មន្ត្រីសេដ្ឋកិច្ចមកពីបណ្តាប្រទេសជាសមាជិកនៃសមាគមប្រជាជាតិអាស៊ីអាគ្នេយ៍ហៅកាត់ថា អាស៊ាន កាលពីម្សិលមិញ បានចុះហត្ថលេខាលើកិច្ចព្រមព្រៀងបន្ធូរបន្ថយលក្ខខណ្ឌរឹតបន្តឹងលើចលនារំហូរ នៃកម្លាំងពលកម្មជំនាញ ដែលនេះជាផ្នែកមួយនៃដំណើរការត្រៀមខ្លួន សម្រាប់ធ្វើសមាហរណកម្មសហគមន៍សេដ្ឋកិច្ចអាស៊ាន ក្នុងឆ្នាំ២០១៥។
កិច្ចព្រមព្រៀងស្តីអំពីចលនានីតិបុគ្គលអាស៊ាន មានគោលបំណងសម្របសម្រួលដំណើរការវិនិយោគបរទេស និងបង្កើនលទ្ធភាពទទួលបានការងារធ្វើរបស់ប្រជាពលរដ្ឋគ្រប់រូប នៅបណ្តាប្រទេសជាសមាជិកសមាគមអាស៊ាន ដោយអំពាវនាវឲ្យរដ្ឋាភិបាលនៃប្រជាជាតិទាំងអស់ពង្រីកវិសាលភាព និងពង្រឹងគុណភាពដំណើរការនៃការធ្វើអន្តោប្រវេសន៍របស់ប្រជាពលរដ្ឋទាំងនេះ បន្ធូរបន្ថយលក្ខខណ្ឌរឹតបន្តឹងលើកម្លាំងពលកម្មបរទេស និងបង្កើនតម្លាភាពវិនិយោគិនទាំងឡាយ។
កិច្ចព្រមព្រៀងនេះ ក៏មានគោលបំណងបង្កលក្ខណៈកាន់តែងាយស្រួល សម្រាប់បុគ្គលិកថ្នាក់គ្រប់គ្រង និងថ្នាក់នាយកប្រតិបត្តិ ក្នុងការទទួលបានការងារធ្វើនៅក្នុងប្រទេសក្នុងតំបន់ និងសម្រាប់វិនិយោគិន ក្នុងការបើកការិយាល័យនៅក្រៅប្រទេសផងដែរ។ លោក ស៊ូរិន ពិតស៊ូវណ្ណ (Surin Pitsuwan) អគ្គលេខាធិការសមាគមអាស៊ាន បានមានប្រសាសន៍ឲ្យដឹងថា “ ចលនាសេរីនៃកម្លាំងពលកម្មក្នុងតំបន់ ពិតជាមានសារៈសំខាន់ ក្នុងការបង្កើនកិច្ចសហប្រតិបត្តិការសេដ្ឋកិច្ច រវាងបណ្តាប្រទេសដែលជាសមាជិករបស់សមាគមអាស៊ាន”។
លោកអគ្គលេខាធិការសមាគមអាស៊ានរូបនេះ បានមានប្រសាសន៍នៅក្នុងកិច្ចសម្ភាសមួយបន្ទាប់ពីពិធីចុះហត្ថលេខាបានបញ្ចប់ថា “ ប្រសិនបើអ្នកចង់បោះទុននៅក្នុងសេដ្ឋកិច្ច រវាងគ្នានឹងគ្នាបន្ថែមទៀត អ្នកត្រូវអនុញ្ញាតឲ្យមានចលនារំហូរមនុស្ស”។ យោងតាមលោក លីម ហុង ហ៊ីន អគ្គលេខាធិការរងសមាគមអាស៊ាន បានឲ្យដឹងថា កិច្ចព្រមព្រៀងនេះគឺជាវិសាលភាពបន្ថែមលើកិច្ចព្រមព្រៀងអាស៊ានមុនៗ ផ្តោតសំខាន់ទៅលើវិស័យសេវាកម្ម។
