បុគ្គលិកធនាគារ សុីអាយអិមប៊ី (CIMB Bank Plc) បានឲ្យដឹងថា ក្នុងកិច្ចខិតខំប្រឹងប្រែងឆ្លើយតបទៅនឹងកំណើនដ៏ច្រើននៃចំនួនអតិថិជន ក្នុងវិស័យកសិកម្ម ធនាគារដែលមានមូលដ្ឋាននៅប្រទេសម៉ាឡេស៊ី កាលពីថ្ងៃសុក្រសប្តាហ៍មុន បានបើកសាខាថ្មីបួនកន្លែង ក្នុងរាជធានីភ្នំពេញ បាត់ដំបង និងខេត្តកំពង់ចាម។
លោក យូវ វ៉ានគុប (Yew Wan Kup) ប្រធានគ្រប់គ្រងទូទៅធនាគារ ស៊ីអាយអិមប៊ី បានមានប្រសាសន៍បន្តទៀតថា ធនាគារនេះបានបោះទុនប្រហែល២លានដុល្លារ ដើម្បីបើកសាខាពីរនៅខណ្ឌទួលគោក ក្នុងរាជធានីភ្នំពេញ មួយទៀតនៅខេត្តបាត់ដំបង និងមួយសាខាទៀតនៅខេត្តកំពង់ចាម។ លោកបានមានប្រសាសន៍ថា “ជាពិសេសនៅខេត្តបាត់ដំបង និងខេត្តកំពង់ចាម យើងមានចំណាប់អារម្មណ៍ទៅលើខេត្តទាំងពីរនេះ និងកំពុងខិតខំពង្រីកវិសាលភាពរបស់យើងជាមួយប្រជាជនក្នុងវិស័យកសិកម្ម”។
លោកបានថ្លែងបន្តថា ធនាគារ ស៊ីអាយអិមប៊ី ចង់ផ្តល់ប្រាក់កម្ចីដល់អតិថិជន ក្នុងអាជីវកម្មស្រូវ ជ័រកៅស៊ូ និងដំឡូងមី។ បន្ទាប់ពីពិធីសម្ភោធដាក់ឲ្យដំណើរការ កាលពីថ្ងៃសុក្រសប្តាហ៍មុន ធនាគារស៊ីអាយអិមប៊ី បានបន្ថែមសាខាថ្មីចំនួនបួនកន្លែងលើសាខាចំនួនប្រាំពីរកន្លែងដែលកំពុងតែដំណើរការស្រាប់នៅរាជធានីភ្នំពេញខេត្តសៀមរាប និងខេត្តព្រះសីហនុ។
លោក គុបបានថ្លែងថា ដោយមានអតិថិជនជាង៦.០០០នាក់ និងទំហំប្រាក់បញ្ញើជាង១០០លានដុល្លារ ធនាគារ ស៊ីអាយអិមប៊ី បានសម្លឹងឃើញថា មានឱកាសកាន់តែច្រើនសម្រាប់ពង្រីកទីផ្សារតាមបណ្តាខេត្ត។ លោកបានថ្លែងថា “ ខេត្តជាច្រើនមានសក្តានុពល ខ្លាំងក្លា ជាពិសេស ខេត្តដែលនៅជុំវិញរាជធានីភ្នំពេញ និងជាប់ព្រំដែនជាមួយថៃ និងវៀតណាម ដែលយើងអាចសម្រេចចិត្តបើកសាខាច្រើនទៀតពេលយើងមានពេលសមស្រប”៕
ប្រែសម្រួលដោយកងសុធា