លោក ចាន់ សុវេ៉តអ្នកស៊ើបអង្កេតរបស់អង្គការសិទ្ធិមនុស្ស បានវិលត្រឡប់មកដល់ប្រទេសកម្ពុជាវិញហើយក្នុងរយៈពេលជាងពីរខែកន្លះ បន្ទាប់ពីបានចាកចេញពីប្រទេស ស្របពេលមានការប្រឈមនឹងការចោទប្រកាន់ពីបទឧក្រិដ្ឋមួយ ដែលគេគិតថាភ្ជាប់ទៅនឹងការបះបោរដែលបានកើតមានឡើងនៅក្នុងខេត្តក្រចេះ កាលពីខែឧសភា។
កាលពីថ្ងៃទី១៤ ខែសីហា សាលាដំបូងរាជធានីភ្នំេពេញ បានចោទប្រកាន់លោកសុវ៉េត អនុប្រធានផ្នែកអង្កេតរបស់អង្គការសិទ្ធិមនុស្សអាដហុក ពីបទផ្តល់ជំនួយដល់ជនល្មើសម្នាក់ និងត្រូវបានកោះហៅឲ្យចូលខ្លួនដើម្បីសាកសួរដោយគ្មានផ្តល់សេចក្តីលម្អិតអំពីការចោទប្រកាន់នោះឡើយ។ ក្រោយមក នៅថ្ងៃទី២៣ខែសីហា តុលាការបានយល់ព្រមលើកពេលការសាកសួរ លោកសុវ៉េត ដោយគ្មានកំណត់ពេលជាក់លាក់ដើម្បីឲ្យលោកបានចូលរួមវគ្គបំពាក់បំប៉នមួយនៅក្នុងទីក្រុងបាងកក។
លោកធន សារាយប្រធានអង្គការអាដហុកថ្លែងកាលពីម្សិលមិញថា“ គាត់បានសម្រេចត្រឡប់មកវិញ ពីព្រោះគាត់បានបញ្ចប់ការសិក្សារបស់គាត់ ហើយគាត់គឺជាបុគ្គលិកម្នាក់របស់អង្គការអាដហុក ហើយគាត់ត្រូវតែធ្វើការ”។ លោកបន្ថែមថា ការស្នាក់អាស្រ័យជាបណ្តោះអាសន្នរបស់លោក សុវ៉េត នៅក្រៅប្រទេសមិនមែនដើម្បីគេចពីការកោះហៅរបស់តុលាការទេ ហើយថា គាត់បានវិលត្រឡប់ពីក្រុងបាងកកកាលពីល្ងាចថ្ងៃច័ន្ទ។
លោក សារាយ បានមានប្រសាសន៍ថាអង្គការអាដហុកមិនទាន់បានទទួលព័ត៌មានផ្លូវការពីតុលាការ រៀបរាប់ពីការចោទប្រកាន់របស់ខ្លួនមកលើលោក សុវ៉េតទេ ហើយថា មេធាវីរបស់អង្គការក្រៅរដ្ឋាភិបាលមួយនេះ ត្រូវបានតុលាការបដិសេធមិនឲ្យមើលសំណុំរឿងនេះឡើយ។
អង្គការអាដហុកជឿថា ការចោទប្រកាន់នេះ មានជាប់ពាក់ព័ន្ធទៅនឹងរឿងក្តីរបស់លោក ម៉មសូណង់ដូ ម្ចាស់ស្ថានីយវិទ្យុសម្បុកឃ្មុំដែលកាលពីខែមុន ត្រូវបានសាលាដំបូងរាជធានីភ្នំពេញផ្តន្ទាទោសឲ្យជាប់ពន្ធនាគាររយៈពេល២០ឆ្នាំ ពីបទធ្វើការបះបោរ ដែលលោក សូណង់ដូ បានបដិសេធចំពោះការចោទនេះ ហើយអង្គការសិទ្ធិមនុស្សបានចាត់ទុករឿងនេះថាគ្រាន់តែជាលេសមួយដើម្បីបណ្តេញអ្នកភូមិចេញពីភូមិប្រមា ក្នុងខេត្តនេះកាលពីក្នុងខែឧសភា។
តែប៉ុន្មានថ្ងៃមុនធ្វើការចោទប្រកាន់ លោកនាយករដ្ឋមន្ត្រីហ៊ុនសែនបានចោទប្រកាន់បុគ្គលិកអង្គការក្រៅរដ្ឋាភិបាល ដែលមិនបញ្ចេញឈ្មោះម្នាក់ ថាបានជួយជនល្មើសម្នាក់ក្នុងចំណោមជនល្មើសជាច្រើន។
លោកឆែវីរៈចៅក្រមស៊ើបសួរ ដែលកាន់សំណុំរឿងរបស់លោកសុវ៉េតមិនអាចទាក់ទងបានទេ ហើយលោកឈុនសុវណ្ណ ក្រឡាបញ្ជីតុលាការ បានបដិសេធមិនធ្វើអត្ថាធិប្បាយឡើយ។
នៅក្នុងលិខិតចុះថ្ងៃទី៣១ ខែតុលាមួយច្បាប់ជូនលោកប្រធានាធិបតីអាមេរិកបារ៉ាក់អូបាម៉ា (Barack Obama) សមាជិកសភាអាមេរិករាប់សិបនាក់ បានលើករឿងក្តីរបស់លោក សុវ៉េត និងលោក សូណង់ដូ រួមជាមួយនឹងការបាញ់ស្លាប់ក្មេងស្រីអាយុ១៤ឆ្នាំម្នាក់ ដោយកងកម្លាំងសន្តិសុខអំឡុងការឆ្មក់ចូលភូមិប្រមា។
ក្រុមសមាជិកសភាទាំងនោះបានជំរុញឲ្យលោកប្រធានាធិបតី លើកឡើងជាសាធារណៈអំពីការរំលោភសិទ្ធិមនុស្សរបស់រដ្ឋាភិបាល នៅពេលលោកមកបំពេញទស្សនកិច្ចក្នុងប្រទេសកម្ពុជា ដើម្បីចូលរួមកិច្ចប្រជុំកំពូលអាស៊ាន និងអាស៊ីបូពា៌៕
(រាយការណ៍បន្ថែមដោយឃួន ណារីម)
ប្រែសម្រួលដោយ ចេវប៊ុននី