លោកអគ្គលេខាធិការរងរូបនេះ បានថ្លែងថា “ បច្ចុប្បន្ន យើងខិតខំប្រឹងប្រែងពង្រីកវិសាលភាពឲ្យគ្របដណ្តប់លើអ្វីគ្រប់យ៉ាងនៅក្រោមព្រះអាទិត្យ ដើម្បីដោះស្រាយបញ្ហារំហូរនៃចលនាប្រជាជនដែលធ្វើសកម្មភាពនៅក្នុងវិស័យពាណិជ្ជកម្ម ដោះដូរទំនិញ និងវិស័យវិនិយោគក្នុងសេដ្ឋកិច្ច”។
ក៏ប៉ុន្តែ លោកបានមានប្រសាសន៍ទៀតថា មិនមែនគ្រប់ប្រទេសនៅក្នុងតំបន់នេះ សុទ្ធតែស្ថិតនៅក្នុងដំណាក់កាលដូចៗគ្នាទេ នៅពេលប្រទេសនីមួយៗឈានទៅរកគុណភាពកម្លាំងពលកម្មរបស់ខ្លួន។ លោកថ្លែងថា “ទាក់ទងទៅនឹងធនធានផ្សេងៗ ប្រទេសនីមួយៗមានកង្វះខាតរៀងៗខ្លួន ពោលគឺខ្វះចំនួនប្រជាជនមានកម្រិតជំនាញច្បាស់លាស់”។
លោកចមប្រសិទ្ធ ទេសរដ្ឋមន្ត្រី រដ្ឋមន្ត្រីក្រសួងពាណិជ្ជកម្មនៃព្រះរាជាណាចក្រកម្ពុជា បានមានប្រសាសន៍នៅក្រៅពិធីចុះហត្ថលេខាកាលពីម្សិលមិញថាព្រះរាជាណាចក្រកម្ពុជា អាចនឹងទទួលបានផលប្រយោជន៍យ៉ាងច្រើនពីរំហូរកម្លាំងពលកម្មពោរពេញដោយចំណេះដឹង និងជំនាញ ដែលហូរមកពីក្រៅប្រទេស។ លោកទេសរដ្ឋមន្ត្រី រដ្ឋមន្ត្រីក្រសួងពាណិជ្ជកម្ម នៃព្រះរាជាណាចក្រកម្ពុជា មានប្រសាសន៍ថា “ តាមរយៈការបើកច្រកសេដ្ឋកិច្ចទាំងអស់របស់យើង សម្រាប់វិស័យសេវាកម្ម ដើម្បីឲ្យមនុស្សចូលមក ពួកគេអាចនឹងមានលទ្ធភាពធ្វើអាជីវកម្មបាន ក៏ប៉ុន្តែ ក្នុងពេលជាមួយគ្នានោះដែរ ពួកគេក៏នាំមកជាមួយនូវបច្ចេកវិទ្យាមកចែកជូនប្រជាជនកម្ពុជាផងដែរ”។
អ្នកស្រី សាន់ដ្រា ដាមីកូ (Sandara D’A-mico) នាយកគ្រប់គ្រងក្រុមហ៊ុនធនធានមនុស្ស អេជអអុីញ (HR Inc.) បានលើកឡើងថា រំហូរចូលនៃពលករបរទេសដែលមានជំនាញខ្ពស់មកកម្ពុជា ក៏នឹងបង្ហាញឲ្យឃើញថាប្រទេសនេះ ត្រូវការពង្រឹងគុណភាពនៃកម្លាំងពលកម្មរបស់ខ្លួនឯងផ្ទាល់ផងដែរ ក្នុងគោលបំណងពង្រឹងសមត្ថភាពប្រកួតប្រជែងនៅលើទីផ្សារក្នុងតំបន់”។ អ្នកស្រីបានថ្លែងថា “ ប្រទេសកម្ពុជានៅតែស្ថិតនៅលើផ្លូវដ៏វែងឆ្ងាយ ក្នុងការអភិវឌ្ឍកម្មវិធីបណ្តុះបណ្តាល និងជំនាញបច្ចេកទេស ដើម្បីឲ្យមានសមត្ថភាពប្រកួតប្រជែងនៅកម្រិតទីផ្សារតំបន់”៕
ប្រែសម្រួលដោយកងសុធា