងដើម្បីអនុវត្តច្បាប់នេះ និងអនុស្សរណៈនៃការយោគយល់គ្នានេះ ឲ្យមានប្រសិទ្ធភាព”៕
ប្រែសម្រួលដោយហមសុផាណ្ណា